Kony pi Jo me Ot

1. Yub me Cabat ma onongo bedo cabit ki cabit-ti okonyo jo me odi me Icrael nining?

¹ Yub me Cabat onongo obedo mic me mar ma Jehovah omiyo pi ber bedo pa jo me odi. Luicrael onongo giywe ki i tic ma gitimo jwi dok ginongo kare me lwodo lok i kom ber pa Jehovah ki watgi kwede. Lunyodo onongo giromo tic ki yub man me tute matek me nyebo Cik pa Lubanga i cwiny lutinogi. (Nwo. 6:6, 7) Yub me Cabat onongo weko jo pa Jehovah gibedo ki kare me keto cwinygi i kom jami me cwiny cabit ki cabit.

2. Yub me Cabat-ti pwonyowa gin ango i kom Jehovah?

² Jehovah pe dong mito ni jo me ot myero gulub cik me Cabat-ti. Ento, cik meno pwonyowa gin mo i kom Lubangawa. En paro mada ni kare ducu jone gunong pwony ma miyo gibedo maber dok ki wat macok kwede. (Ic. 48:17, 18) I kare-ni, yo acel ma Jehovah nyutu kwede marre piwa aye otyeno me Woro pi Jo me Ot.

3. Pingo kiketo Otyeno me Woro pi Jo me Ot?

³ Pingo Kiketo Otyeno me Woro pi Jo me Ot? I Januari 2009, kiketo Cokke me Kwano Buk i otyeno acel ki Cukul me Tiokraci ki dok Cokke me Ticwa. Tyen lok acel me alokaloka man aye wek jo me ot gujing wat i kingi ki Jehovah kun giketo otyeno mo acel cabit ki cabit me Woro pi Jo me Ot. Kicuko cwiny jo me ot ducu me keto otyeno me kwangi me bedo i nino ma onongo yam tye pi cokke me kwano buk, kun ka twere, gitiyo ki kare meno me nyamo pwony me Baibul ma pe kirune aruya dok bene ma rwatte pi dano ducu ma i ot.

4. Tika mitte ni jo me ot omyero guket ni cawagi me kwan obed cawa acel keken? Tit kong.

⁴ Me bedo tye i Cokke me Kwano Buk, onongo kare mitte me yubbe, me cito i cokke, ki jami mukene. Pi dano mapol, yubbe pi cokke man onongo tero cawa malac loyo cawa acel me cokke-nu kikome. Pi alokaloka ma kiketo i yub me cokkewa, dong watwero tic ki otyeno man me woro Jehovah macalo jo me ot. Pi man, pe omyero kiket ni otyeno me Woro pi Jo me Ot obed cawa acel keken. Ma ka meno, myero watemme me niang gin ma mitte ki goro pa jo me odiwa ka wek waket cawa mupore.

5. Myero kityek otyeno ducu i nyamo lok kacel keken? Tit kong.

⁵ Omyero Mono Watyek Otyeno-ni Ducu me Nyamo Lok Kacel i Gurup? Ka jo ma gunyomme kacel ki jo me ot ma gitye ki lutino ginywako pwony me Ginacoya kacel, gicuko cwinygi kekengi. (Rom. 1:12) Weko jo me ot gibedo ki wat macok i kingi. Pi meno, nyamo Ginacoya aye myero obed gin ma pire tek loyo i kwan me Otyeno me Woro pi Jo me Ot. Ento, ngat acel acel me ot romo bene cwalo kare i kwan pire kene. Me labolle, i nge nyamo lok i gurup, dano pud gitwero bedo kacel kun ngat acel acel nongo tye ka kwan pire kene, yubbe pi cokke nyo kwano magajin. Jo me odi mukene gumoko pe me yabo telebijon i otyeno meno kulu.

6. Nyamo lok man myero obed nining?

⁶ Nyamo Lok Man Myero Obed Nining? Yub man pe myero obed me lapeny-ki-lagam keken kare ducu. Me wek otyeno me Woro pi Jo me Ot obed mamit, jo me odi mapol gitye ki yub macal ki yub me cokkewa ma bedo i dye cabit. Gipoko pwonygi me anyama i bute mapat pat dok ginywako lokke kacel i yo mapat pat. Me labolle, giromo kwano Baibul kacel, yubo bute mogo me cokke, ki dok poro gin ma timme i ticwa me pwony. Pot karatac 6 miyo tam mogo mabeco.

7. Lunyodo myero guwek piny obed nining?

⁷ Lunyodo Myero Guwek Piny Obed Nining? Jo me otti giromo pwonye maber ka piny opye mot. I kare mukene ka piny tye maber, wuromo kwan ki woko. Wubed agonya me yweyo i cawa mo keken ka mitte. Jo me odi mukene giromo camo nyo mato gin mo kacel i nge kwangi. Kadi bed lunyodo myero gugwokke pe me tic ki otyeno me Woro pi Jo me Ot me yeto ki miyo pwod bot lutino, ento giromo tic ki kare meno me nyamo peko nyo gin mo marac ma tye ka timme. Ento, romo bedo ber me lok i kom jami ma weko dano keco oyot bot latin i mung i kare mukene wek lewic pe omake i nyim omegine ki lumegine. Otyeno me Woro pi Jo me Ot pe myero obed gin mangic dok ma olo dano ento myero onyut kit pa Lubanga ma layomcwiny ma wan waworo-ni.—1 Tem. 1:11, NW.

8, 9. Kit yubbe ango ma mitte bot luwi odi?

⁸ Lawi Ot Romo Yubbe Nining? Jo ducu me ot moni gibinongo adwogi maber loyo ka ce lawi ot oyubbe woko con pi otyeno ducu me Woro pi Jo me Ot, kun moko bene tamme i kom gin ma gibinyamone ki kit ma gibinyamo kwede. (Car. 21:5) Bedo ber ka lawi ot openyo tam pa dakone ka tye ka keto pulan me yub ma kit man. (Car. 15:22) Luwi odi, pingo pe wupeny tam pa lutinowu kicel kicel? Ka itimo kit meno, ibiniang maber miti pa lutinoni kacel ki pargi.

⁹ Pe mitte ni lawi ot obed ka cwalo cawa mapol pi yubo pwony cabit ki cabit. Pol kare jo me ot gitwero lubo yub mogo ma nongo dong kiketo con, pe dok bimitte ni en obed ka katti ki manyen kare ducu. Romo bedo ber ka en yubo pulanne i nge tyeko otyeno me Woro pi Jo me Ot cut ma nongo jami ma mitte pi jo me ode pud tye i wiye. Luwi odi mukene gimwono pulan me yubgi man ka ma jo ducu giromo nenone, calo i doggola me firij. Man tugo miti dok miyo bot jo me ot ducu kare me yubbe ka mitte.

10. Jo ma gibedo kengi giromo tic ki otyeno me Woro pi Jo me Ot nining?

¹⁰ Ka Abedo Kena Nyo Atye Kena i Niye Kono? Jo ma gibedo kengi giromo tic ki otyeno me Woro pi Jo me Ot me kwan pigi kengi. Yub me kwan piri keni maber kwako kwano Baibul, yubbe pi cokke, ki dok kwano Watchtower ki Awake! Medo i kom magi, lutit kwena mukene giketo yub me kwedo lok pigi kengi. I kare mogo, giromo lwongo latit kwena nyo jo me ot mukene me nywako kwedgi i nyamo Ginacoya.

11, 12. Adwogi maber ango ma bino pi bedo ki otyeno me Woro pi Jo me Ot i cabit ducu?

¹¹ Adwogi Maber Ango ma Bino pi Bedo ki Otyeno me Woro pi Jo me Ot i Cabit Ducu? Jo ma ginywako i woro me ada ki cwinygi ducu ginyiko cok ki Jehovah. Medo i kom meno, jo me odi ma giribbe i woro kacel gijingo wat i kingi. Jo aryo ma gunyomme gucoyo pi mot ma gulimo ni: “Macalo jo munyomme ma gipe ki lutino dok ma gitye painia, kare ducu wakuro otyeno me Woro pi Jo me Ot ki yomcwiny. Wawinyo ni watye ka nyiko cok i kinwa ki dok bot Wonwa me polo. Kombeddi dong ka waco odiko i nino me kwanwa, wawaco i kinwa ni: “Byek kong ngo ma wabibedo kwede tin? Otyeno me Woro pi Jo me Ot!”

¹² Yub me bedo ki otyeno me Woro pi Jo me Ot konyo bene jo me ot ma gitye ki tic mapol. Mego mo acel ma tye kene ki awobene aryo dok obedo painia marii ocoyo ni: “I kare mukato, kwanwa macalo jo me ot onongo pe woto maber. Onongo obedo gin ma timme kicel kicel pien nongo aol woko. Pe onongo angeyo kit ma omyero atim kwede. Pi man, atye ka coyo waraga me pwoyowu tutwal pi otyeno me Woro pi Jo me Ot. I kare-ni dong kwanwa tye ka wot maber dok watye ka limo adwogi maber.”

13. Ka jo me odi binongo adwogi maber ki i yub man nyo pe, jenge i kom ngo?

¹³ Macalo Cabat macon ca, otyeno me Woro pi Jo me Ot obedo mot ma oa ki bot Wonwa me polo dok twero konyo jo me odi ducu. (Yak. 1:17) Kit ma jo me odi pa Luicrael gutiyo kwede ki Cabat-ti onongo gudo wat i kingi ki Jehovah. I yo acel-lu, ka jo me otwa binongo adwogi maber ki i yub man nyo pe, jenge i kom kit ma watiyo kwede ki otyeno ma kiminiwa me woro pi jo me ot. (2 Kor. 9:6; Gal. 6:7, 8; Kol. 3:23, 24) Ka watiyo maber ki yub man, jo me odi gibibedo calo laco Jabuli ma owaco ni: “Ento ki tung bota, bedo cok ki Lubanga aye ber; in Rwot [Jehovah] Lubanga aye dong idoko kalarrena.”—Jab. 73:28.

[Boro buk i pot karatac  5]

Otyeno me Woro pi Jo me Ot pe myero obed gin mangic dok ma olo dano ento myero onyut kit pa Lubanga ma layomcwiny ma wan waworo-ni

[Bok i pot karatac 6]

GWOK MABER

Tam Mogo Mabeco pi Otyeno me Woro pi Jo me Ot

Baibul:

• Wukwan kacel bute mo ki i yub me kwano Baibul cabit ki cabit. Kabedo mukene i Baibul kicoyo i yo ma weko dano acel twero bedo calo latit lok, ci jo mukene gikwano lok pa jo ka kicoyo i komgi-ni.

• Wupor macalo tuku goga gin ma wukwano ki i bute mo me Baibul.

• Mi ki ngat acel acel me ot cura me Baibul ma en omyero okwan con kun coyo piny lapeny acel nyo aryo ma en onongo ki i iye. Ci dong, wuromo kwedo lapeny pa ngat acel acel kacel.

• Cabit ducu wuyub kad ma kicoyo iye tyeng me Baibul, ci wutem titone ki dok makone i wiwu. Wuwot ki gwoko kad magi, kun wunwoyo tic kwedgi cabit ki cabit me neno ginacoya adi ma wiwu po iye.

• Wuwiny dwan me kwano Baibul ma kimako amaka, kun wuwoto ki lubone ki i Baibulwu.

Cokke:

• Wuyub kacel bute mo me cokke.

• Wupwony wero wer me Ker ma kiyerogi pi cabit manyen.

• Ka ngat mo tye ki pwony me amiya i Cukul me Tiokraci nyo lapor i Cokke me Ticwa, wunyam tamwu kacel i kom kit me nyutone, nyo wupor i nyim jo me ot.

Kop ma Mako Jo me Ot:

• Wunyam pwony mogo ki i buk me Young People Ask nyo Learn From the Great Teacher.

• Wupor kit ma wutwero cobo kwede peko ma romo timme i cukul.

• Wupor gin ma timme i kwo kun lunyodo giromo loko ticgi ki pa lutinogi. Wek lutino gukwed pwony mo ci gunyam lok-ke ki lunyodogi.

Tic me Pwony:

• Wupor pwony ma wuyubbe me tic kwede i tum cabit.

• Wulok i kom yub mogo ma jo me ot romo ketone me medo ticgi i tic me pwonywa-ni i kare me Nipo nyo me yweyo.

• Mi dakika mo manok ki ngat acel acel me ot wek gukwed kit me miyo lagam i kom lapeny mapat pat ma dano twero penyogi i tic me pwony, ci dong wupor lagam meno.

Tam Mogo Mukene:

• Wukwan kacel pwony mo ki i magajin ma tye.

• Wek ngat acel acel me ot okwan woko con pwony mo ma tugo mitine ki i magajin ma tye, ci wek en omi ripot iye i otyeno me Woro pi Jo me Ot.

• Kicel kicel wulwong latit kwena mo nyo jo munyomme pi otyeno me Worowu pi Jo me Ot ci wuromo penyogi me tito jami mutimme i ticwa me pwony nyo kit ma gunongo kwede ada.

• Wunen vidiowa acel ci wunyam lok i kome.

• Wunyam kacel “Lapeny pa Jo Matino” nyo “Lok me Anyama pi Jo me Ot” ki i Awake!

• Wunyam kacel bute me “Pwony Lutinoni” nyo “Pi Jo Matino” ki i Watchtower.

• Wukwan dok wunyam bute mo ki i Yearbook ma tye nyo ki i buk ma pud obino nyen i gure madit me distrik ma okato cok cok-ki.

• I nge dwogo ki i gure madit, gure me adwol nyo gure me nino acel, wunyam jami mogo ma kipwonyo.

• Wungi matut cwec pa Jehovah, ci wulok i kom gin ma gipwonyowa i kom Jehovah.

• Wuyub gin mo kacel, calo cweyo cal, goyo mep, nyo chart.