Lumemba Aryo Manyen me Lukiko Madit
I CENG ADEK, Januari 18, 2023, kiketo lok angeyo mo ma kite dok pat i jw.org, ma tito ni Omego Gage Fleegle ki Jeffrey Winder kicimogi me tic macalo lumemba me Lukiko Madit pa Lucaden pa Jehovah. Omege aryo magi ducu dong gutiyo pi Jehovah ki gen pi mwaki mapol.
Gage Fleegle ki dakone, Nadia
Omego Fleegle odongo tung kupoto ceng me Pennsylvania, lobo Amerika, i cing lunywalle ma gitye Lucaden. I kare ma en tye mwaka apar ki wiye, jo me ganggi gukobo i caro mo ka ma can lutit kwena tye iye. Ma pe orii i nge meno, en onongo batija i nino dwe 20 me Novemba, mwaka 1988.
Lunyodo pa Omego Fleegle onongo kare ducu gicuko cwinye me donyo i tic pi kare malac. Pol kare onongo gilwongo luneno me adwol kacel ki Lubetel i pacogi, dok Omego Fleegle onongo twero neno yomcwiny ma omege ki lumege magi gitye kwede. Ma pe orii i nge batijane, en ocako tic macalo painia marii i nino dwe 1 me Sektemba, mwaka 1989. Mwaki aryo i nge meno, en ocobo yub mo ma en onongo oketo i kare ma tye ki mwaka 12—yub me tic i Betel. En ocako tic i Betel ma i Brooklyn i Oktoba 1991.
Ki i Betel, Omego Fleegle otiyo i faktori me goyo ki ribo bukke pi mwaki aboro, dok i nge meno kicwale ka tic i Dipatmen ma Neno Wi Tic. I kare meno, en obedo i kacokke ma kiloko iye leb Russian pi mwaki mogo. I mwaka 2006, en onyomo dakone Nadia, ci Nadia odonyo i Betel ka tic kacel ki cware. Gin gutiyo kacel i wang tic ma kiloko iye leb Portuguese dok pi mwaki makato apar gunywako i tito kwena i leb Spanish. I nge tic i Dipatmen ma Neno Wi Tic pi mwaki mapol, kikobo Omego Fleegle ka tic i Opic pa Komitti me Pwony ki lacen i Opic pa Komitti ma Doro Tic me Tito Kwena. I Marci 2022, kicime macalo lakony kor Komitti pa Lukiko Madit ma Doro Tic me Tito Kwena.
Jeffrey Winder ki dakone, Angela
Omego Winder odongo i Murrieta, California, lobo Amerika. Lunywalle aye gupwonye ada dok en onongo batija i nino dwe 29 me Marci, mwaka 1986. I dwe ma lubo meno, en omoko tamme me tic macalo painia pi tutunu. Tic man oyomo cwinye adada mumiyo en obedo ki miti me medde kwede. I nge tic macalo painia pi tutunu pi dwe mapol, en ocako tic macalo painia marii i nino dwe 1 me Oktoba, 1986.
I kare ma Omego Winder tye ki mwaka apar ki wiye, en olimo omegine aryo madongo ma onongo gitye ka tic i Betel. Meno otugo mitine me pongo fom me tic i Betel ka mwakane oromo. Dong i Mai 1990, kilwonge me tic i Betel ma tye i Wallkill.
Ki i Betel, Omego Winder otiyo i dipatmen mapatpat, ma i kine onongo tye iye Dipatmen me Gwoko Lengo, Dipatmen me Pur, ki Opic ma Doro Tic i Betel. En onyomo dakone Angela i mwaka 1997, dok gitye ka tic kacel i Betel nicakke i kare meno. I mwaka 2014, gukobo i Warwick, ka ma Omego Winder obedo ka konyo tic me gero gang kalwa madit. I mwaka 2016, gukobo i Watchtower Educational Center i Patterson, ka ma Omego Winder otiyo i Dipatmen me Mako Dwan ki Vidio. I nge mwaki angwen, gudok cen i Warwick, dok kicimo Omego Winder me tic i Opic pa Komitti ma Neno Lok Kom Lubetel. I Marci 2022, kicime macalo lakony kor Komitti pa Lukiko Madit ma Neno Lok Kom Lubetel.
Walego ni Jehovah ogo laane i kom ‘mot magi ma gubedo dano’ ka gimedde ki tic matek pi Ker-ri.—Ep. 4:8.