Dongo Dirowa i Tic me Pwony—Kit me Miyo Caden i Kabedo me Biacara

Gin Mumiyo Pire Tek: Kit macalo pol pa dano gitiyo pi cawa malac, yo maber me o botgi ki kwena me Ker-ri en aye me limogi i dog ticgi. Miyo caden i kabedo me biacara twero kelo adwogi maber ki yomcwiny, pien lutic ducu nongo gitye i dog ticgi dok gitemme me jolo dano ma bino botgi kun ginenogi calo luwil. Wek tic man owot maber, lutit kwena myero guti ki ryeko dok rukgi ki kit ma ginen kwede myero obed ma oporre. (2 Kor. 6:3) Pi man, lanen wi tic myero onen tyen adi ma gitiyo i kabedo me biacara dok angagi ma gitiyo iye.

Kit me Timone:

Yub kit me cako lok macek. Ka waloko tutwal ci wacamo cawa pa lutic, i anyim pe gibimiyo botwa kare me lok kwedgi.
Yer cawa ma nongo luwil tye manok, calo i cawa ma pud giyabo doggola ayaba.
Temme me lok ki ladit tic ma loyo kabedo meno. Bwuny dok inyut kit me lirem. Iromo wacci: “Watye ka limo dano macek cek i dog ticgi pien nongogi paco tek mada.” Tit bote pwony ma iyubo, ci imine trak, magajin, nyo buk mo keken ma watye kwede. Wek pe dok kinenwa macalo lucat-wil, bedo ber ka pe waloko i kom yubwa me miyo mot nikwanyo ka kipenyowa.
Ka ladit me biacara meno nen larem, penye ka twere wek ilok ki lutic mukene-ni. I kabedo me biacara mukene, bedo ber ka ipenyo ka iromo weko bukkewa ka ma kijolo iye welle.
Ti ki diro, dok inyut niango. Me labolle, ka latic moni tye ka lok ki kactoma, kur nio ka otyeko lokke ka dong icit bote.

Tem Timo Kit Man i Dwe-ni:

I otyeno me Worowu pi Jo me Ot, wupor kit me lok ki dano i wang tic me biacara.