Wutim Gin Maber Kun Wunywako Jamiwu ki Jo Mukene
1 Dorka “yam tiyo tic mabeco mapol mada, dok konyo lucan.” (Tic 9:36, 39) Ticce mabeco-ni onongo yomo cwiny dano ma gingeye, kacel ki cwiny Lubanga Jehovah bene. Jo Ibru 13:16 waco ni: “Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubanga.” I yo ango ma watwero timo kwede gin maber kun nongo wanywako jamiwa ki jo mukene i kare-ni?
2 Yo acel aye me nywako kwedgi ‘jamiwa ma pigi tego.’ (Car. 3:9) Mot ma wabolo pi konyo ticwa i lobo ducu, kitiyo kwede me gedo Odi me Ker, Odi Madito me Gure, kacel ki jang gang kal ma tye ka timme i lobo ducu. Man dong omiyo dano milion mapol gitye ka nongo kony ma a ki i pwony pa Lubanga kacel ki ribbegi i yo me cwiny.
3 Paro pi Peko: Ka peko mo opoto atura, lutic pa Jehovah nongo gitye atera me ‘timo tic mabeco’ bot utmegi-gi kacel ki jo ma pe gitye i niyegi. (Gal. 6:10) I kare ma cuma mo me kemikol omwoc obalo jami mapol i lobo France, luot mo ma gibedo cok ki cuma meno gutito ni: “Utmegiwa ma Lukricitayo gubino cut cut ka miyo kony me yubo i otwa ki pa jiraniwa bene. Jiraniwa gubedo ki ur mada me neno lwak dano mapol ma gubino ka konyowa.” Lamego mukene bene otito ni: “Luelda guribo cingi me konyowa. Gubino ka cuko cwinywa. Adada meno aye onongo gin ma wamito loyo wa jami me kony.”
4 Kadi bed ni tye yo mogo mapol ata ma watwero miyo kwede kony bot jiraniwa, ento yo maber ma dong loyo me konygi aye me nywako kwedgi ngec ma pire tek me lok me ada, ma tye iye ‘gen me kwo me labed naka’ ma Jehovah aye ociko pire. (Tito 1:1, 2) Kwena me Baibul miyo kwe cwiny me ada bot jo ma cwinygi cwer pi balgi ki pi jami maraco ma tye ka timme i lobo-ni. (Mat. 5:4) Pi meno, dong wamedde wunu ki timo gin maber kun wanywako jami ma watye kwede ki jo mukene ka pud watye ki kero me timone.—Car. 3:27.