Yecu Bigiko Tim me Turo Cik

Yecu ngeyo kit ma dano giwinyo kwede ka kitye ka terogi marac. Kimoro adot gobagoba i kome, kigoye i wi alii, kipido i kome ma pe otimo bal mo, kingolo kop alenga i wiye, dok kineke nek alany. Kadi bed en onongo pe ki bal mo, en ojalle pire kene me miyo “kwone me koko jo mapol.” (Matayo 20:28; Jon 15:13) Dong, cokcok-ki, macalo Kabaka me Ker pa Lubanga, en bikelo ngolo kop atir i wi lobo ducu, kun giko tim me turo cik matwal.—Icaya 42:3.

Baibul tito kit ma lobo bibedo kwede ka Yecu dong ocako ticce:

• “Odong kare manok, ci dano marac dong bibedo pe matwal; kadi ingi i kabedone maber, ibinongo ni en dong pe kunnu. Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.”—Jabuli 37:10, 11.

Watwero nyuto pwocwa nining pi jami ducu ma Yecu dong otimo dok bitimone piwa i anyim? Yo acel aye me pwonyo lok madok i kom “kwena maber me Ker pa Lubanga,” ma Yecu otito. (Luka 4:43) Kwan pwony ma wiye tye ni “Ker pa Lubanga Obedo Gin Ango?”