Lubanga Ocweyo Polo ki Lobo

Lubanga Jehovah aye Lacwecwa. En ocweyo jami ducu ma waneno ki jami ducu ma pe nen. Ma peya en ocweyo jami ma wanenogi-ni, en kong ocweyo malaika mapol ata. In mono ingeyo angagi ma lumalaika gubedo? Malaika gubedo cwec pa Jehovah dok gitye calo Lubanga. Pe watwero neno komgi, kit macalo pe waneno Lubanga. Lamalaika mukwongo ma Lubanga ocweyo omiyo kony mapol bot Jehovah. Malaika meno okonyo Jehovah mada i kare ma tye ka cweyo lacer, jami me dan polo ki jami mukene-ni ducu. I kin jami ma kicweyogi, acel obedo lobo, pacowa mamwonya-ni.

I ngeye, Jehovah oyubo lobo maber ci oketo dano ki lee me bedo iye. En omiyo dero ceng oryeny i wi lobo. En ocweyo godi, nam madito, ki kulu mapol.

Gin ango ma otimme i nge meno? Jehovah owacci: ‘Abimiyo lum, ginapita ki yadi twi i wi lobo.’ Yadi mapatpat ki nyiggi, pot dek, ki ature gucako twi mapol. Lacen Jehovah ocweyo kwai lee mapol mapat pat​—lee ma tuk ki bwome, ma kwang, ma giwoto ki tyengi, ki ma giywane ki korgi. En ocweyo lee matino, calo apwoyo, ki lee madongone, calo lyec. Lee mene ma in imaro loyo?

Jehovah owaco bot lamalaika mukwongo-ni ni: ‘Wek wacwe dano.’ Dano onongo bibedo pat ki lee. Gibitimo jami ki ryeko me wigi. Gibilok, gibinyero, dok gibilego lega. Gibigwoko lobo ki lee ducu. In ingeyo nying laco mukwongo? Kong wanenu.