“ Wuket Tek me Gwoko Ribbe ma Cwiny Maleng Omiyowu”
Lakwena Paulo ociko Lukricitayo me Epeco me medde ki ‘diyo cwinygi i kom luwotgi ki mar, ki me keto tek me gwoko ribbe ma cwiny maleng omiyogi wek gubed acel i twec me kuc.’—Ep. 4:2, 3.
“Ribbe” ma tye i kinwa-ni, ‘cwiny maleng aye miniwa.’ Man tyen lokke ni ribbe bedo tye i kinwa pi teko pa cwiny maleng pa Lubanga. Ento kit ma Paulo otito kwede, mito tute matek me gwoko ribbe meno. Man obedo tic pa angagi? Ada, obedo tic pa Lukricitayo ducu me gwoko ribbe ma ‘cwiny maleng miniwa.’
Me labolle, go kong ni ngat mo omini mutoka manyen. Tic me gwoko mutoka meno bibedo pa anga? Ngene kene ni obedo ticci. Pe itwero kok i kom ngat ma omini mic meno ka ce inen mutoka meno oballe pien in aye pe igwoko maber.
I yo acel-lu, ribbe ma tye i kinwa obedo mic ma oa ki bot Jehovah ento obedo tic pa wan ducu me gwoko ribbe meno. Ka wat maber pe tye i kinwa ki utmegiwa, ci bedo ber me pennye ni, ‘Tika atye ka tute matek me neno ni ribbe tye i kacokke?’
‘WUKET TEK ME GWOKO RIBBE MA TYE I KINWU’
Kit ma Paulo ocoyo kwede, nen ka maleng ni pe twero bedo yot me gwoko ribbe ma tye i kin omege ki lumege, tutwalle ka ngat mo acel i kin utmegiwa ocwero cwinywa. Tika pol kare mitte ni wang ma iloko ki ngat moni me tite kit ma iwinyo kwede? Pe mitte ni itim kit meno. Dong pennye kekeni ni, ‘Ka acito aloko ki ngat meno, tika biyubo wat i kinwa kece bibalone abala?’ I cawa mukene, twero bedo ber me timo kica ki ngat meno nyo me jalo lok meno woko.—Car. 19:11; Mar. 11:25.
Pennye kekeni ni, ‘Ka acito aloko ki ngat-ti, tika biyubo wat i kinwa kece bibalone abala?’
Kit ma lakwena Paulo ocoyo kwede, mitte ni ngat acel acel omedde ki “diyo cwinye i kom lawote ki mar.” (Ep. 4:2) Buk mo acel owaco ni lok meno bene kitwero gonyone ni “wujolgi kit ma gitye kwede.” Man tyen lokke ni omyero waye ni omegiwa ki lumegiwa gitimo bal kit ma wan bene watimo kwede. Ngene kene ni, watye ka tute me ‘ruko kit pa dano manyen.’ (Ep. 4:23, 24) Ento pe tye ngat mo keken i kinwa ma twero timo meno labongo roc. (Rom. 3:23) Ka waye lok meno, ci bibedo yot botwa me diyo cwinywa i kom luwotwa, timmigi kica ki dong me ‘gwoko ribbe ma cwiny maleng omiyowa.’
Wabibedo “acel i twec me kuc” i kacokke ka watimo kica dok wiwa wil woko i kom jami maraco ma jo mukene gutimo i komwa. Nyig lok me leb Grik ma kigonyo ni “twec” i Jo Epeco 4:3 en aye kigonyo ni “ler” i Jo Kolocai 2:19. Ler magi gubedo ler ma konyo me kubo cogo acel i kom lawote i wang mwot. I yo acel-lu, kuc kacel ki mar pi utmegiwa, konyowa me medde ki bedo ki wat macok kwedgi kadi bed i kare mukene gitimo jami ma cwero cwinywa.
Dong ka laye lawoti mo ocwero cwinyi, temme me neno ngat meno i yo me kica kun pe iketo cwinyi i kom gorone. (Kol. 3:12) Kit macalo dano ducu gitye ki roc-ci, twero bedo ni in bene i nino mo icwero cwiny ngat mo. Ka wiwa opo i kom lok meno, ci bikonyowa ‘me gwoko ribbe ma cwiny maleng omiyowa.’