Nong Kwecwiny ki Bot Jehovah

1. Tit kong kit ma kwo onongo tye kwede pi Lujudaya ma gibedo i Babilon.

PI MWAKI mapol adada, Lujudaya gubedo ka jemo i kom Jehovah teretere. Macalo adwogine, Jehovah oye ni Lubabilon gubal lobo pa Lujudaya dok gutergi i opii i Babilon. Kwone onongo tye nining botgi ki kunu? (2 Tekwaro 36:​15, 16, 20, 21) Ki lok ada, onongo gitye agonya me timo jami ma mitte pi kwogi me nino ducu. (Jer. 29:​4-7) Kadi bed kit meno, kwo onongo pe yot dok Babilon onongo pe obedo ka ma gin aye guyero me kwo iye. Man oweko guwinyo nining? Nen kong gin ma ngat acel ma okwo i Babilon owaco: “Wabedo piny i nget kulu me Babilon, ci wakok matek i kare ma wapo pi Cion.” (Jab. 137:1) Cwiny Lujudaya onongo otur adada, dok onongo gimito kwecwiny. Ento anga ma onongo twero cuko cwinygi?

2-3. (a) Gin ango ma Jehovah otimo pi Lujudaya ma onongo gitye i opii i Babilon? (b) Gin ango ma wabinyamo i pwony man?

² Jehovah obedo “Lubanga ma kweyo cwiny dano ducu.” (2 Kor. 1:3) Jehovah maro luticce dok mito kweyo cwinygi. Jehovah onongo ngeyo ni Lujudaya ma gitye i opii i Babilon gibingut i kom balgi ci gibidwogo cen ka wore i yo ma atir. (Ic. 59:20) Pi meno, Jehovah oweko lanebi Icaya ocoyo kwena me kwecwiny pigi i buk pa Icaya mwaki makato 100 ma peya kicwalogi i opii i Babilon. Buk pa lanebi man okonyogi nining? Icaya otito ni: “‘Wukwe cwiny lwakka, wukwe cwinygi!’ Man lok ma Lubangawu owaco.” (Ic. 40:1) Jehovah otiyo ki lok ma i buk pa lanebi man me kweyo cwiny Lujudaya ma gitye i opii i Babilon. Jehovah omiyo kwecwiny ma onongo Lujudaya gimito kikome.

³ Calo Lujudaya magi, wan bene wamito kwecwiny kare ki kare. I pwony man, wabinyamo yo adek mapatpat ma Jehovah okweyo kwede cwiny Lujudaya i kare ma gitye i Babilon: (1) En ocikke me timo kica ki jo ma gungut, (2) en omingi gen, dok (3) en okonyogi pe me bedo ki lworo. Wabinyamo bene kit ma Jehovah kweyo kwede cwinywa i yo acel-lu i kare-ni.

JEHOVAH TIMIWA KICA

4. Jehovah onyuto nining ni ebedo Lubanga ma lakica? (Icaya 55:7)

⁴ Jehovah obedo “Won ma lakica.” (2 Kor. 1:3) En onyuto kite meno i kare ma ocikke me weko bal pa Lujudaya ma gungut. (Kwan Icaya 55:7.) En owaco ni: “Abitimo kica boti ki mar ma pe gik.” (Ic. 54:8) Jehovah onongo binyuto kicane nining? Kadi bed ni Lujudaya onongo gibedo i opii i Babilon macalo adwogi me kwero bedo luwiny, Jehovah ocikke botgi ni pe gibibedo kunu matwal. (Ic. 40:2) Lok man nen calo pud dong ocuko cwiny Lujudaya ma gungut ya!

5. Pingo watye ki tyen lok maber makato pa Lujudaya me ye ni Jehovah bitimiwa kica?

⁵ Pwony ango ma wanongo? Jehovah tye atera me weko bal ducu pa laticce ma ongut woko. I kare-ni, watye ki tyen lok maber makato pa Lujudaya ma onongo gitye i opii, me ye ni Jehovah bitimiwa kica. Pingo? Pien waniang gin ma Jehovah otimo me weko balwa. I nge mwaki ma romo 700 ma lanebi Icaya oloko i kom kica pa Jehovah, Jehovah ocwalo Wode me amara i lobo wek omi kwone macalo ginkok pi lubalo ducu ma gungut. Pien Yecu oto piwa, Jehovah dong twero jwayo balwa woko kwicikwici. (Tic 3:19; Ic. 1:18; Ep. 1:7) Jehovah pud dong obedo Lubanga ma lakica ya!

6. Pingo tye me cuko cwiny ka watamo i kom kica pa Jehovah? (Nen bene cal.)

⁶ Kwena pa Jehovah ma nonge i Icaya 55:7 twero bene konyowa ka cwinywa bedo ka pidowa pi balwa ma watimo i kare mukato angec kadi bed dong watyeko ngut iye woko. Pud cwinywa twero medde ki pidowa tutwal-le ka watye ka kato ki i peko ma obino macalo adwogi me bal ma watimo. Ento ka watuco balwa, dok waloko kwowa, ci watwero bedo ki gen ni Jehovah otyeko timiwa kica woko. (Por ki Jeremia 31:34.) Kit macalo Jehovah pe gwoko bal ma watimo i kare mukato, wan bene omyero pe wabed ka tamo pigi. Gin ma pire tek bot Jehovah obedo gin ma watye ka timone kombeddi ento pe balwa mukato angec. (Ejek. 33:​14-16) Dok macok cok-ki, Wonwa ma lakica bijwayo pekki ducu ma obino macalo adwogi me balwa.

7. Gin ango ma twero tugo cwinywa me yenyo kony ki bot luelda ka watimo bal madit?

⁷ Ka cwinywa tye ka pidowa pi bal ma watimo dok wamungo woko kono? Baibul cuko cwinywa ni omyero wapeny pi kony ki bot luelda. (Yak. 5:​14, 15) Pe twero bedo yot me tittigi bal ma watimo. Ento omyero wiwa opo ni Jehovah tiyo ki co magi me konyowa dok gibiterowa i yo me kica dok ki mar kit ma Jehovah mito kwede. Nen kong kit ma kica pa Jehovah ocuko kwede cwiny omego mo ma nyinge Arthur,a ma cwinye obedo ka pide matek adada. Arthur owaco ni: “Pi kare ma romo mwaka acel, abedo ka neno cal macilo. Ento i nge winyo pwony mo ma loko i kom cwiny ma ngoliwa kop, atuco balla bot dakona ki luelda. I nge meno, awinyo maber adada pien cwinya onongo dong pe pida. Ento cwinya onongo pud cwer pi balla. Luelda gupoyo wiya ni Jehovah pe okwera woko dok en pud mito bedo larema. En tirowa pien en marowa. Lokgi me kica man ogudo cwinya dok okonya me moko ni Jehovah otimma kica.” I kare-ni, Arthur dong tiyo macalo painia ki lakony kor tic. Pud dong tye me cuko cwiny ya me ngeyo ni Jehovah timiwa kica ka wangut i kom balwa!

JEHOVAH MINIWA GEN

8. (a) Gen ango ma Jehovah omiyo bot Lujudaya ma onongo gibedo i Babilon? (b) Ma lubbe ki Icaya 40:​29-31, gen man onongo bikonyo Lujudaya ma gungut nining?

⁸ Lujudaya onongo guromo tamo ni, pe bitwere kulu me dok cen i lobogi. Lubabilon onongo gingene macalo jo ma pe gigonyo opiigi. (Ic. 14:17) Ento Jehovah omiyo bot jone gen. En ocikke bot jone ni kibigonyogi ki i opii ci gibidok cen i lobogi. Dok onongo pe tye gin mo keken ma twero genge ki cobo cikkene meno. (Ic. 44:26; 55:12) Ki tung bot Jehovah, Babilon onongo rom ki apwa ma tye i mijan. (Ic. 40:15) Ka ikuto apwa, duny woko cut. Onongo bibedo yot kit meno pi Jehovah me gonyo jone ki i opii i Babilon. Gen man onongo bikonyo Lujudaya nining? Onongo bicuko cwinygi. Ento onongo bitimo makato. Icaya ocoyo ni: “Jo ma neno [nyo geno] . . . Rwot, teko bidwogo cen i komgi.” (Kwan Icaya 40:​29-31.) Ada, gen onongo biminigi teko odoco; dok “gibituk gicito malo calo ocur.”

9. Tyen lok ango ma onongo Lujudaya gitye kwede me geno ni cikke pa Jehovah me larogi ki i opii bicobbe?

⁹ Jehovah bene omiyo ki Lujudaya tyen lok mumiyo gitwero geno cikkene. Tyen lok ango ma en ominigi? Tam kong i kom lok pa lunebi ducu ma onongo dong gucobbe kakare. Me labolle, onongo gingeyo ni kit ma Jehovah otito kwede con, Aciria oturo ker me kaka apar me Icrael ci oterogi i opii. (Ic. 8:4) Guneno kit ma Lubabilon gujwero kwede Jerucalem ci gutero jone i opii. (Ic. 39:​5-7) Onongo gingeyo ni kabaka me Babilon okolo wang Kabaka Jedekia ci kitere i Babilon. (Jer. 39:7; Ejek. 12:​12, 13) Jami ducu ma Jehovah otito ocobbe kakare. (Ic. 42:9; 46:10) Jami magi ducu nen calo ojingo niyegi matek ni cikke pa Jehovah me gonyogi ki i opii bene bicobbe!

10. Gin ango ma twero konyowa me bedo ka roco genwa i kare man me agikki-ni?

¹⁰ Pwony ango ma wanongo? Ka cwinywa otur, genwa pi anyim twero cuko cwinywa dok miniwa teko. Kwo i lobo-ni tye ka doko tek medde ameda, dok lumone pa Lubanga gidagwa. Ento, pe omyero wawek cwinywa otur. Jehovah ominiwa gen mamwonya adada—me kwo pi naka i Paradic ma nongo kuc oromo piny ducu. Omyero wabed ka roco gen meno. Ka pe, ci bibedo calo ngat ma tye ka neno kabedo mo maleng adada ki i wang ot macilo. Kabedo meno pe binen maleng nikwanyo ka en odunyo wang ot meno. Tye marom aroma ki genwa. Dong watwero “dunyo wang ot” nyo bedo ka roco genwa nining? Watwero kwanyo kare me goyo i wiwa kit ma kwowa bibedo mamwonya kwede i lobo manyen. Watwero kwano pwony, neno vidio, nyo winyo wer ma giloko i kom genwa. Dok watwero tito ki Jehovah i lega jami ducu ma watye ka kurone i paradic.

11. Gin ango ma konyo laminwa mo ma tye ki two mapatpat me nongo teko?

¹¹ Tam kong kit ma gen omiyo kwede kwecwiny ki teko bot laminwa mo ma nyinge Joy, ma tye ka yelle ki two mapatpat. En owaco ni: “Ka awinyo calo piny oloya woko, atito ki Jehovah kit ma awinyo kwede kun ageno ni en niang pekona. I kare ma kit meno, Jehovah mina ‘tek madwong me twero.’” (2 Kor. 4:7) Joy bene goyo i wiye ni dong etye ka kwo i lobo manyen, ma nongo “pe tye dano mo . . . ma biwaco ni, ‘An koma lit.’” (Ic. 33:24) Ka wan bene watito ki Jehovah kit ma wawinyo kwede dok wabedo ka roco genwa, ci wabinongo teko me kanyo pekkiwa.

12. Tyen lok ango ma watye kwede me geno cikke pa Jehovah? (Nen bene cal.)

¹² Kit macalo Jehovah omiyo ki Lujudaya ma i Babilon tyen lok mapol me geno cikkene, en bene timo kit meno piwa i kare-ni. Tam kong i kom lok pa lunebi ma watye ka neno cobbegi. Me labolle, watye ka neno kit ma ker me Britain ki Amerika ‘bedo matek i kare mogo ki dok bedo goro i kare mukene.’ (Dan. 2:​42, 43) Wawinyo bene pi ‘oyengyeng ma yengo lobo i kabedo mapol,’ dok watye ka nywako i tito kwena “bot rok ducu.” (Mat. 24:​7, 14) Kit macalo watye ka neno cobbe pa lok pa lunebi magi kacel ki mukene, man miniwa gen ni cikke pa Jehovah ducu bicobbe.

JEHOVAH KONYOWA PE ME BEDO LWOR

13. (a) Pekki ango ma onongo Lujudaya gibikato ki iye i kare ma kibigonyogi ki i Babilon? (b) Kit ma kitito kwede i Icaya 41:​10-13, Jehovah ocuko cwiny Lujudaya nining?

¹³ Jehovah omiyo ki Lujudaya ma gikwo i Babilon gen ni kibigonyogi ki i opii, ento en bene onongo ngeyo ni kwo bibedo tek ka kare meno woto ki nyiko cok. En onongo otito con ni kabaka mo matek bioto lweny ci loyo ker mapatpat ma orumu Babilon ci lacen bilweny i kom Babilon bene. (Ic. 41:​2-5) Tika onongo omyero Lujudaya gubed ki lworo? Mwaki mapol ma peya man otimme, Jehovah ocuko cwiny jone. En owaco ni: “Pe ilwor, an atye kwedi, cwinyi pe opoti, pien an Lubangani.” (Kwan Icaya 41:​10-13.) Lok man ni “An Lubangani” tyen lokke ngo? Jehovah onongo pe tye ka poyo wi Lujudaya me wore—pien onongo dong gingeyo meno. Me ka meno, en onongo tye ka poyo wigi ni etye kwedgi dok ebikonyogi.—Jab. 118:6.

14. Gin ango mukene ma Jehovah otimo me konyo Lujudaya pe me bedo ki lworo?

¹⁴ Jehovah bene okonyo Lujudaya pe me bedo lwor kun poyo wigi i kom tekone kacel ki ryekone ma lapore pe. En olegogi ni kong guting wigi malo ci gunen lakalatwe. En otittigi ni en aye ecweyo lakalatwe magi ducu dok bene engeyo nyinggi ki acel acel. (Ic. 40:​25-28) Ka Jehovah ngeyo nying lakalatwe magi ki acel acel, ci labongo akalakala mo en ngeyo nying luticce ducu! Dok ka Jehovah tye ki teko me cweyo lakalatwe, ci en bene tye ki teko me konyo jone. Ada, Lujudaya onongo pe gitye ki tyen lok mo me bedo ki par nyo lworo.

15. I yo ma nining ma Lubanga oyubo kwede jone pi gin ma onongo bitimme i anyim?

¹⁵ Jehovah bene otito ki jone gin ma myero gutim ka kare me gonyogi oromo. Con kong i buk pa Icaya, Lubanga otito ki jone ni: “Wudony i kicikawu, ka wulor doggola woko; kong wukanne kunnu pi kare mo manoknok, nio wang ma akemo pa Rwot dong okato.” (Ic. 26:20) Twero bedo ni Lujudaya gulubo cik man i kare ma Kabaka Ciro oturo Babilon. Laco mo ma obedo Lagrik ma onongo coyo lok me tekwaro owaco ni, i kare ma Ciro odonyo i Babilon, en “ogolo rukca ki lumonye ni myero gutong ngat mo keken ma kinongo tye ka lak woko.” Go kong kit ma man twero bedo ni oonyo kwede koyo i kom jo ma bedo i Babilon! Ento Lujudaya nen calo gubedo maber pien gulubo cik pa Jehovah.

16. Pingo pe omyero wabed ki par madwong tutwal pi gin ma bitimme i kare me twon can madit atika-ni? (Nen bene cal.)

¹⁶ Pwony ango ma wanongo? Ma cokcok-ki, twon can madit atika bicakke. Dok ka ocakke, dano ma i lobo-ni gibibedo ki lworo dok ma wigi onywene. Ento pe jo pa Jehovah. Wangeyo ni Jehovah obedo Lubangawa. Wabibedo ki tekcwiny ‘pien nongo kare me kokowa dong onyiko cok.’ (Luka 21:28) Kadi wa i kare ma Gog—ma obedo lobe ma guribbe—bioto lweny i komwa, wabimedde ki geno Jehovah. (Ejek. 38:18) Jehovah bitic ki lumalaika me gwokowa, dok en biminiwa tira me laro kwowa. En biminiwa tira meno nining? Pud pe wangeyo. Ento, twero bedo ni wabinongo tira meno ki i kacokkewa. Kacokke magi gitwero bedo calo ‘kicikawa,’ ka ma wabinongo iye gwok. Watwero yubbe nining pi gin ma tye anyim? Omyero wabed ki wat macok ki omegiwa ki lumegiwa, wabed atera me lubo tira ma a ki bot dul pa Jehovah dok waye ni Jehovah aye tye ka telo dulle.—Ibru 10:​24, 25; 13:17.

17. Itwero nongo kwecwiny ki bot Jehovah nining?

¹⁷ Kadi bed kwo onongo pe yot pi Lujudaya ma gibedo i Babilon, Jehovah ominigi kwecwiny ma gimito. En bitimo kit meno piwa bene. Dong kadi bed gin ango otimme i anyim, omyero wamedde ki geno Jehovah. Bed ki niye ni en timo kica ki luticce ma lugen dok paro pigi. Gwok genni wek obed matek. Dok wi pe owil ni, ka Jehovah obedo Lubanga-ni, ci omyero pe ilwor gin mo.