Cing Jehovah Pe Cek

1. I yo ma nining ma Moses onyuto kwede genne i kom Jehovah i kare ma otelo lwak me Icrael me a ki i Ejipt?

BUK pa Jo Ibru ryeyo nying jo mapol ma gubedo ki niye matek i kom Jehovah. Ngat acel i kingi obedo, Moses. (Ibru 3:​2-5; 11:​23-25) En onyuto niye matek ki telo wi lwak Luicrael me a woko ki i Ejipt. En pe oweko lworo Parao kacel ki monnye ogenge ki cobo tic ma Jehovah omine. Moses oketo genne ducu i kom Jehovah ci otelo lwak me Icrael me kato ki i Nam Makwar kacel ki dye tim aroo. (Ibru 11:​27-29) Pol pa Luicrael gujuko bedo ki gen ni Jehovah biminigi jami me kom ma mitte, ento Moses omedde ameda ki geno Jehovah. Dok gen pa Moses meno pe opoto nono, pien Jehovah omiyo cam kacel ki pii me konyo Luicrael i dye tim aroo.a—Nia 15:​22-25; Jab. 78:​23-25.

2. Pingo Lubanga openyo Moses ni: ‘Cing Jehovah aye dong odoko cek bo’? (Wel 11:​21-23)

² I acakkine, Moses onyuto niye matek i kom Jehovah. Ento i nge kare ma romo mwaka acel ma Jehovah olaro Luicrael ki i Ejipt, Moses bene ocako bedo ki akalakala ka ce Jehovah bimiyo jami ma mitte pi Jone. Onongo tye co ma welgi romo 600,000 kacel ki mon ki lutino mapol, dok cam onongo nok adada. Jehovah onongo biminigi cam muromo nining? Me konyo Moses, Jehovah openye ni: “Cing Rwot [Jehovah] aye dong odoko cek bo?” (Kwan Wel 11:​21-23.) Nyig lok man ni “cing Rwot” niange ni cwiny maleng pa Lubanga, nyo tekone me timo gin moni. I yo macek, Jehovah onongo tye ka penyo Moses ni, ‘Tika itamo ni ape ki teko me timo gin ma acikke me timone?’

3. Gin ango ma wabinyamo i pwony man?

³ Wan ducu i kare mogo wabedo ki par ka ce Jehovah bimiyo jami ma mitte piwa kacel ki pi lupacowa. Kadi bed i kare-ni watye ki par nyo pe, nyamo gin mutimme i kom Moses kacel ki Luicrael ma pe gugeno teko pa Jehovah me minigi jami ma mitte bikonyo wan ducu. Wabinyamo bene wang ginacoya mogo ma bijingo genwa ni Jehovah kare ducu bikonyowa.

PWONY MA WANONGO KI BOT MOSES KI LUICRAEL

4. Pingo lwak ducu gucako bedo ki akalakala ka ce Jehovah biminigi jami ma mitte?

⁴ Pingo Luicrael mapol gucako bedo ki akalakala ka ce Jehovah biminigi jami ma mitte? Rok me Icrael kacel ki “lwak kwa rok murubbe” ma pe gubedo Luicrael onongo dong guwoto i dye tim aroo pi kare mo olo. (Nia 12:38; Nwo. 8:15) Lwak rok murubbe magi kacel ki Luicrael mogo gucako kok i kom Moses pien guol woko ki camo manna. (Wel 11:​4-6) Timgi man omiyo cwiny lwak ducu ocako pukke pi cam ma onongo gungi camo i lobo Ejipt. Pien lwak gubedo ka koko matek i kom Moses, omiyo en ocako bedo ki par ni omyero eminigi ringo. Ento en onongo binongo ringo ki kwene?—Wel 11:​13, 14.

5-6. Tam pa lwak murubbe ogudo Luicrael nining, dok man pwonyowa gin ango?

⁵ Lwak ma pe gubedo Luicrael pe gubedo ki pwoc pi jami ma Jehovah onongo tye ka timo pigi, mumiyo Luicrael bene gucako tam calo gin. Gin ma kit meno bene twero timme i komwa. Ka dano ma gurumo ka ngetwa pe ginyuto cwiny me pwoc, wan bene watwero rwenyo pwocwa woko pi jami ma Jehovah ominiwa. Watwero cako paro pi jamiwa macon ma wabedo kwede nyo bene nyeko twero cako makowa i kom jo mukene pi jamigi. Ento, wabibedo ki yomcwiny makato ka wayeng ki jami ma watye kwede.

⁶ Onongo bibedo ber ka Luicrael gubedo ka tam i kom jami ma Jehovah ociko me timo pigi. Jehovah onongo ocikke me minigi mot mapol makato ma cwinygi mito, pe ki i dye tim aroo ento ka gudonyo i Lobo ma Kiciko Pire. Wan bene watwero medde ki bedo ki yomcwiny makato ka ce pe wabedo ka paro pi jami ma wape kwede i kare-ni. Tamo pi jami ma Jehovah ociko pire i Paradic konyowa bene me bedo ki yomcwiny i kwowa. Medo i kom meno, omyero wakwan dok walwod wang ginacoya ma twero konyowa dongo niye matek i kom Jehovah.

7. Pingo watwero bedo ki gen ni Jehovah kare ducu twero konyowa?

⁷ Watwero bedo ki lapeny ni; pingo Lubanga openyo Moses ni, ‘Cing Jehovah aye dong odoko cek bo?’ I kare ma Jehovah openyo Moses ki lapeny meno, twero bedo ni En onongo mito ni Moses otam i kom jami aryo magi: me (1) teko pa Jehovah agikkine pe, me (2) teko pa Jehovah twero o ka mo keken. Pi meno, kadi bed Luicrael onongo gitye wa i dye tim aroo, Jehovah onongo pud twero minigi ringo madwong. Lubanga onyuto tekone kun tiyo ki ‘twero me bade ki cinge ma oryeyo.’ (Jab. 136:​11, 12) Dong, ka watye ka kato ki i kwo matek, pe omyero wabed ki akalakala ni cing Jehovah cek ma pe twero o ka konyowa.—Jab. 138:​6, 7.

8. Gin ango ma twero konyowa pe me timo bal acel ma Luicrael gutimo i dye tim aroo? (Nen bene cal.)

⁸ Jehovah otimo gin ma en onongo ocikke me timone, ci ocwalo winyo aluru madwong me acama bot jone. Kadi bed kit meno, Luicrael pe gupwoyo Lubanga pi tango man. Me ka meno, gin gudongo cwiny me woro. Pi nino acel ki nucu kulu, gin gubedo ka mako winyo aluru madwong kit ma onongo gitwero kwede. Kiniga omako Jehovah i kom “jo ma keegi dwong,” mumiyo en ojwerogi woko. (Wel 11:​31-34) Pwony ango ma watwero nongo ki i gin mutimme man? Wapwonyo ni omyero wagwokke adada ki dongo cwiny me bedo ki jami madwong mukato kare woko. Kadi bed wan lulonyo nyo lucan, gin ma pire tek loyo botwa omyero obed me kano ‘lonyowa i polo’ ki dongo wat macok ki Jehovah kacel ki Yecu. (Mat. 6:​19, 20; Luka 16:9) Timo meno, bikonyowa me dongo genwa ni Jehovah biminiwa jami ma mitte pi kwowa me nino ducu.

9. Gen ango ma watwero bedo kwede i kom Jehovah ka watye ka kato ki i peko?

⁹ Jehovah bene tye atera me konyo jone i kare-ni. Tika meno tyen lokke ni pe wabikato ki i peko me can cente nyo ginacama?b Pe tye kit meno. Jehovah pe biwekowa liyak labongo kony mo, ento kare ducu en biminiwa teko me kato ki i pekkiwa. Me labolle, tam kong i kom peko me: (1) can cente ki (2) par ni, wabinongo jami ma mitte ki kwene ka wawoto ki tii woko. Ka watye ka kato ki i pekki magi, watwero nyuto nining ni wageno Jehovah ni biminiwa jami ma mitte pi kwo me nino ducu.

KA WATYE KA KATO KI I PEKO ME CAN LIM

10. Jami ango ma twero weko wakato ki i peko me can lim?

¹⁰ Ka agikki me lobo man woto ki nyiko cok, pekki mapol bene binya macalo adwogi me alokaloka me gamente, lweny, can ma poto atura, kacel ki two gemo. Watwero rwenyo ticwa nyo jami me kom ma watye kwede atura. Dok twero mitte ni wadak jo me pacowa i kabedo manyen ma meno romo weko bedo tek me nongo jami me kom ma mitte pi lupacowa. Ka watye ka kato ki i pekki magi, gin ango ma twero konyowa me moko tam ma nyuto ni wageno Jehovah?

11. Jami ango ma gitwero konyi me lweny ki peko me can lim? (Luka 12:​29-31)

¹¹ Yo acel ma pire tek ma wanyuto kwede ni wageno Jehovah aye ki lega bote ka watye ki par. (Car. 16:3) Leg Jehovah pi ryeko me moko tam maber dok ilege wek okonyi ibed ki wic ma opye mot. Gwokke bene ki bedo ka “tamo lok mapol” madok i kom pekkini. (Kwan Luka 12:​29-31.) Medde ki lega bot Jehovah wek okonyi ibed ma iyeng ki jami ma itwero nongone ma mitte pi kwo. (1 Tem. 6:​7, 8) Tim kwed kun itiyo ki bukkewa ma giloko i kom kit me lweny ki peko me can cente. Utmege mapol bene gunongo adwogi maber ki i neno vidio kacel ki kwano pwony mapatpat ma nonge i jw.org ma loko i kom peko me can lim.

12. Lapeny ango ma Lakricitayo twero pennye kwede me konye moko tam maber pi lupacone?

¹² Utmege mogo gupoto i atematema me dak i kabedo mabor ka tic kun nongo guweko lupacogi woko i kabedo mukene. Ento lacen guniang ni gimoko tam marac. Ma peya iye dog tic moni, pe itam i kom wel mucara ma ibinongo keken, ento tam bene i kom kit ma tic meno bigudo kwede watti ki Jehovah. (Luka 14:28) Pennye kekeni ni: ‘Tic man bigudo wat i kin an ki luota nining? Tika bimina cawa muromo me cito i cokke, tic me pwony, ki bedo kacel ki omege ki lumege?’ Ka itye ki lutino, bibedo ber ka ipennye ki lapeny ma pire tek man: ‘Ka koma pe i ka nget lutinona, ci bitwere nining me pwonyogi ki “kit mabeco ma Rwot [Jehovah] pwoyo”?’ (Ep. 6:4) Ka itye ka moko tam, tute me lubo tam pa Jehovah ento pe gin ma wadini nyo luremi ma pe giworo Jehovah giwacci.c Omego Tony ma bedo i Asia onongo tic mapol ma culgi bup i lobo mukene. Ento i nge lega matek kacel ki nyamo lok ki dakone, en okwero jolo tic magi woko. Dok gumoko tamgi me dwoko rwom me kwogi piny. I kare-ni, Tony owaco ni: “Macalo adwogine, abedo ki mot me konyo jo mapol me doko Lucaden, dok lutinowa 11 ducu gimaro tic pi Jehovah matek. An kacel ki jo me pacona wapwonyo ni ka waketo i tic tira ma nonge i Matayo 6:​33, ci Jehovah kare ducu biminiwa jami ma mitte pi kwo.”

KA WATYE KI PAR ME NONGO CENTE KA WAWOTO KI TII

13. Gin ango ma watwero timone kombeddi ma bikonyowa ka wawoto ki tii?

¹³ Watwero bene nyuto ni wageno Jehovah ka watye ka goyo pulan pi kare me kwowa ma nongo dong watii woko. Baibul cuko cwinywa me tic matek wek wagwok cente mo olo ma romo konyowa i kare me anyim. (Car. 6:​6-11) Ka twere boti, ci tim ber igwok cente mo ma bikonyi ka dong itii woko. Baibul waco ni cente miyo gwok mo olo. (Latit. 7:12) Ento pe omyero wawek tiyo cente aye obed gin ma pire tek loyo i kwowa.

14. Lok ma tye i Jo Ibru 13:5 twero konyowa nining pe me bedo ki par mapol ka odok i lok kom cente?

¹⁴ Yecu obolo carolok ma nyuto ni ngat ma kano lim madwong ento pe “tye ki lonyo bot Lubanga” nongo obedo ngat maming. (Luka 12:​16-21) Ki lok ada, pe tye ngat mo ma ngeyo gin ma romo timme diki. (Car. 23:​4, 5; Yak. 4:​13-15) Medo i kom meno, Yecu owaco ni jo ma gimito lubo kore omyero gubed atera me ‘jalo jami’ me kom ma gitye kwede. (Luka 14:33) Man aye gin mutimme i kom Lukricitayo me cencwari me acel ma onongo gibedo i Judaya, dok gutimo man ki yomcwiny. (Ibru 10:34) I kare-ni, utmege mapol bene gurwenyo jamigi me kom pien pe gicwako tung ka mo keken i tim me wibye. (Yabo 13:​16, 17) Ngo ma okonyogi me timo meno? Utmege magi guketo gengi ducu i kom cikke pa Jehovah ni: “Pe abiboli, pe abibwoti ata.” (Kwan Jo Ibru 13:5.) Pi meno, omyero itute matek me gwoko cente mo ma twero konyi ka iwoto ki tii. Medo i kom meno, bed ki gen matek ni Jehovah bikonyi ka gin mo marac otimme i komi atura.

15. Neno ma atir ango ma Lukricitayo omyero gubed kwede i kom lutinogi? (Nen bene cal.)

¹⁵ I tekwaro mogo, lunyodo ginywalo lutino tutwalle ki tyen lok ni ka gudongo ci gibitiyo cente madwong ma romo gwokogi ka giwoto ki tii. I yo macek, lunyodo magi nongo gineno lutinogi calo cente “pencon.” Ento Baibul tittiwa ni lunyodo aye tye ki tic me miyo jami ma mitte pi lutinogi. (2 Kor. 12:14) Ngene kene ni ka lunyodo giwoto ki tii, gibimito kony me cente kacel ki jami mogo ki bot lutinogi dok lutinogi gitimo man ki yomcwiny. (1 Tem. 5:4) Ento lunyodo ma gigeno Jehovah giniang ni gibibedo ki yomcwiny madwong makato ka gikonyo lutinogi me tic pi Jehovah makato ka lutinogi gudongo ki miti me tiyo cente madwong me gwokogi.—3 Jon 4.

16. I yo ango ma lunyodo gitwero konyo kwede lutinogi me cung pigi kengi? (Jo Epeco 4:28)

¹⁶ Lunyodo, cakke ma pud lutinowu gitino, wupwonygi ber pa tic matek. Wunyut lanen maber bot lutinowu me geno Jehovah. Wuwek gukwan tic cing mo ma bikonyogi i anyim kun gigeno Jehovah. (Car. 29:21; kwan Jo Epeco 4:28.) Wutwero bene timo kwed me nongo cik mogo ma igi lac me Baibul ma wutwero tic kwede me konyo lutinowu me yero rwom me kwan mupore. Miti pa lunyodo omyero obed me konyo lutinogi kwano diro tic mo ma bikonyogi me cung pigi kengi kun gibedo ki cawa muromo me tito kwena nyo bene tic macalo painia.

17. Gin ango ma wangeyo?

¹⁷ Jo ma giketo gengi i kom Jehovah pe gibedo ki akalakala mo ka ce Jehovah twero minigi jami me kom ma mitte. Ka wawoto ki nyiko cok ki agikki me lobo man, genwa i kom Jehovah omyero omedde ameda ki dongo. Kadi bed gin ango otimme, omyero wabed ki gen matek ni Jehovah bitic ki tekone me miniwa jami me kom ma mitte. Labongo akalakala mo wangeyo ni cing Jehovah pe cek, dok en bikonyo wan ducu ki acel acel.