Tika Dong ‘Ipwonnye’ me Bedo ma Iyeng ki Jami ma Itye Kwede?

1. Tyen lokke ngo me bedo ma wayeng ki jami ma watye kwede, ento bene man pe kwako gin ango?

TIKA ibedo ngat ma yeng ki jami ma tye kwede? Ngat ma yeng ki jami ma tye kwede pe keto cwinye i kom jami ma en pe kwede dok bedo ki yomcwiny kacel ki kuc i kwone. En pe bedo ki keccwiny nyo akemo pi jami ma en pe kwede. Kadi bed kit meno, bedo ma iyeng ki kwoni pe te lokke ni dong pe iyenyo yo mo me medo ticci pi Jehovah nyo jami ma itye kwede. Me labolle, pe rac pi Lakricitayo me keto yub me medo ticce pi Jehovah. (Rom. 12:1; 1 Tem. 3:1) Dok ka wayeng ki kwowa, pe wabirwenyo yomcwinywa pi paro mot me tic mo ma wabyeko ni wabinongo.

2. Gin marac ango ma twero timme ka pe wayeng ki jami ma watye kwede?

² Ka pe wayeng ki jami ma watye kwede, watwero cako moko tam maraco. Me labolle, jo mogo ma pe giyeng ki jamigi, gitiyo wa i nge cawa me tic wek gibed ki kare me tiyo cente madwong me wilo jami ma bene pe mitte i kwogi. Ki cwercwiny, kadi wa Lukricitayo mogo dong gukwalo cente nyo jami mogo ma cwinygi maro. Oromo bedo ni gutamo ni, ‘Gin eni opore me bedo mega adada,’ ‘Akuro dong oromo, pe kanye,’ nyo ni ‘Abikwanyo cente man ci aculo lacen.’ Ento kwalo kwo i kit yo mo keken cwero cwiny Jehovah dok pe kelo deyo i kome. (Car. 30:9) Tye bene jo mogo ma gujuko wa tic pi Jehovah woko pien pe gunongo mot me tic ma gubyeko ni gibinongone. (Gal. 6:9) Gin ango ma weko latic pa Jehovah cako tamo tam me timo jami malik macalo meno? Twero bedo ni motmot en ojuko bedo ma oyeng ki jamine.

3. Pwony ma pire tek ango ma wanongo ki i Jo Pilipi 4:​11, 12?

³ Wan ducu watwero pwonnye me bedo ma wayeng ki jami ma watye kwede. Lakwena Paulo owaco ni: “Apwonnye woko ma angeyo ni, gin ma atye kwede romma.” (Kwan Jo Pilipi 4:​11, 12.) En ocoyo lok meno i kare ma kitweye i buc. Kadi bed kit meno, en onongo pe orwenyo yomcwinye. En onongo ‘opwonnye’ me yeng ki jamine. Ka wanongo ni tek me yeng ki jamiwa, lok pa Paulo kacel ki jami mutimme i kwone twero cuko cwinywa me bedo ma wayeng ki jami ma watye kwede. Pe omyero watam ni yot me bedo ma wayeng ki jami ma watye kwede i kwo. Me ka meno, omyero wapwonnye me bedo ma wayeng ki kwowa. Watimo man nining? I pwony man, wabinyamo kit mogo mapatpat ma romo konyowa me bedo ma wayeng ki jamiwa.

BED KI PWOC PI JAMI MA ITYE KWEDE

4. Pingo bedo ki pwoc konyowa me bedo ma wayeng ki jamiwa? (1 Jo Tecalonika 5:18)

⁴ Ngat ma tye ki cwiny me pwoc pol kare yeng ki jami ma en tye kwede. (Kwan 1 Jo Tecalonika 5:18.) Me labolle, ka watye ki pwoc pi jami ma mitte ma watye kwede, ci pe wabibedo ka paro pi jami ma wape kwede dok pe mitte botwa. Ka watye ki pwoc pi mot me tic pi Jehovah ma watye kwede i kare-ni, ci man bikonyowa me tamo kit ma watwero dongo kwede diro i ticwa man me ka paro pi mot me tic mukene. Man aye oweko Ginacoya pol kare cuko cwinywa me pwoyo Jehovah i legawa! Ka watye ki pwoc pi jami ma watye kwede ci wabibedo ki “kuc pa Lubanga ma kato ngec pa jo ducu.”—Pil. 4:​6, 7.

5. Jami ango ma Jehovah otimo pi Luicrael ma onongo myero owek gubed ki pwoc? (Nen bene cal.)

⁵ Nen kong gin mutimme i kom Luicrael. Tyen mapol, gin gubedo ka nguru i kom Jehovah pien onongo gimito camo cam ma onongo gicamo i lobo Ejipt. (Wel 11:​4-6) Lok ada tye ni, kwo i dye tim aroo onongo pe yot. Gin ango ma onongo romo konyogi me bedo ma guyeng ki jami ma gitye kwede? Onongo myero gulwod jami mapol ma Jehovah otimo pigi dok onongo myero gunyut pwoc pi jami magi. Me labolle, i kare ma gitye i Ejipt, onongo kiterogi marac macalo opii, ento lacen Jehovah ocwalo gemo apar i kom Luejipt wek kigonygi. I kare ma Luicrael gitye ka a ki i Ejipt, “guyako” ryal, jabu, kacel ki bongi mapol. (Nia 12:​35, 36) I kare ma kiguro wi Luicrael i kin mony pa Parao ki Nam Makwar, Jehovah otimo tango ci oyabo dye nam wek gukat ki iye. Dok i kare ma gitye ka wot i dye tim aroo, en opitogi nino ducu kun minigi manna. Dong, pekogi onongo tye ka kwene? Kadi bed Jehovah onongo ominigi cam muromo me acama, gin pe gunyuto pwoc pi jami ma onongo gitye kwede.

6. Jami ango ma waromo timone ma twero konywa me dongo cwiny me nyuto pwoc?

⁶ Ngo ma romo konyi me dongo cwiny me nyuto pwoc? Me acel, kwany kare me tam i kom jami ma yomo cwinyi. Itwero bene coyo jami aryo nyo adek ma itye ki pwoc pire. (Koko 3:​22, 23) Me aryo, nyut pwocci pi jami magi. Kwany kare me pwoyo jo mukene pi jami mabeco ma gutimo piri. Ma pire tek loyo, pwo Jehovah nino ducu. (Jab. 75:1) Me adek, yer lurem ma gin bene ginyuto pwoc. Ka luremwa pe ginyuto pwoc nyo pol kare gimaro nguru, ci wan bene wabidoko calo gin. Ento ka luremwa ginyuto cwiny me pwoc, ci lanengi maber bene twero tugo cwinywa me nyuto pwoc. (Nwo. 1:​26-28; 2 Tem. 3:​1, 2, 5) Ka wayenyo kare me pwoyo jo mukene, ci pe wabiketo cwinywa i kom pekkiwa nyo i kom jami ma wamito ento nongo wape kwede.

7. Gin ango ma okonyo Amelia me yeng ki jami ma en tye kwede?

⁷ Nen kong gin mutimme i kom laminwa mo ma bedo i lobo Indonesia ma nyinge Ameliaa. En owaco ni: “I kare me two Korona, acako poro kwona ki kwo pa luye luwota mukene. Macalo adwogine, arwenyo yomcwiny kacel ki pwoc pi jami ma onongo atye kwede.” (Gal. 6:4) Gin ango ma okonyo Amelia me loko nenone? Amelia owaco ni: “Acako lwodo jami mabeco ma onongo Jehovah tye ka mina nino ducu. Abedo bene ka tamo matut i kom mot mapol ma atye kwede pien atye i dul pa Jehovah. Dok onongo apwoyo Jehovah pi jami magi ducu. Macalo adwogine, acako bedo ma ayeng ki kwona.” Ka cwinyi pe yom pi pekki ma tye i kwoni ci tim gin ma Amelia otimo-ni wek okonyi ibed ki pwoc pi jami ma itye kwede i kwoni.

BED NGAT MAMWOL

8. Gin ango ma otimme i kom Baruk?

⁸ Karan pa Jeremia ma nyinge Baruk cwinye otur adada i kare mo. Baruk onongo tye ki tic matek me atima. Onongo mitte ni en okony lanebi Jeremia me tito ki Luicrael ma kitgi tek-ki gin ma onongo bitimme i komgi pien pe gubedo lugen bot Jehovah. Ento me ka keto cwinye i kom cobo tic ma Jehovah mito ni en otim, Baruk ocako keto cwinye mukato kare woko ka yenyo jami mukene. Jehovah otiyo ki lanebi Jeremia me cikke ni: “Itye ka yenyo gin mogo madito piri keni? Pe iyenygi.” (Jer. 45:​3-5) I yo macek, Jehovah onongo tye ka waco ki Baruk ni: “Bed ma iyeng ki jami ma itye kwede.” Baruk ojolo tira meno dok omedde ki bedo ki wat macok ki Jehovah.

9. Ma lubbe ki 1 Jo Korint 4:​6, 7, gin ango ma cwiny me mwolo bikonyowa me niang iye? (Nen bene cal.)

⁹ I kare mogo, latic pa Jehovah twero tamo ni epore me nongo mot me tic moni. En twero tamo kit man pien nongo tye ki diro mapol, obedo latic matek, nyo dong otiyo pi Jehovah pi mwaki mapol. Kadi bed kit meno, jo mukene aye gitwero nongo mot me tic meno ma en mito-ni. Gin ango ma twero konyo omego-ni ka ce cwinye otur? En omyero olwod lok ma lakwena Paulo ocoyo i 1 Jo Korint 4:​6, 7. (Kwan.) Mot me tic ducu ma wanongo kacel ki diro ma watye kwede a ki bot Jehovah. Jehovah pe miniwa jami magi pien ni wan dok waber waloyo jo mukene-ni. Me ka meno, Jehovah miniwa mot magi pi mar kacel ki kica ma en tye kwede i komwa.—Rom. 12:​3, 6; Ep. 2:​8, 9.

10. Watwero dongo cwiny me mwolo nining?

¹⁰ Watwero dongo cwiny me mwolo ka watamo matut i kom lanen ma Yecu owekiwa. Tam kong i kom gin mutimme i dyewor ma Yecu olwoko iye tyen lukwenane. Lakwena Jon ocoyo ni: “Yecu onongo ngeyo ni [1] Won otyeko miyo jami ducu i cinge, dok ni [2] ea ki bot Lubanga, dok [3] edok bot Lubanga,” ento en ‘ocako lwoko tyen lupwonnyene.’ (Jon 13:​3-5) Yecu onongo twero tamo ni lukwenane aye myero gulwok tyene. Ento Yecu pe obedo ki tam ni kit macalo en Wod pa Lubanga, omyero ebed ki ot maber, cente madwong, nyo kwo mayot. (Luka 9:58) Yecu obedo ngat mamwol dok onongo yeng ki jami ma en tye kwede. En owekiwa lanen ma pud dong ber loyo me aluba!—Jon 13:15.

11. Gin ango ma okonyo Dennis me bedo ma oyeng ki mot ma en tye kwede?

¹¹ Omego Dennis ma bedo i lobo Netherlands, otute matek me lubo lanen me mwolo pa Yecu, ento timo meno pe obedo yot. En otito ni: “Ka ngat mo onongo mot me tic ma an onongo amito, i kare mogo cwinya tur adada pien awinyo ni an aye onongo apore me nongo mot meno. Ka gin ma kit meno otimme, akwano pwony ma giloko i kom mwolo. I JW Laibrari, aketo alama i kom ginacoya mogo ma giloko i kom mwolo wek ka amito kwanogi, anongogi oyotoyot. Akwanyo bene vidio mogo ma giloko i kom mwolo ci aketogi i cimma, dok abedo ka nenogi teretere.b Aniang ni jami ducu ma atimo pi Jehovah myero obed me kelo deyo bote, ento pe me ywayo tam pa dano i koma. Jehovah miyo ki ngat acel acel tic me atima ento en aye weko ticwa ducu cobbe kakare.” Ka ce cwinyi otur pi mot me tic mo ma ipe kwede, tute matek me dongo cwiny me mwolo. Man bijingo watti ki Jehovah dok bikonyi me yeng ki mot ma itye kwede.—Yak. 4:​6, 8.

LWOD LOK I KOM CIKKE PA JEHOVAH

12. Cikke mamwonya ango ma twero konyowa me bedo ma wayeng ki jami ma watye kwede? (Icaya 65:​21-25)

¹² Wabedo ma wayeng ki jami ma watye kwede ka walwodo lok i kom gen mamwonya ma watye kwede pi anyim. I buk pa Icaya, Jehovah otitiwa ni eniang ni watye ka kato ki i pekki mapol. Ento en bene ocikke ni ebijwayo pekki magi ducu woko. (Kwan Icaya 65:​21-25.) Wabibedo ki gangi maleng. Wabitiyo tic ma wamaro, dok wabicamo cam mamit ma kelo yotkom. Pe dong wabibedo ki par ni gin mo marac twero timme i komwa nyo i kom lutinowa. (Ic. 32:​17, 18; Ejek. 34:25) Watye ki gen matek ni cikke magi ducu bicobbe kakare.

13. I kare macalo mene ma mitte ni waket cwinywa i kom gen ma watye kwede pi anyim?

¹³ Mitte ni waket cwinywa i kom gen ma watye kwede i kare-ni makato kare mo keken. Pingo? Pien watye ka kwo “i kare me agikki” dok wan ducu watye ki pekki ma “lweny kwedgi tek.” (2 Tem. 3:​1, NWT) Nino ki nino, Jehovah konyowa me ciro pekki magi ki miniwa tira, kero, kacel ki kony ma wamito. (Jab. 145:14) Medo i kom meno, gen ma watye kwede macalo Lukricitayo konyowa i kare ma kwo tek. Twero bedo ni itye lacan dok itute atuta me nongo ginacama, bongi, kacel ki ot me bedo pi jo me paconi. Tika man tyen lokke ni ibibedo lacan matwal? Pe tye kit meno! Jehovah ocikke me mini jami ma mitte madwong makato i Paradic. (Jab. 9:18; 72:​12-14) Twero bedo ni itye ka lweny ki two ma pe cang, two par, nyo two mo mukene malit adada. Tika ibilweny ki two man pi naka labongo gen mo me cang? Pe tye kit meno. Lubanga bijwayo two kacel ki to woko i lobo manyen. (Yabo 21:​3, 4) Gen man konyowa pe me bedo ki cwercwiny nyo akemo pi jami maraco ma tye ka timme i komwa i kare-ni. Pud watwero medde ki bedo ki yomcwiny kacel ki kuc kadi bed ngat mo oterowa marac, ka danowa me amara oto, nyo ka gin mo marac otimme i kwowa. Pingo? Pien wangeyo ni “un ma giunowa kwede pe pek” dok ni pe wabideno can matwal i Paradic macok bino-ni.—2 Kor. 4:​17, 18.

14. Watwero jingo genwa pi anyim nining?

¹⁴ Pien gen ma watye kwede pi anyim konyowa me bedo ma wayeng ki jamiwa, gin ango ma dong twero konyowa me bedo ki gen matek ni cikke pa Jehovah wang ma ocobbe? Kit macalo twero mitte ni ngat moni oruk kiyo wek onen maber jami ma tye ka mabor, mitte bene ki watim jami mogo ma twero konyowa me goyo kit ma kwowa bibedo kwede i Paradic. Me labolle, ka par onurowa woko pien ni wape ki cente ma mitte me kwo, watwero goyo kit ma kwo bibedo kwede i lobo manyen ma nongo cente pe bimitte dok ngat mo pe bibedo lacan. Ka wawinyo ni cwinywa otur pien wape ki mot me tic moni, watwero goyo kit ma jami magi pigi pe bibedo tek kwede ka kiporo ki kit ma kwo bibedo kwede i nge tic pi Jehovah pi mwaki mapol ma nongo dong wape ki roc. (1 Tem. 6:19) Watwero bedo ka paro pi jami mapol i kare-ni ma weko bedo tek piwa me lwodo cikke pa Jehovah pi anyim. Ento ka wabedo ka tamo pi anyim mamwonya ma Jehovah ocikke pire, ci bidoko yot piwa me keto tamwa i kom cikke magi ento pe i kom pekkiwa.

15. Gin ango ma ipwonyo ki i lok pa Christa?

¹⁵ Nen kong kit ma gen okonyo kwede laminwa Christa, dako pa Dennis ma kiloko i kome con-ni. Christa otito ni: “Atye ki two ma weko ler koma ducu bedo magoro adada. Pe atwero wot dok atiyo ki lela pa lungolo, dok pol kare abedo ka buto abuta. Atye ki arem matek nino ducu. Macok cok-ki, daktarna owacca ni pe abicang. Ento cutcut atamo ni, ‘En pe neno anyim kit ma an aneno kwede.’ Aketo tamma ducu i kom genna dok meno weko abedo ma wiya opye mot. I kare-ni, mitte ni akany pekki mapol ento abinongo mit pa kwo i lobo manyen!”

“GIN MO PE MA REM BOT JO MA GILWORE”

16. Pingo Daudi onongo twero coyo ni “gin mo pe ma rem” bot jo ma gilworo Jehovah?

¹⁶ Kadi bed wayeng ki kwo ma watye iye, pud wabibedo ki pekki. Tam kong i kom Kabaka Daudi, en orwenyo lutinone adek i to. Kimoro adot gobagoba i kome, kitimo tim me roro i kome, dok kabaka Caulo obedo ka dwarre me aneka pi mwaki mapol. Kadi bed en okato ki i pekki magi ducu, Daudi omedde ki bedo ma oyeng ki kwone. En oloko kit man i kom Jehovah: “Gin mo pe ma rem bot jo ma gilwore.” (Jab. 34:​9, 10) Pingo onongo en twero waco lok meno? Pien onongo ngeyo ni kadi bed Jehovah pe gengo pekki ki timme i kwowa, En onongo kare ducu bimiyo jami ma mitte bot Daudi. (Jab. 145:16) Calo Daudi, wan bene watwero bedo ki tekcwiny ni Jehovah bikonyowa me kanyo pekki ma watye ka kato ki iye. Pi meno, watwero bedo ki kuc kacel ki yomcwiny kadi bed watye ka kato ki i kwo matek.

17. Pingo imoko tammi me pwonnye me bedo ma iyeng ki kwoni?

¹⁷ Jehovah mito ni wabed ma wayeng ki kwowa. (Jab. 131:​1, 2) Pi meno, tute matek me pwonnye me yeng ki jami ma itye kwede. Ka itute me dongo cwiny me pwoc, bedo ngat mamwol, ki dong jingo genni, ibibedo ki kare me waco ni: “Iyo, dong anongo ginaleya maber ma romma.”—Jab. 16:​5, 6.