Wii Pe Owil me Lega pi Jo Mukene

1. Watwero ngeyone nining ni legawa pire tek bot Jehovah?

LEGA obedo mic mamwonya adada. Tam kong iye: Jehovah opoko tic mogo bot lumalaika. (Jab. 91:11) En bene omiyo ki Wode tic ma pigi tego adada. (Mat. 28:18) Ento tika en omiyo ki ngat mukene tic me winyo legawa? Pe tye kit meno. Jehovah kikome aye ‘Lawiny legawa.’—Jab. 65:2.

2. I yo ma nining ma lakwena Paulo oweko kwede lanen maber ka odok i kom lega pi jo mukene?

² Kadi bed watye agonya me tito ki Jehovah par ma watye kwede, ento omyero waleg pi jo mukene bene. Lakwena Paulo onongo timo kit meno. Me labolle, en ocoyo bot kacokke ma i Epeco ni: “Alwongo nyingwu bene i legana.” (Ep. 1:16) Paulo bene olego pi Lukricitayo ki acel acel. Me labolle, en owaco bot Temceo ni: ‘Apwoyo Lubanga kun alwongo nyingi i legana kare ducu.’ (2 Tem. 1:3) Paulo onongo tye ki pekkine ma myero oleg pire. (2 Kor. 11:23; 12:​7, 8) Kadi bed kit meno, en pud okwanyo karene me lega pi jo mukene.

3. Pingo i kare mogo wiwa twero wil woko me lega pi jo mukene?

³ I kare mogo, wiwa twero wil woko me lega pi jo mukene. Pingo? Laminwa mo ma nyinge Sabinaa otito tyen lok acel. En owaco ni: “I lobo man, watye ki jami mapol adada me atima. Watwero lungo wiwa i kom pekkiwa keken ma weko pe dong walego pi jo mukene.” Tika gin ma kit man bene timme i komi? Ka tye kit meno, ci pwony man twero konyi. Pwony man (1) bitito pingo pire tek me lega pi jo mukene dok (2) bimiyo tam i kom kit me timone.

PINGO OMYERO WALEG PI JO MUKENE?

4-5. I yo ma nining ma legawa pi jo mukene “tye ki twero madwong?” (Yakobo 5:16)

⁴ Lega pi jo mukene “tye ki twero madwong.” (Kwan Yakobo 5:16.) Tika watwero konyo me loko gin ma romo timme i kom jo mukene ki lega pigi? Ada, watwero. Yecu onongo ngeyo ni ma pe orii, lakwena Petero bikwere woko, pi meno en owaco ni: “Alego piri ni niyeni pe odok cen.” (Luka 22:32) Paulo onongo bene ngeyo ni lega pi jo mukene twero konyo me loko gin ma romo timme i komgi. I kare ma kitweye i buc i Roma, en ocoyo bot Pilemon ni: “Atye ki gen ni legawu biweko gimiya botwu.” (Nen “pien atye ki gen ni legawu” i jami me akwana me nwtsty-E pi Pile. 22.) Dok meno aye gin ma otimme kikome. Ma pe orii, kigonyo Paulo woko ki i buc dok en omedde ki tito kwena odoco.

⁵ Ngene kene ni, legawa pe twero keto dic i kom Jehovah me cobo gin ma walego pire. Ento en keto cwinye i kom gin ma luticce gitye ka lega pire ma lubbe ki pargi, dok i kare mogo en twero yero me timo gin ma gulege pire. Ngeyo meno twero konyowa me lega bot Jehovah ki cwinywa ducu kun wageno ni en bicobo gin ma walego pire i yo maber loyo.—Jab. 37:5; nen 2 Jo Korint 1:11 i jami me akwana me nwtsty-E.

i jami me akwana me

6. Lega pi jo mukene miyo wawinyo nining i komgi? (1 Petero 3:8)

⁶ Lega pi jo mukene konyowa me dongo cwiny me “kica.” (Kwan 1 Petero 3:8.) Ngat ma lakica neno peko pa ngat mukene dok bedo ki miti me timo gin mo me konyo ngat meno. (Mar. 1:​40, 41) Laelda mo ma nyinge Michael owaco ni: “Ka alego pi jo mukene ma lubbe ki mitigi, ci acako niang maber pekki ma gitye ka kato ki iye, dok man weko mara pigi dongo matek. Awinyo ni atye cok kwedgi kadi bed gin pe gingeyo.” Laelda mo ma nyinge Richard bene otito adwogi maber mukene ma bino ka walego pi jo mukene. En owaco ni: “Ka walego pi ngat mo, meno twero tugo cwinywa me timo gin mo me konye.” En bene omedde ni: “Ka wakonyo ngat ma watye ka lega pire-ni, bedo calo watye ka konyo me gamo lega ma walego pire.”

7. Lega pi jo mukene konyowa nining me bedo ki neno matir i kom pekkiwa? (Jo Pilipi 2:​3, 4) (Nen bene cal.)

⁷ Lega pi jo mukene konyowa me bedo ki neno matir i kom pekkiwa. (Kwan Jo Pilipi 2:​3, 4.) Kit macalo watye ka kwo i lobo ma Catan aye loyo-ni, wan ducu ki acel acel watye ki pekki. (1 Jon 5:19; Yabo 12:12) Ka waweko odoko kitwa me lega pi jo mukene, nongo watye ka poyo wiwa ni ‘utmegiwa ma gitye i lobo ducu gitye ka ciro kit can macalo meno.’ (1 Pet. 5:9) Lapainia mo ma nyinge Katherine owaco ni: “Ka alego pi jo mukene, poyo wiya ni gin bene gitye ki pekki. Ka wiya opo i lok man, miyo ajuko bedo ki par mukato kare woko i kom pekona.”

ANGAGI MA WATWERO LEGA PIGI?

8. Mi labol pa jo ma watwero lega pigi.

⁸ Angagi ma watwero lega pigi? Watwero lega pi gurup pa dano magi—jo ma komgi lit, jo matino ma gikemme ki ngala kacel ki abita me timo bal i gang kwan, nyo jo ma gitye ki pekki ma bino pi tiyo. Luye luwotwa mapol bene gitye ka kato ki i aunauna ma bino ki bot jo ganggi nyo gamente me lobogi. (Mat. 10:​18, 36; Tic 12:5) Utmegiwa mukene bene guweko gangigi woko pi lok me lweny ma tye i kabedogi. Jo mukene gitye ka deno can pi pekki ma poto atura. Pe watwero ngeyo utmege magi ducu. Ento ka walego pigi, wanyuto ni watye ka lubo lok ma Yecu ociko ni “wumarre kekenwu.”—Jon 13:34.

9. Pingo omyero waleg pi co ma gidoro wi tic i dul pa Jehovah kacel ki pi mongi bene?

⁹ Watwero bene lega pi co ma gidoro wi tic i dul pa Jehovah. I kin co magi tye iye omege me Lukiko Madit kacel ki lukony korgi, lumemba me Komitti me Jang Gang Kal, omege ma gineno wi tic mapatpat i jang gang kal, luneno me adwol, luelda me kacokke ki dong lukony kor tic. Pol pa omege magi gitye ka kemme ki pekki mapol adada ento pud gimedde ki tic matek me konyowa. (2 Kor. 12:15) Me labolle, laneno me adwol mo ma nyinge Mark owaco ni: “Anongo tek adada me kwo ka mabor ki lunyodona ma dong guteggi woko-ni. Gin aryo ducu komgi lit. Kadi bed lamera gin ki cware gitye ka gwokogi, pud anongo ni lit adada ni pe atwero minigi kony muromo.” Pe watwero ngeyo pekki ducu ma omege magi ma gitiyo matek-ki gikato ki iye, ento omyero wiwa opo me lega pigi. (1 Tec. 5:​12, 13) Watwero bene lega pi mon pa omege magi, pien gikonyo coggi matek me medde ki ticgi pi kacokke.

10-11. Tika lega lumuku pi omegiwa ki lumegiwa yomo cwiny Jehovah? Tit kong.

¹⁰ Kit ma dong wanyamo kwede, pol kare walego pi gurup pa omege ki lumege mapatpat. Me labolle, kadi bed pe watye ki tam me lega pi ngat moni, watwero lego Jehovah me konyo utmege ma kitweyogi i buc nyo me kweyo cwiny jo ma gurwenyo danogi me amara i to. Laelda mo ma nyinge Donald owaco ni, “Watye ki omege ki lumege mapol ma gitye ka kato ki i pekki mapatpat ma weko cawa mukene walego pi gin ducu lumuku.”

¹¹ Tika lega ma kit meno yomo cwiny Jehovah? Yomo cwinye adada! Pe wangeyo gin ma omegiwa ki lumegiwa ducu ki acel acel gimito. Pi meno, pore me lega lumuku pi gurup mapatpat pa omege ki lumege. (Jon 17:20; Ep. 6:18) Lega ma kit meno nyuto ni ‘wamaro utmegiwa ducu.’—1 Pet. 2:17.

KA WATYE KA LEGA PI NGAT MO

12. Bedo ma wangi bit twero konyi nining me lega pi jo mukene kun itiyo ki nyinggi?

¹² Bed ma wangi bit. Medo i kom lega lumuku pi omege ki lumege, pore bene me lega pi ngat moni kun ilwongo nyinge. Tika tye ngat mo i kacokkewu ma kome lit matek? Tika tye bulu mo i kacokkewu ma cwinye otur pien lutino kwan luwote gibedo ka bite me timo bal? Nyo wutye ki lanyodo mo ma tye kene dok tye ka tute me ‘pwonyo ki nyebo latinne me bedo ki kit mabeco ma Jehovah pwoyo?’ (Ep. 6:4) Ka ibedo ma wangi bit, ci mari kacel ki kica-ni pi jo mukene bidongo dok meno bitugo cwinyi me lega pigi.b—Rom. 12:15.

13. Watwero lega pi jo ma pe wangeyogi nining?

¹³ Leg pi jo mukene kun ilwongo nyinggi. Watwero lega kadi wa pi jo ma peya warwatte kwedgi. Me labolle, tam kong i kom omegiwa ki lumegiwa ma kitweyogi i buc i lobe calo Crimea, Eritrea, Russia, ki Singapore. Itwero nongo nying omege ki lumege ma kitweyogi i buc i jw.org.c Laneno me adwol mo ma nyinge Brian owaco ni: “Anongo ni ka acoyo piny nying omego nyo lamego mo ma tye i buc ci alwongo nyinge matek, bedo yot bota me po i kom nyinge ki me lega pire.”

14-15. Watwero lega pi gin ma mitte pi ngat acel acel nining?

¹⁴ Leg pi gin ma mitte kikome pi ngat ma itye ka lega pire-ni. Omego Michael, ma kiloko i kome con-ni, omiyo tam ni: “Ka atye ka kwano ki i jw.org lok i kom omege ma kitweyogi i buc, atemo goyo i wiya kit ma onongo abiwinyo kwede ka onongo an aye atye i buc. Angeyo ni onongo abibedo ki par i kom dakona, dok onongo abitute me neno ni en onongo jami ducu ma mitte. Timo man konya me ngeyo gin ma myero aleg iye kikome pi omege ma gunyomme ma kitweyogi i buc.”—Ibru 13:3.

¹⁵ Ka watemo goyo i wiwa kit ma kwo tye kwede pi utmegiwa ma kitweyogi i buc, twero konyowa me nongo jami mukene ma watwero lega pire. Me labolle, watwero lega ni acikari ma gigwoko lumabuc gunyut cwiny me kica bot utmegiwa dok ni lutela guye ki utmegiwa me woro Lubanga agonya. (1 Tem. 2:​1, 2) Watwero lega ni lanen pa omego nyo lamego meno ma kitweyo-ni ojing jo me kacokkene nyo ni jo ma pe gubedo luye gunen kite maber-ri ci gujol kwenawa. (1 Pet. 2:12) Dok bene watwero timo gin ma rom aroma ka watye ka lega pi omege ki lumege ma gitye ka ciro pekki mukene. Ka wabedo ma wangwa bit, walwongo nying jo ma watye ka lega pigi, dok walego pi gin ma mitte pigi kikome, ci wanyuto ni ‘marwa tye matek tutwal pi ngat acel acel.’—1 Tec. 3:12.

BED KI NENO MA ATIR I KOM LEGANI

16. Gin ango ma twero konyowa me bedo ki neno ma atir i kom legawa? (Matayo 6:8)

¹⁶ Kit ma dong waneno kwede, legawa twero kelo alokaloka i kwo pa dano. Kadi bed kit meno, omyero wabed ki neno ma atir i kom legawa. Wiwa myero opo ni ka watye ka lega, nongo pe watye ka tito ki Jehovah gin mo ma en pe ngeyo, dok en pe mito tamwa i kom kit me cobo peko moni. Jehovah ngeyo gin ma luticce mito ma nongo peya gungeyo nyo wan wangeyo. (Kwan Matayo 6:8.) Dong pingo omyero waleg pi jo mukene? Medo i kom tyen lok mogo ma kititogi i pwony man, lega obedo yo ma wanyuto kwede ni waparo pi jo mukene. Mar tugo cwinywa me lega pi jo mukene. Dok yomo cwiny Jehovah adada me neno ka jone lubo lanenne me mar.

17-18. Lapor mene ma twero konyowa me niang kit ma pire tek kwede me lega pi luye luwotwa?

¹⁷ Kadi bed legawa twero nen calo pe okelo alokaloka mo keken, ento nyuto ni wamaro omegiwa ki lumegiwa dok Jehovah neno meno. Watwero porone kit man: Go kong jo me ot mo ma gitye ki lutino matino aryo—awobi ki anyaka. Ento awobi-ni kome lit. Ci anyaka-ni olego wonne ni: “Baba, tim gin mo ba me konyo omera. Kome lit adada!” Wonne dong otyeko timo jami ducu ma en twero; en maro wode dok tye ka gwokke maber adada. Kad bed kit meno, wego meno cwinye bedo yom adada me neno kit ma nyare paro kwede pi ominne ma oweko olego wonne me konyo ominne.

¹⁸ Meno aye gin ma Jehovah cuko cwinywa me timone—me paro pi luwotwa kacel ki lega pigi. Ka watimo meno, wanyuto ni pe waparo piwa kekenwa ento wamaro omegiwa ki lumegiwa, dok Jehovah neno man. (2 Tec. 1:3; Ibru 6:10) Dok kit ma wanyamo kwede, legawa twero kelo alokaloka i kwo pa ngat mo. Dong pi meno, myero watute matek me lega pi jo mukene.