Pe Watye Kenwa

1-2. (a) Pingo watwero waco ni pe watye kenwa ka watye ka kato ki i peko? (b) Gin ango ma wabinyamo i pwony man?

KA WATYE ka kato ki i pekki mapol, watwero winyo calo warweny woko i dye bunga mo madit adada. Ento pe watye kenwa. Wonwa me polo ma lamar-ri neno pekki ma watye ka kato ki iye dok en ocikke me konyowa. Ki mar madit, Jehovah ocikke bot luticce ma lugen ni: “abikonyi.”—Ic. 41:10.

² Pwony man binyamo yo angwen magi ma Jehovah konyowa kwede: (1) En miniwa tira, (2) miniwa jami me kom ma mitte, (3) gwokowa, dok (4) kweyo cwinywa. Jehovah ocikke ni wiye pe biwil i komwa kadi bed watye ka kato ki i pekki mapol i kwowa. En pe biwekowa liyak. Pi meno, nongo pe watye kenwa.

JEHOVAH MINIWA TIRA

3-4. Jehovah telowa nining? (Jabuli 48:14)

³ Kwan Jabuli 48:14. Jehovah ngeyo ni wan pe waromo doro kwowa piwa kenwa dok en ngeyo ni wamito kony ma mege me telowa. I kare-ni, Jehovah telo luticce ma lugen nining? Yo acel ma en timo kwede meno, aye ki Baibul. (Jab. 119:105) Jehovah tiyo ki Baibul me konyowa moko tam mabeco kacel ki dongo kit mogo mamwonya ma konyowa i kare-ni ki i anyim.a Me labolle, en pwonyowa ni omyero pe wamak kiniga i cwinywa, wabed lugen i jami ducu, kacel ki maro jo mukene ki cwinywa ducu. (Jab. 37:8; Ibru 13:18; 1 Pet. 1:22) Timo jami magi konyowa me doko lunyodo mabeco, luot ma gimare, kacel ki lurem ma gigenne.

⁴ Medo i kom meno, Jehovah oketo i Baibul labol pa jo ma gukato ki i pekki macal ki megwa. (1 Kor. 10:13; Yak. 5:17) Ka wakwano gin mutimme i kwo pa jo magi dok waketo i tic pwony ma wanongo, wanongo adwogi mabeco aryo magi. Mukwongo, waniang ni pe wan keken aye watye ki pekki i kwowa. Jo mukene gukemme ki peko acel-li dok Jehovah okonyogi me kato ki iye. (1 Pet. 5:9) Me aryo, wapwonyo kit me kanyo peko kun wamedde ki bedo ki yomcwiny.—Rom. 15:4.

5. Angagi ma Jehovah tiyo kwede me tirowa i yo me kwo?

⁵ Jehovah bene tiyo ki omege ki lumege me telowa.b Me labolle, kare ki kare luneno me adwol gilimo kacokke me cuko cwinywa. Pwony ma gimiyo jingo niyewa dok konyowa me gwoko note ma tye i kinwa. (Tic 15:40–16:5) Luelda me kacokke bene gitiyo matek me konyo wan ducu ki acel acel me gwoko watwa ki Jehovah. (1 Pet. 5:​2, 3) Lunyodo gipwonyo lutinogi me maro Jehovah, moko tam ma atir, kacel ki timo jami me cwiny kare ki kare. (Car. 22:6) Mege ma guteggi bene gikonyo lumege matino ki nyutigi labol maber, minigi tam, kacel ki cuko cwinygi.—Tito 2:​3-5.

6. Gin ango ma omyero watim me nongo adwogi maber ki i tira pa Jehovah?

⁶ Jehovah ominiwa jami ducu ma wamito me moko tam ma atir. Ento gin ango ma omyero watim me nongo adwogi maber ki i tirane? Carolok 3:​5, 6 waco ni: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede.” Ka watimo meno, ‘en bitiro yo ma wawoto iye bedo atir.’ Man tyen lokke ni, en bikonyowa me wene ki i pekki mapol kun wabedo ki yomcwiny i kwowa. Tye me yomcwiny adada me ngeyo ni Jehovah ngeyo wan ducu ki acel acel dok mini tira me konyowa!—Jab. 32:8.

JEHOVAH MINIWA JAMI ME KOM MA MITTE

7. Jehovah konyowa nining me nongo jami me kom ma mitte? (Jo Pilipi 4:19)

⁷ Kwan Jo Pilipi 4:19. Medo i kom tirowa i yo me cwiny, Jehovah bene goyo laane i kom tutewa me nongo ginacama, ginaruka, kacel ki kabedo ma mitte. (Mat. 6:33; 2 Tec. 3:12) Pe rac me bedo ki par mo olo pi kit ma wabinongo kwede ki jami magi. Ento Jehovah pe mito ni wabed ki par mukato kare woko pi jami meno. (Nen jami me akwana me nwtsty-E pi Matayo 6:25.) Pingo? Pien Jehovah genne dok pe biweko luticce ma lugen i kare ma gimito kony. (Mat. 6:8; Ibru 13:5) Watwero geno Wonwa ki cwinywa ducu pi cikkene me miniwa jami ma mitte.

8. Gin ango ma Jehovah otimo pi Daudi?

⁸ Tam kong i kom kit ma Jehovah okonyo kwede Daudi. Pi mwaki mapol ma Daudi onongo tye ka ngwec me laro kwone ki i cing Kabaka Caulo, Jehovah omiyo ki Daudi kacel ki lumonye jami ma mitte pi kwo. Tamo i kom kit ma Jehovah okonyogi kwede omiyo Daudi ocoyo ni: “Yam abedo latin, ento man dong adit; pud peya aneno gibwoto dano ma kite atir, kadi ki litinone bene pe aneno ka gilego kwon alega.” (Jab. 37:25) Calo Daudi, in bene gwok ineno kit ma Jehovah omini nyo omiyo ki omege ki lumege jami ma mitte i kare me peko.

9. I kare-ni, Jehovah miyo jami me kom nining bot luticce ka can ma poto atura otime? (Nen bene cal.)

⁹ Jehovah bene miyo kony bot luticce ka can ma poto atura otimme. Me labolle, i kare ma kec opoto i Jerucalem, utmege ma i kabedo mukene gucwalo jami ma mitte me konyo Lukricitayo ma kunnu. (Tic 11:​27-30; Rom. 15:​25, 26) Lutic pa Jehovah i kare-ni bene gikonyo omege ki lumege ma gitye i peko. Ka can ma poto atura otimme, ki mar madit Jehovah tiyo ki jone me poko cam, pii, bongi, kacel ki kony me yot kom bot utmege ma i kabedo meno. Dipatmen ma doro tic me gedo i dulwa giroco odi pa utmege kacel ki Odiwa me Ker ma oballe. Dok lutic pa Jehovah gibedo atera me kweyo kacel ki cuko cwiny luwotgi ma odigi oballe nyo gurwenyo danogi me amara i to kun gitiyo ki Baibul.c

10-11. Gin mutimme i kom Bonny pwonyowa gin ango?

¹⁰ Jehovah bene nyuto yot cinge ki miyo kony bot jo ma peya gitye ka tic pire. I yo acel-lu, wan bene walubo lanen pa Jehovah ka wayenyo kare me timo jami mabeco bot jo ma pe gitiyo pi Jehovah. (Gal. 6:10) Ka watimo man, ci watwero bedo ki kare me konyogi pwonyo lok i kom Jehovah. Nen kong gin mutimme i kom lapwony mo ma nyinge Bonny,d ma bedo i lobo Ukraine. Kadi bed Bonny pe tye Lacaden pa Jehovah, en onongo tero lutino kwanne ma Lucaden maber dok onongo woro niyegi. I kare ma lweny ocakke, en oa woko ki i caro ma en bedo iye ci oringo i kabedo ma lweny pe tek iye. I kare ma en oo kunnu, utmege gukonye matek. Lacen, Bonny ocito i kwe me Nipo me to pa Yecu. Cwiny me mar ki kica ma utmege gunyuto oweko Bonny owaco ni: “Lucaden guparo pira dok gugwoka maber. Atye ki pwoc madit adada bot Lucaden pa Jehovah.”

¹¹ Wan ducu watwero lubo lanen me kica pa Wonwa me polo ki miyo kony bot jo ma tye i peko kadi bed gubedo luye luwotwa nyo pe. (Luka 6:​31, 36) Wabedo ki gen ni tutewa me minigi kony bitugo cwinygi me bedo ki miti me cako ngeyo Jehovah kacel ki tic pire. (1 Pet. 2:12) Ento, kadi bed guyero me tic pi Jehovah nyo pe, pud wamedde ki bedo ki yomcwiny pien ‘miyo mot kelo yomcwiny makato gamo agama.’—Tic 20:35.

JEHOVAH GWOKOWA

12. Jehovah ocikke me gwoko jone macalo gurup nining? (Jabuli 91:​1, 2, 14)

¹² Kwan Jabuli 91:​1, 2, 14. I kare-ni, Jehovah ocikke me gwoko luticce ki i kit gin mo keken ma twero balo watgi kwede. Jehovah pe biye ni Catan obal woro me ada. (Jon 17:15) Watye ki gen matek ni ka “can madit atika” ocakke, Jehovah bikonyowa me gwoko niyewa dok bilarowa ki i gin mo keken ma twero nekowa.—Yabo 7:​9, 14.

13. I yo ma nining ma Jehovah gwokowa ki acel acel?

¹³ Jehovah gwokowa ki acel acel nining? Jehovah ominiwa Baibul ma konyowa me ngeyo gin maber ki gin marac. (Ibru 5:14) Ka waketo i tic gin ma wapwonyo ki i Baibul, ci wagwoko watwa ki Jehovah dok wamoko tam maber ma konyowa me bedo ki yomcwiny dok ki yotkom. (Jab. 91:4) Medo i kom meno, Jehovah oketo kacokke ma miniwa kony me medde ki bedo lugen bote. (Ic. 32:​1, 2) Omege ki lumege ma i kacokke gimaro Jehovah dok gilubo cikke. Bedo kacel kwedgi i cokke, tic me pwony, kacel ki namo kwedgi cuko cwinywa dok konyowa me bedo ki tekcwiny me kwero gin marac.—Car. 13:20.

14. (a) Pingo Jehovah pe gengo peko ki poto i komwa? (b) Lok ma tye i Jabuli 9:10 cuko cwinywa nining? (Nen bene lok ma tye i tere piny.)

¹⁴ I kare macon, Jehovah ogwoko luticce ki jami ma onongo twero keto kwogi ka mading nyo nekogi. Ento, en pe otimo man i kom luticce ducu. Baibul pwonyowa ni pekki ma timme atura poto i kom ngat mo keken. (Latit. 9:11) Medo i kom meno, Jehovah oye ni luticce mogo gukat ki i aunauna kadi wa to, me moko ni Catan obedo lagoba. (Yubu 2:​4-6; Mat. 23:34) Gin ma kit meno twero timme i komwa. Kadi bed i kare mogo Jehovah pe kwanyo pekowa woko, pud watwero bedo ki gen ni en pe bibwoto jo ma gimare.e—Jab. 9:10.

JEHOVAH KWEYO CWINYWA

15. I yo ma nining ma lega, Baibul, kacel ki utmege gikweyo cwinywa? (2 Jo Korint 1:​3, 4)

¹⁵ Kwan 2 Jo Korint 1:​3, 4. I kare mogo, wakato ki i turcwiny, kumu, nyo par madwong. Twero bedo ni itye ki par dok iwinyo ni itye keni. Tika tye ngat mo ma niang kit ma iwinyo kwede? Jehovah niang. En pe winyo aremwa keken ento bene “en kweyo cwinywa i can ducu ma walimo.” Jehovah timo man nining? Ka wabako dogwa i lega bot Jehovah, en miniwa “kuc pa Lubanga ma kato ngec pa jo ducu.” (Pil. 4:​6, 7) Wanongo bene kwe cwiny ka wakwano Baibul. Ki i Baibul, Jehovah tittiwa ni emarowa matek, pwonyowa kit me bedo jo maryek, dok miniwa gen ma meno twero kweyo cwinywa. Wanongo bene kwecwiny ki i cokke, ka ma wapwonyo ki i Baibul jami mapol ma cuko cwinywa. Dok bedo kacel ki omege ki lumege ma gimaro Jehovah kweyo cwinywa.

16. Pwony ango ma inongo ki i gin mutimme i kom Nathan ki Priscilla?

¹⁶ Gin mutimme i kom Omego Nathan ki dakone Priscilla ma gibedo i lobo Amerika nyutiwa kit ma Jehovah miyo kwede cukocwiny ki kwecwiny kun tiyo ki Baibul. Mwaki mogo angec, gin gumoko tamgi me dak i kabedo ma can lutit kwena tye iye. Nathan owaco ni: “Onongo watye ki gen ni Jehovah bigoyo laane i kom jallewa me konyo wang tic meno.” Ento i kare ma guo i wang tic man, gukemme ki peko me yotkom ma obino atura dok pe gunongo tic me atima me nongo cente. I nge kare mo, gumoko tamgi me dok cen ganggi. Ento pud gumedde ki kato ki i peko me can cente. Nathan otito ni, “Abedo ka pennye kekena pingo Lubanga pe ogoyo laane i komwa kit ma wabyeko kwede. Abedo bene ka tamo ni gwok atimo gin mo marac.” I nge kare mo, Nathan ki Priscilla guniang ni Lubanga kara onongo pe owekogi liyak i kare ma onongo gimito kony. Nathan omedde ni, “I kare meno ma onongo kwo tek adada-ni, Baibul odoko calo laremwa maryek ma miniwa tam kacel ki cuko cwiny ma wamito. Watute bene pe me keto cwinywa i kom pekkiwa keken. Waketo cwinywa i kom kit ma Jehovah onongo tye ka konyowa me kanyo pekki magi, dok man ojingo genwa ni Jehovah pud bimedde ki konyowa i anyim.”

17. Lamego ma nyinge Hellen onongo cukocwiny nining? (Nen bene cal.)

¹⁷ Omege ki lumege bene gitwero cuko cwinywa. Gitimo man nining? Nen kong labol pa laminwa Hellen, ma bedo i lobo Hungary. Pi mwaki mapol, en okato ki i pekki madongo ma okelle par madwong dok onongo winyo calo konnye pe. Hellen owaco ni ka etamo i kom kwo ma ekato ki i ye, eniang ni Jehovah obedo ka tic ki omege ki lumege me cuko cwinye. En ocoyo ni: “Jehovah omina kony ma onongo amito kare ducu ma awinyo calo kerona nok pi lyeto me dog tic, twoyo latinna acel keken, kacel ki pekki mukene. Nino ducu pi mwaki 30 mukato angec-ci, Jehovah pud tye ka medde ki gwoko cikkene me kweyo cwinya. En pol kare mina kero me kanyo pekkina kun tiyo ki lok me cuko cwiny ma a ki bot jo mukene. Pol kare gicwalla mecej i cim, kad, dok gipwoya i kare ma amito kikome.”

18. Watwero cuko cwiny jo mukene nining?

¹⁸ Watye ki mot madit me lubo lanen pa Lubangawa me kweyo cwiny jo mukene. Watwero timo meno nining? Watwero diyo cwinywa ka winyo lokgi, waloko kwedgi i yo me cukocwiny, dok waminigi kony i yo mapatpat. (Car. 3:27) Watute matek me cuko cwiny jo ma gitye ka kato ki i peko, kadi wa jo ma pe gitiyo pi Jehovah. Ka jiraniwa gurwenyo ngat mo ma gimaro i to, komgi lit, nyo gitye ki par, walimogi, wawinyo lokgi, dok wanywako kwedgi wang ginacoya me cuko cwiny ki i Baibul. Ka walubo lanen pa Jehovah, “Lubanga ma kweyo cwiny dano ducu,” ci wabikonyo utmegiwa me kanyo pekkigi. Kweyo cwiny jo ma pe gitiyo pi Jehovah bene twero tugo cwinygi me bedo ki miti me pwonyo lok i kome.—Mat. 5:16.

JEHOVAH KARE DUCU BIKONYOWA

19. Gin ango ma Jehovah timo piwa, dok waromo lubo lanenne nining?

¹⁹ Jehovah paro tutwal pi jo ma gimare. En pe wekowa ata ka watye ka kato ki i pekki. Kit macalo lanyodo ma lamar paro kwede pi latinne, Jehovah bene paro pi luticce ma lugen. En miniwa tira, miniwa jami me kom, gwokowa, dok kweyo cwinywa. Walubo lanen pa Wonwa ka wakonyo dok wacuko cwiny jo mukene i kare me peko. Ka agikki piny woto ki nyiko cok, wabibedo ka kemme ki pekki mapol, ento watwero bedo ki gen ni Jehovah kare ducu bikonyowa. En ocikke ni: “Pe ilwor, an atye kwedi.” (Ic. 41:10) Cikke man weko wabedo ki tekcwiny ni wape kenwa!