Mok Tam ma Rwatte ki Niyeni

1. Pingo onongo lakwena Paulo cwinye yom pi kit ma ebedo ka kwo kwede?

LAKWENA PAULO onongo ngeyo ni ma pe orii kibineke woko, ento i kare ma en otamo i kom kit ma ebedo ka kwo kwede, cwinye obedo yom adada. En owaco ni: “Atyeko lwenyo lweny maber, atyeko cobo ngwecca, dok agwoko bene niye.” (2 Tem. 4:​6-8) Paulo onongo omoko tam maber me tic pi Jehovah, dok en obedo ki gen matek ni cwiny Jehovah yom i kome. Wan bene wamito moko tam mabeco wek wayom cwiny Jehovah. Watwero timo man nining?

2. Gin ango ma onongo Paulo tye ka lok iye i 2 Jo Korint 5:7?

² Paulo oloko kit man i kome kekene kacel ki Lukricitayo mukene ma lugen: “Kwowa cung i kom niye, pe i neno piny ma waneno.” (2 Kor. 5:7) Gin ango ma onongo Paulo tye ka lok iye? Jo ma pe gitye ki niye i kom Jehovah gimoko tamgi ma lubbe ki gin ma gineno dok giwinyo. Ento ngat ma tye ki niye kong tamo i kom gin ma Jehovah mito ma peya omoko tamme. Kit ma en timo kwede ki jami nyuto ni en tye ki gen ni ka elubo tira ma nonge i Baibul, ci ebibedo ki kwo maber i kare-ni dok Jehovah bimine mot i anyim bene.—Jab. 119:66; Ibru 11:6.

3. Adwogi mabeco ango ma wanongo ka wamoko tam ma jenge i kom niyewa? (2 Jo Korint 4:18)

³ Wan ducu i kare mogo wajenge i kom jami ma waneno nyo wawinyo me moko tam. Ento, ka wajenge i kom gin ma waneno nyo wawinyo keken ka watye ka moko tam ma pigi tego, ci wabimoko tam maraco. Pingo? Pien jami ma waneno nyo wawinyo twero bwolowa. Ka wamoko tam ma jenge i kom gin ma waneno nyo wawinyo keken, ci kadi ki ngo wabitimo gin ma Jehovah dagi. (Latit. 11:9; Mat. 24:​37-39) Ento ka wamoko tam ma jenge i kom niyewa, ci wabiyero “gin ma yomo cwiny Rwot.” (Ep. 5:10) Lubo tira pa Lubanga bimiyo wabedo ma cwinywa opye mot dok wabedo ki yomcwiny me ada. (Jab. 16:​8, 9; Ic. 48:​17, 18) Dok ka kwowa cung i kom niye, wabibedo ki gen me nongo kwo ma pe tum i anyim.—Kwan 2 Jo Korint 4:18.

4. Ngat moni twero ngeyo nining ni tamme jenge i kom niye nyo pe?

⁴ Bedo ber ka wan ducu wapennye kekenwa ki lapeny magi: Tam ma amoko jenge i kom ngo? Tika tamma jenge i kom jami ma aneno keken nyo jenge i kom tira pa Jehovah? Kong dong wanyamu kit ma watwero medde ki jenge i kom tira pa Jehovah: (1) Ka watye ka yero dog tic, (2) ka watye ka yero ngat ma omyero wanyomme kwede, (3) ki dong, ka wanongo tira ki bot dul pa Jehovah. Wabinyamo bene gin ma omyero watam iye wek wamok tam ma yomo cwiny Jehovah i kabedo adek magi.

KA WATYE KA YERO DOG TIC

5. Gin ango ma omyero watam iye ka watye ka yero dog tic me atiya?

⁵ Wan ducu wamito nongo jami ma mitte piwa ki pi jo me odiwa. (Latit. 7:12; 1 Tem. 5:8) Dog tic mogo culle ber adada. Tic ma kit meno weko latic nongo cente muromo me pito jo gange kun bene gwoko bute mukene pi anyim. Ento dog tic mukene culle nok, ma weko latic twero nongo jami ma mitte pi kwo keken. Ka watye ka yero dog tic ma omyero watim, ngene kene ni wabitamo i kom cente ma wabinongo ki iye. Ento, ka wel mucara keken aye obedo gin ma watamo pire, ci nongo pe watye ka moko tam ma jenge i kom niyewa.

6. Wanyuto nining ni wakwo ma lubbe ki niyewa ka watye ka yero dog tic? (Jo Ibru 13:5)

⁶ Ka wakwo ma lubbe ki niye, ci wabitamo bene i kom kit ma tic meno twero gudo kwede watwa ki Jehovah. Watwero pennye kekenwa ni: ‘Tic man tika opore pi Lakricitayo, nyo mono kwako timo jami ma Jehovah dagi?’ (Car. 6:​16-19) ‘Tika tic man biweko akeng cokke dok pe anongo cawa muromo me tito kwena ki kwan pira kena? Tika tic man bitera ka mabor ma weko pe abedo ki kare me bedo kacel ki jo me oda?’ (Pil. 1:10) Ka lagam pi lapeny mo keken ma malo-ni tye ni eyo, ci bibedo ber pe me ye tic meno kadi bed nongo tic tek adada i kabedoni. Pien wakwo ma lubbe ki niye, wamoko tam ma nyuto ni wageno Jehovah ni biminiwa jami ma mitte pi kwo.—Mat. 6:33; kwan Jo Ibru 13:5.

7-8. Omego mo ma nyinge James omoko tam ma lubbe ki niyene nining? (Nen bene cal.)

⁷ Omego mo ma bedo i Amerika ma Tung Kupiny ma nyinge James,a ngeyo kit ma pire tek kwede me moko tam ma lubbe ki niye. En owaco ni: “Onongo acoyo waraga me penyo wek kimed rwom me dog ticca dok culle onongo bidodo mucarana macon kun bene anongo yomcwiny madwong iye.” Ento, James bene onongo tye ki miti madwong adada me doko painia. En omedde ki lokke ni: “Ladit ma loyo wi kampuni olwonga me cito ka gamo lapeny me nongo tic. Ma peya adonyo i opic ka gamo lapeny, alego bot Jehovah pi kony pien amoko ni Jehovah ngeyo gin maber loyo pira. Onongo atye ki miti me bedo ki tic mapol kacel ki cente muromo, ento onongo pe abiye tic man ka bigenga ki cobo yubba me cwiny.”

⁸ James otito ni: “I kare ma atye ka gamo lapeny magi, ladit tic owacca ni kare ki kare, bimitte ni ati wa inge cawa me tic. Atitte ki mwolo ni pe atwero timo tic meno pien nongo bigenga woko ki woro Jehovah.” Labongo akalakala mo, James okwero tic man woko. Dok i nge cabit aryo, en ocako tic macalo painia. I kare mo, James onongo tic ma en timo pi nino mogo manok i cabit acel acel. En owaco ni: “Jehovah ogamo legana dok okonya me nongo tic ma oweko twere bota me tic macalo painia. Atye ki pwoc madwong ni anongo tic ma weko abedo ki cawa madwong me tic pi Jehovah kacel ki konyo utmege.”

9. Pwony ango ma inongo ki i gin mutimme i kom Omego Tom?

⁹ Gin ango ma omyero itim ka iniang ni tic ma itye ka timone i kare-ni tye ka weko bedo tek adada piri me tic pi Jehovah? Nen kong gin ma otimme i kom omego mo ma nyinge Tom ma bedo i lobo Congo. Tom otito ni: “Onongo amaro dog ticca adada. Onongo agamo mucara ma dodo mucarana macon tyen adek kulu, dok dano onongo giwora matek.” Kadi bed kit meno, Tom onongo pol kare keng cokke pien nongo tic omako wiye wa i nge cawa me tic. Dok i kare mogo, lutic luwote onongo giketo lyeto i kome me waco lok goba wek pe kinge bal ma kampuni otimo. Tom obedo ki mito me juko tiyo tic man woko ento obedo bene ki lworo ni pe ebinongo tic mukene. Gin ango ma okonye me moko tam ma lubbe ki niyene? En owaco ni: “Lok ma tye i Kabakuk 3:​17-19 okonya me niang ni kadi bed arwenyo ticca, Jehovah pud bigwoka. Pi meno, ajuko tic man woko.” Tom odolo te lokke ni: “Kampuni mapol gitamo ni ka dog tic moni culle bup, ci latic bijalo gin mo keken kadiwa jo me pacone nyo watte ki Lubanga wek etim tic meno. Atye ki yomcwiny madwong ni agwoko watta ki Jehovah kacel ki jo me pacona. I nge mwaka acel, Jehovah okonya me nongo tic mupore ma mucarane nok ento konya me nongo jami ma mitte me kwo kun weko abedo ki cawa madwong me tic pi Jehovah. Ka waketo tic pi Jehovah mukwongo, kwo pe oromo bedo yot pi kare mo, ento Jehovah bikonyowa me nongo jami ma mitte pi kwo.” Ki lok ada, ka wageno tira kacel ki cikke pa Jehovah, ci wabimedde ki moko tam ma nyutu ni watye ki niye dok wangeyo ni Jehovah bigoyo laane i komwa.

KA WATYE KA YERO NGAT MA OMYERO WANYOMME KWEDE

10. Jami mene ma pigi tek me tam iye ka watye ka yero ngat ma omyero wanyomme kwede, ento gin ango ma omyero wagwokke kwede?

¹⁰ Nyom obedo mic ma oa ki bot Jehovah, dok pe rac ka ngat moni tye ki miti me nyomme. Me labolle, tam i kom lapor man: Ka lamego mo tye ka tam me nongo omego mo me nyomme kwede, en twero tam i kom kit ma omego meno mwonya kwede. Kit ma omego meno timo kwede ki jami kacel ki kit ma jo mukene gineno kwede omego man. Laminwa-ni twero bene tam i kom kit ma omego-ni tiyo kwede ki cente, tic ma tye i wi omego-ni me gwoko wadine, ki dok ka omego-ni yomo cwinye.b Tam i kom jami magi ducu pigi tek. Ento, ka laminwa-ni olungo wiye ka tam i kom jami magi keken, ci nongo pe tye ka moko tam ma jenge i kom niyene.

11. Watwero moko tam ma lubbe ki niyewa nining ka watye ka yero ngat ma omyero wanyomme kwede? (1 Jo Korint 7:39)

¹¹ Jehovah tye ki awaka madit i kom omege ki lumege ma gilubo tirane ka gitye ka yero ngat ma omyero ginyomme kwede! Omege ki lumege magi giketo i tic tira me Baibul ma waco ni ngat moni myero “kong oteggi maber” ka dong ocak tamo pi nyomme. (1 Kor. 7:​36, NWT) Giketo tek me neno ni ngat ma gibinyomme kwede tye ki kit mogo ma Jehovah pwoyo. (Car. 31:​10-13, 26-28; Ep. 5:33; 1 Tem. 5:8) Ka ngat mo ma pe obedo Lacaden ma onongo batija onyuto miti i komgi, omegiwa nyo lumegiwa gilubo tira ma waco ni omyero inyomme i kin “jo pa Rwot keken.” (Kwan 1 Jo Korint 7:39.) Gitimo meno pien gingeyo ni kare ducu Jehovah biminigi teko me medde ki cung matek.—Jab. 55:22.

12. Pwony ango ma wanongo ki i gin mutimme i kom Rosa?

¹² Nen kong gin mutimme i kom laminwa mo ma nyinge Rosa, ma tiyo macalo painia i lobo Colombia. Laco mo ma pe tye Lacaden ma onongo Rosa pwonyo ki i Intanet ocako nyuto miti i kome. Rosa bene ocako maro laco-ni. Rosa owaco ni: “Laco-ni onongo nen calo ngat maber. En onongo jalle me konyo dano ma i kabedone, pe tye lamero, pe mato taa, dok pe tiyo ki yadi mogo calo jayi. En onongo tera maber adada. Laco man onongo tye ki kit mamwonya ducu ma onongo amito ki bot omego. Ento ariya ma obedo tye keken aye ni en onongo pe tye Lacaden.” Rosa omedde ni: “Obedo tek adada me kwero laco-ni pien man onongo obedo gin ma cwinya mito kikome. I kare mogo, pud awinyo ni atye kickic dok amito ni omego mo onyoma, ento peya anongo omego mupore.” Rosa pe oketo cwinye i kom jami ma nen ki woko keken. En otamo i kom kit ma winnye ki laco-ni bigudo kwede watte ki Jehovah. Pi meno, Rosa ojuko kit kubbe mo keken ki laco-ni, ci oketo cwinye i tic pi Jehovah. Ma pe orii, kilwongo Rosa me cito i Cukul pi Lutit Kwena me Ker-ri, dok i kare-ni en dong tiyo macalo painia keken. Rosa otito ki yomcwiny madit ni: “Jehovah ogoyo laane i koma dok omiyo atye ki yomcwiny madwong.” Ka watye ki miti madwong i kom gin moni, ci pe oromo bedo yot me moko tam ma rwatte ki niyewa. Ento ka wamoko tam ma rwatte ki miti pa Jehovah, ci kare ducu wabinongo adwogi maber.

KA WANONGO TIRA KI BOT DUL PA JEHOVAH

13. I kare mogo watwero dok i tira ma dul pa Jehovah ominiwa nining?

¹³ Pol kare wanongo tira ki bot Lukiko Madit, jang gang kal, luneno me adwol, kacel ki luelda ma konyowa me medde ki tic pi Jehovah. Ento i kare mogo pe watwero niang pingo kiminiwa tira meno. Waromo bedo ki akalakala kace tira man twero konyowa. Watwero bene bedo ka keto cwinywa i kom goro pa omege ma guminiwa tira meno.

14. Gin ango ma bikonyowa me lubo tira ma dul pa Jehovah ominiwa? (Jo Ibru 13:17)

¹⁴ Watye ki niye matek ni Jehovah aye tye ka tiro dulle dok waye ni en ngeyo kwo ma watye ka kato ki iye. Pi meno, kare ducu nongo watye atera me bedo luwiny, dok watimo meno ki yomcwiny. (Kwan Jo Ibru 13:17.) Wangeyo bene ni ka wabedo luwiny, ci wakonyo kacokke me bedo ma onote. (Ep. 4:​2, 3) Wageno Jehovah matek dok wangeyo ni omege ma gitye ka doro wiwa gitye ki roc, ento ka wabedo luwiny botgi ci Jehovah bigoyo laane i kom wan ducu. (1 Cam. 15:22) Dok wangeyo ni ka gin mo tye ma mito ayuba, ci Jehovah biyubone i kare ma en neno ni opore.—Mika 7:7.

15-16. Gin ango ma okonyo omego Kevin me timo alokaloka kadi bed en onongo tye ki akalakala i kare ma onongo tira? (Nen bene cal.)

¹⁵ Nen kong gin mutimme ma nyuto ber pa bedo ki niye kacel ki lubo tira ma dulwa miyo. Kadi bed pol pa dano ma gibedo i lobo Peru giloko leb Spanish, lutedero mapol bene giloko leb pengi. Leb acel pa lutedero magi, kilwongo ni Quechua. Pi mwaki mapol, utmege ma giloko leb Quechua gubedo ka cwalo cawa malac ka yenyo dano ma giloko leb man i wang ticgi. Ento dulwa otimo alokaloka i kom kit me tito kwena i wang tic man wek orwatte ki cik manyen pa gamente. (Rom. 13:1) Macalo adwogine, utmege mogo gubedo ki akalakala ka ce alokaloka man binyako nyige. Kadi bed kit meno, i kare ma utmege gulubo tira man, Jehovah ogoyo laane i kom tutegi me tito kwena bot jo ma giloko leb Quechua.

¹⁶ Laelda mo ma nyinge Kevin, ma tye i kacokke me leb Quechua, obedo ki akalakala ka ce tira meno binyako nyinge. En otito ni: “Apennye kekena ni, ‘Bitwere nining me nongo jo ma giloko leb Quechua i wang ticwa?’” Gin ango ma okonyo Omego Kevin? En owaco ni: “Alwodo lok ma nonge i Carolok 3:5. Dok atamo bene i kom lanen pa Moses. Jehovah omine tira ma onongo twero nen calo pe tye me ryeko. Jehovah owaco ki Moses ni otel wi lwak me Icrael ki i Ejipt otergi i Nam ma Kwar. Man oweko onen calo dong pe gibitwero bwot ki i cing Lumony me Ejipt ma gitye ka ryemogi. Kadi bed kit meno, Moses olubo tira pa Jehovah, dok Jehovah ogoyo laane ki timo tango me aura me laro jone.” (Nia 14:​1, 2, 9-11, 21, 22) Omego Kevin oye me jolo alokaloka ma kitimo ma lubbe ki yo me tito kwena i wang ticgi. Adwogine obedo nining? En otito ni: “Abedo ki ur madit me neno kit ma Jehovah ogoyo kwede laane i kom ticwa. Con onongo wawoto pi cawa malac i tic me pwony ka watye ka yenyo jo ma giloko leb Quechua i wang ticwa. I kare-ni dong wacito atir i wang tic ma jo mapol giloko iye leb Quechua. Man oweko i kare-ni watye ki cawa madwong me lok ki dano, dok cen ka lim, kacel ki kwano Baibul ki dano. Wel dano ma gibino i cokkewa bene omedde.” Ka walubo tira pa dulwa, ci kare ducu Jehovah bigoyo laane i komwa.

17. Pwony man okonyowa me niang gin ango?

¹⁷ I pwony man, watyeko nyamo kabedo adek ma pigi tego, dok waneno kit me moko tam ma lubbe ki niyewa i kabedo adek magi. Pwony man bene okonyowa me niang ni omyero wamedde ki moko tam ma lubbe ki niyewa i kabedo ducu i kwowa. Me labolle, ka watye ka yero jami me galowang nyo yweyo wiwa, rwom me kwan ma wabiyero, kacel ki kit ma wabipwonyo kwede lutinowa. Dong, tam mo keken ma wabimoko, omyero wamok ma lubbe ki watwa ki Jehovah, tira ma en miniwa, cikkene me gwokowa, ento pe ma lubbe ki jami ma waneno ki wangwa keken. Ka walubo tira pa Jehovah ci “wabiwot i nying Jehovah Lubangawa nakanaka.”—Mika 4:​5, NWT.