Pwonnye me Lego Lega ma a ki i Cwinyi

1-2. (a) Gin ango ma romo gengowa ki tito bot Jehovah kit ma wawinyo kwede ka watye ka lega? (b) Wangeyo nining ni Jehovah tero ite ka winyo legawa?

TIKA inongo ni i kare mukene ibedo ka nwoyo lega acel-li dok pol kare pe itito ki Jehovah kit ma iwinyo kwede kikome? Ka tye kit meno, ci pe itye keni. Kit macalo wan ducu watye ki tic mapol, miyo i kare mogo walego lega macek dok wanongo tek me cwalo cawa malac i lega. Nyo gwok wanongo ni tek me tito ki Jehovah kit ma wawinyo kwede kikome pien wawinyo calo pe wapore me lega bote.

² Baibul pwonyowa ni gin ma pire tek bot Jehovah pe obedo nyig lok ma watiyo kwede ka watye ka lega, ento lega ma a ki i cwinywa. En winyo “lega pa jo mamwol.” (Jab. 10:17) En tero ite ka winyo lok ducu ma wawaco bote pien en paro piwa.—Jab. 139:​1-3.

3. Lapeny mene ma wabinyamogi i pwony man?

³ I pwony man, wabinyamo lapeny magi: Pingo watwero bedo agonya me lega bot Jehovah? Watwero lega i yo ma weko wanyikke cok bot Jehovah nining? Pwony ango ma watwero nongo ki i lega pa lutic pa Jehovah me kare macon ma kicoyogi i Baibul? Dok gin ango ma watwero timone ka watye ki par ma gengowa tito ki Jehovah kit ma wawinyo kwede?

PE ILWOR LEGA BOT JEHOVAH

4. Gin ango ma twero konyowa me lega bot Jehovah labongo lworo? (Jabuli 119:145)

⁴ Ka waniang ni Jehovah obedo larem ma lagen ma mito gin maber loyo piwa, ci wabibedo agonya me lega bote, kun watite tamwa ki kit ma wawinyo kwede. Laco Jabuli 119 otute me neno Jehovah macalo Lareme kare ducu ma en lego Bote. Kwone onongo opong ki ayelayela. Jo mogo guwaco lok goba i kome. (Jab. 119:​23, 69, 78) En bene i kare mogo cwinye otur pi bal ma otimogi. (Jab. 119:5) Kadi bed kit meno, en pe obedo ki lworo me tito ki Jehovah kit ma ewinyo kwede.—Kwan Jabuli 119:145.

5. Pingo pe omyero wawek lworo ogengwa ki lega bot Jehovah? Mi labol.

⁵ Jehovah mito ni kadi wa jo ma gutimo bal madongo bene guleg bote. (Ic. 55:​6, 7) Pi meno, pe omyero wawek gin mo keken ogengwa ki lega bote. Me labolle, go kong ni icito ka lim i kabedo mo manyen. Ma io kunnu, irweny woko. Ento ngat mo ma bedo kunnu twero konyi me nongo yo ma myero ilubi. Tika ibiweko lewic gengi ki penyo ngat meno pi kony pien ni irweny woko? Lewic pe bigengi kulu! I yo acel-lu, ka i kare mogo pe wangeyo tam ma myero wamoki nyo watimo bal, pud watwero lega bot Jehovah labongo lworo.—Jab. 119:​25, 176.

KIT ME LEGA I YO MA WEKO WANYIKKE COK BOT JEHOVAH

6-7. Gin ango ma twero konyowa me tito ki Jehovah kit ma wawinyo kwede kikome? Mi labol. (Nen lok ma tye i tere piny.)

⁶ Ka watito ki Jehovah tamwa ki kit ma wawinyo kwede kikome, ci wabinyikke cok kwede. Dong gin ango ma twero konyowa me timo meno?

⁷ Tam matut i kom kit pa Jehovah mapatpat.a Ka wabedo ka tamo matut i kom kit pa Jehovah, ci doko yot botwa me tite kit ma wawinyo kwede kikome. (Jab. 145:​8, 9, 18) Nen kong labol pa laminwa Kristine, ma wonne onongo ger adada. Pi meno, en onongo nongo ni tek adada me ye ni Jehovah obedo Wego ma lamar ki me lega bote. En bene onongo winyo calo pe epore dok ni Jehovah bijuko mare woko ka etimo bal. Kit pa Jehovah mene ma okonye? Kristine owaco ni: “Atamo matut i kom mar ma pe lokke pa Jehovah dok meno ocuko cwinya ni Jehovah mara. I kare-ni dong, angeyo ni en bikonya kare ducu. Kadi bed atim bal mogo, en pud bimedde ki mara. Dong ka atamo i kom kit ma Jehovah lamar kwede, miyo abedo agonya me tite jami ducu ma yomo cwinya ki ma cwero cwinya.”

8-9. Adwogi mabeco ango ma bino ka kong ikwanyo kare me tam i kom gin ma imito lega pire? Mi labol.

⁸ Tam i kom gin ma imito lega pire. Ma pud peya icako lega, itwero pennye ki lapeny macalo magi: ‘Peko ango ma atye ka kemme kwede i cawa-ni? Tika tye ngat mo ma myero atimme kica? Tika tye gin mo ma olokke i kwona cokcok-ki ma mito kony pa Jehovah me loyone?’ (2 Luker 19:​15-19) Itwero bene lubo lega ma Yecu omiyo macalo lapor kun itamo i kom gin ma itwero penyo ki bot Jehovah ma lubbe ki Nyinge, Ker-re kacel ki Mitine.—Mat. 6:​9, 10.

⁹ I kare ma laminwa mo ma nyinge Aliceb oniang ni cware tye ki two kanca ma mako adam dok bikwo pi kare manok keken, obedo tek adada bote me lega. Wiye po ni: “Par onongo nurra matek adada ma omiyo ka acako lega nongo pe atwero tam i kom gin ma omyero awacci.” Gin ango ma okonye? En otito ni: “Ma peya alego, akwanyo kare me tam i kom gin ma myero awac bot Jehovah wek pe abed ka lega pira ki pi two pa cwara keken. Ka atimo meno, miyo abedo ma wiya opye mot dok nongo atwero lega bot Jehovah i kom jami mapatpat.”

10. Pingo omyero pe irune ka itye ka lega? (Nen bene cal.)

¹⁰ Pe irune ka itye ka lega. Tye lok ada ni kadi wa lega macek twero nyikowa cok ki Jehovah, ento ka wakwanyo kare me lega pi cawa malac, ci wabibedo ki kare me tito ki Jehovah kit ma wawinyo kwede kikome.c Omego Elijah, ma obedo cwar Alice, otito ni: “Atute me lega tyen mapol nino ducu dok awinyo ni atye cok ki Jehovah ka alego pi cawa malac. Jehovah pe ruya ka atye ka lega, pi meno atero kare muromo i lega.” Tem kong lubo tam man: Mok cawa ki kabedo ma itwero lega iye ma nongo gin mo keken pe twero wiro tammi, dok itwero lega pi cawa malac, nyo kadi ki dwan malongo. Dok itute me timone kare ki kare.

TAM MATUT I KOM LEGA MOGO MA TYE I BAIBUL

11. Adwogi maber ango ma wanongo ka wakwanyo kare me tam i kom lega pa lutic pa Lubanga ma kicoyogi i Baibul? (Nen bene bok ma wiye tye ni “Tika In Bene Iwinyo Kit ma Guwinyo Kwede?”)

¹¹ Twero bedo me kony boti ka itamo i kom gin ma lutic pa Jehovah me kare macon guwaco i legagi kacel ki wer me pak bot Jehovah. Ka ilwodo i kom tamgi ki kit ma onongo giwinyo kwede, man twero konyi me lubo lanengi me lega. Legagi bene twero konyi me nongo nyig lok mogo manyen ma itwero tic kwede me pako Jehovah. Dok itwero nongo lega ma rwatte ki kwo ma itye ka kato ki iye kikome.

12. Lapeny mene ma waromo pennye kwede ka watye ka kwano lok i kom lega ma kicoyogi i Baibul?

¹² Ka itye ka kwano lok i kom lega mo ma kicoyo i Baibul, pennye kekeni ni: ‘Anga ma olego lega man, dok kwone onongo tye nining? Tika lega man rwatte ki gin ma tye ka timme i kwona? Tika atwero nongo pwony ki i lega man?’ Twero mitte ni itim kwed me gamo lapeny magi, ento tute-ni pe bipoto nono. Kong dong wanenu lega angwen ma kicoyogi i Baibul.

13. Tit kong pwony acel madok i kom lega ma wanongo ki bot Anna? (1 Camuel 1:​10, 11) (Nen bene cal ma tye i )

¹³ Kwan 1 Camuel 1:​10, 11. I kare ma Anna olego lega man, en onongo tye ki pekki aryo madongo. En onongo pe nywal, dok nyeke onongo tere marac adada. (1 Cam. 1:​4-7) Ka in bene itye ki peko ma weko kwoni bedo tek adada, pwony ango ma itwero nongone ki i lega pa Anna? En olego pi cawa malac kun tito ki Jehovah par ducu ma etye kwede, dok i nge meno en owinyo maber adada. (1 Cam. 1:​12, 18) In bene itwero winyone maber ka ‘ibolo pekoni ducu bot Jehovah’ kun ititte par ducu ma itye kwede ki kit ma iwinyo kwede kikome.—Jab. 55:22.

14. (a) Pwony mukene ango ma wanongo ki i lanen pa Anna? (b) Pingo kwano ki lwodo Lok pa Lubanga konyowa me nongo nyig lok mapol ma watwero tic kwede i legawa? (Nen lok ma tye i tere piny.)

¹⁴ I nge mwaki mogo ma Anna onywalo wode Camuel, en otero latin man bot Lalamdog Madit Eli. (1 Cam. 1:​24-28) En olego bot Jehovah ki cwinye ducu kun titte pwoc ma etye kwede pien Jehovah gwoko dok paro pi luticce ma lugen.d (1 Cam. 2:​1, 8, 9) En onongo pud tye ki peko i kwone, ento me ka bedo ka tam i kom pekkine keken, en oketo tamme i kom kit ma Jehovah ogoyo kwede laane i kome. Pwony ango ma wanongo? Wabibedo ki kero me kanyo pekkiwa ka waketo tamwa i kom kit ma Jehovah tye ka konyowa kwede.

15. Pwony ango ma wanongo ki i lega pa lanebi Jeremia? (Jeremia 12:1)

¹⁵ Kwan Jeremia 12:1. Lanebi Jeremia cwinye otur pien oneno ni jo maraco gibedo ki pekki manok i kwogi. Cwinye bene otur pi kit ma Luicrael luwote onongo gitere kwede marac. (Jer. 20:​7, 8) Watwero niang kit ma en onongo winyo kwede pien wan bene kicayowa dok waneno kit ma lutim maraco gimedde kwede ki bedo lulonyo. Kadi bed Jeremia otito kit ma cwinye ocwer kwede pi jami magi, en pe okok i kom Jehovah ni pe ngolo kop atir. Dok genne i kom ngolo kop pa Jehovah nen calo ojing matek i kare ma en oneno kit ma Jehovah omiyo kwede pwod bot Jone ma lujemo. (Jer. 32:19) Wan bene watwero tito ki Jehovah kit ma cwinywa cwer kwede ka waneno dano gitimo jami maraco. Ki tungcel bene, wabedo ki gen ni Jehovah bijwayo tim maraco woko ka karene oromo.

16. Pwony ango ma wanongo ki i lega pa Lalevi man? (Jabuli 42:​1-4) (Nen bene cal.)

¹⁶ Kwan Jabuli 42:​1-4. Lalevi mo ma onongo pe twero cito i ot pa Lubanga ka woro kacel ki Luicrael luwote aye ocoyo wer man. Wer meno nyuto kit ma en onongo winyo kwede. Wan bene watwero winyone kit meno ka pe watwero a ki i paciwa pi peko me two, nyo ka watye i buc pi niyewa. I kine mukene watwero winyone maber, ento i kare mogo wabedo ma cwinywa otur. Labongo paro pi kit ma wawinyo kwede, bedo ber ka watito pi gin meno bot Jehovah i lega. Timo man bikonyowa me niang maber kit ma wawinyo kwede ki dok me poyo wiwa i kom gin ma pire tek loyo. Me labolle, Lalevi man oniang ni ebibedo ki kare maber mukene me pako Jehovah. (Jab. 42:5) En bene olwodo kit ma Jehovah onongo tye ka gwokke kwede. (Jab. 42:8) Lega ki cwinywa ducu konyowa me bedo ma komwa opye mot ki me niang maber pingo i cawa mogo wawinyo marac, dok weko wabedo ki teko me ciro peko.

17. (a) Pwony ango ma watwero nongone ki i lega pa lanebi Yona? (Yona 2:​1, 2) (b) Nyig lok mogo ma kitiyo kwede i Jabuli twero konyowa nining ka watye ka kato ki i kwo matek? (Nen lok ma tye i tere piny.)

¹⁷ Kwan Yona 2:​1, 2. Lanebi Yona owaco legane man i kare ma onongo en tye i i rec mo madit. Kadi bed en okwero bedo lawiny bot Jehovah, Yona onongo pud tye ki gen ni Jehovah biwinyo legane. I legane meno, Yona otiyo ki nyig lok mapol ma nonge i Jabuli.e Oromo bedo ni en onongo ngeyo lok ma i Jabuli maber adada. Dong po i kom lok magi kacel ki bedo ka lwodone, okonye me bedo ki gen ni Jehovah bikonye. I yo acel-lu, ka watute me po i kom wang Ginacoya mogo, ci biminiwa kwecwiny ka walego bot Jehovah i kare me peko.

MEDDE KI NYIKKE COK BOT JEHOVAH I LEGA

18-19. Ka i cawa mogo iwinyo ni tek me tito kit ma iwinyo kwede i lega, lok me cuko cwiny ango ma wanongo ki i Jo Roma 8:​26, 27? Mi labol.

¹⁸ Kwan Jo Roma 8:​26, 27. I kare mogo, wabedo ki par ma miyo pe watwero tito kit ma wawinyo kwede bot Jehovah. Ento pe watye labongo kony. I kare ma kit meno, cwiny maleng pa Lubanga “bako doge” piwa. Man tyen lokke ngo? Jehovah otiyo ki cwiny mere maleng me konyo luco Baibul me coyo piny lega mapol pa dano ma gukato ki i pekki macal ki megwa. Ka dong pe watwero tito kit ma wawinyo kwede bot Jehovah, en twero tic ki nyig lok mogo ma nonge i lega magi, ci jologi calo obedo lega ma megwa kikome.

¹⁹ Tam man okonyo laminwa mo ma nyinge Yelena ma a ki i Russia. Kimake pi lok me lega kacel ki lok me kwano Baibul. Par onuro Yelena matek adada ma oweko en onongo ni tek me lega. En otito ni: “I kare meno, wiya opo ni ka par onura woko dok pe angeyo gin ma myero aleg pire, Jehovah bitic ki lega pa luticce ma i kare macon . . calo legana. . . . Man okweyo cwinya adada i kare ma onongo kwo tek.”

20. Gin ango ma twero weko bedo tek botwa me lega ka par onurowa?

²⁰ Ka par onurowa, twero miyo bedo tek botwa me lega ki cwinywa ducu. Gin ango ma twero konyowa? Watwero kong kwanyo karewa me kwano tyeng mogo ma i Jabuli ki dwan malongo ma peya walego. Watwero bene tute me coyo piny kit ma wawinyo kwede, kit ma Kabaka Daudi otimo kwede. (Jab. 18, 34, 142; lok me ka wiye.) Ki lok ada, pe tye cik mo ma tittiwa jami ma omyero watimgi ma peya walego. (Jab. 141:2) Tim gin ma inongo ni twero konyi me lega maber.

21. Pingo watwero lega ki cwinywa ducu?

²¹ Kweyo cwinywa adada me ngeyo ni Jehovah niang kit ma wawinyo kwede kadi wa ma nongo pud peya watite gin mo keken. (Jab. 139:4) Ento en mito ni watite kit ma wawinyo kwede ki kit ma wagene kwede. Dong pe ilwor tito ki Woru me polo kit ma iwinyo kwede. Nong pwony ki i lega mogo ma kicoyogi i Baibul. Leg ki cwinyi ducu. Wek Jehovah onge jami ma yomo cwinyi kacel ki jami ma cwero cwinyi. Jehovah obedo Larem me ada, dok kare ducu en bibedo atera me konyi!