Jehovah Konyowa me Bedo ki Yomcwiny me Ada

1-2. (a) Dano gitye ka kato ki i kit kwo ma nining i kare-ni? (b) Gin ango ma wabinyamo i pwony man?

POL pa dano i kare-ni gitimo gin mo keken ma gitwero me nongo yomcwiny. Ento kadi bed gitute matek, pe ginongo yomcwiny. Jo mapol cwinygi cwer matek dok giwinyo calo jami pe biyubbe botgi matwal. Lutic pa Jehovah mogo bene gitwero winyo kit meno. Kit macalo watye ka kwo i “kare me agikki,” wangeyo ni wabikemme ki pekki ma weko wabedo ki par nyo cwercwiny.—2 Tem. 3:1.

² I pwony man, wabineno jami mogo ma twero rwenyo yomcwinywa woko ki kit ma watwero bedo kwede ki yomcwiny odoco ka ce orwenyo woko. Ento mukwongo, kong wanenu Anga ma twero konyowa me bedo ki yomcwiny me ada.

ANGA MA TWERO WEKO WABEDO KI YOMCWINY ME ADA?

3. Ginacweya pwonyowa gin ango i kom Jehovah? (Nen bene cal.)

³ Jehovah kare ducu bedo ma cwinye yom, dok en mito ni wan bene wabed ma cwinywa yom. Meno aye gin mumiyo en ocweyo jami mapol ma yomo cwinywa. Me labolle, wabedo ki yomcwiny ka waneno kit ma kideyo kwede lobo man ki kala mapatpat, yomo cwinywa bene ka waneno lee gitye ka tuko, dok wabedo ki yomcwiny ka watye ka camo dek ma wamaro adada. Lubanga marowa adada dok mito ni wanong mit pa kwo!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Pingo Jehovah medde ki bedo ma cwinye yom kadi bed deno can onya adada? (b) Gin ango ma Jehovah omiyo botwa? (Jabuli 16:11)

⁴ Jehovah paro pi dano ka gitye ka deno can. Cwinye cwer adada ka neno dano deno can. Kadi bed kit meno, Baibul lwonge ni “Lubanga ma layomcwiny.” (1 Tem. 1:​11, NWT) Pingo Jehovah medde ki bedo ma cwinye yom? Tyen lok acel aye ni en dong otyeko moko woko nino ma en bijwayo iye cwercwiny ki can ducu matwal. Ka en woto ki kuro kare meno, en paro adada pi kit ma wawinyo kwede. Ka watye ka kato ki i peko, Jehovah gwokowa dok konyowa. En konyowa nining? En miyo botwa yomcwiny. (Kwan Jabuli 16:11.) Kong dong wanenu kit ma Jehovah omiyo Yecu obedo kwede ki yomcwiny.

5-6. Pingo cwiny Yecu yom?

⁵ Ki i kin cwec pa Jehovah ducu, Yecu aye cwinye yom loyo. Pingo? Nen kong tyen lok mogo mumiyo tye kit meno. Mukwongo, “Kricito obedo cal pa Lubanga ma pe nen-ni” dok en lubo kit pa Wonne kore ki kore. (Kol. 1:15; nen “yomcwiny” i jami me akwana me nwtsty-E pi 1 Temceo 6:15.) Me aryone, Yecu obedo kacel ki Wonne, ma obedo Wang It me yomcwiny, pi kare malac ma loyo ngat mo keken.

⁶ Medo i kom meno, Yecu cwinye yom pien kare ducu timo gin ma Wonne mito. (Car. 8:​30, 31; Jon 8:29) Meno aye omiyo Jehovah cwinye yom adada i kome.—Mat. 3:17.

7. Watwero nongo yomcwiny me ada nining?

⁷ Wan bene watwero bedo ma cwinywa yom ka wamedde ki ngeyo Jehovah, ma en aye Wang It me yomcwiny. Ka wacwalo cawa malac me pwonyo kit ma Jehovah tamo dok winyo kwede, ci watwero lubo lanene maber. Dok timo meno medo yomcwinywa. Wabibedo bene ki yomcwiny ka watimo gin ma Lubanga mito dok ka wangeyo ni en cwinye yom i komwa.a (Jab. 33:12) Tye lok ada ni i kare mogo wabedo ki cwercwiny, gwok pi nino mogo manok nyo pi kare malac. Ka iwinyo kit meno, bed ki gen ni man pe tyen lokke ni Jehovah cwinye pe yom i komi. Watye ki roc dok i kare mogo wabedo ki arem, cwercwiny nyo par. Jehovah niang meno maber. (Jab. 103:14) Kong dong wanyamu jami mogo ma twero rwenyo yomcwinywa ki kit ma watwero bedo kwede ki yomcwiny odoco ka onongo orwenyo woko.

PE IWEK GIN MO ORWENY YOMCWINYI

8. Pekki ma wakato ki iye twero gudowa nining?

⁸ Gin me 1: Pekki ma wakato ki iye. Tika itye ka kato ki i aunauna, can ma poto atura, can lim, two, nyo tiyo? Watwero rwenyo yomcwinywa oyotoyot ka ce watye ka kato ki i pekki magi, tutwalle ka pe watwero timo gin mo keken me kwanyo peko meno. Baibul waco ni cwinywa twero cwer adada ma miyo wawinyo ni pe dok wabibedo ki yomcwiny odoco. (Car. 15:13) Laelda mo ma nyinge Charalambos bene owinyo kit meno. I kine me mwaka angwen keken, ominne acel keken, minne, kacel ki wonne guto woko. En owaco ni: “Awinyo ni atye kena dok pe tye ngat mo ma twero konya. I kare mogo, akoko ange pien abedo ki jami mapol me atima mumiyo pe anongo kare muromo me bedo ki lunyodona kacel ki omera i kare ma onongo pud gikwo.” I yo acel-lu, i kare mogo kanyo pekkiwa twero bedo tek adada ma weko cwinywa tur dok wawinyo ni waol adada.

9. Gin ango ma twero konyowa me bedo ki yomcwiny odoco? (Jeremia 29:​4-7, 10)

⁹ Gin ma twero konyowa me bedo ki yomcwiny odoco. Watwero bedo ki yomcwiny odoco ka wajuko bedo ki par i kom jami ma pe watwero lokogi kun wabedo ki pwoc pi jami ma watye kwede. Pud watwero bedo ki yomcwiny kadi bed kwowa pe tye kit ma wamito ni obed kwede. Man pat ki gin ma pol pa jo me lobo-ni gitamo. Me labolle, Jehovah owaco bot Lujudaya ma kiterogi i opii i Babilon me tute matek me bedo ki yomcwiny kunnu. (Kwan Jeremia 29:​4-7, 10.) Pwony ango ma wanongo ki i gin mutimme man? Tute me neno jami mabeco ma tye i kwoni, dok inong mit pa jami magi. Wii opo ni, Jehovah pe biweki keni. En bikonyi. (Jab. 63:7; 146:5) Laminwa Effie, ma onongo awano mo marac adada ma oweko pe dong twero wot, owaco ni: “Jehovah, jo gangwa, kacel ki omege ki lumege me kacokke gukonya dok gucuko cwinya. Amito nyutigi ni atye ki pwoc madit adada pi jami ducu ma gutimo pira. Pi meno, atute matek me bedo ma cwinya yom.”

10. Pingo pud watwero bedo ki yomcwiny kadi bed wakato ki i peko?

¹⁰ Kadi bed watye ki peko nyo ka jami maraco otimme i komwa nyo i kom jo gangwa, pud watwero medde ki bedo ma cwinywa yom.b (Jab. 126:5) Pingo? Pien yomcwinywa pe jenge i kom kwo ma watye ka kato ki iye. Lapainia mo ma nyinge Maria owaco ni: “Kadi bed watye ki pekki, wamedde ki bedo ma cwinywa yom pien wiwa po i kom jami ma Jehovah ocikke pire botwa. Man pe tyen lokke ni pe wakok nyo wanyuto kit ma wawinyo kwede. Ento kadi bed wakat ki i peko ma nining, Wonwa twero konyowa me bedo ki yomcwiny.” Wii opo ni, kadi bed kwo tek adada i kare-ni, pekkiwa ducu tye pi tutunu—calo kor tyen ma dong i kweyo. Ma pe orii, kor tyen magi rwenyo woko kwicikwici, ma bedo calo pe kiwoto i kweyo meno.

11. Lanen pa lakwena Paulo cuko cwinyi nining?

¹¹ I kare mogo, watwero cako tamo ni watye ki pekki pien pe watye ki cwak pa Jehovah. Ka wawinyo kit meno, ci watwero tam i kom lutic pa Jehovah mukene ma gukato ki i kwo matek adada. Tam kong i kom labol pa lakwena Paulo. Yecu oyere me tito kwena maber bot “lurok ki luker ki jo Icrael.” (Tic 9:15) Meno pud dong obedo mot madit ya! Kadi bed kit meno, Paulo pud okato ki i pekki mapol adada. (2 Kor. 11:​23-27) Tika pekki mapol ma Paulo okato ki iye-ni nyuto ni en onongo orwenyo cwak pa Jehovah woko? Pe tye kit meno! Ki lok ada, Paulo obedo ki kero me ciro pekki magi ducu pien Jehovah okonye. (Rom. 5:​3-5) Kong dong itam i kom kwo ma itye ka wok ki iye i kare-ni. Itye ka medde ki tic pi Jehovah ki gen kadi bed itye ki pekki mapol. Dong in bene itwero bedo ki gen ni Jehovah tye ka konyi dok cwinye yom i komi.

12. Gin ango ma twero timme ka ce dong pe watwero tic pi Jehovah kit ma wamito kwede?

¹² Gin me 2: Gen ma pe ocobbe. (Car. 13:12) Wamaro Jehovah dok watye ki pwoc pi jami ducu ma en timo piwa. Dong meno miniwa kare me tam i kom yo mogo ma watwero tic kwede pire ki kerowa ducu. Ento ka watute me timo gin ma kerowa pe twero macalo adwogi me kwo ma watye ka kato ki iye, cwinywa twero tur woko. (Car. 17:22) Lapainia mo ma nyinge Holly owaco ni: “Onongo atye ki miti me cito ka tito kwena i lobo mukene, nyo miyo kony i tic me gedo Betel manyen i lobo Amerika. Ento kwona olokke dok onongo pe atwero timo gin mo keken me cobo yub magi. Gin man ocwero cwinya adada. Turo cwinyi adada ka ce imito cobo yub mogo ento kero-ni dong pe twero.” Lutic pa Jehovah mapol giwinyo kit meno ka dong pe gitwero timo gin ma onongo gimito cobone i ticgi pi Jehovah.

13. Jami macalo mene ma watwero timogi kadi bed kwo ma watye ka kato ki iye miyo pe watiyo pi Jehovah kit ma wamito kwede?

¹³ Gin ma twero konyowa me bedo ki yomcwiny odoco. Wii opo ni Jehovah pe mito ni watim gin ma kerowa pe romo. En bene pe terowa ni piwa tek ma lubbe ki tic ma watiyo pire. Ento Jehovah mito ni wabed jo mamwol dok ma lugen. (Mika 6:8; 1 Kor. 4:2) Jehovah cwinye bedo yom ka watute me yomo cwinye i tamwa, mitiwa, kacel ki kitwa kadi bed dong pe watwero timo gin ma onongo wamito timone i ticce. Pi meno, pe omyero wabed ki miti me timo gin ma kerowa pe romo.c Dong kadi bed pe itwero timo gin ma onongo imito timone pi Jehovah, tam i kom jami ma iromo timogi. Me labolle, itwero konyo me pwonyo jo matino nyo cuko cwiny omege ki lumege ma dong guteggi. Gwok nyo itwero limo ngat mo, gone cim nyo cwale mecej me cuko cwinye. Jehovah cwinye bedo yom ka itimo jami ma keroni twero, dok en bimini yomcwiny! Dok wii opo ni i lobo manyen, wabibedo ki kare me tic pi Jehovah i yo ma onongo pe wabyeko! Meno aye gin ma ocuko cwiny laminwa Holly. En owaco ni: “Ka cwinya otur, apoyo wiya kekena ni abibedo ki kwo ma pe tum. Dok abibedo ki kero me cobo yubba mogo i lobo manyen, ki kony pa Jehovah.”

14. Gin ango mukene ma twero rwenyo yomcwinywa woko?

¹⁴ Gin me 3: Keto tamwa i kom yomo cwinywa kekenwa. Jo mukene gitiyo ki kabedo me nywako lok i Intanet me nyuto ni yomcwiny me ada bino macalo adwogi me timo jami ma yomo cwinywa kekenwa. Meno twero weko wacako bedo ki tam ni ka watimo jami ma wamaro, wawilo gin mo keken ma wamito, nyo walimo kabedo mapatpat, ci wabibedo ki yomcwiny me ada. Jehovah mito ni wanong mit pa jami mamwonya ma en ocweyogi. Ento jo mapol ma gutute me yomo cwinygi kekengi, lacen guniang ni jami ma onongo gitamo ni bikelo botgi yomcwiny pe otiyo kulu. Lapainia mo ma nyinge Eva owaco ni, “Ka kwoni jenge i kom kit ma itwero yomo kwede cwinyi kekeni, ci kare ducu pe ibiyeng ki jami ma itye kwede.” Ka pol kare waketo tamwa i kom kit me yomo cwinywa kekenwa, ci wabibedo ki cwercwiny kare ducu.

15. Pwony ango ma watwero nongone ki bot Kabaka Solomon?

¹⁵ Kabaka Solomon otimo jami mapol mapatpat ki miti me nongo yomcwiny. Me labolle, en ocamo kwai cam mabeco ducu, obedo ka winyo wer mamit, dok owilo jami me wel mapol. Ento jami magi ducu pe okelo yomcwiny bote. En owaco ni: “Wang dano pe twero yeng ki gin ma dano neno, kadi ki it bene pe twero yeng ki gin ma dano winyo.” (Latit. 1:8; 2:​1-11) Tam ma jo me lobo-ni gitye kwede i kom gin ma kelo yomcwiny me ada kitwero porone ki cente kikwangala. Cente meno twero nen calo gin ma konnye tye, ento meno goba. Jami magi pe twero keliwa yomcwiny me ada.

16. Pingo konyo jo mukene keliwa yomcwiny? (Nen bene cal.)

¹⁶ Gin ma twero konyowa me bedo ki yomcwiny odoco. Yecu opwonyowa ni “miyo mot kelo gum [yomcwiny] makato gamo agama.” (Tic 20:35) Laelda mo ma nyinge Alekos owaco ni: “Atute me timo jami mogo matino tino me konyo jo mukene. Ka akonyo jo mukene, miyo pe aketo tamma i kom jami ma amito keken, dok meno kela yomcwiny.” Gin ango ma in itwero timone pi jo mukene? Me labolle, ka ineno ngat mo ma cwinye tye ka cwer, itwero lok kwede. Kadi bed pe itwero cobo pekone, ento pud itwero cuko cwinye. Ngat meno twero winyo maber ka iciko iti me winyo lokke dok itute me niang kit ma en winyo kwede. Itwero poyo wiye me tito bot Jehovah kit ma en winyo kwede pien Jehovah paro pire. (Jab. 55:22; 68:19) Itwero bene poyo wiye ni Jehovah pe oweke ata. (Jab. 37:28; Ic. 59:1) Iromo bene timo gin mo ma nyuto kica bot ngat meno. Me labolle, itwero tede dek mo nyo timo gin mukene pire. Nyo itwero cito ka tito kwena kacel kwede. Nywako kwena maber-ri ki jo mukene keliwa yomcwiny kare ducu. Wek Jehovah oti kwedi me cuko cwiny jo mukene. Keto tamwa i kom jo mukene me ka ketone i yomo cwinywa kekenwa bikeliwa yomcwiny me ada!—Car. 11:25.

17. Ka wamito bedo ki yomcwiny me ada, gin ango ma omyero watim? (Jabuli 43:4)

¹⁷ Watwero bedo ki yomcwiny me ada ka wamedde ki nyikke cok ki Wonwa me polo, Jehovah. Baibul cuko cwinywa ni Jehovah aye ‘Lubanga ma yomo cwinywa mada.’ (Kwan Jabuli 43:4.) Dong kadi bed watye ki pekki, pe mitte ni wabed ki par nyo lworo. Ka waweko Jehovah obedo Laremwa macok loyo, ci en bikonyowa me bedo ki yomcwiny pi naka!—Jab. 144:15.