Nyut Woro Bot Jo Mukene

1. Pingo dano gimito ni kiworgi? (Carolok 22:1)

TIKA yomo cwinyi ka jo mukene gunyutti woro? Ngene kene. Dano ducu gimito ni kiworgi. Wawinyo maber adada ka jo mukene gunyutiwa woro. Meno aye gin mumiyo Baibul waco ni ‘woro ma dano gimiyo boti ber loyo ryal nyo jabu!’—Kwan Carolok 22:1.

2-3. Pingo i kare mukene pe twero bedo yot me nyuto woro bot dano, dok angagi ma omyero wanyutigi woro?

² I kare mogo, pe twero bedo yot me nyuto woro bot jo mukene. Tyen lok acel aye ni, waneno goro pa jo ma wabedo cok kwedgi. Medo i kom meno, watye ka kwo i kare ma pol pa dano pe ginyuto woro. Ento wan omyero wabed pat. Pingo? Pien Jehovah mito ni wanyut woro bot “dano ducu.”—1 Pet. 2:17.

³ I pwony man, wabinyamo gin ma nyuto woro bot jo mukene kwako ki dong kit ma watwero nyutone kwede bot (1) jo me gangiwa, (2) luye luwotwa, ki dong (3) jo ma pe gubedo Lucaden. Wabineno tutwalle kit ma waromo nyuto kwede woro i kare ma timone tek.

TYEN LOKKE NGO ME NYUTO WORO BOT JO MUKENE?

4. Tyen lokke ngo me nyuto woro bot jo mukene?

⁴ Tyen lok me woro romo gonnye nining? I leb mogo, “woro” ki “deyo” gikubbe macok adada. I yo ma nining? “Woro” tutwalle kwako kit ma waneno kwede ngat moni. Ka waworo ngat moni, nongo waneno en calo ngat ma opore me nongo pwocwa, gwok nyo pien ni kite ber, nyo pi jami ma en ocobogi nyo bene rwom ma en tye kwede. Ento “deyo” kwako kit ma watero kwede ki ngat moni. Ka wamiyo deyo ki ngat moni, nongo watere i yo ma weko en winyo ni pire tek, kimare, dok kiwore. Ki lok ada, wek deyo ma wamiyo obed me ada, myero oa ki i cwinywa.—Mat. 15:8.

5. Gin ango ma twero tugo cwinywa me woro jo mukene?

⁵ Jehovah mito ni wanyut woro bot jo mukene. Me labolle, en tittiwa ni omyero wanyut woro bot ‘luloc ma giloyowa.’ (Rom. 13:​1, 7) Ento jo mogo giwaco ni, “An atye atera me miyo woro ki dano teke gitimo jami mabeco.” Tika meno tam ma tye atir? Pe. Waniang ni omyero wanyut woro bot jo mukene labongo paro pi gin ma gitimo, ento pien ni Jehovah mito ni waworgi dok wamito yomo cwinye.—Yoc. 4:14; 1 Pet. 3:15.

6. Tika twerre me nyuto woro bot ngat ma pe worowa? Tit kong. (Nen bene cal.)

⁶ Jo mukene gitwero pennye ni, ‘Tika watwero nyuto woro bot ngat mo ma pe worowa?’ Twerre. Nen kong labol mogo. Kabaka Caulo oloko ki wode Yonacan ki gero i nyim jo mukene. (1 Cam. 20:​30-34) Kadi bed kit meno, Yonacan pud onyuto woro bot wonne, dok gumedde ki cito i dog lweny kacel nio wa i nino ma kineko iye Caulo. (Nia 20:12; 2 Cam. 1:23) Lalamdog Madit Eli bene okok i kom Anna ni omer. (1 Cam. 1:​12-14) Ento Anna oloko ki woro bot Eli, kadi bed dano ducu me Icrael onongo gingeyo ni Eli pe otiro awobene ma onongo giraco-ni, kun meno onongo obedo ticce macalo wego ki lalamdog madit. (1 Cam. 1:​15-18; 2:​22-24) Dok co mogo me Atene guyeto lakwena Paulo, kun gilwonge ni “lalok atata-ni.” (Tic 17:18) Kadi bed kit meno, Paulo oloko kwedgi ki woro. (Tic 17:22) Labol magi nyuto ni mar matut pi Jehovah kacel ki bedo ma walworo cwero cwinye bitugo cwinywa me nyuto woro bot jo mukene kadi bed timone yot nyo tek. Kong dong wanenu angagi ma omyero wanyut woro botgi.

NYUT WORO BOT JO ME PACOWU

7. Gin ango ma twero weko bedo tek me nyuto woro bot jo me pacowa?

⁷ Ariya ma tye. Watero kare malac adada ki jo me pacowa. Macalo adwogine, wangeyo gorogi kacel ki tekogi. Jo mogo i kin wadiwa gitwero bedo ki two ma weko bedo tek me gwokogi, nyo giromo bedo ki two par. Mogo gitwero waco nyo timo jami ma cwero cwinywa. Omyero wawiny agonya ka watye kacel ki lupacowa. Ento ka jo me pacowa pe ginyuto woro i kingi, ci gitwero bedo ma gukeco i kingi. Macalo adwogine, ribbe bedo pe i kin jo me ot meno. Watwero poro jo me ot ki dul kom dano. Two twero gengo dul komwa ki tic maber. I yo acel-lu, ka jo me pacowa pe gitye ki woro i kingi, man twero weko bedo tek adada botgi me tic kacel. Ento kit macalo kitwero cango kwede two mapatpat-ti, twerre bene bot jo me ot me pwonyo kit me nyuto woro i kingi.

8. Pingo pire tek me nyuto woro bot jo me pacowa? (1 Temceo 5:​4, 8)

⁸ Pingo omyero wanyut woro? (Kwan 1 Temceo 5:​4, 8.) I waragane mukwongo bot Temceo, Paulo onyamo kit ma jo me odi myero gugwok kwede luwotgi. En otito ni tyen lok ma pire tek ma omiyo wagwoko jo me odiwa i yo man, omyero pe obed ni pien man tic ma tye i wiwa, ento pi mar ma watye kwede pi Jehovah. Man tyen lokke ni watimo man pien wamaro Jehovah dok waneno meno calo obedo but worowa bote. Jehovah aye ocako te yub me ot. (Ep. 3:​14, 15) Dong ka wanyuto woro bot jo me odiwa, nongo watye ka nyuto woro bot Jehovah, ma en aye Ocako te yub me ot. (Nen jami akwana me nwtsty-E pi 1 Temceo 5:4.) Pud dong watye ki tyen lok ma pire tek ya me nyuto woro bot jo me pacowa!

9. Laco ki dako gitwero nyuto woro i kingi nining? (Nen bene cal.)

⁹ Kit me nyuto woro. Laco keto deyo i kom dakone ka nyuto ni dakone pire tek bote kadi bed gitye kengi nyo i kin lwak. (Car. 31:28; 1 Pet. 3:7) En pe lwenyo i kom dakone, pe leyo wi dakone, dok pe weko dakone tamo ni pire pe tek. Omego mo ma bedo i lobo Argentina, owaco ni: “Dakona cawa mukene waco lok mogo ma cwero cwinya adada pi two ma en tye kwede. Ka gin ma kit man otimme, apoyo wiya kekena ni man aye pe kit ma en tamo kwede. Dok wiya po i kom 1 Jo Korint 13:​5, ma konya me lok ki dakona i yo me woro ento pe ki gero.” (Car. 19:11) Ki tungcel, dako nyuto woro bot cware ki loko lok mabeco i kom cware bot jo mukene. (Ep. 5:33) En pe loko lok me cac, nyo lok me ngala ma pe nyuto mar i kom cware, dok pe yeto cware. En niang atir ni ka etimo man, ci twero balo nyomgi woko. (Car. 14:1) Lamego mo ma bedo i Italy ma cware tye ki two par owaco ni: “I cawa mukene, awinyo calo cwara tye ki par mukato kare woko i kom jami mogo. I kare mukato angec, onongo pe anyuto woro i lokka kacel ki kit ma wanga nen kwede bot cwara. Ento bedo ki lurem ma giloko maber i kom jo mukene okonya me nyuto woro i kom cwara.”

10. Jo matino giromo nyuto woro bot lunyodogi nining?

¹⁰ Wun jo matino, wulub cik mapatpat ma lunyodowu oketo piwu. (Ep. 6:​1-3) Nyut woro i kit ma wuloko kwede ki lunyodowu. (Nia 21:17) Ka lunyodowu giwoto ki teggi, nyutigi woro kun wuminigi kony ma gimito. Tute ki keroni ducu me gwokogi maber. Nen kong labol pa Maria, ma wonne pe obedo Lacaden pa Jehovah. I kare ma wonne kome odoko lit, obedo tek adada ki Maria me gwoko wonne pien onongo loko lok ma cwero cwiny Maria. Maria owacci: “Onongo pe alego me bedo ki woro keken ento me bedo ki kero me nyuto woro. Atamo kekena ni, ka Jehovah mito ni awor lunyodona, ci en bene bimina kero me timone. I nge kare mo, aniang ni omyero abed ki woro i kom babana, kadi bed kite pe olokke.” Ka wanyuto woro bot jo me pacowa kadi bed timone tek, nongo watye ka nyuto woro bot Jehovah, ma ocako te yub me ot.

NYUT WORO BOT OMEGE KI LUMEGE

11. Pingo twero bedo tek me nyuto woro bot luye luwotwa?

¹¹ Ariya ma tye. Omegiwa ki lumegiwa gitute me kwo ma lubbe ki gin ma Baibul pwonyowa, ento i kare mukene gitwero terowa marac, gitamo tam ma pe tye kakare i komwa, nyo gicwero cwinywa. Ka laye lawotwa mo ‘tye ki lok mo i komwa’, ci twero miyo bedo tek botwa me nyutte woro. (Kol. 3:13) Gin ango ma romo konyowa me medde ki nyuto woro?

12. Pingo pire tek me nyuto woro bot luye luwotwa? (2 Petero 2:​9-12)

¹² Pingo omyero wanyut woro? (Kwan 2 Petero 2:​9-12.) I waragane me aryo, lakwena Petero oloko i kom Lukricitayo mogo i cencwari me acel ma gubedo ka “yeto wegi deyo.” Wegi deyo magi gubedo luelda. Kadi bed lumalaika guneno gin ma jo magi gutimo-ni, ento gudok iye nining? Pi woro ma gitye kwede i kom Jehovah, omiyo pe guwaco kadi nyig lok mo acel marac i kom lujemo magi. Man obedo gin me ur adada! Lumalaika gugwokke pe me lok marac i kom jo magi ma gin luwaka-ni. Me ka meno, guye ni Jehovah aye ongol kop i kom jo magi dok ojukgi. (Rom. 14:​10-12; por ki Juda 9.) Watwero nongo pwony ki bot lumalaika. Lumalaika pe gicayo kadi wa jo ma gin lujemo. Dong, wan bene omyero wagwokke pe me nyuto cac i kom omege ki lumege ma gimaro Jehovah. Me ka meno, wan aye omyero watel yo ka odok i kom miyo deyo bot luwotwa. (Rom. 12:10) Ka watimo meno, wanyuto ni waworo Jehovah.

13-14. Watwero nyuto woro bot jo me kacokke nining? Mi labol mogo. (Nen bene cal.)

¹³ Kit me nyuto woro. Wun luelda, kare ducu ka wutye ka pwonyo jo mukene, wutute me timone i yo me mar. (Pile. 8, 9) Ka mitte ni imi tira ki ngat mo, mi ki kica ento pe i kare ma nongo ikeco. Wun lumege, wutwero konyo jo me kacokke me bedo ki woro i kingi ka pe wuye kwoto nying nyo balo nying ngat mo keken. (Tito 2:​3-5) Wan ducu waromo nyuto woro bot luelda me kacokke ka watiyo kacel kwedgi dok wamiyo pwoc pi tic matek ma gitimo me doro cokke, telo wi tic me tito kwena, ki dong konyo jo ma ‘gutimo bal.’—Gal. 6:1; 1 Tem. 5:17.

¹⁴ Laminwa mo ma nyinge Rose owaco ni i kare mo enongo ni tek me nyuto woro bot laelda mo ma omine tira. En owaco ni: “Cwinya ocwer pien awinyo calo en pe oloko kweda i yo me mar. Abedo ka lok marac i kome ki gang. Kadi bed onongo atute pe me nyutone, ento ki i cwinya onongo awinyo calo en pe paro pira dok pe alubo tirane.” Gin ango ma okonyo Rose? En otito ni: “I kare ma atye ka kwano Baibul, akwano 1 Jo Tecalonika 5:​12, 13. I kare ma aniang ni pe atye ka nyuto woro bot omego-ni, cwinya ocako pida. Alego bot Jehovah dok atimo kwed i bukkewa me nongo ngec ma twero konya me loko nenona. Meno okonya me niang ni pekona pe obedo omego-ni, ento awaka ma atye kwede. I kare-ni dong, aniang ni ka pe abedo ngat ma mwol, ci bibedo tek bota me woro jo mukene. Pud atye ka tute matek me nyuto woro bot jo mukene dok awinyo ni Jehovah cwinye yom i koma ni atye ka timo meno.”

NYUT WORO BOT JO MA PE GUBEDO LUCADEN

15. Pingo watwero nongo ni tek me nyuto woro bot jo ma pe gubedo Lucaden pa Jehovah?

¹⁵ Ariya ma tye. Pol kare warwatte ki dano i ticwa me pwony ma pe gimaro Lubanga nyo lok me Baibul. (Ep. 4:18) Jo mogo pe giye winyo lokwa pien gilubo gin ma kipwonyogi con i kare ma gitino. Lutic luwotwa nyo lutino kwan luwotwa mogo giger, nyo romo bedo ni ladit ticwa nyo lapwonywa pe pwoyo ticwa. Watwero rwenyo woro i kom jo ma kit magi, dok wajuko terogi i yo me kica.

16. Pingo pire tek me nyuto woro bot jo ma pe gubedo Lucaden? (1 Petero 2:12; 3:15)

¹⁶ Pingo omyero wanyut woro? Wii myero opo ni Jehovah keto cwinye i kom kit ma watero kwede jo ma pe gubedo Lucaden. Lakwena Petero opoyo wi Lukricitayo ni ka jo mukene guneno kit ma gikwo kwede i yo maber, ci dano gitwero cako ‘miyo deyo bot Lubanga.’ Pi tyen lok meno, en owaccigi ni omyero gutit pi niyegi “ki mwolo dok ki woro.” (Kwan 1 Petero 2:12; 3:15.) Kadi bed mitte ni Lakricitayo otit pi niyene i nyim langolkop nyo bot ngat mo mukene, kare ducu mitte ni otim meno ki woro. Tye kit meno pien Jehovah neno dok winyo jami ma wawaco ki kit ma wawaco kwede. Meno pud dong obedo tyen lok maber adada me tero jo ma pe gubedo luye ki woro!

17. Watwero nyuto woro bot jo ma pe gubedo Lucaden nining?

¹⁷ Kit me nyuto woro. Ka watye i tic me pwony, pe wamito ni jo mukene guwiny calo wanenogi ni pigi pe tek pien ni gitye ki ngec manok i kom Baibul. Me ka meno, wamito ni wanen jo mukene calo pigi tek bot Lubanga dok gidito giloyowa. (Ag. 2:7; Pil. 2:3) Dong ka ngat mo owaco gin mo marac i kom niyewa, pe idok iye ki gero. Me labolle, pe wamito waco gin mo ma miyo wanen calo waryek ento twero weko ngat meno winyo ni eming. (1 Pet. 2:23) Ka iwaco gin mo ma weko ikoko ange iye, kwa kica cutcut. Itwero nyuto woro bot lutic luwoti nining? Bed latic matek, dok itute me neno kit mabeco pa lutic luwoti ki ludito ticci. (Tito 2:​9, 10) Ka ibedo latic matek dok ma genne, itwero yomo cwiny dano nyo pe, ento labongo akalakala mo, ibiyomo cwiny Lubanga.—Kol. 3:​22, 23.

18. Pingo omyero wanyut woro bot jo mukene?

¹⁸ Watye ki tyen lok mapol me nyuto woro bot jo mukene. Dong watyeko neno ni ka wanyuto woro bot jo me pacowa, nongo watye ka miyo deyo bot Lawi ot madit, Jehovah. Kit meno bene, ka wanyuto woro bot omege ki lumege, wamiyo deyo bot Wonwa me polo. Dok ka wanyuto woro bot jo ma pe gubedo Lucaden, ci wamiyo botgi kare maber loyo me miyo deyo bot Lubangawa, Jehovah. Kadi bed jo mukene pe ginyutiwa woro, pire tek ni wanyut botgi woro kare ducu. Pingo? Pien Jehovah bigoyo laane i komwa. En ocikke ni: “Jo ma giketo deyo i koma an bene abiketo deyo i komgi.”—1 Cam. 2:30.