“ Lubanga Mari Matek Twatwal”!

1-2. Gin ango ma romo konyowa me moko ni piwa tek bot Jehovah?

LUTIC pa Jehovah pigi tek adada bote. Ento tye jo mogo i kingi ma ginongo ni tek me ye ni Jehovah marogi. Twero bedo ni ngat mo oterogi marac adada ma omiyo giwinyo ni konygi pe. Tika gin ma kit meno dong otimme i komi? Ka tye kit meno, ci gin ango ma twero konyi me bedo ki tekcwiny ni piri tek bot Jehovah?

² Gin acel ma twero konyi obedo kwano lok ma i Baibul ma nyuto kit ma Jehovah mito ni kiter kwede ki dano. Wode Yecu obedo ki woro i kom dano dok oterogi ki kica. I kare ma otimo meno, en onyuto ni jo ma giwinyo ni konygi pe pigi tek adada bote kacel ki bot Wonne. (Jon 5:19; Ibru 1:3) I pwony man, wabinyamo: (1) kit ma Yecu okonyo kwede dano me niang ni pigi tek bot Jehovah ki (2) kit ma waromo bedo ki gen ni piwa tek bot Lubanga.—Ag. 2:7.

KIT MA YECU OKONYO KWEDE DANO ME NIANG NI PIGI TEK

3. Yecu otero jo me Galilaya ma gubino bote pi kony nining?

³ I kare ma Yecu obedo ka tito kwena i Galilaya, jo mapol gubino bote me winyo lokke ki dong wek Yecu ocanggi. Yecu owaco ni jo magi “onongo kiunogi dok pe kigwokogi, calo romi ma lakwatgi pe.”(Mat. 9:36; nen bene jami me akwana me nwtsty-E.) Lupwonye dinigi onongo gicayo jo magi dok gilwongogi ni ‘dano ma kicenogi.’ (Jon 7:​47-49; nen jami me akwana me nwtsty-E.) Ento Yecu onyuto botgi woro dok oterogi ki kica kun kwanyo kare me pwonyogi kacel ki cango jo ma gitye ki two. (Mat. 9:35) Dok bene, wek ebed ki kare me konyo jo mapol, en opwonyo lukwenane me tito kwena dok owaccigi ni, “wucang lutwo.”—Mat. 10:​5-8.

4. Pwony ango ma wanongo ki i kit ma Yecu otero kwede jo ma onongo kinenogi calo konygi pe?

⁴ Yecu onongo tero lwak ma gibino bote ki kica kacel ki woro, dok man onyuto ni en kacel ki Wonne gimaro jo ma pol kare kicayogi dok kinenogi ni konygi pe. Ka in latic pa Jehovah ento itye ki akalakala ka ada piri tek bote, ci tam i kom kit ma Yecu otero kwede jo ma gubino ka winyo lokke. Timo meno bikonyi me niang kit ma piri tek kwede i wang Jehovah.

5. Gin ango ma wangeyo i kom dako mo ma Yecu orwatte kwede i Galilaya?

⁵ Yecu pe opwonyo lwak keken ento bene okonyo dano ki acel acel. Me labolle, i kare ma Yecu tye ka tito kwena i Galilaya, en orwatte ki dako mo ma remo obedo ka cwer ki i kome pi mwaki 12 kulu. (Mar. 5:25) Ma lubbe ki Cik pa Moses, dako ma kit meno nongo obedo ngat ma kome pe leng, dok ngat mo keken ma ogude bidoko ngat ma pe leng. Dong man onongo nen calo weko dako-ni pol kare pe ribbe ki dano. Medo i kom meno, en onongo pe twero cito ka woro Lubanga kacel ki lwak i kacokke pa Lujudaya nyo i nino me kwer madito. (Levi 15:​19, 25) Dong dako man onongo pe kome lit keken ento bene onongo nenne kekene calo konye pe.—Mar. 5:26.

6. Gin ango ma dako ma kome lit-ti otimo wek ecang woko?

⁶ Dako man ma kome lit-ti onongo mito ni Yecu ocange. Ento en pe obino atir bot Yecu. Pingo? Twero bedo ni lewic obedo ka make pi twone meno. Nyo twero bedo ni en obedo ki lworo ni Yecu biryeme woko pien kome pe leng dok Cik pe ye ni en obed i kin dano. Pi meno, en ogudo mere dog bongo pa Yecu keken, pien onongo tye ki gen matek ni meno biweko ecang woko. (Mar. 5:​27, 28) Dok niyene matek meno okele adwogi maber. En ocang woko! Yecu openyo anga ma ogude ci dako meno otito gin ma etimo woko. Yecu odok iye nining?

7. Yecu otero dako ma onongo kome lit-ti nining? (Marako 5:34)

⁷ Yecu otero dako man ki kica dok ki woro. En oneno ni dako-ni onongo tye ki ‘lworo, dok kome tye ka myel.’ (Mar. 5:33) Pi meno, Yecu otere ki kica adada dok ocuko cwinye. En bene olwongo dako meno ni “nyara.” I kare ma Yecu olwongo dako meno ni nyare, en pe onyuto bote woro keken ento bene onyuto kica kacel ki mar. (Kwan Marako 5:34.) Man aye obedo tyen acel keken i Baibul ma Yecu olwongo kwede dako mo ni ‘nyare.’ En nen calo otiyo ki nyig lok man pien oneno ni dako man tye ki lworo dok kome tye ka myel. Itamo ni dako man owinyo nining i kare ma Yecu oloko kwede kit meno? Nen calo cwinye obedo yom adada pien Yecu otere ki kica dok ki mar. Ka onongo Yecu pe oloko kwede ki kica, kono onongo dako meno oa ma cwinye tye ka poto ni etimo bal me gudo bongo pa Yecu ki bedo i kin lwak. Yecu onongo pe tye ki miti me cango dako man keken, ento bene me nyuto bot dako meno ni pire tek adada bot Wonne Jehovah.

8. Pekki ango ma laminwa mo ma a ki i lobo Brazil okemme kwede?

⁸ I kare-ni bene, lutic pa Jehovah mogo gitye ki two ma weko gibedo ki turcwiny dok giwinyo ni konygi pe. Laminwa mo ma nyinge Mariaa ma a ki i lobo Brazil tiyo macalo painia marii. Kinywale labongo tyene ki bade tung acam. En otito ni: “Pi goro ma atye kwede, lutino kwan luwota onongo gilwonga ki nying me anywar ma cwero cwinya adada. Dok i cawa mukene, kadi wa jo gangwa bene onongo gitera i yo ma miyo awinyo ni konya pe adada.”

9. Gin ango ma okonyo Maria me niang ni en pire tek i wang Jehovah?

⁹ Gin ango ma okonyo Maria? I kare ma en odoko Lacaden pa Jehovah, Lukricitayo luwote gunyutte mar madwong adada dok gukonye me nenne kekene kit ma Jehovah nene kwede. En owaco ni: “Omege ki lumege mapol adada gukonya! Apwoyo Jehovah adada pi mina jo me kacokke ma gitye calo jo me gangwa kikome.” Omege ki lumege magi gukonyo Maria me niang ni en pire tek i wang Jehovah.

10. Peko ango ma Maliam Lamagdala onongo tye kwede dok man onongo miyo en winyo nining? (Nen bene cal.)

¹⁰ Kong dok wanenu kit ma Yecu okonyo kwede dako mo ma nyinge Maliam Lamagdala. Dako man onongo tye ki cen abiro kulu i kome! (Luka 8:2) Cen magi nen calo onongo miyo en timme i yo mapat adada dok macalo adwogine onongo dano pe bedo i ka ngete. En odeno can adada. Dok nen calo en onongo bedo ki lworo dok tamo ni pe tye ngat mo keken ma twero marre nyo konye. Yecu oryemo cen ma onongo yelo Maliam woko, ci en odoko lalub kor Yecu.

11. I yo ma nining ma Yecu onyuto kwede ki Maliam Lamagdala ni pire tek adada bot Lubanga? (Nen bene cal.)

¹¹ I yo mukene ango ma Yecu okonyo kwede Maliam Lamagdala me niang ni pire tek bot Lubanga? Yecu omiyo ki Maliam Lamagdala mot me wot kacel kwede ki lupwonnyene ka gicito ka tito kwena i kabedo mapatpat.b Macalo adwogine, en onongo twero winyo ka Yecu pwonyo jo mukene. Yecu bene onen bot Maliam i nino ma kicere iye kikome. Maliam obedo i kin lupwonnye mukwongo ma Yecu oloko kwedgi i nino meno. Dok Yecu omine tic me waco ki lukwenane ni dong kicere woko. I yo magi ducu, Yecu okonyo Maliam me neno ni pire tek adada bot Jehovah!—Jon 20:​11-18.

12. Gin ango ma omiyo Lidia onongo winyo calo ngat mo keken pe twero mare?

¹² Calo Maliam Lamagdala, dano mapol i kare-ni bene giwinyo calo konygi pe. Laminwa mo ma nyinge Lidia, ma a ki i lobo Spain owaco ni ma pud peya kinywale, mine obedo ki tam me kwanye woko ki i ic. Lidia bene wiye po ni ma pud etidi adada, mine onongo pe paro pire dok yete ki leb malik. En owaco ni: “Kit macalo mamana pe onyutta mar mo keken-ni, kare ducu onongo amito ni jo mukene gumara dok gubed lurema. Onongo atye ki lworo ni kadi bed atim gin ango, jo mukene pe gibimara kulu pien mamana onongo weko atamo ni abedo dano marac.”

13. Gin ango ma okonyo Lidia me nenne kekene ni pire tek bot Jehovah?

¹³ I kare ma Lidia ocako kwano Baibul, kwone olokke woko. Lega bot Jehovah, kwano Baibul, kacel ki lok me kica ma omege ki lumege giwacce okonye me niang ni pire tek adada bot Jehovah. Lidia owaco ni: “Cwara kare ducu bedo ka wacca kit ma emara kwede. Kare ki kare, en poyo wiya i kom kit mabeco ma atye kwede. Lurema mukene macok bene gitera kit meno.” Calo Lidia, twero bedo ni tye ngat mo i kacokkewu ma mito kony me niang ni pire tek bot Jehovah, dok itwero konye i lokki kacel ki jami ma itimo.

KIT ME NENNE KEKENWA KIT MA JEHOVAH NENOWA KWEDE

14. I yo ma nining ma 1 Camuel 16:7 konyowa me nenne kekenwa kit ma Jehovah nenowa kwede? (Nen bene bok ma wiye tye ni “Pingo Jo pa Jehovah Pigi Tek Adada Bote?”)

¹⁴ Wii opo ni Jehovah pe neni kit ma jo me lobo gineni kwede. (Kwan 1 Camuel 16:7.) Jo me lobo gitero ngat moni ni pire tek ma lubbe ki kit ma en nen kwede, wel cente ma en tye kwede, nyo rwom me kwan ma en tye kwede. Ento Jehovah pe neni kit meno. (Ic. 55:​8, 9) Dong, tute me nenne kekeni kit ma Jehovah neni kwede ento pe kit ma dano me lobo gineni kwede. Baibul loko i kom jo mogo ma guwinyo ni konygi pe, calo Elia, Naomi ki Anna. Ka itye ka kwano lok i komgi, tute me neno kit ma Jehovah omarogi kwede. Itwero bene coyo piny jami mogo mutimme i kwoni ma oweko imoko ni Jehovah mari. Medo i kom meno, itwero kwano pwony mogo ma loko i kom bedo ki neno mupore i komi kekeni ma nonge i bukkewa.c

15. Pingo Jehovah onongo ‘maro Daniel matek tutwal?’ (Daniel 9:23)

¹⁵ Bed ki gen ni niyeni matek i kom Jehovah miyo piri bedo tek adada bote. I kare ma onongo lanebi Daniel dong cok o mwaka 100, cwinye otur dok en owinyo ni dong eol adada. (Dan. 9:​20, 21) Jehovah ocuko cwiny Daniel nining? Lubanga ooro lamalaika Gabriel me poyo wi Daniel ni ‘Lubanga mare matek twatwal’ dok otyeko winyo legane. (Kwan Daniel 9:23.) Pingo onongo Daniel pire tek adada bot Lubanga? Pien Daniel onongo obedo dano ma kite atir dok lagen. (Ejek. 14:14) Jehovah oweko kicoyo lok man i Baibul me cuko cwinywa. (Rom. 15:4) Kit macalo in bene itimo gin ma atir dok itye lagen bot Jehovah, en mari. Dok kit ma owinyo kwede ki lega pa Daniel, en bene biwinyo legani.—Mika 6:8; Ibru 6:10.

16. Gin ango ma twero konyi me neno Jehovah calo Wego ma lamar?

¹⁶ Nen Jehovah calo wego ma mari. En tye ki miti me konyi, ento pe me yenyo bal i komi. (Jab. 130:3; Mat. 7:11; Luka 12:​6, 7) Lwodo lok meno dong okonyo jo mapol ma gilwenyo ki tam ni konygi pe. Me labolle, tam kong i kom laminwa Michelle, ma a ki i lobo Spain. En onongo winyo ni pe kimare dok konye pe pien pi mwaki mapol cware obedo ka yete ki leb mogo maraco. En owaco ni, “Ka acako winyo ni konya pe, atute me goyo i wiya kit ma Jehovah otinga kwede i kore dok tye ka nyutta mar kun bene gwoka.” (Ic. 40:11) Laminwa Lauren, ma a ki i lobo South Africa, poyo wiye kekene ni, “Kit macalo Jehovah okela cok bote, oweko atye cok kwede pi mwaki magi ducu, dok bene otiyo kweda me pwonyo jo mukene, meno nyuto ni en nena ni pira tek dok konya tye.”—Koc. 11:4.

17. Gin ango ma twero konyi me moko ni itye ki cwak pa Jehovah? (Jabuli 5:12) (Nen bene cal.)

¹⁷ Bed ki gen ni itye ki cwak pa Jehovah. (Kwan Jabuli 5:12.) Daudi oporo cwak pa Jehovah ki “kwot” madit ma gwoko jo ma kitgi atir. Ngeyo ni itye ki cwak pa Jehovah twero gwoki calo kwot ka icako bedo ki tam ni konyi pe. Itwero ngeyone nining ni itye ki cwak pa Jehovah? Kit ma dong waneno kwede, Jehovah ominiwa Baibul ma tittiwa kit ma en winyo kwede i komwa. Medo i kom meno, en tiyo ki luelda, luremwa macok, kacel ki jo mukene me poyo wiwa ni piwa tek adada bote. Dong gin ango ma omyero itim ka jo mukene guwacci lok me kica?

18. Pingo omyero iye lok me pwoc ma a ki bot jo mukene?

¹⁸ Ka jo ma gingeyi dok gimari gupwoyi pi jami mabeco ma itimo, pe ikwer woko. Wii opo ni twero bedo ni Jehovah tye ka tic kwedgi me konyi me ye ni piri tek bote. Laminwa Michelle, ma kiloko i kome con-ni, owaco ni: “Motmot, acako ye lok me kica ma jo mukene giwacca. Anongo ni tek adada me ye jami mabeco ma kiwaco i koma, ento angeyo ni meno aye gin ma Jehovah mito ni atim.” Luelda bene gukonyo Michelle me niang ni Jehovah mare. I kare-ni dong, Michelle tye ka tic macalo painia marii dok jalle me konyo tic me Betel kun tiyo ki gang.

19. Pingo itwero bedo ki gen ni piri tek i wang Jehovah?

¹⁹ Yecu opoyo wiwa ni piwa tek adada bot Wonwa me polo. (Luka 12:24) Pi meno, watwero bedo ki tekcwiny ni Jehovah nenowa calo jo ma pigi tek. Dong omyero wiwa pe owil matwal i kom lok meno! Dok omyero watute ki kerowa ducu me konyo jo mukene me ye ni pigi tek i wang Lubanga!