Ti pi Jehovah Labongo Gin Mo ma Dwoyo Tammi

1, 2. Pingo Yecu onongo maro Marita, ento ngo ma nyuto ni en onongo tye ki roc?

GIN ango ma bino i wi ka itamo i kom Marita ma kicoyo pire i Baibul-li? Kadi bed ni en keken aye dako ma kicoyo nyinge i Baibul ki i kin mon ma Yecu onongo marogi, ento Yecu bene onongo maro dok woro mon mukene. Me labolle, Maliam lamin Marita onongo tye larem Yecu macok. Medo i kom meno, Yecu bene onongo maro mine Maliam adada. (Jon 11:5; 19:25-27) Ento, pingo Yecu onongo maro Marita adada?

² Yecu onongo pe maro Marita pienni gwoko welo dok kome mit ento pien onongo tye ki niye matek. En obedo dako ma onongo ye pwony pa Yecu ki cwinye ducu. Marita onongo tye ki niye muromo ni Yecu obedo Meciya ma kiciko pire. (Jon 11:21-27) Calo wan i kareni, en bene onongo tye ki roc. I nino mo acel ma Yecu olimogi ki gang, Marita iye owang i kom laminne, mumiyo owaco bot Yecu ni owac ki laminne obin ka konye ki tic. En owacci, “Ladit, pe iparo ni lamera oweka atye ka tic kena? Wac bote wek okonya.” (Kwan Luka 10:38-42.) Pwony ango ma wanongo ki i gin man mutimme-ni?

MARITA OKETO CWINYE I JAMI MA DWOYO TAMME

3, 4. I yo ango ma Maliam oyero kwede “dul maber” ki dok pwony ango ma Marita onongo? (Nen cal ma tye i pot karatac 22.)

³ Me nyuto yomcwinye pi cwiny me gwoko welo, Yecu opwonyo Marita gin ki Maliam ki cam me cwiny. Maliam otiyo ki kare meno me winyo pwony pa Lapwony Madit dok “obedo ka tyen Yecu kun winyo lokke.” Marita bene onongo twero timo kit meno. Labongo akalakala, Yecu onongo bipwoyo Marita pien keto cwinye ka winyo lokke.

⁴ Ma ka meno, Marita olungo wiye i yubo cam mamit ki timo jami mukene ma weko bedo pa Yecu ganggi bedo maber. Ento timo jami magi ducu onongo tye ka weko en bedo ki par mapol nono, ma oweko cwinye ocwer i kom Maliam. Yecu oniang ni Marita tye ka tute me timo jami mapol, pi meno, en owaco bote ki mwolo ni “Marita, Marita, ibedo ki tam mapol, cwinyi ongabbe pi jami mapol.” Lacen, en owacce ni cam manok keken romogi. Yecu dok oloko tamme bot Maliam wek obed agonya kun waco ni: “Maliam oyero dul maber ma pe gibikwanyo woko ki bote.” Twero bedo ni Maliam wiye owil woko i kom gin ma en ocamo i nino meno, ento wiye pe owil i kom kit ma Yecu opwoye kwede ki dong cam me cwiny ma en onongo i kare ma oketo tamme i lok pa Yecu. I nge mwaki 60, lakwena Jon ocoyo ni: “Yecu yam maro Marita ki laminne.” (Jon 11:5) Lok magi ma kicoyo i ginacoya-ni nyuto ni Marita olubo tira ma Yecu omiye ki cwiny me marri dok otute matek me tic ki cwinye ducu pi Jehovah pi kwone lung.

5. Watwero poro kwo i kareni ki kare me Baibul nining, dok man kelo lapeny ango?

⁵ Ma lubbe ki jami ma wiro tamwa, inongo ni kwo me kareni tye nining ka iporo me Baibul? Kadi wa i kare meno, onongo nen calo itamo ni gin mo manyen bibedo tye nino ducu. Pe tye kare mo keken i tekwaro pa dano ma rwom me kubbe ki gilok odongo adada, nyonyo ma goyo bukke i cipid, magajin ma tye ki cal mabeco, redio ki telebijon dong gunya adada. Watchtower me Sektemba 15, 1958 owaco ni “jami ma dwoyo tam pa dano bibedo ka medde ka wawoto ki nyiko cok ki agikki me lobo man. Meno tye lok ada! Man kelo lapeny ma pire tek adada: Gin ango ma myero watim wek wagwokke ki i jami mogo ma gidwoyo tamwa kun watute me bedo calo Maliam ki dok waketo tamwa i jami me cwiny?

TI KI JAMI ME LOBONI ENTO PE MUKATO KARE WOKO

6. Jo pa Jehovah gutiyo ki diro me tet me loboni nining?

⁶ Wek tic me Ker-ri omedde, but dul pa Lubanga ma i lobo tye ka tic ki diro me tet me loboni i yo maber adada. Me labolle, tam kong i kom “Photo-Drama of Creation,” cinema ma onongo kinyuto i kor ot dok nyuto cal ma woto kun tye ki kala kacel ki dwan ma winye. Ma peya Lweny me I me Wi Lobo ocakke ki dong i ngeye, dano milion mapol i twok lobo lung gunongo kwe cwiny ki i cinema man, ma gik ki tito kit ma Loc me Mwaka Alip Acel pa Yecu Kricito bibedo ki kuc kwede. Lacen, kicako tito kwena me Ker-ri bot lwak kun kitiyo ki redio dok dano milion mapol i twok lobo lung guwinyo. I kareni, kitye ka tic ki kompiuta ki intanet i yo me aura me tito kwena maber-ri wa i cula nam mogo ma o iye tek ki dong i kabedo mapat pat i lobo.

7. (a) Pingo rac me tic ki jami me loboni mukato kare woko? (b) Gin ango ma pire myero obedo tek botwa?

⁷ Kit ma Baibul cikowa kwede, adwogi marac bino ka walungo wiwa i tic ki jami ma loboni miyo. (Kwan 1 Jo Korint 7:29-31.) Lakricitayo twero balo cawa malac i jami ma nongo pe giraco calo kwano buk, neno telebijon, limo piny, wil, yenyo tet ma pud odonyo nyen i cuk nyo jami mabeco. Jo mapol gimaro kubbe nyo gicwalo lok macego cego ki i intanet, gibedo ka roto lok angeya manyen nyo kit ma tuko owoto kwede. Ento mogo gitwero doko opii pa jami magi.a (Latit. 3:1, 6) Ka pe wadwoko piny cawa ma watero i jami ma pigi pe tego, ci watwero nongo ni pe waketo cwinywa i kom gin ma pire tek loyo ducu​—woro Jehovah.​—Kwan Jo Epeco 5:15-17.

8. Pingo tira ma kimiyo ni pe myero wamar jami me loboni pire tek?

⁸ Catan oyubo lobone-ni wek obitwa dok odwo tamwa. Meno aye gin ma obedo ka timme i cencwari me acel dok bene tye ka timme makato i kareni. (2 Tem. 4:10) Pi meno, omyero walub tira ma wacci: “Pe wumar . . . gin ma tye i lobo.” Ka kare ducu wabedo ka ngine kekenwa kun watiyo ki tira man, ci wabigwokke ki jami mogo ma twero dwoyo tamwa dok wabimedde ki dongo ‘marwa i kom Lubangawa.’ Man biweko timo miti pa Lubangawa bedo yot dok bene wabedo i marre pi naka.​—1 Jon 2:15-17.

KET CWINYI I KOM GIN MA PIRE TEK

9. Yecu opwonyo lupwonnyene me keto cwinygi i kom gin anga, dok lanen ango ma en oweko?

⁹ Tira me mar ma Yecu omiyo bot Marita-ni onongo rwatte ki pwonye kacel ki lanenne. En ocuko cwiny lupwonyene me bedo ki ‘wang ma pe wor’ wek guket cwinygi i kom Ker-ri labongo jami mogo ma dwoyo tamgi. (Kwan Matayo 6:22, 33.) Yecu pe oketo tamme me yenyo jami me kom mapol; en onongo pe ki ot nyo ngomme.​—Luka 9:58; 19:33-35.

10. Lanen ango ma Yecu oweko i acakki me ticce me pwony?

¹⁰ Jami mapol otimme i kwo pa Yecu i kare ma en tye i ticce me pwony ma onongo gitwero dwoyo tamme ento en pe oye ni gudwo tamme. I acakki me ticce me pwony, i nge pwonyo lwak ki dok timo tango mapol i Kapernaum, dano gulege ni pe myero oa woko. Ento Yecu odok i kwacgi-ni nining? En owaco ni: “Myero atit lok me kwena maber me ker pa Lubanga i gang mukene bene, pien giora pi lok man.” (Luka 4:42-44) Me nyuto ni ecung i lokke-ni, Yecu owoto i lobo Palestina weng kun pwonyo dok tito kwena. Kadi bed ni en pe ki roc, en okwo macalo dano adana ma i kine mukene bene onongo ol pienni nongo otiyo matek i tic pa Lubanga.​—Luka 8:23; Jon 4:6.

11. Gin ango ma Yecu owaco ki laco mo ma gubedo ka laro ginaleya gin ki ominne, dok cik ango ma en omiyo?

¹¹ I kare ma Yecu tye ka pwonyo lulub kore kit me cung matek i aunauna, laco mo ongolo lokke kun waco ni: “Lapwony, wac bot omera wek wapok ginaleya kwede.” Ento Yecu okwero donyo i nywere nywere man. En ogamo lokke ni: “Nyeri, anga ma oketa me bedo langolkop ki lapok jami-wu?” Ci Yecu omedde ki pwonye kun ciko jo ma gitye ka winye i kom adwogi marac ma bino ka guweko jami me kom odwoyo tamgi ki i tic pi Lubanga.​—Luka 12:13-15.

12, 13. (a) I nge nino manok ma peya Yecu oto, gin ango ma ogudo cwiny Lugrik mogo ma gulokke i dini pa Lujudaya? (b) Gin ango ma Yecu otimo i kare ma Pilipo openye ni myero orwatte ki Lugrik magi?

¹² I cabit me agikki me kwo pa Yecu i lobo, en onongo tye ki cwercwiny madit. (Mat. 26:38; Jon 12:27) En onongo tye ki tic mapol me atiya dok ngeyo ni kibingolo kop alenga i kome ka lacen kineke. Me labolle nen kong gin mutimme i Ceng Cabit me Nican 9 mwaka33 K.M.P. Kit ma kitito kwede, Yecu odonyo i Jerucalem kun bedo i wi latin kana dok lwak gubedo ka pakke macalo “Kabaka ma bino i nying Rwot [Jehovah]!” (Luka 19:38) I orwone, Yecu odonyo i ot pa Lubanga ci oryemo ki tekcwiny lucat wil ducu ma gin lukwo ma onongo guloko ot pa Lubanga odoko ka cato wil kun gikwalo cente ki bot Lujudaya luwotgi.​—Luka 19:45, 46.

¹³ I kin jo ma gubedo tye i Jerucalem onongo tye Lugrik mogo ma gulokke i dini pa Lujudaya ma nen calo jami ma Yecu otimogi ogudo cwinygi ma oweko gupenyo lakwena Pilipo ni gimito rwatte ki Yecu. Ento, Yecu pe oye ni gudwo tamma ki i tiyo tic ma pire tek ma onongo pud tye anyim. En onongo pe mito temme me nongo yweka wek ebwot ki i to i cing lumone pa Lubanga. I nge tito ni cokcok-ki kibineke woko, en owaco bot Anderiya ki Pilipo ni: “Ngat ma maro kwo mere, birwenyone; ngat ma kwero kwone i lobo man, bigwoko nio i kom kwo ma pe tum.” Ma ka cobo miti pa Lugrik, en owaco ma lubbe ki tone macalo ginkok-ki kun cikke bot lupwonnyene ni: “Ka ngat mo tiyo pira, ci Won binyuto worone i kome.” Labongo akalakala mo, Pilipo odwoko lok man bot Lugrik.​—Jon 12:20-26.

14. Kadi bed ni Yecu oketo pi tito kwena bedo mukwongo i kwone, ngo mukene ma en bene otimo?

¹⁴ Kadi bed ni Yecu pe oye ni gin mo odwo tamme ki i tic me tito kwena maber ma onongo pire tek tutwal-li, en pe kare ducu pe obedo ka tamo pi tic meno. En oye lwongo acel me bedo tye i nyom mo dok bene oyomo cwiny dano i kare ma oloko pii odoko kongo mamit. (Jon 2:2, 6-10) I kare ma bene kilwonge, en oye me cito ka cam ki luwote macok kwede kacel ki jo ma onongo giromo doko lupwonnyene. (Luka 5:29; Jon 12:2) Ma dong pire tek loyo, Yecu kare ki kare onongo kwanyo cawa me lega kene ma miye kare me lwodo lok ki dok yweyo.​—Mat. 14:23; Mar. 1:35; 6:31, 32.

“WABOLU GIN MOGO MAPEK-GU WOKO DUCU”

15. Tira ango ma lakwena Paulo omiyo, dok en oweko lanen ango?

¹⁵ Lakwena Paulo ocoyo kit man i kare ma tye ka poro kwo me dyere pa Lukricitayo ki diyo cwiny, en owaco ni: “Kong dong wabolu gin mogo mapek-gu woko ducu.” (Kwan Jo Ibru 12:1.) Ka pe ki gin mo, Paulo nen calo oketo i tic gin ma en obedo ka pwonyone dok ojalo lonyo ki yweka ma onongo dini pa Lujudaya twero mine. En oketo tamme i kom ‘jami ma pigi tego loyo’ ki dok tiyo tic pa Lubanga kun longe i kin lobbe calo Ciria, Makedonia ki dong i Judaya. Paulo ocoyo ma lubbe ki genne me kwo pi naka i polo: “Wiya bedo ka wil i gin mukato angec, kun alaro gin ma tye anyim calo dano ma tye i ngwec me pyem. Aringo acito anyim atir kun akemo tol, wek anong mot.” (Pil. 1:10; 3:8, 13, 14) Paulo otiyo ki kwone macalo ngat ma wiye nono kun keto ‘cwinye i kom Rwot, ma gin mo pe ywayo tamme tero woko cen.’​—1 Kor. 7:32-35.

16, 17. Watwero lubo lanen pa Paulo nining kadi bed wiwa nono nyo wanyomme? Tit kong gin mo acel mutimme.

¹⁶ Calo Paulo, lutic mogo pa Lubanga giyero me bedo ma wigi nono wek kwo me ot pe odwo tamgi ki i tiyo tic mapol i ticwa me pwony. (Mat. 19:11, 12) Lutic pa Lubanga ma gunyomme pol kare gitye ki tic mapol me atima. Ento kadi bed wiwa nono nyo wanyomme, wan ducu romo ‘bolo gin mogo mapek-gu ducu’ wek wabed ki kare me tic pi Lubanga ki jami manok ma twero dwoyo tamgi. Man te lokke ni myero wakwany cawa ki i jami mogo ma gibalo karewa nono kun nongo waketo yub me cwalo cawa malac i tic pi Lubanga.

¹⁷ Nen kong labol pa Mark gin ki Claire luot ma gia ki i lobo Welsh, gin ducu gudonyo i tic macalo painia i nge tyeko kwangi dok gumedde kwede i nge nyomgi. Mark otito ni: “Wadwoko rwom me kwowa lapiny kun wacato otwa ma onongo tye ki rum adek ki bene waweko tic ma onongo watiyo pi nucu nino wek wabed ki kare me donyo i tic me konyo gedo ma kwako wi lobo lung.” Pi mwaki 20 mukato angec, gin gubedo ka wot i lobbe ma i Afrika kun gikonyo gedo Odi me Ker. Jehovah ogwokogi kadi bed ni i kine mukene centegi nongo odong dolla 15 keken. Claire owaco ni: “Wanongo yomcwiny madit adada me tic pi Jehovah nino ducu. Wamako lirem mapol dok bene pe tye gin mo ma remowa. Jami manok ma wajalogi-ni pe watwero porone ki yomcwiny ma bino i tic pi Jehovah pi kare malac.” Jo mapol ma gitiyo pi Jehovah i tic pi kare malac giye lok man.b

18. Lapeny macalo mene ma jo mogo myero gupenye kwede?

¹⁸ Ento in kono? Ngo ma itwero timone ka i niang ni pe dong itye ka tiyo tic me Ker-ri ki mit kom pienni jami mogo ma pigi pe tego tye ka dwoyo tammi? Twero bedo ni lagamme cung i kom kit ma i kwano kwede Baibul nino ki nino wek inong adwogi maber. Itwero timo meno nining? Pwony ma lubo man binyamone.