Lumemba Aryo Manyen me Lukiko Madit

I NINO DWE 5 ME OKTOBA, MWAKA 2024, kimiyo lok angeya mo ma pire tek adada i cokke ma bedo mwaka ki mwaka, ni: Omego Jody Jedele gin ki Jacob Rumph dong kityeko cimogi macalo lumemba me Lukiko Madit pa Lucaden pa Jehovah. Omege aryo magi ducu dong gutiyo pi Jehovah pi mwaki mapol.

Kinywalo Omego Jedele i Missouri, i lobo Amerika, dok lunyodone onongo gubedo Lucaden pa Jehovah. Jo ganggi gukwo i kabedo ma onongo Lucaden nok iye adada. Pi tyen lok man, omiyo en obedo ki kare me rwatte ki omege ki lumege mapol ma gia ki i kabedo mapatpat ma onongo gicito ka tito kwena kunnu. Mar kacel ki note ma onongo tye i kin utmege magi ogudo cwiny Jedele adada. En onongo batija i nino dwe 15 me Oktoba, mwaka 1983. En omaro tic me tito kwena matek, dok i nge tyeko kwanne me cinia, en ocako tic macalo painia i Sektemba, mwaka 1989.

I kare ma Omego Jedele onongo pud awobi matidi, lunyodone onongo pol kare tere gin ki laminne ka limo Betel. Lim magi otugo cwinygi me tic i Betel, dok i nge kare mo gin aryo ducu gucako tic i Betel. Kilwongo Omego Jedele me cito i Betel me Wallkill i Sektemba, mwaka 1990. En ocako ticce mukwongo i Dipatmen me Gwoko Lengo, dok lacen en otiyo i Dipatmen ma Neno Lok me Yotkom pa Lubetel.

I kare meno, onongo tye kacokke mo matidi me leb Spanish ma onongo tye ka dongo dok onongo mito omege. Pi meno, Omego Jedele ocako wot i kacokke meno ci opwonyo leb Spanish. I nge kare manok keken, en orwatte ki lamego mo ma nyinge Damaris, ma onongo tye painia i adwol meno. Lacen gunyomme, ci Damaris bene ocako tic i Betel.

I mwaka 2005, gin gudok cen gang ka gwoko lunyodogi ma onongo dong gutegi woko-ni. I kare meno, gin gubedo ka tic macalo painia marii. Omego Jedele omiyo kony me pwonyo Cukul pi Painia, dok en bene otiyo i Komitti ma Kubu kin Lucaden ki Ludaktari ki bene i Komitti ma Loyo Lok me Gedo i Rijon.

I mwaka 2013, kilwongo Omego Jedele gin ki dakone me dok cen i Betel me miyo kony i tic me gedo i Warwick. Cakke i kare meno, gin bene gutiyo i Betel me Patterson ki Wallkill. Omego Jedele bene otiyo i Dipatmen ma Doro Tic me Goyo Pulan ki Gedo (LDC) ki dok i Ka Nongo Ngec Madok i Kom Ot Yat. I dwe me Adek, mwaka 2023, kicime macalo lakony kor Komitti ma Doro Tic me Tito Kwena. Ka en otamo i kom tic mapatpat ma ebedo kwede, en waco ni: “Ka inongo mot me tic manyen, itwero bedo ki lworo. Ento meno aye kare ma myero ijenge i kom Jehovah pien en aye miniwa kero me cobo tic ma ominiwa.”

Kinywalo Omego Rumph i California, i lobo Amerika. I kare ma en pud tidi, mamane onongo ticce pi Jehovah okwe woko ento gire otute me pwonyo wode lok ada me Baibul. Medo i kom meno, mwaka ki mwaka Omego Rumph onongo cito ka limo daane, ma onongo obedo Lacaden ma lagen. Dadane okonye matek me tugo mitine me pwonyo ada, dok i kare ma en oo mwaka 13, en openyo ni kikwan Baibul kwede. I nino dwe 27 me Sektemba mwaka 1992, en onongo batija ma pud tye ki mwaka apar ki wiye keken. Ki yomcwiny madit, mamane dok ocako tito kwena odoco kacel ki cito i cokke dok wonne, omin Rumph ki laminne gucako kwano Baibul ci gunongo batija.

I kare me bulune, Omego Rumph onongo neno kit ma lupainia cwinygi yom kwede. Pi meno, i nge tyeko kwanne me cinia, en ocako tic macalo painia i Sektemba 1995. I mwaka 2000, en okobo i lobo Ecuador me tic ka ma can lutit kwena tye iye. Ki kunnu, en orwatte ki lamego mo ma tye lapainia ma nyinge Inga, ma a ki i lobo Canada. Lacen gunyomme, ci gucako tic kacel i taun mo i Ecuador ma onongo tye ki gurup mo matidi pa lutit kwena. I kare-ni dong, taun meno tye ki kacokke madit.

I nge kare mo, kicimo Omego Rumph gin ki dakone me tic macalo painia keken dok lacen, kicwalogi i tic me limo adwol. I mwaka 2011, kilwongogi i kilaci me 132 me Gilead. I nge tyeko kwangi, gutiyo i lobe abic mapatpat dok gubedo ki mot me tic mapatpat calo, tic i Betel, tic macalo lumiconari, ki dong tic me limo adwol. Omego Rumph bene opwonyo i Cukul pi Lutit Kwena me Ker-ri.

I kare ma two Korona opoto, onongo mitte ni Omego Rumph ki dakone gudok cen i lobo Amerika. Kilwongogi me cito i Betel me Wallkill, dok ki kunnu Omego Rumph onongo pwonnye i Dipatmen ma Neno Wi Tic. Lacen, kicwalogi dok me tic i jang kal me Ecuador, dok ki kunnu Omego Rumph otiyo macalo Lamemba me Komitti me Jang Gang Kal. I mwaka 2023, kikobogi me tic i Warwick. I Januari mwaka 2024, kicimo Omego Rumph me tic macalo lakony kor Komitti ma Doro Tic me Tito Kwena. Ka en otamo i kom kabedo mapatpat ma dong etiyo iye, en waco ni, “Gin ma weko tic moni pire bedo tek, pe obedo kabedo ma itye iye ento dano ma itiyo kwedgi aye.”

Watye ki pwoc madit pi tic pa omege magi, ‘dok bene omyero waket deyo i kom jo ma cal kwedgi.’—Pil. 2:29.