Dul Lok me Acel
Ribbe i Woro i Karewa-ni—Tyen Lokke Tye Ningo?
1, 2. (a) Kit aloka loka ango ma tye ka timme i karewa-ni? (b) Kit gen mamwonya ango ma jo ma cwinygi atir tye kwede?
I KABEDO ducu i wi lobo-ni, dano gitye ka mol me cito i ribbe i woro acel i yo ma neno mit mada. Kitye ka ribbo dano milion mapol ma gia ki i lobe, kaki, ki leb-gu ducu kacel. Kiguro jo mapol i mwaka ducu. Jo magi kingeyogi i Baibul calo ‘lucaden’ pa Jehovah dok gilwongogi ni “lwak dano mapol ata.” Gitiyo ‘tic maleng dyeceng ki dyewor’ bot Lubanga. (Icaya 43:10-12; Niyabo 7:9-15) Pingo gitimo man? Pien dong gingeyo Jehovah macalo Lubanga acel me ada. Man miyo giyubo kit me kwogi ma rwatte ki yo ma atir. Dok bene, giniang ni watye ka kwo i “kare me agikki” me lobo man marac-ci, dok bene ni Lubanga cok cokki bijwero-ne woko, ci en bileyo kakare ki lobo me paradic manyen ma mege.—2 Temceo 3:1-5, 13; 2 Petero 3:10-13.
2 Lok pa Lubanga ciko ni: “Odong kare manok, ci dano marac dong bibedo pe matwal . . . Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.” (Jabuli 37:10, 11) “Jo ma kitgi atir gibicamo lobo, dok gibibedo iye matwal.” (Jabuli 37:29) “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”—Niyabo 21:4.
3. Ribbe i woro me ada tye ka bino nining?
3 Jo ma dong kitye ka ribogi i woro me ada kombeddi, gibidoko jo ma okwongo me lobo manyen meno. Gin dong gutyeko pwonye me ngeyo mitti pa Lubanga dok gitye ka yelle me timone ki kerogi ducu. Me nyuto ni timo mitti pa Lubanga pire tek, Yecu owaco ni: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” (Jon 17:3) Lakwena Jon ocoyo ni: “Lobo tum woko ki mitine ducu; ento ngat ma tiyo gin ma Lubanga mito rii nakanaka.”—1 Jon 2:17.
Tyen Kop Man
4. (a) Guro jo man mapol ata-ni i ribbe me woro i karewa-ni mono tyene ada tye ningo? (b) Baibul mono oloko i kom gure man nining?
4 Guro jo mapol i ribbe me woro i karewa-ni mono nyuto ngo? Nyuto atir ka maleng ni watye cok adada ki agikki me lobo man marac-ci, dok bene ni lobo manyen pa Lubanga-ni bicakke cut inge man. Wan aye watye caden me wang, pien watye ka neno cobbe me cokke man ma pire tek ma Baibul otito pire con-ni. Lok pa lanebi acel mo waco ni: “Man bitimme i kare ma pud tye anyim [i agikki]: got me ot pa Rwot [worone me ada ma tye lamal] bicung macalo got mabor makato godi ducu, borre bikato cere ducu [malo i wi kit woro mo keken]; rok ducu gibimol gicito iye, dok lwak lurok mapol gibibino, gibiwacci, ‘Wubin, waitu i wi got pa Rwot, i ot pa Lubanga pa Yakobo; wek en opwonywa kit mere, ka wek walub yone.’”—Mika 4:1, 2; Jabuli 37:34.
5, 6. (a) Tye ada nining ni lobe gitye ka loke bot Jehovah? (b) Kit lapeny ango ma omyero wapenye kwede kenwa?
5 Kadi bed ni lobe kulu pe gitye ka bino i ot me woro pa Jehovah me cwiny, ento dano milion ma i lobo ducu gitye ka bino ki acel acel. Ginongo pwonnye i kom yub me mar ki kit Lubanga Jehovah ma yomo cwinygi, dok bene gimaro. Giyenyo me niang i kom gin ma Lubanga mito ki botgi ki mwolo. Legagi bedo calo pa lacoc me jabuli ma owaco ni: ‘Pwonya wek ati gin ma imito, pien in Lubanga-na!’—Jabuli 143:10.
6 In mono igoyo cal-li i kin lwak dano mapol ma Jehovah kombeddi tye ka gurogi kacel i woro-ni? Mono kit ma idok kwede i pwonye ma ilimo ki i Lokke nyuto ni in ada cwinyi pwoyo ni pwony man Oa ki bot Jehovah? In mono ‘ibilubo yone’ i rwom ma romene?
Kit ma Ribbe i Woro Man Tye ka Cobbe Kwede
7. (a) Ribbe i woro olo twal bibedo ma o lakwene? (b) Pingo mitte pi oyot tutwal me doko lawor Jehovah kombeddi, dok watwero konnyo jo mukene me timo meno nining?
7 Yub pa Jehovah tye ni ginacweya ducu ma gitye ki wic me ryeko omyero guribbe i woro me ada. Nino ma nongo jo ducu ma kwo biworo kwede Lubanga-ni kono obin doo! (Jabuli 103:19-22) Ento ma nongo meno peya otimme, Jehovah kong bijwero jo ducu ma kwero timo mitine matir-ri. Pi kica-ne, en okwongo ki miyo ngec pi gin ma ebitimo, wek dano ma tye ka ducu gubed ki kare me loko kwogi. (Icaya 55:6, 7) Pi meno, i kare-ni gitye ka kok “bot rok ducu ki kaka ki leb-gu ki jo mapatpat ducu” ni: “Wulwor Lubanga, wumi deyo bote, pien karene me ngolo kop dong oromo. Wuwor en ngat ma oketo polo ki lobo ki nam ki wang it-gu.” (Niyabo 14:6, 7) Dong ijolo lwongo man mono? Ka ijolo, ci bibedo calo mot boti me lwongo jo mukene me ngeyo ki me woro Lubanga me ada.
8. Inge niang pwony ma pirgi tego me Baibul, kit keto tek me dongo ango ma myero watim?
8 Jehovah pe mito woro pa jo ma giwaco ni giye i kome ento dok gimedde ki timo mitti ma megi. Lubanga mito ni dano ‘gunong ryeko ma tye kakare i kom mitti-ne,’ dok gunyut man i kit me kwogi. (Jo Kolocai 1:9, 10) Pi meno, jo ma ginongo pwony ma okwongo me Baibul, ma cwinygi pwoyo, gimedde ki dongo me doko Lukricitayo ma gutegi. Tamgi bedo me ngeyo Jehovah i yo maber adada, me yaro ki medo ngecgi i kom Lokke matut, ki me ketone i tic i kwogi. Gitemme matek me bedo ki kit pa Won ma i polo dok me neno jammi i kit ma en neno kwede. Man miyo giyenyo yo me nywako tic me laro kwo ma en oweko tye ka timme i wi lobo i karewa-ni. Meno bene mono obedo mitini?—Marako 13:10; Jo Ibru 5:12–6:3.
9. I kit yoo ango ma ribbe me ada twere kwede i kare-ni?
9 Baibul nyuto ni jo ma gitiyo pi Jehovah omyero gubed jo ma giribbe. (Jo Epeco 4:1-3) Ribbe man myero obed i kare-ni, kadi bed wakwo i lobo ma opokke dok watye ka lweny ki goro me komwa. Yecu olego adada ni lupwonnyene ducu omyero gubed acel, kun nongo ginongo mit pa ribbe me ada man. Meno mono tyen lokke ngo? Me acel, ni gibibedo ki wat maber ki Jehovah kacel ki Wode. Me aryo, ni gibiribbe i kingi kengi. (Jon 17:20, 21) Pi meno, kacokke pa Lukricitayo tye calo dul ma Jehovah tiyo kwede me pwonyo lwakke.
Kit Yoo Ango ma Weko Ribbe man Twere?
10. (a) Wadongo kit ango ka watiyo ki Baibul me nyammo lagam me lapeny ma gudo komwa? (b) Niang tyen lok ma kelo ribbe pa Lukricitayo kun igamo lapeny ma kiryeyo i paragraf man.
10 Kiryeyo piny yoo abiro ma tye ma pirgi tego ma kelo ribbe i woro. Ka itye ka dok i lapeny ma tye lubo lok magi, tam kit ma lokke ki acel acel gudo kwede wati ki Jehovah kacel ki Lukricitayo luwoti. Nyammo lok magi kacel ki ngiyo ginacoya ma kicimo ento pe kicoyo lokke kany, bikonyowa me dongo i ryeko ma a ki bot Lubanga, teko me tam, ki wang ma neno anyim, kit magi mitte pi wan ducu. (Carolok 5:1, 2; Jo Pilipi 1:9-11) Nen yoo magi ducu ki acel acel.
(1) Waye twero pa Jehovah me keto cik pi gin maber ki marac. “Gen Rwot ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir.”—Carolok 3:5, 6.
Pingo omyero wayeny tam ki tira pa Jehovah ka watye ka moko tam? (Jabuli 146:3-5; Icaya 48:17)
(2) Watye ki Lok pa Lubanga me telowa. “Cakke ma wugamo lok pa Lubanga ma wuwinyo ki botwa, pe wugamo macalo lok pa dano, ento macalo lok pa Lubanga. Ada aye lok pa Lubanga, tye bene ka tic i iwu wun jo muye Yecu.”—1 Jo Tecalonika 2:13.
Gin ango ma rac ma tye i timo jammi ma ‘watamo’ mere ni tye atir? (Carolok 14:12; Jeremia 10:23, 24; 17:9)
Ka pe wangeyo tam ma Baibul miyo i kom gin moni, omyero watim ngo? (Carolok 2:3-5; 2 Temceo 3:16, 17)
(3) Wan ducu wanongo kony ki i yub acel me pit me cwiny. “Litinoni ducu Rwot aye bipwonyogi, litinoni gibibedo maber twatwal.” (Icaya 54:13) “Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo dong guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca [me tyeko lobo] dong tye ka nyiko cok-ki.”—Jo Ibru 10:24, 25.
Bakacic ango ma bino bot jo ma gitiyo maber ki yub me pit pa Jehovah i yo me cwiny? (Icaya 65:13, 14)
(4) Yecu Kricito, ma pe dano adana, aye Latelawa. “Ento wun pe myero gilwongwu ni, ‘Lapwony,’ pien wutye ki lapwony acel, pi meno wun ducu dong wudoko utmego. Dok bene pe wulwong dano mo ni wonwu i wi lobo, pien Wonwu tye acel, en aye ngat ma tye i polo. Pe bene gilwongwu ni ‘lutel,’ pien wutye ki latelwu acel, ma en aye Kricito ma Lubanga oyero.”—Matayo 23:8-10.
Ngat mo i kinwa myero otam ni edit ekato jo mukene? (Jo Roma 3:23, 24; 12:3)
(5) Wakuro gamente me Ker pa Lubanga macalo gen acel keken pi dano. “Dong wuleg kit man ni, ‘Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.’ Ento kong wukwong keto cwinywu i kom kerre, ki nongo kit ma atir ma en tye kwede, ci jami magi ducu gibimedo botwu.”—Matayo 6:9, 10, 33.
‘Keto cwinywa ma okwongo i kom kerre’ konyo me gwoko ribbewa nining? (Mika 4:3; 1 Jon 3:10-12)
(6) Cwiny maleng nyako nyinge i i luwor Jehovah, kit magi pirgi tego pi ribbe pa Lukricitayo. “Ento nyig ma nyak pi Cwiny Maleng gin aye mar, yomcwiny, kuc, diyo cwiny, kica, ber, gen, mwolo, gwokke ken.”—Jo Galatia 5:22, 23.
Myero watim gin ango wek cwiny pa Lubanga odong nyige i iwa? (Tic pa Lukwena 5:32)
Bedo ki cwiny pa Lubanga kubo wat i kinwa ki Lukricitayo luwotwa nining? (Jon 13:35; 1 Jon 4:8, 20, 21)
(7) Luwor Lubanga me ada ducu ginywako tito kwena maber me Ker-ri. “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—Matayo 24:14.
Gin ango ma myero ominiwa mitti me nywako tic me pwony man tutwal? (Matayo 22:37-39; Jo Roma 10:10)
11. Ka watiyo ki ada me Baibul i kwowa, adwogi ango ma bino?
11 Woro Jehovah ma nongo waribbe weko wabedo cok ki en dok konyo me kelo mer i kinwa ki luwotwa me niye. Jabuli 133:1 waco ni: “Nen kit macalo bedo ber ki me yomcwiny ka omego gibedo kacel ki mer i kingi!” A woko ki i lobo ki i kite me wany ducu, tim caro caro ki gerone ducu, ka dong bedo kacel ki jo ma gimaro Jehovah dok gilubo cikke pud dong miyo yweyo ya!
Kwer Kit ma Kelo Apokapoka
12. Pingo omyero wakwer cwiny me loc ken?
12 Wek pe wabal ribbewa me wi lobo ma pire tekki, omyero wakwer jammi ma kelo apokapoka. Gin acel i kine aye obedo cwiny me bedo ki loc ken i kom Lubanga ki i kom cikke. Jehovah konyowa me kwero cwiny meno ki nyuto Catan Larac-ci calo lacak tere. (2 Jo Korint 4:4; Niyabo 12:9) Catan aye omiyo Adam ki Kawa pe gulubo gin ma Lubanga owacigi dok oweko gumoko tam ma pe rwatte ki mitti pa Lubanga. Adwogine obedo peko pi gin wa ki wan. (Acakki 3:1-6, 17-19) Lobo-ni opong ki cwiny me bedo ki loc ken i kom Lubanga ki lokke. Pi meno omyero wageng cwiny meno pe me bino i tamwa.
13. Jammi ango ma binyuto ka ada watye ka yubbe me kwo i lobo manyen me kit ma atir pa Lubanga?
13 Me lapor, tam kong i kom cikke pa Jehovah me leyo ka tyen lobo marac me kare-ni ki polo manyen ki lobo manyen ka ma “kit ma atir bedo iye.” (2 Petero 3:13) Man mono pe cwalowa me cako yubbe pi kwo i kare ma nongo kit ma atir keken aye bibedo tye i lobo? Man tyen lokke ni omyero walubu tam me Baibul ni: “Pe wumar lobo, kadi gin ma tye i lobo. Ka dano mo maro lobo, nongo mar pa Lubanga pe i iye.” (1 Jon 2:15) Pi meno, wakweru cwiny man me lobo—cwiny me loc ken, tim tar-wang ki gero ni woko. Waweku obed kitwa me winyo Jehovah ki me lubo en ki cwinywa ducu, kadi bed-ni kit me kom diyowa. Kit yo me kwowa ducu omyero onyut ni tamwa ki jammi ma wamito lubbe ki mitti pa Lubanga.—Jabuli 40:8.
14. (a) Pingo pire tek kombeddi me nongo kare me pwonyo yo pa Jehovah ki me lubone i kwowa? (b) Tyen ginacoya ma kicimo i paragraf-fi miyo wawinyo ningo kekenwa?
14 Ka kare ma Jehovah oyubo me jwero lobo man me yub maraci ki jo ducu ma gimaro yone oromo, en pe bigale. En pe bidiro kare meno nyo loko cikkene me miyo kare bot jo ma pud gumoko i lobo ento gitimme ni gitye ka nongo pwony i kom mitti pa Lubanga kun cwinygi nongo tye nucu nucu, pi nongo kwo. Man aye kare me nyuto ticci! (Luka 13:23, 24; 17:32; 21:34-36) Pud dong yomo cwinywa ya, me neno lwagi dano mapol ata gitye ka kwanyo kare man me yenyo pwony ma Jehovah miyo ki i Lokke ki dulle kun gitye ka wot ma guribbe i yone ma cito i lobo manyen! Dong ka ngecwa i kom Jehovah omedde, marwa ki mittiwa me tic bene bimedde.
Nyammo wi Lok ma Kineno
• Yub pa Jehovah tye ningo i lok kom woro?
• Inge nongo pwony ma okwongo me Baibul, kit ango ma pirgi tego ma nongo mitte me atima ma myero walubbi?
• Ngo ma wan ki acel acel watwero timone wek ribbe obed tye i kinwa ki luwor Jehovah mukene?
[Cal ma tye i pot karatac 4]
‘Jo ma mwol aye gibicamo lobo; gibibedo ki yomcwiny pi lonyo madwong ma gibilimo’