Mar pa Lubanga Bedo Nakanaka

1-2. Watwero winyo nining ka watye ka kato ki i peko mo?

TAM kong kit ma yeya bedo kwede i dye pii ka yamo tye ka kodo matek. Twagge pa pii matek bedo ka coro yeya tungi ki tungi. Yeya meno twero cito ka mo keken ma yamo tye ka kodo dok iye nikwanyo ka ngat mo obolo lajuk me yeya. Lajuk yeya meno miyo yeya cung mot dok miyo pe bedo ka dirre woko ka yamo tye ka kodo.

² Ka itye ka kato ki i peko mo madit, in bene itwero bedo calo yeya meno. Kit ma iwinyo kwede twero lokke oyotoyot. I nino acel, itwero winyo calo Jehovah mari dok tye ka konyi. Ento orwone, icako bedo ki akalakala ka ce en neno gin ma tye ka timme i kwoni. (Jab. 10:1; 13:1) Gwok nyo laremi mo owacci lok ma ocuko cwinyi ci icako winyo maber ber pi kare mo. (Car. 17:17; 25:11) Ento lacen, dok icako bedo ki akalakala ka ce Jehovah tye ka konyi. Iromo bene cako tamo ni Jehovah neni calo ngat ma konnye pe. Gin ango ma twero konyi me cung matek calo yeya ma kibolo lajukke piny? Nyo i yo mayot, gin ango ma romo konyi me medde ki bedo ki tekcwiny ni Jehovah marri dok bikonyi?

3. (a) Lok man ni “mar ma pe lokke” ma kitiyo kwede i Jabuli 31:7 ki 136:1 gonnye ningo? (b) Pingo watwero waco ni Jehovah aye labol maber loyo me nyuto kit man? (Nen bene cal.)

³ Yo acel ma itwero cung kwede matek calo yeya ma kibolo lajukke piny aye ka wii bedo ka po i kom mar ma pe lokke pa Jehovah. (Kwan Jabuli 31:7; 136:1.) Lok man ni “mar ma pe lokke” loko i kom wat matek dok ma rii ma ngat moni bedo kwede ki ngat mukene. Jehovah aye obedo labol maber loyo me nyuto mar ma pe lokke. Ki lok ada, Baibul tito ni ‘marre ma pe lokke dwong.’ (Nia 34:​6, 7) Baibul bene loko i kom Jehovah kit man: ‘Mar meri ma pe lokke dwong pi jo ducu ma kok boti.’ (Jab. 86:5) Tam kong i kom tyen lok me ginacoya magi: Jehovah pe biweko luticce ma lugen ata! Ka wii po ni Jehovah lagen, man twero konyi me cung matek ka itye ka kato ki i peko mo madit.—Jab. 23:4.

NEN MAR PA JEHOVAH CALO PWONY MA PIRE TEK ME BAIBUL

4. Mi labol me pwony mogo ma pigi tego me Baibul dok itit pingo waye i kom pwony magi ki cwinywa ducu.

⁴ Gin mukene ma twero konyi me cung matek i kare me peko aye ka ineno mar pa Jehovah calo pwony ma pire tek me Baibul. Gin ango ma bino i wii ka iwinyo lok man ni “pwony ma pire tek me Baibul?” Twero bedo ni itamo i kom ada ma ipwonyo ki i Lok pa Lubanga. Me labolle, ipwonyo ni Lubanga nyinge Jehovah, ni Yecu obedo Wod pa Lubanga acel keken, ni jo muto pe gingeyo gin mo, dok ni lobo bidoko Paradic ma dano bikwo iye pi naka. (Jab. 83:18; Latit. 9:5; Jon 3:16; Yabo 21:​3, 4) I kare ma iye pwony magi, onongo dong pe twerre ki ngat mo me loko tammi. Pingo? Pien onongo dong iniang ni pwony magi obedo lok ada. Kong dong wanenu kit ma neno mar pa Jehovah calo pwony ma pire tek me Baibul twero konyi kwede me jwayo akalakala ni Jehovah pe paro piri nyo pe neno peko ma itye ka kato ki iye.

5. Tit kong kit ma ngat moni twero kwero kwede ki pwony goba.

⁵ Gin ango ma okonyi me kwero pwony goba i kare ma pud icako kwano Baibul acaka? Twero bedo ni gin ma okonyi aye bedo ka poro pwony ma inongo ki i dinini macon ki pwony manyen ma itye ka nongone ki i Baibul. Tam kong i kom labol man: Ket kong ni onongo iye ni Yecu obedo Lubanga Won Twer Ducu. I kare ma icako kwano Baibul, nen calo ibedo ki ur matek mumiyo icako pennye kekeni ni, ‘Pwony man tika obedo lok ada?’ I nge pwonyo gin ma Baibul waco madok i lok man, imoko ka maleng ni ada Yecu pe obedo Lubanga. Ci lacen ileyo ka ka pwony goba ma onongo iye iye-ni ki lok ada ma ipwonyo ki i Baibul ni: Yecu obedo “latin kayo me ginaketa ducu,” dok ‘Wod pa Lubanga acel keken.’ (Kol. 1:15; Jon 3:18) Ngene kene ni pe yot me “turo” teko pa pwony goba dok bene pe yot me kwerone. (2 Kor. 10:​4, 5) Ento i kare ma ipwonyo lok ada, pe dok idok cen me cako ye i kom pwony goba magi odoco.—Pil. 3:13.

6. Pingo kinwoyo lok man ni “mar mere ma pe lokke bedo nakanaka” tyen mapol i Jabuli 136?

⁶ Itwero timo gin acel-lu ka odok i kom gin ma Baibul pwonyo i kom mar pa Jehovah. Ka itye ka kato ki i peko mo, ci icako bedo ki akalakala ka ce Jehovah marri, itwero pennye kekeni ni, ‘Tika tamma man tye kakare?’ Por akalakala ma itye kwede i kom mar pa Jehovah ki lok ma nonge i Jabuli 136:1—ma obedo wang ginacoya ma pwony man jenge iye. Pingo Jehovah oloko i kom mar mere ni “pe lokke”? Pingo kinwoyo lok man ni “mar mere ma pe lokke bedo nakanaka” tyen 26 kulu i Jabuli man? Lok man pwonyowa ni, mar ma pe lokke pa Jehovah obedo pwony ma pire tek me Baibul ma rom aroma ki pwony mukene ma dong iye ni tye ada. Tam man ni Jehovah neni calo ngat ma konnye pe obedo lok goba. Kwer tam meno lajwac kit ma ikwero kwede pwony goba mukene-ni ducu!

7. Tit kong wang ginacoya mogo ma nyuto ni Jehovah marri.

⁷ Baibul tye ki wang ginacoya mapol ma nyuto ni Jehovah marowa. Me labolle, Yecu owaco ki lulub kore ni: “Piwu tek kato pi aribe mapol.” (Mat. 10:​31, NWT) Jehovah kikome owaco bot jone ni: “Abimiyi tek, dok abikonyi, abimaki ki cinga lacuc, ma miyo aloyo lukworra-ni.” (Ic. 41:10) Tika ineno kit ma ginacoya magi nyuto kwede mar pa Jehovah? Yecu pe owaco ni, ‘Oromo bedo ni piwu tek,’ dok Jehovah bene pe owaco ni, ‘Gwok nyo abikonyi.’ Me ka meno, gin ducu guwaco ni: ‘Piwu tek makato’ dok “Abikonyi.” Ka ce itye ka kato ki i peko ci icako bedo ki akalakala i kom mar pa Jehovah, ginacoya magi twero konyi me winyo ni Jehovah marri. Medo i kom meno, gitwero konyi me moko ni en marri. Wang ginacoya magi loko lok ada. Ka ilego bot Jehovah pi akalakala ma itye kwede dok itamo matut i kom wang ginacoya magi, ci ibibedo ki kare me waco lok ma nonge i 1 Jon 4:16 ni: ‘Man omiyo wangeyo mar ma Lubanga tye kwede i komwa, dok waye ni en marowa.’a

8. Gin ango ma itwero timone ka i kare mogo pud ibedo ki akalakala ka ce Jehovah marri?

⁸ Gin ango ma itwero timone ka i kare mogo pud ibedo ki akalakala ka ce Jehovah marri? Tem poro kit ma iwinyo kwede ki gin ma dong ingeyo i kom Jehovah. Kit ma wawinyo kwede lokke ento lok ada pe lokke, dok mar pa Jehovah obedo lok ada ma Baibul pwonyo. Dong ka ce pe waye ni Jehovah marowa, nongo bedo calo watye ka wacci lok man ni “Lubanga aye mar” obedo lok goba.—1 Jon 4:8.

TAM MATUT I KOM ‘MAR PA JEHOVAH PIRI’

9-10. Gin ango ma onongo Yecu tye ka lok iye i kare ma owaco lok man ni “Won kikome marowu,” ma kicoyo i Jon 16:​26, 27? (Nen bene cal.)

⁹ Watwero pwonyo lok mapol i kom mar pa Jehovah ka watamo matut i kom lok ma Yecu owaco bot lulub kore ni: “Won kikome marowu.” (Kwan Jon 16:​26, 27.) Yecu pe owaco lok meno mere me yomo cwiny lupwonnyene. Ki lok ada, tyeng ma orumo lok meno nyuto ni Yecu onongo pe tye ka lok i kom kit ma lupwonnyene giwinyo kwede i cawa meno. Ento, en onongo tye ka nyamo lok i kom lega.

¹⁰ Yecu onongo pud oa ka waco ki lupwonnyene ni omyero guleg i nyinge ento pe bote. (Jon 16:​23, 24) Onongo pire tek ni guniang lok meno. I nge cer pa Yecu, lupwonnyene onongo gitwero bedo ki miti me lega bote. Tye kit meno pien Yecu onongo obedo laremgi macok. Onongo giromo bedo ki tam ni pien Yecu marogi matek, en romo bedo ki miti me winyo kwacgi ci lego Wonne me konyogi. Ento Yecu owaccigi ni omyero pe gutam kit meno. Pingo? Pien en owaccigi ni: ‘Won kikome marowu.’ Ada, Jehovah marowa matek adada mumiyo en kikome aye winyo legawa. Lok ada man tye i kin pwony ma pigi tego madok i kom lega. Tam kong kit ma lok man gudi kwede: Kwanni me Baibul oweko ibedo ki kare me ngeyo ki maro Yecu. (Jon 14:21) Dong calo lupwonnye pa Yecu, in bene itwero lega bot Lubanga ki tekcwiny pien ingeyo ni en ‘kikome mari.’ Kare ducu ka ilego bot Jehovah, nongo inyuto ni iye lok meno.—1 Jon 5:14.

NIANG GIN MA MIYO WABEDO KI AKALAKALA

11. Pingo yomo cwiny Catan adada ka wabedo ki akalakala i kom mar pa Jehovah?

¹¹ Gin ango ma twero weka wacako bedo ki akalakala i kom mar pa Jehovah piwa? Itwero gamo ni Catan aye ma weko wabedo ki akalakala dok meno tye lok ada. Larac-ci tye ka “yenyo dano me amwoda,” dok en mito ni wabed ki akalakala i kom mar pa Jehovah piwa. (1 Pet. 5:8) Pi mar pa Jehovah, en omiyo ginkok piwa, ma obedo gin ma Catan mito ni wawiny calo pe wapore pire pi roc ma watye kwede. (Ibru 2:9) Dong anga ma cwinye bibedo yom loyo ka ce wacako bedo ki akalakala i kom mar pa Jehovah piwa? Catan. Dok anga ma cwinye bibedo yom loyo ka cwinywa otur ci wagiko tic pi Jehovah woko? Ngene kene ni Catan. Catan mito ni watam ni Jehovah pe marowa. Ento olungtukene aye tye ada. Catan aye Jehovah pe maro. Ento, “roro” acel ma Catan tiyo kwede aye lok goba ni Jehovah pe marowa dok okwerowa woko. (Ep. 6:11) Ka waniang gin ma lamonewa Catan tye ka tute me timone, man bijingo mitiwa me ‘lweny matek ki Catan.’—Yak. 4:7.

12-13. Roc ma kinywalowa kwede twero weko wabedo ki akalakala i kom mar pa Jehovah nining?

¹² Tye dok gin mukene ma twero weko wabedo ki akalakala i kom mar pa Jehovah. Meno obedo gin ango? Obedo bal ma walako ki bot lunyodowa mukwongo. (Jab. 51:5; Rom. 5:12) Roc meno obalo wat ma onongo tye i kin dano ki Lubanga. Obalo bene tamwa, kit ma wawinyo kwede, ki dong yotkomwa.

¹³ Bal gudo kit ma wawinyo kwede i yo marac adada; weko wabedo ki poto cwiny, par, lworo, ki lewic. Watwero winyo kit meno ka watimo bal. Ento watwero bene winyo kit meno pien kare ducu watye ki roc, ma meno aye pe kit ma Lubanga onongo ocweyo kwede ki dano. (Rom. 8:​20, 21) Kit macalo mutoka ma tayane otuc pe twero ngwec maber, wan bene macalo jo ma gitye ki roc pe watwero timo jami ducu kakare kit ma onongo kicweyowa kwede. Dong pe tye me ur ni i kare mogo wabedo ki akalakala ka ce Jehovah marowa. Ka meno otimme, omyero wiwa opo ni Jehovah ‘dit, dok wabedo ki lworo i nyime. En Lubanga ma gwoko mar mere ma pe lokke pi jo ma gimare dok ma gilubo cikke.’—Nek. 1:5.

14. I yo ma nining ma lwodo lok i kom ginkok twero konyowa me bedo ki gen ni Jehovah marowa? (Jo Roma 5:8) (Nen bene bok ma wiye tye ni “Gwokke ki i kom ‘Bwola me Bal.’”)

¹⁴ I kare mogo, wawinyo marac pien pe wapore me nongo mar pa Jehovah. Ento ngeyo ni pe wapore me nongo mar pa Jehovah en aye weko marre meno pire bedo tek adada. Pe wanongo mar pa Jehovah ma lubbe ki jami mabeco ma watimo. Ento ginkok aye umo balwa, dok Jehovah ominiwa mic meno pien en marowa. (1 Jon 4:10) Wii bene myero opo ni Yecu obino i lobo me laro lubalo ento pe jo ma gipe ki roc. (Kwan Jo Roma 5:8.) Pe tye ngat mo ma twero timo jami ducu kakare dok Jehovah bene pe keto gingi ni omyero watim jami ducu kakare. Ka waniang ni roc ma watye kwede twero weko wabedo ki akalakala i kom mar pa Jehovah piwa, ci wabimoko tamwa pe me ye ni gin ma kit meno otimme.—Rom. 7:​24, 25.

MOK TAMMI ME BEDO LAGEN BOT JEHOVAH

15-16. Ka wamedde ki bedo lugen bot Jehovah, gin ango ma watwero bedo ki tekcwiny iye, dok pingo? (2 Camuel 22:26)

¹⁵ Jehovah mito ni wamok tam ma atir ki ‘moko matek i kome.’ (Nwo. 30:​19, 20) Ka watimo meno, watwero bedo ki gen ni en bene bibedo lagen botwa. (Kwan 2 Camuel 22:26.) Ka wamedde ki bedo lugen bot Jehovah, watwero bedo ki tekcwiny ni en bikonyowa me kanyo peko mo keken ma wabikato ki iye i kwowa.

¹⁶ Kit ma dong wanyamo kwede, watye ki tyen lok mapol me cung matek ka watye ka kato ki i peko i kare-ni. Wangeyo ni Jehovah marowa dok bene bikonyowa. Meno aye bene gin ma Baibul pwonyo. Ka wacako bedo ki akalakala i kom mar pa Jehovah, ci wiwa myero opo i kom gin ma wangeyo i kom mar pa Jehovah ento pe kit ma wawinyo kwede i cawa meno. Wamito medde ki ye ni mar pa Jehovah ma pe lokke bedo nakanaka kit ma Baibul waco kwede.