Wukony Luwotu me Dongo
1 Lakwena Paulo oyelle matek me jingo cwiny jo muye luwote. (Tic. 14:19-22) I kit yo acel-lu, wan bene waparo matek ka ce omegiwa gitye i peko, dok wamito ni wakonygi. Baibul waco ni dano ducu omyero gupar pi luwotgi, ento pe luelda keken. (Rom. 15:1, 2) Nen kong yo aryo magi ma watwero lubo kwede cik ma waco ni: “Wucuk cwinywu kekenwu, dok wukonnye bene kekenwu wek wudong i cwinywu.”—1 Tec. 5:11.
2 Nge Gin ma Jo Mukene Mito: Lok pa Lubanga tito ni Dorka “yam tiyo tic mabeco mapol mada, dok konyo lucan.” (Tic. 9:36, 39) En obedo kaneno jo ma onongo gitye ki peko ci otemme me konyogi. Man pud dong obedo lanen maber botwa ya! Iromo niang ni lamego nyo omego mo ma dong otegi mito ni kikonye me o i cokke. Nyo oromo bedo ni painia mo mito ni ngat mo owot kwede i tic me pwony i otyeno mo i nino ma nongo obedo nino me tic. Kong itam kit ma man bicuko kwede cwinygi ka ce ibedo me kony botgi!
3 Boko Lok i Kom Jami me Cwiny: Wan waromo miyo jo mukene gidongo ki lok ma waloko. (Ep. 4:29) Laelda mo owaco ni: “Ka imito ni icuk cwiny dano, ci lok lok i kom jami me cwiny. Me cako lok ma dongo tam pa dano, iromo cako ki lapeny mogo ma yot yot ni, ‘In icako ngeyo lok me ada-ni nining?’” Nyut miti i kom jo ma tino ma gitye i kacokke. Nyut miti bene i kom jo ma cwinygi otur ki jo mangic. (Car. 12:25) Pe iwek boko lok i kom jami me galowang me lobo obal cawa me boko lokwu i kom jami me cwiny ki jo muye luwoti.—Rom. 1:11, 12.
4 Ento gin ango ma itwero lokone ma miyo jo mukene gidongo? Nyo inongo pwony mo ma omedo marri ki pwoci i kom Jehovah i kare me kwano Baibulli piri keni? Nyo lok mo ocuko cwinyi matek ki i pwony ma kiyubo pi lwak nyo ki i Kwan me Watchtower? Nyo gin mo ma jingo niye ma otimme i kwo pa dano mo ma oyomo cwinyi? Ka ce imaro jami mabeco me cwiny macalo magi, ci i kare ducu ibedo ki lok ma itwero cuko kwede cwiny jo mukene.—Car. 2:1; Luka 6:45.
5 Wakonyu jo mukene me dongo ki kony ma wamiyo botgi kacel ki leb maber ma watiyo kwede botgi.—Car. 12:18.