Lyeto Omedde Matek i Wi Lobo Ducu i Mwaka 2023—Gin Ango ma Baibul Waco?

Dano ma i wi lobo ducu gitye ka ciro lyeto magwar kacel ki pekki mukene ma bino macalo adwogi me medde pa lyeto. Nen kong ripot magi:

• “Dwe me abicel me mwaka man aye obedo dwe me abicel ma pud dong lyet loyo nicakke ma dano gucako gwoko rekod me lyeto piny mwaki 174 mukato angec.”—National Oceanic and Atmospheric Administration, U.S. Department of Commerce, July 13, 2023.

• “Lobo Italy, Spain, France, Germany ki dong Poland gitye ka kato ki i lyeto piny magwar adada ma kibyeko ni bio wa i Celcac 48 i cula nam me Sicily ki Sardinia – dok man nen calo bibedo lyeto ma pud dong lamal loyo i Ulaya.”—European Space Agency, July 13, 2023.

• “Ka lyeto woto ki medde i lobo-ni, byek tye ni kot bibedo ka cwer madwong adada teretere, dok man bikelo aluka i kabedo mapol.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

Tika ripot macalo magi i kom alokaloka me piny keli par? Nen kong gin ma Baibul waco i kom lok man ma pire tek-ki.

Tika alokaloka me piny tye ka cobo lok pa lunebi me Baibul?

Eyo. Lyeto magwar kacel ki pekki mukene ma bino macalo adwogi me alokaloka me piny i wi lobo ducu rwatte ki jami ma Baibul otito pigi con ni bitimme i karewa-ni. Me labolle, Yecu otito ni wabineno “gin ma miyo lworo mako dano.” (Luka 21:11) Medde pa lyeto i wi lobo ducu oweko jo mapol gilworo ni dano gibibalo lobo woko.

Tika lobo biballe woko ma pe watwero bedo iye?

Pe. Lubanga ocweyo lobo wek wabed iye matwal; En pe biye ni dano gubal woko. (Jabuli 115:16; Latitlok 1:4) Ki lok ada, en ocikke me ‘tyeko jo ma gitye ka balo lobo.’—Niyabo 11:18.

Baibul nyuto ni Lubanga twero gwoko lobo ki i can ma poto atura, dok en bitimone.

• ‘Lubanga juko yamo matek ci nam pye mot, ki biamwonyi me nam ducu ling woko mot.’ (Jabuli 107:29) Lubanga tye ki teko me doro piny. En twero cobo pekki me kabedo murumowa ma miyo dano deno can pi alokaloka me piny.

• ‘Igwoko lobo, ci imiyo kot cwer iye, imiyo lobo ducu ceko cam mabup.’ (Jabuli 65:9) Lubanga biloko lobo ducu doko paradic.

Me nongo ngec matut i kom cikke ma tye i Baibul me roco lobo, nen pwony ma wiye tye ni “Anga ma Bilaro Lobo?”