Yo Maber Loyo me Dok i kom Tim Maraco

1-2. Jo mapol gidok i kom tim maraco nining, dok gin ango ma wabinyamo i pwony man?

JO MAPOL i kare-ni kiterogi marac adada. Kiterogi marac pien ni gubedo lucan, nyo pi ka ma gia ki iye, kit ma ginen kwede, nyo pi tyen lok mukene. Jo mapol gideno can pien lulonyo mogo nyo lutela pa gamente ma gin lucamucana giparo pi nongo cente keken. Jami maraco magi twero gudowa atir atir nyo ngat mo ma wangeyo.

² Pe tye me ur ni jo mapol gitye ki akemo pi kit ma kiterogi kwede marac nyo pien guneno ka kitero jo mukene marac. Dano ducu gimito ni kitergi maber dok gikwo ki kuc. Jo mogo gitute me cobo pekki ma gineno timme i kabedogi nyo i wi lobo. Gijemo i kom gamente kacel ki cik mogo, nyo gibolo kwir bot latela me wibye ma ocikke me cobo pekkigi. Ento macalo Lukricitayo, kipwonyowa pe me bedo “jo me lobo” ento me keto genwa i kom Ker pa Lubanga ma bijwayo tim maraco ducu. (Jon 17:16) Kadi bed kit meno, cwinywa pud cwer dok i kare mogo akemo makowa ka waneno kitye ka tero jo mukene marac. Watwero pennye kekenwa ni: ‘Myero adok i kom tim maraco nining? Tika tye gin mo ma atwero timone i kare-ni ka aneno tim maraco?’ Me gamo lapeny magi, kong wacaku ki neno kit ma Jehovah gin ki Yecu giwinyo kwede i kom tim maraco.

JEHOVAH GIN KI YECU PE GITERO DANO I YO MARAC

3. Pingo pe rac me bedo ki akemo ka kiterowa nyo jo mukene marac? (Icaya 5:7)

³ Baibul tito tyen lok mumiyo pe wamito ni kiterwa nyo jo mukene marac. Tye kit meno pien Jehovah ocweyowa ki kero me lubo kite. Dok en “maro kit ma atir ki ngolo kop atir.” (Jab. 33:5; Acak. 1:26) En pe tero dano i yo marac dok pe mito ni dano guter luwotgi marac! (Nwo. 32:​3, 4; Mika 6:8; Jek. 7:9) Me labolle, i kare pa lanebi Icaya, Jehovah owinyo “twon koko me can” ma oa ki bot Luicrael ma onongo luwotgi tye ka unogi. (Kwan Icaya 5:7.) Jehovah omiyo pwod bot jo ma gumedde ki turo cikke kun gitero luwotgi i yo marac.—Ic. 5:​5, 13.

4. Yecu winyo nining ka kitero ngat mo marac? (Nen bene cal.)

⁴ Calo Wonne Jehovah, Yecu bene maro ngolo kop atir. I nino mo acel, Yecu oneno laco mo ma bade tungcel otal woko. Kica omako Yecu i kom laco meno ci ocango bade woko. Ento i kare ma lupwonye dini guneno gin ma Yecu otimo, akemo omakogi matek. Guwaco ni Yecu oturo cik me Cabat. Pe guparo can pa laco meno kulu. Yecu owinyo nining i kom kit ma jo magi gudok kwede i gin mutimme-ni? “Cwinye ocwer pi nwang cwinygi.”—Mar. 3:​1-6.

5. Pingo omyero pe wamedde ki bedo ki akemo pi kare malac ka gin mo marac otimme?

⁵ Jehovah gin ki Yecu cwinygi cwer ka dano gitero luwotgi marac. Pi meno, pe rac ka wan bene wawinyo calo gin. (Ep. 4:26 ki jami me akwana me nwtsty-E pi “Ka kiniga omakowu”) Ento omyero wajuk akemowa dok wiwa myero opo ni pe watwero jwayo tim maraco. Ka wamedde ki bedo ki akemo pi kare malac, ci twero kelo two i komwa nyo miyo wabedo ki par. (Jab. 37:​1, 8; Yak. 1:20) Dong omyero wadok i kom tim maraco nining? Watwero nongo pwony ki i lanen pa Yecu.

KIT MA YECU ODOK KWEDE IYE I KARE MA ONENO TIM MARACO

6. I yo mapatpat ango ma onongo kitero kwede dano marac i kare ma onongo Yecu tye i lobo? (Nen bene cal.)

⁶ I kare ma Yecu onongo tye i lobo, en oneno ka kitero dano marac. En onongo ngeyo ni lupwonye dini gumedo cik mapol ma onongo weko kwo pa dano bedo tek adada. (Mat. 23:​2-4) En bene onongo ngeyo ni luloc me Roma onongo gitero dano marac adada. Lujudaya mapol onongo gimito a woko ki i te loc pa Luroma. Jo mogo bene gucako dulgi ma onongo lwenyo i kom loc pa Luroma. Ento Yecu pe odonyo i dul mo keken ma onongo lwenyo me loko gamente. Dok i kare ma onongo lwak gimito mako Yecu tektek me kete me bedo kabaka, en olwi woko ki botgi.—Jon 6:15.

7-8. Pingo Yecu pe otute me jwayo tim maraco woko i kare ma en tye i lobo? (Jon 18:36)

⁷ I kare ma Yecu onongo tye i lobo, en pe orwako wiye i tim me wibye wek ecob pekki ma onongo nenogi. Pingo? Pien en onongo ngeyo ni pe tye dano mo keken ma tye ki twero nyo kero me loyo jo mukene. (Jab. 146:3; Jer. 10:23) Dok pe tye dano mo ma twero kwanyo tyen lok ma omiyo peko tye, ma meno aye Catan ki roc ma watye kwede. Catan Larac-ci aye loyo lobo man. En ger, cwinye col dok dano mapol i lobo-ni gitye ka lubo lanene. (Jon 8:44; Ep. 2:2) Dok pi roc ma watye kwede weko pe twerre kadi wa pi jo ma kitgi beco me timo gin maber i kare ducu.—Latit. 7:20.

⁸ Yecu onongo ngeyo ni Ker pa Lubanga keken aye twero kwanyo tyen lok mumiyo peko tye. Meno aye omiyo en otiyo matek me tito “lok me kwena maber i kom ker pa Lubanga.” (Luka 8:1) En ocuko cwiny “jo ma kec ki orwo pii nekogi pi bedo jo ma kitgi atir” ni agikki me camucana ki tim maraco bibino. (Nen jami me akwana me nwtsty-E pi Matayo 5:6; Luka 18:​7, 8) Pe tye gamente pa dano mo keken ma twero kelo alokaloka magi. Ker pa Lubanga keken aye bitimo meno, dok Ker meno “pe me lobo man.”—Kwan Jon 18:36.

LUB LANEN PA YECU KA IKEMME KI TIM MARACO

9. Pingo iye ni Ker pa Lubanga keken aye bijwayo pekki ducu?

⁹ Watye ka kwo “i kare me agikki” me lobo man, pi meno pekki dwong makato i kare ma onongo Yecu tye i lobo. Ento kit ma otimme kwede i kare pa Yecu, Catan kacel ki jo ma lubbe aye gikelo peko i lobo. (2 Tem. 3:​1-5, 13; Yabo 12:12) Calo Yecu, wangeyo ni Ker pa Lubanga keken aye bijwero Catan, lakel peko ma loyo ducu, dok bijwayo tim maraco woko. Kit macalo wabedo lutit kwena me Ker pa Lubanga, pe wadonyo i jemo mo keken dok pe waketo genwa i kom gamente pa dano ni bigiko tim maraco. Nen kong gin mutimme i kom laminwa mo ma nyinge Stella.a Ma peya en opwonyo ada, Stella onongo pol kare dorre i dye gudi ki miti me kelo alokaloka. Ento i nge kare mo, en ocako bedo ki akalakala ka ada dorre-ni bikonyo me cobo pekki pa dano. En owaco ni: “Ka onongo atye ka dorre, onongo apennye ka ce atye tung ka maber. Ento i kare man ma dong acwako Ker pa Lubanga-ni, angeyo ada ni atye tung ka maber. Angeyo ni Jehovah bigiko pekki ducu, dok meno obedo gin ma an pe atwero timone.”—Jab. 72:​1, 4. 

10. Ma lubbe ki Matayo 5:​43-48 pingo pe watemme me loko cik kacel ki gamente? (Nen bene cal.)

¹⁰ Dano mapol i kare-ni gidonyo i dul mogo ma gimito loko gamente. Ento, jo mapol i kingi cwinygi doko kec ci gicako turo cik kacel ki wano jo mukene. Meno aye pe gin ma Yecu opwonyowa me timone. (Ep. 4:31) Omego mo ma nyinge Jeffrey owaco ni: “Angeyo ni ka dano gitye ka jemo, cwinygi twero doko kec oyotoyot ma miyo gicako balo jami kacel ki kwalo kwo, dok bene gitwero wano jo mukene.” Ento Yecu opwonyowa ni omyero water dano ducu ki mar, kadi wa jo ma pe giye lokwa nyo giunowa. (Kwan Matayo 5:​43-48.) Macalo Lukricitayo, wagwokke ki timo gin mo keken ma pe rwatte ki lanen ma Yecu owekiwa.

11. Pingo i kare mogo wanongo ni tek me lubo lanen pa Yecu?

¹¹ Kadi bed wangeyo ni Ker pa Lubanga bijwayo tim maraco woko matwal, pud watwero nongo ni tek me lubo lanen pa Yecu ka kiterowa marac. Meno aye kit ma laminwa mo ma nyinge Janiya owinyo kwede i kare ma kitere marac pi kala me del kome. En owaco ni: “Lok ma dano guloko i koma ocwero cwinya mada. Akemo bene omaka matek dok onongo amito ni jo magi gunong pwod. Meno oweko acako bedo ki tam me donyo i dul mo ma gilwenyo i kom tim me apokapoka me rangi del kom. Atamo ni timo man biweko awinyo maber.” Ento i nge kare mo, Janiya oniang ni omyero elok tamme. En owaco ni: “Onongo atye ka ye ki jo mukene me doro tamma, mumiyo acako geno dano me ka keto genna i kom Jehovah. Amoko tamma me giko ribbe woko ki dul meno.” Kadi bed akemo makowa ka kiterowa nyo jo mukene marac, omyero wajuk kinigawa dok kare ducu wamedde ki bedo ma pe wacwako tung ka mo keken.—Jon 15:19.

12. Pingo omyero wabed ma wagwokke ka odok i kom gin ma wakwano, waneno nyo wawinyo?

¹² Gin ango ma twero konyowa me bedo ma komwa opye mot ka kiterowa nyo jo mukene marac? Gin acel ma twero konyowa aye me bedo ma wagwokke ka odok i kom gin ma wakwano, waneno nyo wawinyo. Lok mogo ma kiketogi i Intanet kicoyogi me kok i kom gamente dok lok mogo kimedo kado iye i yo ma miyo balo cwiny dano. Pol kare, luco lok angeya gitwero waco tam ma meggi, ento pe gin mutimme kikome. Kadi bed lok ma gucoyo-ni tye kakare, pe watwero cobo pekki ka wamedde ki kwano gin mutimme. Ki lok ada, ka watero kare malac ka winyo nyo kwano lok angeya ma kit meno, watwero cako bedo ki par mukato kare, cwercwiny, ki dong akemo. (Car. 24:10) Ma dong rac loyo, watwero juko keto pi Ker pa Lubanga mukwongo i kwowa dok wiwa twero wil woko ni Ker meno keken aye bicobo pekki ducu ma wakemme kwede.

13. Yub me kwano Baibul nino ducu konyowa nining ka waneno kit ma kitero kwede dano marac?

¹³ Ka watye ki yub me kwano Baibul ki lwodo lok nino ducu, man twero konyowa me kanyo tim maraco ma kitimo i komwa. Laminwa mo ma nyinge Alia cwinye ocwer adada me neno kit ma kiuno kwede dano mogo ma i kabedogi. Akemo omake matek ni jo ma gubedo ka timo jami magi pe kimiyo botgi pwod mo keken. En owaco ni: “Akwanyo kare me pennye kekena ni, ‘Tika aye ni Jehovah bicobo pekki magi ducu?’ I kare meno aye akwano iye Yubu 34:​22-29. Tyeng magi opoyo wiya ni pe tye ngat mo ma twero kanne woko ki i wang Jehovah. En kene aye ngolo kop atir, dok en kene aye bicobo pekki pa dano ducu.” Ento ka wawoto ki kuro Ker pa Lubanga me cobo pekki pa dano ducu, gin ango ma watwero timone i kare-ni?

GIN MA WATWERO TIMONE I KARE-NI

14. Gin ango ma watwero timone i kare-ni? (Jo Kolocai 3:​10, 11)

¹⁴ Pe watwero loko kit ma dano gitero kwede luwotgi ento watwero tute me tero dano i yo maber. Kit ma dong wanyamo kwede, walubo lanen pa Yecu ki nyuto mar bot dano ducu. Mar ma kit meno twero tugo cwinywa me nyuto kica bot dano ducu, kadi wa bot jo ma giunowa. (Mat. 7:12; Rom. 12:17) Jehovah cwinye bedo yom ka watero dano ducu maber dok ki kica.—Kwan Jo Kolocai 3:​10, 11.

15. Watwero konyo dano nining ka watito botgi gin ma Baibul pwonyo?

¹⁵ Gin ma pire tek loyo ma watwero timone me lweny ki tim maraco aye ki nywako lok ada me Baibul ki jo mukene. Pingo watwero wacone kit meno? Pien “ngec pa [Jehovah]” twero loko ngat ma onongo ger dok kite rac me doko ngat ma lakica ma maro kuc. (Ic. 11:​6, 7, 9) Ma peya laco mo ma nyinge Jemal opwonyo lok ada, en odonyo i dul pa adwii ma gilwenyo me loko gamente me lobogi pien en onongo tamo ni gamentegi rac. En owaco ni: “Pe itwero loko dano ki lweny i komgi. Ento ka gupwonyo lok ada me Baibul, gitwero lokke. Meno aye kit ma alokke kwede.” Gin ma Jemal opwonyo otugo cwinye me timo alokaloka. Dong ka wapwonyo dano lok ada ma nonge i Baibul, watwero konyogi me giko timo jami ma wano jo mukene.

16. Pingo itye ki miti me pwonyo dano lok i kom Ker pa Lubanga?

¹⁶ Calo Yecu, wan bene watye ki miti madwong me tito bot dano ni Ker pa Lubanga keken aye bicobo pekki ducu matwal. Gen meno twero cuko cwiny jo ma kiterogi marac. (Jer. 29:11) Stella, ma kiloko i kome con-ni, otito ni: “Pwonyo lok ada okonya me kanyo tim maraco ma aneno ki ma akato ki iye. Jehovah tiyo ki kwena me Baibul me miyo kwecwiny.” Me nywako kwena me kwecwiny ma nonge i Baibul ki jo mukene, myero wabed ma wayubbe maber. Ka iniang maber gin ma Baibul tito i kom deno can, ci itwero bedo ki gen matek i kom pwony magi. Dong ibibedo ki kare me pwonyo jo mukene i cukul nyo i ka ticci, tyen lok mumiyo wadeno can ki gin ma Jehovah bitimone me giko pekki.b

17. Jehovah konyowa nining ka kiterowa marac?

¹⁷ Wangeyo ni wabimedde ki deno can ka pud Catan aye “lalo lobo man.” Ento watwero ciko wangwa i kom kwo maber ma tye anyim pien Jehovah ocikke ni ebikonyowa dok ebikwanyo Catan kacel ki tim maraco woko ducu. (Jon 12:31) I Ginacoya, Jehovah otitiwa pingo tim maraco onya tutwal ki dok ni eparo pi jo ma kiterogi marac. (Jab. 34:​17-19) Wapwonyo ki bot Yecu kit ma myero wadok kwede iye ka kiterowa marac. Dok cokcok-ki, Ker pa Lubanga bijwayo tim maraco dok ngat mo pe dong bideno can. (2 Pet. 3:13) Dong omyero wamedde wunu ki tito kwena maber me Ker-ri ki mit kom, kun wamedde ki kuro kare ma lobo ducu bipong ki ‘ngolo kop atir ki kit ma atir.’—Ic. 9:7.