Waromo Cer Ki I To!

KA WATO, Lubanga mono mito ni ecerwa nyo edwokwa cen i kwo?— Yubu, laco ma onongo kite ber obedo ki niye ni Lubanga mito timone. Pi meno, i kare ma Yubu otamo ni en dong ecok to, en owaco bot Lubanga ni: “Ka lacen ibilwonga, ci abigamo dogi.” Yubu owaco ni pire bibedo mit bot Lubanga Jehovah, nyo ni en mito matek adada me cero en Yubu.​—Yubu 14:14, 15.

Yecu bene rom aroma ki Wonne, Lubanga Jehovah. Yecu mito konyowa. I kare ma laco mo ma tye ki two dobo owacce ni, ‘ka imito, itwero lonyo koma,’ Yecu odok iye ni: “Amito.” Ci en ocango dobo pa laco-ni.​—Marako 1:40-42.

Yecu opwonyo bedo ki mar i kom lutino ki bot Wonne. Tyen aryo kulu i kare mukato angec, Jehovah otiyo ki luticce me cero jo matino. Elia obako doge bot Jehovah me cero wod pa dako mo ma onongo obedo ka gwoko en Elia. Ci Jehovah ocero wod pa dako-ni. Jehovah bene otiyo ki laticce Elica me cero awobi mo matidi.​—1 Luker 17:17-24; 2 Luker 4:32-37.

Mono pe yomo cwinywa me ngeyo ni Jehovah marowa adada?— En pe tamo piwa ka wakwo keken. En bene wiye po i komwa ka wato. Yecu owaco ni Wonne neno jo ma guto ma en maro calo pud gikwo! (Luka 20:38) Baibul waco ni ‘kadi to nyo kwo nyo jami ma tye i kare ni nyo ma bino anyim pe bibedo ki twero mo me pokowa ki i kom mar pa Lubanga.’​—Jo Roma 8:38, 39.

I kare ma Yecu tye i lobo, en onyutu ni Jehovah paro pi lutino matino. Wi opo ni Yecu okwanyo cawa me lok ki lutino i kom Lubanga. Tika ingeyo ni Lubanga omiyo teko bot Yecu me cero lutino ma guto ki i kin jo muto?— Kong walok i kom kare ma Yecu ocero latin anyaka mo me mwaka 12 pa laco mo ma nyinge Yairo.

Yairo onongo gikwo gin ki dakone ki latinne acel keken cok ki Nam me Galilaya. I nino mo acel two obwoyo latin anyaka-ni matek adada, dok Yairo oneno ni anyaka man obito woko. En ocako tamo pi Yecu ma oywek ma en Yairo owinyo lok i kome ni twero cango dano. Pi meno, Yairo ocako yenyo en. En onongo Yecu tye ka pwonyo dano mapol i dog Nam me Galilaya.

Yairo okato ki i kingi ocito ogungo [orumo] ka tyen Yecu. En owaco bot Yecu ni: ‘Nyara kome lit adada. Itwero bino wek ikony en? Alegi ni ibin.’ Cutcut Yecu gucito gin ki Yairo. Lwak ma gubino ka neno Lapwony Madit-ti bene gulubo korgi. Ento ma pud peya guwoto mabor, co mogo gubino ki i paco pa Yairo ci guwacce ni: “Nyari dong oto woko, pud dok iyelo Lapwony pingo?”

Yecu owinyo ka co magi giwaco lok man. En onongo ngeyo kit ma cwiny Yairo tye ka cwer kwede pi rwenyo latinne acel keken-ni. Pi meno En owacce ni: ‘Pe ilwor. Bed ki niye i kom Lubanga, ci nyari bicang.’ Gumedde ki wot nio wa i paco pa Yairo. Lurem jo me paco pa Yairo onongo gitye ka koko. Cwinygi onongo tye ka cwer pien laremgi matidi-ni oto woko. Ento Yecu owaccigi ni: ‘Wuwek koko obedi. Latin man pe oto, ento onino anina.’

I kare ma Yecu owaco lok man, dano gucako nyero pien onongo gingeyo ni anyaka man oto woko. Pingo itamo ni Yecu owacci nyako-ni onino anina?— Itamo ni pwony ango ma en onongo mito miyone bot dano?— En onongo mito ni dano gunge ni to obedo calo nino matut. En onongo mito pwonyogi ni ki teko pa Lubanga, en etwero dwoko dano muto cen i kwo i yo mayot calo kit ma wacoyo kwede ngat mo ki i wang nino.

Yecu ocwalo dano ducu woko ci odong gin ki lukwenane Petero, Yakobo, Jon ki dong won nyako-ni ki minne. Ci en ocito ka ma latin man tye iye. Omako cinge ci owacce ni: ‘Latin anyaka, a malo!’ Cutcut en oa malo ci ocako wot! Wonne ki minne cwinygi obedo yom adada.​—Marako 5:21-24, 35-43; Luka 8:40-42, 49-56.

Tam kong lok man. Kit ma Yecu onongo twero dwoko latin anyaka meno cen i kwo-ni, en mono pe twero timone bot jo mukene?— Itamo ni en bitimo meno?— Bitimone. Yecu kikome bene owaco ni: “Kare bibino ma jo ducu ma tye i lyel biwinyo iye dwane [Yecu], ci gibikatti woko.”​—Jon 5:28, 29.

Itamo ni Yecu mito cero dano?— Lanen mukene me Baibul konyowa me gamo lapeny meno. Gin mutimme cok ki Nain i nino mo acel nyutu kit ma Yecu paro kwede pi jo ma gitye ka kumo pi danogi muto.

Dako mo kacel ki lwak dano onongo gitye ka cito ka yiko wode kun gia ki i Nain. Con kong cware oto, man dok latinne acel keken-ni oto woko. Cwinye pud dong obedo ka cwer ya! Lwak dano mapol me Nain onongo gitye ka lubo kore i kare ma kitye ka a ki i gang ki kom lato. Dako-ni onongo tye ka koko, dok pe tye gin mo ma dano onongo gitwero timone me kweyo cwinye.

I nino meno, Yecu ki lupwonnyene onongo gitye ka bino i Nain. Cok ki doggola madit me Nain, gurwatte ki dano mapol ma gitye ka cito ka yiko wod pa dako-ni. I kare ma Yecu oneno dako man tye ka koko, kica omake i kome. En owinyo i cwinye arem malit ma dako-ni tye kwede. Man omiyo en omito ni ekony dako-ni.

Pi meno, ki cwiny me kica en oloko matek ma dako-ni twero winyone ni: “Wek koko obedi.” Kite kacel ki ticce oweko dano ducu gucako bedo ki miti i kome. I kare ma Yecu tye ka cito cok ki kom lato, dano ducu nen calo gubedo ki ur i kom gin ma en obitimo. Yecu oloko ki twero ni: “Awobi, awacci, a malo.” Cutcut en oa malo obedo abeda! Ci en ocako lok.​—Luka 7:11-17.

Tam kong kit ma dako-ni owinyo kwede ki i cwinye! Itamo ni in iromo winyo nining me jolo dano-ni me amara ma oto ci ocer?— Man mono pe nyutu ni Yecu ada maro dano dok bene mito ni ekonygi?— Tam kong kit ma bibedo mwonya kwede me jolo dano dok aye pi kwo i lobo manyen pa Lubanga!​—2 Petero 3:13; Niyabo 21:3, 4.

I kare meno jo ma gibicerogi gibibedo jo ma wangeyogi con, ma i kine bibedo lutino matino. Wabingeyogi kit ma Yairo ongeyo kwede nyare i kare ma Yecu ocere. Jo mukene i kine bibedo jo ma guto mwaki mia nyo alip mapol ata angec. Ento Lubanga wiye pe biwil i komgi kadi bed gukwo yam con.

Man mono pe obedo gin mamwonya tutwal me ngeyone ni Lubanga Jehovah kacel ki Wode Yecu gimarowa matek kit man?— Gimito ni myero wakwo pi naka ento pe pi mwaki mo manok keken!