Gin Mumiyo Ryemo Dano ki i Kacokke Obedo Yub me Mar

JULIAN owaco ni: “I kare ma awinyo i lok angeya ni kiryemo woda woko ki i kacokke, abedo calo iwacci lobo dong ouma woko. En tye woda madit dok kinwa onongo cok adada; ma watimo jami mapol kacel. En onongo kare ducu nyuto lanen maber ento wapo apoya ni en ocako timo jami mogo ma pe rwatte. Dakona obedo ka kok teretere dok onongo pe angeyo kit ma myero akwe kwede ki cwinye. Wabedo ka penye kekenwa ka ce gwok tye gin mo ma pe watimo maber macalo lunyodo.”

Pingo kiromo wacone ni ryemo Lakricitayo ki i kacokke obedo yub me mar kadi kono bed ni lit adada? Tyen lok ango ma Ginacoya miyo ma weko kiryemo ngat moni ki i kacokke? Pingo kiryemo ngat moni?

TYEN LOK ARYO MA WEKO KIRYEMO NGAT MONI

Tye tyen lok aryo ma weko kiryemo Lacaden pa Jehovah ki i kacokke. Me acel, ka ngat ma kibatija en otimo bal madit adada. Me aryo, ka ce en pe ongut i kom balle.

Kadi bed ni Jehovah pe keto gingi i komwa tutwal ni myero walub cikke ento en tye ki rwom me lengo ma mito ni luticce gulubi. Me labolle, Jehovah nwoyo adada ni pe myero wadony i bal madongo calo tim kwele, woro cal apaya, kwalo kwo, yak, nek, ki dong tyet.—1 Kor. 6:9, 10; Yabo 21:8.

Tika pe iye ni cik pa Jehovah pe gidiyowa dok gitye me gwokowa? Anga ma pe mito bedo kacel ki jo ma gitye ki kuc i kingi, ma kwogi tye atir dok gigene? Kwo ma kit meno tye i kin omegiwa ki lumegiwa, dok watye ki pwoc madit pien wacikke i kare ma wadyere bot Lubanga ni wabikwo i yo ma rwatte ki tirane ma nonge i Lokke.

Ento ka Lakricitayo ma kibatija en otimo bal madit pi roc ma watye kwede kono? Jo ma gubedo lugen bot Jehovah i kare mukato angec gutimo bal ma kit meno ento Lubanga pe okwerogi matwal. Labol pa Kabaka Daudi tye labol ma ngene loyo. En otimo abor dok bene oneko nek; ento lanebi Natan otito bote ni: “Rwot [Jehovah] . . . otyeko jwayo balli woko.”—2 Cam. 12:13.

Lubanga otimo kica bot Daudi pi balle pien ongut ki cwinye ducu. (Jab. 32:1-5) I yo acel-li, kiryemo latic pa Jehovah ki i kacokke ka ce en pe onyut i kom balle nyo pud medde ameda ki timo bal. (Tic 3:19; 26:20) Ka ngat moni pe onyuto cwiny me ngut bot luelda ma gitye i komitti me ngolo kop, ci man miyo kiryeme woko.

Ka wawinyo ni kiryemo ngat moni, waromo tamo ni tam ma kimoko me ryemo labal-li rac nyo pe nyuto cwiny me kica tutwalle ka kinwa cok ki ngat meno. Kadi bed kit meno, Lok pa Jehovah miniwa tyen lok matir me ye ni tam ma kumeno nyuto mar.

DANO DUCU GINONGO ADWOGI MABER KA KIRYEMO NGAT MONI

Yecu otito ka maleng ni ‘ryeko nen atir ni tye kakare pi ticce.’ (Mat. 11:19) Ryemo ngat ma pe ongut i kom balle obedo tam me ryeko pien kelo adwogi maber. Nen kong adwogi adek magi:

Ryemo labal keto deyo i kom nying Jehovah. Pi meno, pien kilwongowa ki nying Jehovah, kit me kwowa gudo nyinge. (Ic. 43:10) Kit ma kwo pa latin moni twero keto deyo nyo kelo lewic i kom nying lunyodone-ni, kit ma jo mukene bene gibineno kwede Jehovah cung i kom lanen maber nyo marac pa jo ma kilwongogi ki nyinge. Jo ma kilwongogi ki nying Lubanga giketo deyo i kom nyinge maber-ri ka ce gikwo i yo ma rwatte ki rwomme matir. Man rwatte ki gin ma otimme i kare pa Ejekiel, i kare ma lurok onongo gilwongo Lujudaya ki nying Jehovah.—Ejek. 36:19-23.

Watwero kelo lewic i kom nying Lubanga ka wadonyo i tim me tarwang. Lakwena Petero omiyo tira bot Lukricitayo ni: “Macalo litino ma luwiny, pe wumi kwowu orwatte ki mitiwu ma yam kong wubedo kwede i kare ma onongo pud wukwiya piny ca. Kit macalo ngat ma olwongowu leng, wun bene wubed jo maleng i kitwu ducu; pien coc ma yam gicoyo loko ni, ‘Wubed jo maleng, pien an aleng. ‘” (1 Pet. 1:14-16) Kwo i yo matir keto deyo i kom nying Lubanga.

Ento ka ngat acel i kin Lucaden pa Jehovah timo bal, ci ka pe gin mo lureme ki jo mukene nongo gingeyo balle. Yub me ryemo labal ki i kacokke nyuto ni Jehovah tye ki jo maleng ma gilubo tira me Ginacoya wek gibed jo maleng. Mwaki mogo mukato angec, dano mo obino i Ot me Ker i lobo Switzerland ci owaco ni emito bedo Lacaden pa Jehovah. Onongo kiryemo laminne ki i kacokke pi tim me tarwang. En owaco ni emito donyo i dul ma “pe ye tim maraco.”

Ryemo labal gwoko kacokke bedo maleng. Lakwena Paulo ociko Lukricitayo me Korint ni rac adada me gwoko jo ma gitimo bal akaka i kingi. En oporo adwogi marac ma jo magi gikelo ki tobi ma kwoto moko doko madit. En owaco ni: “Tobi matidi mo yenyo moko ducu ma girubo me tedo mugati.” En omiyo botgi tira ni: “Wuryem dano marac woko ki i kinwu.”—1 Kor. 5:6, 11-13.

“Dano marac” ma Paulo oloko i kome-ni nen calo obedo ka timo tim me tarwang akaka. Dok jo mukene me kacokke bene gucako cwako tim man. (1 Kor. 5:1, 2) Ka bal madit kumeno onongo kineno anena, ci Lukricitayo mukene nen calo gubedo ki cwiny me lubo kit me kwo pa jo me boma meno ma onongo gimaro tim tarwang tutwal-li. Neno jo ma gitimo bal akaka anena miyo kitero cik pa Lubanga calo gin me tuko. (Latit. 8:11) Medo i kom meno, labal ma pe ngut romo doko “got ma tye i te pii,” ma twero balo niye pa jo mukene me kacokke.—Juda 4, 12, NW.

Ryemo ngat moni miyo en niang balle. Yecu oloko i kom awobi mo ma ocoko jamine ducu ki paco ci ocito obalo ginaleyane pi bedo ki kwo me carocaro. Awobi murwenyo-ni onongo pwony malit adada pien oniang ni a ki paco obedo gin me mingo dok nyuto cwiny marac. Lacen, awobi-ni oniang pire kene, ongut i kom balle ci oa odok cen paco. (Luka 15:11-24) Yomcwiny ma Yecu otito ni wego ma lamar-ri obedo kwede pien wode otimo alokaloka i kwone konyowa me niang kit ma Jehovah bene winyo kwede ki cwinye. Jehovah owacciwa ni: “Cwinya pe bedo yom me neno ka latim marac to, ento amito en onguti owek timo bal ci olokke odwog bota wek obed kwo.”—Ejek. 33:11.

I yo acel-li, lupaco ma gitye Lucaden giromo niang gin ma girwenyo ka ngat mo ki i pacogi kiryemo ki i kacokke. Adwogi marac ma bino pi bal medo ki jami mabeco ma wigi po iye i kare ma pud gitye ki wat maber ki Jehovah kacel ki jone twero kelo wigi i niang.

Omyero wanyut mar dok wacung matek ka wamito ni ngat ma kiryemo-ni onong adwogi maber. Daudi owaco ni ka ‘dano ma kite atir aye opwoda, dok ojuka ma kica omake i koma, man bedo calo iwacci moo ma kionyo iwiya.’ (Jab. 141:5) Go kong ni ngat mo tye ka mwodo ringo ci ringo omoko i dwane. Pe dong twero yweyo maber dok kero otum woko ki kome. Dok bene pe twero lok. Ka ngat mo pe okonye oyotoyot ci en bito woko. Ento, lareme mo bedo ka dongo nyo bapo kore motmot wek ringo ni okati woko. En twero winyo arem ento man romo laro kwone. I yo acel-li, Daudi oniang ni dano ma kite atir aye myero omiye pwod malit wek enong adwogi maber.

Tyen mapol, ryemo labal moni ki i kacokke miyo en nongo pwod ma mitte. I nge mwaki mogo ma romo apar, wod pa Julian ma kiloko i kome malo-ni oloko kwone ci odwogo cen i kacokke dok tye ka tic macalo laelda. En owaco ni: “Ryema ki i kacokke okonya me kemme ki adwogi ma obino pi kwona marac. Man aye pwod ma onongo amito.”—Ibru 12:7-11.

YO MABER ME TERO NGAT MA KIRYEMO KI I KACOKKE

Ki lok ada, ryemo ngat moni ki i kacokke obedo peko i yo me cwiny ento omyero pe kilok odok peko madit adada. Wan ducu omyero watute me timo jami ma mitte wek yub me ryemo dano ki i kacokke okel adwogi maber.

Luelda ma gitye ki tic me waco bot ngat moni ni kiryeme woko ki i kacokke-ni omyero gutemme me nyuto mar calo Jehovah. Ka luelda gitito bot ngat moni gin mumiyo kiryeme, gin giwaco i yo me kica dok giwacce gin ma myero en otim wek kidwokke i kacokke. Me poyo wi ngat moni ma kiryemo-ni kit ma en romo dwogo kwede bot Jehovah, luelda giromo limo kare ki kare jo ma gunyuto ni gitye ka loko yo me kwogi.a

Jo me paco gitwero nyuto mar pi kacokke kacel ki labal-li kun gilubo tam ma kimoko me ryemo ngat moni. Julian owaco ni: “En onongo pud tye latinna. Ento kwone marac-ci aye okelo ariya i kinwa.”

Jo ducu me kacokke ginyuto mar ka gigwokke kun pe gikubbe nyo giboko lok ki ngat ma kiryemo ki i kacokke. (1 Kor. 5:11; 2 Jon 10, 11) Pi meno, gin ginyuto ni gicwako pwod ma Jehovah omiyo bot ngat meno kun tiyo ki luelda. Medo i kom meno, gin gitwero nyuto mar madit ki cwak muromo bot lupaco pa ngat ma kiryemo-ni, pien gitye ki arem cwiny dok pe myero kiwek gutam ni gin bene pe dong kimito ni gibed kacel ki luye luwotgi.—Rom. 12:13, 15.

Julian ogiko lokke kun waco ni: “Ryemo dano ki i kacokke obedo yub ma wamito pien konyowa me kwo ma lubbe ki cik pa Jehovah. Kadi bed ni lit, ento kelo adwogi maber i nge kare mo. Ka onongo abedo ka cwako jami maraco ma woda obedo ka timogi-ni, kono onongo en peya ongut.”