Kit Ma Kigwoko Kwede Yecu

JEHOVAH kine mukene timo jami i yo me aura me gwoko jo matino ma pe gitwero gwokke kengi. Ka itye ka wot i kin caro, iromo neno yo acel ma Jehovah timo man kwede. Ento i acakkine, niang gin ma nongo tye ka timme twero ngayi woko.

Itwero neno winyo mo bino pye cok kwedi i ngom. Iromo tamo ni winyo-ni kome lit. Winyo-ni romo bedo ka ywayo bwome acel aywaya ento ngweco medde cito anyim ka itemme me cito bote. Ka imedde ki lubo kore, en ngweco medde cito anyim. Ci cutcut, winyo-ni tuk cito woko. Winyo-ni nongo bwome pe lit kulu! Tika ingeyo gin ma winyo-ni onongo obedo ka timone?—

Ka ma winyo-ni opye cok kwedi iye-ni, lutinone onongo okanogi i lum cok kenyo. Min winyo-ni onongo lworo ni iromo nongo lutinone ci i wanogi. Pi meno, en obedo ka timme calo kome lit ci oteri cen ki bot lutinone. Tika ingeyo anga ma romo gwokowa kit ma min winyo ogwoko kwede lutinone?— I Baibul, kiporo Jehovah ki winyo ma kilwongo ni ocur ma konyo lutinone.​—Nwoyo Cik 32:11, 12.

Latin pa Jehovah ma pud dong pire tek loyo aye Yecu, Wode me amara. I kare ma Yecu tye i polo, en onongo obedo ngat matek me cwiny calo Wonne. En onongo twero gwokke kene. Ento i kare ma kinywalo Yecu macalo latin i lobo, en onongo pe ki teko. Onongo mitte ni kigwoke.

Wek Yecu ocob miti pa Lubanga i lobo kany, onongo mitte ni en kong odong odok laco madit ma pe ki roc. Ento Catan otemo neko Yecu ma peya odoko dit. Tutene me neko Yecu i kare ma en pud tidi ki dong yo ma Jehovah ogwoke kwede tye me yomcwiny adada. Imito winyone?—

I nge kare manok keken ma kinywalo Yecu, Catan oweko gin mo ma cal ki lakalatwe oryeny tung Wokceng. Co ma gityeto ki lakalatwe gulubo lakalatwe man pi mairo miya mapol nio wa i Jerucalem. Ki kunnu, gupenyo kakwene ma kibinywalo iye ngat ma myero obed kabaka pa Lujudaya. I kare ma kipenyo co ma gingeyo gin ma Baibul waco i kom lok man, gugamo ni: “I Beterekem.”​—Matayo 2:1-6.

I kare ma Kerode, ma obedo kabaka marac i Jerucalem-mi, owinyo pi kabaka manyen ma pud kinywalo anywala i Beterekem taun ma tye cok-ki, en owaco bot lutyet ki lakalatwe magi ni: ‘Wupeny lok kom latin man, ka wunonge ci wudwokka lokke.’ Ingeyo pingo Kerode onongo mito ngeyo ka ma eromo nongo iye Yecu?— Kerode onongo tye ki cwiny me nyeko dok onongo mito neko Yecu!

Lubanga ogwoko Wode nining?— I kare ma lutyet ki lakalatwe man gunongo Yecu, gumine mic mapol. Lacen Lubanga ociko lutyet ki lakalatwe magi i wang lek ni pe gudok cen bot Kerode. Pi meno, gin pe gudok cen i Jerucalem ento gukwanyo yo mukene me dok paco. I kare ma Kerode oniang ni lutyet ki lakalatwe-ni gudok woko, iye owang matek. I tutene me neko Yecu, Kerode oweko kineko lutino awobe ducu ma i Beterekem cakke mwaka aryo odwogo kwede piny! Ento ma gin meno timme-ni, Yecu onongo dong pe kunnu.

Ingeyo kit ma Yecu obwot kwede?— Ma dong lutyet ki lakalatwe-ni gudok paco, Jehovah owaco bot Yucepu cwar Maliam ni oa woko oring i lobo Ejipt. Ki kunnu Kerode ma kite rac-ci onongo dong pe twero neko Yecu. I nge mwaki mapol, ma dong Maliam gin ki Yucepu gudwogo kacel ki Yecu ki i lobo Ejipt, Lubanga dok ociko Yucepu ki gin mukene. En owacce i wang lek ni oa woko, ocit i Najaret ka ma Yecu bibedo iye labongo ayela mo.​—Matayo 2:7-23.

Ineno kit ma Jehovah ogwoko kwede Wode?— Nga ma iromo wacci obedo calo lutino winyi ma mingi okanogi i lum-mi nyo calo Yecu i kare ma en onongo pud tye latin matidi? In mono pe itye calo gin?— Tye jo mukene ma gimito wani bene. Tika ingeyo ngat meno?

Baibul wacci Catan tye calo labwor ma kok ma mito mwodowa. Kit ma labwor pol kare yero lee matino-ni, Catan ki jogine bene giyero lutino. (1 Petero 5:8) Ento Jehovah tek loyo Catan woko. Jehovah romo gwoko lutinone nyo kwanyo gin mo keken marac ma Catan timmo i komgi.

Wi tika po i Dul me 10 i buk man i kom gin ma Larac-ci ki jogine gitemme me neno ni watim?— Gitemme me neno ni wadonyo i tim me buto ma Lubanga waco ni rac. Ento angagi keken aye ma myero gudony i tim me buto?— Laco ki dako ma gunyomme i kingi.

Tye kono me cwercwiny ni jo madito mogo gibuto ki lutino. Ka gutimo man, awobe ki anyira giromo cako timo tim caro ma gupwonyo ki bot jo madito magi. Lutino magi bene giromo cako tic ki dul komgi me co nyo me mon-ni i yo ma marac. Meno aye gin mutimme yam con i Codom. Baibul wacci dano ma kunnu, “awobe wa ki ludito,” gutemme me donyo i tim me buto ki co ma gubino ka limo Lot.​—Acakki 19:4, 5.

Pi meno, kit ma onongo mitte ni kigwok Yecu-ni, mitte bene ni myero kigwok in ki bot jo madito—wa ki bot lutino mukene bene—ma giromo temme ni gidony i tim me buto kwedi. Pol kare, jo magi gitimme ni gin luremi. Giromo mini gin mo ka ce icikke ni pe ibiwaco bot jo mukene gin ma gimito timone kwedi-ni. Calo Catan ki jogine, jo magi giparo pigi kengi dok gimito ni ginong yomcwiny pigi keken. Dok gitemme me nongo yomcwiny man ki i buto ki lutino. Man rac tutwal!

Tika ingeyo gin ma giromo timone me nongo yomcwiny?— Giromo temme me tuko ki dul komi me co nyo me mon. Nyo gitwero tuku ki dul komgi me co nyo me mon kacel ki megi. Ento omyero pe iwek ngat mo keken otuk ki dul komi me co nyo mon. Kadi omeru nyo lameru nyo mamani nyo babani. Dul komi magi pe gitye pi ngat mukene.

Itwero gwoko komi ki bot jo ma gitimo jami maraco kit magi nining?— Mukwongo, pe iwek ngat mo keken otuk ki dul komi me co nyo mon. Ka ngat mo otemo tuko kwede, wac ki dwan malongo ni: “Wek kodi ticci-ni! Abidoti!” Ka ngat meno owacci gin mutimme-ni obedo balli, pe iye lok enoni. Meno nongo pe tye ada. Cit idot ngat meno kadi obedo watti nyo rwomme dit romene! Omyero idote kadi bed ni en owacci gin ma wutimo kacel-li obedo mung i kin in ki en. Kadi bed ngat meno ocikke me mini mic maber nyo oburi, omyero ia woko ki bote dok idote.

Lworo omyero pe omaki, ento myero igwokke. Ka lunyodoni gucikki me gwokke ki dano nyo kabedo mogo maraco, omyero iwiny lokgi. Ka itimo meno, pe ibimiyo kare ki dano maraco me timo gin mo keken ma wano komi.