Lub Lanen pa Lumalaika ma Lugen

1-2. (a) Apokapoka ango ma tye i kinwa ki lumalaika? (b) I yo ma nining ma warom ki lumalaika?

MACALO jo pa Jehovah, waworo Jehovah dok watye but jo me ode ma gimare i kingi. Man kwako omege ki lumege ma i but lobo ducu, kacel ki lumalaika milion mapol ata. (Dan. 7:​9, 10) Pol kare ka watamo i kom lumalaika, watwero tamo kit ma gipat kwede ki wan. Me labolle, kicweyo lumalaika mwaki mapol adada ma peya kicweyo dano. (Yubu 38:​4, 7) Gitego giloyowa woko. Dok gubedo jo maleng ma kitgi atir loyowa, pien watye ki roc.—Luka 9:26.

² Ento kadi bed wapat ki lumalaika i yo mapol, warom kwedgi i yo mapol bene. Me labolle, calo lumalaika, wan bene watwero poro kit mapatpat pa Jehovah. Calo lumalaika, wan bene watwero moko tam piwa kenwa. Lumalaika gitye ki nyinggi kacel ki kitgi mapatpat, dok gitye ki tic mapatpat ma Jehovah ominigi. Meno bene rom aroma ki wan. Dok calo lumalaika, wan bene kicweyowa ki miti me woro Lacwecwa.—1 Pet. 1:12.

3. Pwony ango ma wanongo ki bot lumalaika ma lugen?

³ Kit macalo warom ki lumalaika i yo mapatpat, lanengi mabeco twero cuko cwinywa kacel ki pwonyowa jami mogo ma pigi tego. I pwony man, wabinyamo kit ma watwero lubo kwede mwolo pa lumalaika ma lugen, margi pi dano, diyo cwinygi, kacel ki kit ma gitute kwede me gwoko kacokke wek obed maleng.

LUMALAIKA GIMWOL

4. (a) Lumalaika ginyuto mwolo nining? (b) Pingo lumalaika gimwol? (Jabuli 89:​7, NWT)

⁴ Lumalaika ma lugen gubedo jo mamwol. Kadi bed gitye ki ngec, teko, kacel ki ryeko, pud gilubo cik pa Jehovah ki mwolo. (Jab. 103:20) Ka gitye ka tiyo tic ma Jehovah ominigi, pe giwakke pi tic meno, nyo tic ki tekogi me ywayo tam pa dano i komgi. Cwinygi yom me timo tic mo keken ma Jehovah ominigi kadi pe kituco nyinggi.a (Acak. 32:​24, 29; 2 Luker 19:35) Pe giye jolo woro ma omyero kimi bot Jehovah keken. Pingo lumalaika gimwol adada? Pien gimaro Jehovah dok gitye ki woro matut adada pire.—Kwan Jabuli 89:​7, NWT.b

5. I yo ma nining ma lamalaika mo onyuto kwede mwolo i kare ma tye ka miyo tira bot lakwena Jon? (Nen bene cal.)

⁵ Tam kong i kom gin mutimme magi ma nyuto ni lumalaika gimwol adada. I kine ka mwaka 96 K.M., lamalaika mo ma pe wangeyo nyinge otito ki Jon ginanyuta me aura adada. (Yabo 1:1) Gin ango ma Jon otimo i nge neno ginanyuta me aura magi? En oryebbe piny me woro lamalaika meno. Ento, lamalaika ma lagen meno ojuke woko oyotoyot, kun wacci: “Pe myero itim kit meno! An latic wadiwu, dok arom ki utmegini . . . Wor Lubanga!” (Yabo 19:10) Lamalaika meno onongo mwol adada! En onongo pe mito jolo woro nyo pak mo keken. Oyotoyot, en otito ki Jon ni owor Lubanga Jehovah keken. Lamalaika man pe otamo ni pire tek loyo Jon. Kadi bed lamalaika man onongo tek dok otiyo pi Jehovah pi mwaki mapol loyo Jon, ki mwolo madit en olwongo Jon ni latic lawote. Dok kadi bed onongo mitte ni en omi ki Jon tira, en pe otimo meno i yo me gero. Me ka meno, lamalaika man oloko i yo me kica. En nen calo oniang ni Jon oryebbe piny macalo adwogi me jami me aura ma en oneno.

6. Watwero lubo lanen me wolo pa lumalaika nining?

⁶ Watwero lubo lanen me mwolo pa lumalaika nining? Calo lumalaika, wan bene omyero wati matek pi Jehovah labongo wakke pi tic ma wacobo nyo timme calo watye ki diro loyo jo mukene. (1 Kor. 4:7) Medo i kom meno, pe omyero watam ni piwa tek loyo jo mukene pien dong watiyo pi Jehovah pi mwaki mapol loyogi. Ki lok ada, ka watye ki mot me tic mapol i dul pa Jehovah, ci omyero wanenne macalo jo ma rwomgi lapiny adada. (Luka 9:48) Calo lumalaika, watye ki miti me tic pi jo mukene. Pe omyero wawek jo mukene guwiny calo piwa tek loyogi.

7. Watwero nyuto mwolo nining ka mitte ni wami tira ki ngat mo?

⁷ Watwero bene nyuto mwolo ka mitte ni wami tira bot laye lawotwa mo nyo lutinowa. I kare mukene mitte ni wami tira magwar. Ento, calo lamalaika ma omiyo tira ki Jon, watwero miyo tira magwar i yo me kica labongo turo cwiny ngat meno. Ka pe wanenne calo piwa tek loyo jo mukene, ci bikonyowa me miyo tira ma jenge i Baibul i yo me woro dok ki mar.—Kol. 4:6.

LUMALAIKA GIMARO DANO

8. (a) Ma lubbe ki Luka 15:​10, i yo ma nining ma lumalaika ginyuto kwede margi pi dano? (b) Lumalaika gikonyowa nining ka watye i tic me pwony? (Nen bene cal ma tye i )

⁸ Lumalaika pe gicayo dano nyo gitamo ni wan konywa pe. Me ka meno, gimaro dano. Cwinygi bedo yomo ka ngat mo ma otimo bal madit ongut nyo ka ngat mo ma ojuko tic pi Jehovah odwogo cen bote. Cwinygi bene bedo yom ka ngat mo opwonyo lok i kom Jehovah dok otimo alokaloka i kwone wek eti Pire. (Kwan Luka 15:10.) Lumalaika bene gikonyowa ka watye ka tito kwena. (Yabo 14:6) Kadi bed pe gin kikomgi aye gitito kwena bot dano, pud gitwero telowa me cito bot ngat mo ma mito pwonyo lok i kom Jehovah. Ngene kene ni, pe watwero waco ni lumalaika keken aye dong kare ducu gicwalowa ka tito kwena bot ngat moni. Jehovah twero tic ki yo mukene bene, calo cwiny mere maleng me konyo jo ma gimito ngeyo en, nyo me tiro luticce bot ngat meno. (Tic 16:​6, 7) Kadi bed kit meno, en tiyo ki lumalaika me konyowa ka watye ka tito kwena. Dong ka watye ka tito kwena maber-ri, watwero bedo ki tekcwiny ni lumalaika gitye atera me konyowa.—Nen bok ma wiye tye ni “Kigamo Legagi.”c

9. Watwero lubo lanen pa lumalaika nining me nyuto mar bot dano?

⁹ Watwero lubo lanen pa lumalaika nining me nyuto mar bot dano? Ka wawinyo lok angeya ni kityeko dwoko ngat moni cen i kacokke, watwero bedo ki yomcwiny calo lumalaika. Watwero weko ngat meno ngeyo ni wamare matek dok ni cwinywa yom pi dwogone cen ka tic pi Jehovah odoco. (Luka 15:​4-7; 2 Kor. 2:​6-8) Watwero bene lubo lanen pa lumalaika ka watimo gin ducu ma watwero me tito kwena maber-ri. (Latit. 11:6) Dok kit macalo lumalaika gikonyowa ka watye i tic me pwony, watwero bene yenyo yo mo keken me konyo omege ki lumege ka watye i tic me pwony. Me labolle, watwero cito i tic me pwony ki latit kwena mo manyen. Nyo waromo konyo omege ki lumege ma guteggi nyo ma gitye ki peko me yotkom wek gin bene gutit kwena.

10. Gin ango ma wapwonyo ki i labol pa Sara?

¹⁰ Ento gin ango ma omyero watim ka pe watwero cobo ticwa pi Jehovah kit ma wamito kwede? Pud watwero yenyo yo mogo me tic kacel ki lumalaika i tic me pwony. Nen kong labol pa Sara,d laminwa mo ma bedo i lobo India ma tye painia. I nge tic macalo painia pi mwaki 20, kome odoko lit dok onongo pe twero a ki i kabuto. Cwiny Sara otur adada. Ento motmot, en ocako bedo ki yomcwiny odoco pi kony ma omege ki lumege gumine kacel ki yub ma mege me kwano Baibul nino ducu. Ngene kene ni, onongo mitte ni en oyeny yo mukene me tito kwena. Kit macalo en onongo pe twero wa bedo me coyo waraga, en onongo tito kwena ki cim keken. Pi meno, en onongo goyo cim me roto jo ma gunyuto miti, dok jo magi onongo gititte pi jo mukene ma gimito pwonyo lok me Baibul. Adwogine obedo nining? I nge dwe mogo manok keken, Sara onongo tye ki lutino kwan me Baibul 70 kulu! En onongo pe twero kwan ki jo magi ducu. Pi meno, en omiyo lutino kwanne me Baibul mukene bot omege ki lumege ma i kacokke. Pol pa lutino kwan me Baibul magi dong giwoto i cokke. Cwiny lumalaika nen calo bedo yom adada me tic kacel ki omege ki lumege ma gitute me timo gin mo keken wek gitit kwena calo Sara!

LUMALAIKA GIDIYO CWINYGI

11. I yo ma nining ma lumalaika ma lugen guwekiwa lanen maber me diyo cwiny?

¹¹ Lumalaika ma lugen gitye lanen maber adada me diyo cwiny. Dong gukanyo ngolo kop alenga kacel ki tim maraco ma Jehovah okato ki iye pi mwaki alip mapol dok man ogudo gin ducu ki acel acel. Guneno ka Catan kacel ki lumalaika mapol ma onongo gitiyo pi Jehovah gujemo i Kome. (Acak. 3:1; 6:​1, 2; Juda 6) Baibul bene tittiwa ni lamalaika mo ma lagen olwenyo ki lamalaika mo marac pi nino mapol. (Dan. 10:13) Medo i kom meno, nicakke i kare pa Adam ki Kawa, lumalaika guneno ka dano manok keken aye guyero me tic pi Jehovah. Kadi bed kit meno, lumalaika magi ma lugen pud gimedde ki tic pi Jehovah ki mit kom kacel ki yomcwiny. Gingeyo ni Lubanga bijwayo tim maraco ducu i karene kikome.

12. Gin ango ma bikonyowa me diyo cwinywa?

¹² Watwero lubo lanen me diyo cwiny pa lumalaika nining? Calo lumalaika, wan bene waneno tim me ngolo kop alenga. Calo gin, watye ki niye ni i kare mupore, Lubanga bijwayo woko tim maraco. Dong, calo lumalaika ma lugen, “pe myero waol ka tiyo gin maber.” (Gal. 6:9) Dok Lubanga ocikke me konyowa ciro pekkiwa. (1 Kor. 10:13) Watwero lega bot Jehovah wek okonywa ki cwiny mere maleng ma konyowa me diyo cwinywa kun wabedo ki yomcwiny. (Gal. 5:22; Kol. 1:11) Ento ka itye ka nongo adegadega kono? Gen Jehovah ki cwinyi ducu, dok pe ibed ki lworo mo. Jehovah kare ducu bikonyi kun weko icung matek.—Ibru 13:6.

LUMALAIKA GIGWOKO KACOKKE WEK OBED LENG

13. Tic ma pire tek ango ma lumalaika gitye ka timone i kare man me agikki-ni? (Matayo 13:​47-49)

¹³ I kare man me agikki-ni, Jehovah omiyo ki lumalaika tic ma pire tek me atima. (Kwan Matayo 13:​47-49.) Dano milion mapol ki i but lobo-ni ducu, gitye ki miti me pwonyo lok me kwena maber-ri. Jo mogo i kingi gitimo alokaloka i kwogi wek gikwo ma rwatte ki rwom pa Jehovah dok giti pire i yo ma en cwako, ento jo mukene gikwero woko. Kimiyo ki lumalaika tic me ‘poko jo maraco woko ki i kom jo ma kitgi atir.’ Man tyen lokke ni, kiminigi tic me gwoko kacokke wek obed maleng. Man pe tyen lokke ni ngat mo keken ma ogiko ribbe kwedwa pe dong bidwogo cen. Pe bene dong tyen lokke ni pe wabibedo ki peko mo keken i kacokke. Kadi bed kit meno, watwero bedo ki gen ni lumalaika gitye ka tic matek me gwoko kacokke wek obed maleng.

14-15. Watwero lubo lanen pa lumalaika me paro pi lengo me kacokke nining? (Nen bene cal.)

¹⁴ Watwero lubo lanen pa lumalaika me paro pi lengo me kacokke nining? Mitte ni wati matek me gwoko watwa ki Jehovah wek obed matek. Watimo man ki yero lurem ma gimare kun wagwokke ki timo gin mo keken ma twero balo watwa kwede. I yo ma kit man, wakonyo me gwoko lengo pa kacokke. (Jab. 101:3) Watwero bene konyo omegiwa ki lumegiwa me medde ki bedo lugen bot Jehovah. Me labolle, ngo ma omyero watim ka waniang ni laye lawotwa mo otimo bal madit? Pi mar ma watye kwede pi ngat meno, wabicuko cwinye me lok ki luelda. Ka en okwero timo meno woko, ci wan aye omyero watit ki luelda gin mutimme. Wamito ni ominwa ma watte ki Jehovah oballe woko-ni onong kony labongo galle!—Yak. 5:​14, 15.

¹⁵ Ki cwercwiny, jo mogo ma gutimo bal madongo mitte ni kikwanygi woko ki i kacokke. Ka meno otimme, ci omyero ‘pe waribbe’ kwedgi.e (1 Kor. 5:​9-13) Yub man konyo me gwoko kacokke wek obed leng. Ma pire tek loyo ducu, ka wayero pe me ribbe ki jo ma kikwanyogi ki i kacokke, nongo watye ka nyutigi cwiny me kica. Man tye ada pien ka wabedo luwiny bot Jehovah kun pe waribbe kwedgi, watwero konyogi me niang ni omyero gidwog cen bot Jehovah. Ka gutimo meno, cwinywa bedo yom kacel ki Jehovah ki lumalaikane.—Luka 15:7.

16. I yo mapatpat ango ma itwero tute me lubo lanen pa lumalaika?

¹⁶ Pud dong watye ki mot madit ya ni Jehovah oye ni wapwony lok i kom lumalaika dok wati kacel kwedgi! Dong omyero walub kitgi mabeco calo: mwologi, margi pi dano, diyo cwinygi, kacel ki kit ma giparo kwede pi lengo me kacokke. Ka walubo lanen pa lumalaika ma lugen, ci wan bene watwero doko jo me ot pa Jehovah pi naka.