Piny ma Otwo Marac Adada—Gin Ango ma Baibul Waco?

• “China owaco ni i mwaka-ni, gibedo ki oro ma obedo lyet dok otwoyo piny adada.”—The Guardian, Sektemba 7, 2022.

• “Pi mwaka angwen dong, kot pe obedo ka cwer i kabedo mogo ma i kunyango me Afrika. Ento kibyeko ni two pa piny man pud bimedde pi mwaka acel mukene.”—UN News, Agucito 26, 2022.

• “Kibyeko ni piny bitwo i kabedo mapol i Ulaya, dok two pa piny man bibedo marac loyo pi mwaki 500.”—BBC News, Agucito 23, 2022.

Ludiro mapol gibyeko ni two pa piny bimedde ameda ki doko rac. Tika tye gen mo pi anyim maber? Gin ango ma Baibul waco?

Lok pa lunebi me Baibul madok i kom two pa piny

Ma lubbe ki karewa-ni, Baibul otito ni:

• “Kec . . . bipoto i kabedo mapol.”—Luka 21:11.

Two pa piny pol kare kelo kec. Kec, deno can, ki dong to ma bino macalo adwogi me two pa piny, cobo lok pa lunebi me Baibul.—Niyabo 6:6, 8.

Gin mumiyo piny tye ka two marac tutwal

Baibul tito gin mumiyo piny tye ka two tutwal i kare-ni. Wacci:

• “Pe tye ngat mo ma tye ki twero me loyo kwone.”—Jeremia 10:23.

Man te lokke ni dano pe gitwero ‘loyo kwogi’ nyo doro kwogi maber. Tam maraco ma gimoko miyo piny two woko dok kelo can pii.

• Pol ka lucayan giwacci jami ma dano gitimo omiyo lyeto tye ka medde i lobo, dok man omiyo piny tye ka two.

• Cwiny me woro kacel ki cik ma kimoko labongo tamo pi anyim omiyo dano gitye ka tongo yadi, wolo kabedo murumowa, ki dong balo piny. Macalo adwogine, waromo kato ki i can pii malit.

Ento, Baibul miyo gen.

Tika tye gen mo pi anyim?

Baibul cikke ni Lubanga bicobo peko me can pii. Nining?

1. 1. Lubanga ‘bityeko jo ma tye ka balo lobo woko.’ (Niyabo 11:18) En bityeko jo ma gitye ka kelo can pii—jo maraco ma giluworo ma gibalo kabedo murumowa.—2 Temceo 3:1, 2.

2. 2. “Pii bibedo ka gunnye atata i lobo mutwo liking.” (Icaya 35:1, 6, 7) Lubanga bicobo pekki ma obino macalo adwogi me two pa piny dok en biloko lobo-ni doko paradic ma tye ki pii muromo.

3. 3. “Ibino i lobo ci imiyo kot cwer iye, imiyo lobo ducu ceko cam mabup.” (Jabuli 65:9) Ki kony pa Lubanga, lobo-ni bibedo ki pii maleng, dok biceko cam mabup pi dano ducu.