Kit ma Watwero Miyo Kwede ki Tam Maber

1. Anga ma omyero omi tira, dok pingo?

TIKA imaro miyo tam bot jo mukene? Jo mogo ginongo ni timo man yot adada. Ento jo mukene gibedo ki lworo me miyo tira nyo tam ki luwotgi. Kadi bed walwor nyo pe, wan ducu omyero wabed jo ma miyo tam nyo tira. Pingo? Pien obedo yo acel ma wanyuto kwede ni wamaro omegiwa ki lumegiwa. Yecu owaco ni omyero wanyut mar i kinwa ka wamito doko lulub kore me ada. (Jon 13:35) Medo i kom meno, Baibul bene waco ni ka wamiyo tira ki luremwa, wat i kinwa dongo bedo matek.—Car. 27:9.

2. Gin ango ma omyero luelda gubed ki tekcwiny me timone, dok pingo? (Nen bene bok ma wiye tye ni “Tira ma Kimiyo i Cokke me Dye Cabit.”)

² Pire tek ni luelda gubed jo ma gingeyo miyo tira maber ki jo mukene. Jehovah ki Yecu gucimo co magi me gwoko kacokke. (1 Pet. 5:​2, 3) Yo acel ma gigwoko kwede ka cokke aye ki miyo tira ma jenge i Baibul ka gitye ka pwony i nyim kacokke. Twero mitte ni gumi tira botwa ki acel acel. Gikonyo bene jo mogo ma gua woko ki i kacokke me dwogo cen. Luelda kacel ki wan ducu watwero miyo tira maber nining?

3. (a) Waromo pwonnye me bedo jo ma miyo tam maber nining? (Icaya 9:6; nen bene bok ma wiye tye ni “Lub Lanen pa Yecu ka Itye ka Miyo Tam.”) (b) Gin ango ma wabinyamo i pwony man?

³ Watwero pwonyo kit me miyo tira nyo tam i yo maber ki nyamo labol pa jo mogo me Baibul. Yecu aye pud dong omiyo tam maber loyo. Baibul olwongo Yecu ni “Lami-tam ma giuro.” (Kwan Icaya 9:6.) I pwony man, wabinyamo gin ma watwero timone ka ngat mo openyowa ni waminigi tam ki dok gin ma watwero timone ka waneno ni mitte ni wami tira kadi bed pe kipenyowa. Wabinyamo bene pingo pire tek me miyo tira i kare mupore dok i yo maber.

KA NGAT MO OPENYOWA NI WAMINE TAM

4-5. Ka ngat mo openyowa ni wamine tam, lapeny mene ma omyero kong wapennye kwede? Mi labol.

⁴ Ka laremi mo openyi ni imine tam, cwinyi twero bedo yom pien nongo ingeyo ni en geni. Dok iromo winyo ni omyero imine tam cutcut. Ento pire tek ni kong ipennye kekeni ni, ‘Tika an aye apore dok atye ki ngec muromo me miyo tam i kom lok man?’ I kare mogo, yo maber loyo ma itwero konyo kwede laremi aye pe ki mine tira ento ki konyo en nongo ngat mo ma tye ki ngec muromo i kom lok meno.

⁵ Nen kong labol man. Ket kong ni laremi mo macok kome odoko lit adada. Ci en owacci ni etye ka timo kwed i kom yo mogo mapatpat me cango twone, dok openyi ni imi tammi i kom yo mene ma in ineno ni opore. Twero bedo ni tye yo me cango mo ma in ineno ni ber ki tung boti, ento in pe ibedo daktar dok ipe ki ngec matut i kom yo me cango two meno. Ka tye kit meno, ci yo maber loyo aye ki konyo laremi nongo ngat mo ma tye ki ngec i kom lok meno wek okonye.

6. Gin ango ma pire tek ni omyero kong watim ma peya wamiyo tamwa?

⁶ I kare mogo, watwero winyo ni wapore me miyo tam bot laremwa. Kadi bed kit meno, twero bedo ber loyo ka pe wamiyo tam meno cutcut. Carolok 15:28 waco ni “dano ma kite atir kong bedo ki tam matut i kom lagam ma myero edok iye.” Kadi bed wawinyo ni wangeyo ngo kikome ma omyero wawaci, bedo ber ka kong watimo kwed, walego, dok walwodo matut tam ma wabimiyo. Ka watimo meno, ci tam ma wabimiyo birwatte ki gin ma Jehovah mito ni wawaci. Nen kong gin mutimme i kom lanebi Natan.

7. Gin mutimme i kom lanebi Natan pwonyowa gin ango?

⁷ I kare ma Kabaka Daudi tye ka lok ki lanebi Natan, en otite ni emito gero ot me woro Jehovah. Cutcut lanebi Natan owaco ki Daudi ni en twero timo meno. Ento meno onongo pe obedo miti pa Jehovah. Pi meno, Natan onongo myero kong openy tam pa Jehovah me niang ka En mito ni Daudi aye ma oger ot meno. (1 Tekwaro 17:​1-4) Gin mutimme man nyuto ni, ka ngat mo openyowa ki tam, nyuto ryeko ka ‘pe warune me gamone.’—Yak. 1:19.

8. Tyen lok mukene ango ma oweko pire tek me tam matut ma peya wamiyo tam?

⁸ Nen kong dok tyen lok mukene ma oweko pire tek adada me tam matut ma peya wamiyo tam bot ngat mo: Ka wamiyo tam marac, ci wan bene kibikok i komwa pi adwogi maraco ma obino i kom ngat meno. Dong, nen ka maleng ni pire tek adada me tam matut i kom gin ma wabiwaco ma peya wamiyo tamwa.

KIT ME MIYO TIRA KADI BED PE KIPENYOWA

9. Gin ango ma luelda omyero gumoki ma peya gumiyo tira? (Jo Galatia 6:1)

⁹ Kare ki kare, twero mitte ni luelda gumi tira bot omego nyo lamego macok “timo bal.” (Kwan Jo Galatia 6:1.) Ngat mo twero bedo ni tye ka moko tam marac ma lacen twero weko en timo bal madit. Ka tye kit meno, ci miti pa luelda tye me konyo ngat meno moko tam ma biweko en medde ki tic pi Jehovah dok nongo kwo ma pe tum. (Yak. 5:​19, 20) Ka wek tiragi okony ngat meno, mukwongo omyero kong gumok ni ngat meno otimo gin mo ma ocwero cwiny Jehovah. Omyero bene guniang ni ka ce ngat mo omoko tam ma pe rwatte ki mitigi, ci dong pe te lokke ni ngat meno otimo gin ma ocwero cwiny Jehovah. (Rom. 14:​1-4) Ento ka luelda gumoko ni ngat meno otimo gin mo ma ocwero cwiny Jehovah, ci gitwero mine tira nining?

10-12. Ka mitte ni laelda mo omi tira ma pe kipenyo pire, gin ango ma en myero otim? Mi lapor. (Nen bene cal.)

¹⁰ Pe yot ki luelda me miyo tira ki ngat ma pe openyo pire. Pingo? Lakwena Paulo owaco ni i kare mogo nongo ngat meno bene pe ngeyo ni etimo gin mo marac. Pi meno, ma peya laelda omiyo tira, tye jami mogo ma en twero timone ma weko bedo yot ki ngat meno me winyo tirane.

¹¹ Miyo tira ma pe kipenyo pire bedo calo pito kodi i kare ma ngom otwo. Ma peya lapur ocoyo kodi, omyero en kong opur poto meno. Timo man miyo ngom bedo mayom me pito kodi. I nge pito kodi en onyo pii iye wek okony kodi me dongo. I yo acel-lu, tye jami mogo ma laelda twero timone wek obed yot ki Lakricitayo lawote me winyo tirane. Me labolle, en myero okur cawa mupore ci otit ki Lakricitayo meno ni eparo pire dok tye gin mo ma emito ni gilok iye. Ka laelda meno ngene macalo ngat ma lamar dok lakica, ci meno biweko bedo yot ki ngat meno me jolo tirane.

¹² Ka gitye ka nyamo lok kacel, laelda-ni twero weko bedo yot pi Lakricitayo-ni me jolo tira ki poyo wiye ni dano ducu giroco dok gimito tira kare ki kare. (Rom. 3:23) Ki dwan me mwolo dok ki woro matut, laelda-ni omyero onyutte ki i Ginacoya gin marac ma ngat meno otimo. Ka Lakricitayo meno oye ni etimo gin marac, ci laelda meno twero “pito kodi” ki tite jami ma mitte ni en myero otim alokaloka iye. I agikki me lokgi, laelda-ni twero “onyo pii” i kodi ma en opito ki pwoyo Lakricitayo meno pi jami mabeco ma en tye ka timone ki dong lega kacel kwede.—Yak. 5:15.

13. Gin ango ma luelda gitwero timone me niang ka ngat moni oniang tira maber?

¹³ I kare mogo, Lakricitayo moni pe twero niang maber tira ma kimine. Gin ango ma luelda gitwero timone wek ngat meno oniang tira maber? I yo me kica, luelda gitwero tic ki lapeny ki diro me niang ka Lakricitayo-ni oniang tira meno maber dok ngeyo gin ma omyero etim.—Latit. 12:11

KIT ME MIYO TIRA I KARE MUPORE DOK I YO MABER

14. Pingo omyero pe wami tira ka kiniga omakowa?

¹⁴ Wan ducu watye ki roc, dok i kare mogo watimo jami nyo wawaco lok ma cwero cwiny jo mukene. (Kol. 3:13) Baibul waco ni i kare mogo ngat mo twero timo nyo waco gin mo ma weko kiniga makowa. (Ep. 4:26) Ento omyero pe wami tira ki ngat meno ki kiniga. Pingo? Pien “kiniga pa dano pe cobo tic ma atir i nyim Lubanga.” (Yak. 1:20) Ka wamiyo tira ki kiniga, ci man twero medo peko ma tye ameda. Man pe tyen lokke ni pe omyero watit kit ma wawinyo kwede bot ngat ma ocwero cwinywa. Ento omyero wakur wang ma cwinywa opye ka watit lok ma tye i cwinywa. Nen kong labol maber pa Eliu ma omiyo tira i yo maber adada bot Yubu.

15. Pwony ango ma wanongo ki i labol pa Eliu? (Nen bene cal.)

¹⁵ Pi nino mapol, Yubu obedo ka tute me gengo ngeye pi lok maraco ma lureme gubedo ka wacone i kome. Eliu otero ite ka winyo lok pa Yubu. Kica omake i kom Yubu. Ento i kare ma Yubu otemo nyuto ni epe ki bal mo, Yubu waco lok mogo ma pe tye atir i kom Jehovah. Lok meno ocwero cwiny Eliu matek. Kadi bed kit meno, Eliu okuro karene me lok ci oloko ma kome opye mot dok ki woro kun miyo tira ki Yubu. (Yubu 32:2; 33:​1-7) Labol pa Eliu miniwa pwony ma pire tek: Ber makato me miyo tira ma nongo komwa opye mot ki woro kacel ki mar.—Latit. 3:​1, 7.

MEDDE KI MIYO TIRA KUN BENE IJOLO TAM MA KIMINI

16. Pwony ango ma wanongo ki i Jabuli 32:8?

¹⁶ Wang Ginacoya ma pwony man jenge iye waco ni “abimiyi ryeko dok abineni.” (Kwan Jabuli 32:8.) Man nyuto ni Jehovah medde ki miniwa kony i nge miniwa tira. En pe miniwa tira keken ento nyutiwa kit me keto tira meno i tic. Wan bene watwero lubo lanen pa Jehovah! Ka wamiyo tira ki jo mukene, omyero wamedde ki cuko cwinygi kun wakonyogi me keto tira meno i tic.

17. Luelda giweko wawinyo nining ka giminiwa tira ma jenge i Baibul? (Icaya 32:​1, 2)

¹⁷ Mitte ni wami dok wajol tira i kare-ni makato kare mo keken. (2 Tem. 3:1) Kit macalo ‘kulu ma piine mol i kabedo mutwo’ twero kweyo cwiny ngat ma orwo neko, luelda ma gimiyo tira ma jenge i Baibul bene gikweyo cwinywa dok gikonyowa me medde ki tic pi Jehovah. (Kwan Icaya 32:​1, 2.) Watye ki yomcwiny pi lurem mabeco ma pe gigalle ki miniwa tira ma mitte. Tam ma giminiwa pire tek calo “jabu ma gimwono i kom ryal.” (Car. 25:11) Walego ni wan ducu wamedde wunu ki dongo diro ma mitte me miyo ki jolo tira mabeco.