Lubanga Tye Ki Yub Ango Pi dano?

1. Lubanga tye ki yub ango pi dano?

YUB pa Lubanga pi lobo tye mamwonya mada. En ocweyo laco ki dako mukwongo, Adam ki Kawa, ci oketogi me kwo i poto mo mamwonya. Yubbe onongo tye ni dano gunywal lutino, gulok lobo ducu odok paradic kun gigwoko lee bene.​—Acakki 1:28; 2:8, 9, 15; nen Lok me Giko Buk Man me 6.

2. (a) Wangeyo nining ni Lubanga bicobo yubbe? (b) Kodi dano ango ma Lubanga mito ni gubed i lobo kany, dok pi kare ma rom mene?

² Tika itamo ni wabikwo i paradic doki i kare mo? Jehovah owacciwa ni: “Dong atyeko yubone, dok abitimone.” (Icaya 46:9-11; 55:11) Ada, en bicobo yubbe, dok pe tye gin mo keken ma romo genge. Jehovah owaco ni ecweyo lobo-ni pi tyen lok. En “pe oketo lobo ci oweko woko.” (Icaya 45:18) En mito ni dano gubed i twok lobo-ni lung. Kodi dano ango ma Lubanga mito ni gubed i lobo kany, dok pi kare ma rom mene? Baibul waco ni: ‘Jo ma kitgi atir [nyo ma luwiny] gibicamo lobo, dok gibibedo iye matwal.’​—Jabuli 37:29; Niyabo 21:3, 4.

3. Kit ma dano gitwo dok gito-ni, man twero kelo lapeny ango?

³ Ento i kareni, dano gitwo dok gito. I kabedo mapol, gilwenyo dok gineke bene. Ki lok ada, meno pe obedo yub pa Lubanga. Dong, ngo ma otimme, dok pingo? Baibul keken aye twero tittiwa.

LAMONE PA LUBANGA

4, 5. (a) Nga ma oloko ki Kawa kun tiyo ki twol i poto me Eden? (b) Dano ma genne twero doko lakwo nining?

⁴ Baibul wacciwa ni Lubanga tye ki lamonene “ma gilwongo ni Ladot, ki Catan.” Catan otiyo ki twol me lok ki Kawa i poto me Eden. (Niyabo 12:9; Acakki 3:1) En oweko onen calo twol aye tye ka lok.​—Nen Lok me Giko Buk Man me 7.

⁵ Dong, Lubanga aye mono ocweyo Catan Larac-ci? Pe! Lamalaika mo ma onongo tye i polo i kare ma Lubanga oyubo lobo pi Adam gin ki Kawa aye olokke odoko Larac-ci. (Yubu 38:4, 7) Meno otimme nining? Tam kong, dano ma lagen lokke doko lakwo nining? Pe kinywale ma obedo lakwo. Ento, en cako bedo ki miti i kom gin ma pe mege. En medde ki tamo pi gin meno, ci mitine marac-ci dongo. Dong, ka kare onen, en kwalo gin meno woko. En nongo dong olokke odoko lakwo.​—Kwan Yakobo 1:13-15; nen Lok me Giko Buk Man me 8.

6. Lamalaika mo odoko lamone pa Lubanga nining?

⁶ Man aye gin mutimme i kom lamalaika meno. I nge cweyo Adam ki Kawa, Jehovah owaccigi ni gunywal lutino gunya dok ‘gupong lobo.’ (Acakki 1:27, 28) Nen calo lamalaika meno otamo ni, ‘Dano magi ducu giromo woro an ma kaka woro Jehovah!’ I kare ma en omedde ki tamo lok man, mitine pi gin ma Jehovah aye myero onong bene omedde ki dongo. Lamalaika-ni onongo mito ni dano guwor en. Pi meno, en obwolo Kawa. (Kwan Acakki 3:1-5.) I kare ma en otimo meno, en odoko Catan Larac-ci, lamone pa Lubanga.

7. (a) Pingo Adam gin ki Kawa guto? (b) Pingo wati dok wato?

⁷ Adam gin ki Kawa gukwero winyo dog Lubanga ci gucamo nyig yat-ti. (Acakki 2:17; 3:6) Gin gutimo bal i kom Jehovah, dok guto woko lacen, kit ma Jehovah onongo otito-ni. (Acakki 3:17-19) Lutino pa Adam ki Kawa gitye lubalo, pi meno gin bene gito woko. (Kwan Jo Roma 5:12.) Me konyowa wek waniang gin mumiyo lutino pa Adam ki Kawa bene gubedo lubalo, waromo tic ki labol i kom bao lago matafali. Ka ce bao lago matafali mo tye ma ogom, ci matafali ducu ma katti ki iye bene bedo ma ogom. I kare ma Adam okwero winyo dog Lubanga, Adam odoko labalo. Kit ma wan ducu wabedo lutino pa Adam-mi, watye lubalo nyo “wagom” calo en. Dong, pien wan ducu watye lubalo, watii dok wato.​—Jo Roma 3:23; nen Lok me Giko Buk Man me 9.

8, 9. (a) Ngo ma Catan onongo mito ni Adam gin ki Kawa gutam? (b) Pingo Jehovah pe oneko lujemo-ni cutcut?

⁸ I kare ma Catan obwolo Adam ki Kawa me turo cik pa Lubanga, en ocako jemo i kom Jehovah. En onongo mito ni Adam ki Kawa gutam ni Jehovah obedo laloc marac ma loko lok goba dok kano jami mabeco woko ki botgi. Catan onongo tye ka wacci dano pe gimito ni Lubanga owaccigi gin me atima dok ni Adam ki Kawa myero gumok pigi kengi gin maber ki marac. Dong, ngo ma Jehovah onongo bitimone? En onongo twero neko lujemo-ni ci giko jemogi woko cutcut. Ento meno tika onongo binyuto ni Catan obedo lagoba? Pe.

⁹ Pi meno, Jehovah pe oneko lujemo-ni cutcut. Ma ka meno, en omiyo kare pi dano me lone kengi. Man onongo binyuto ka maleng ni Catan obedo lagoba ki dok ni Jehovah ngeyo gin maber pi dano. Wabinyamo lok man i yo matut i Dul me 11. Ento itamo ningo i kom tam ma Adam gin ki Kawa gumoko? Tika onongo pore pigi me ye lok pa Catan kun gikwero winyo Lubanga? Jehovah onongo omiyo bot Adam ki Kawa jami ducu ma gitye kwede. En ominigi kwo ma pe ki roc, kabedo mamwonya me kwo iye, ki dong tic ma yomo cwinygi. Ento Catan onongo pe otimo gin mo pigi. Ka onongo itye kunnu, kono itimo ngo?

10. Tam ma pire tek ango ma ngat acel acel i kinwa myero omoki?

¹⁰ I kare-ni, wan ducu ki acel acel omyero wamok tamwa i lok man, dok kwowa jenge i kom gin ma wayero. Watwero yero me winyo dog Jehovah, Lalocwa, kun wakonyo me nyuto ni Catan obedo lagoba. Nyo watwero yero Catan macalo lalocwa. (Jabuli 73:28; kwan Carolok 27:11.) Dano manok keken i lobo-ni aye giyero me winyo dog Lubanga. Ki lok ada, en pe obedo laloc me lobo-ni. Ento ka Lubanga aye pe obedo laloc me lobo-ni, ci dong anga ma tye ka loyone?

ANGA MA LOYO LOBO-NI?

11, 12. (a) Pwony ango ma wanongo ki i kit ma Catan otemo kwede Yecu? (b) Wang Baibul mene ma nyuto ni Catan aye laloc me lobo-ni?

¹¹ Yecu onongo ngeyo ngat ma ada loyo lobo-ni. I nino mo acel, Catan “onyutte ker ducu ma i wi lobo ki deyogi ducu.” Ci Catan ocikke bot Yecu ni: “Magi ducu abimiyo boti, ka iryebbe iwora.” (Matayo 4:8, 9; Luka 4:5, 6) Penye kekeni ni, ‘Ka Catan aye pe obedo laloc me ker magi, kono onongo omiyogi bot Yecu?’ Pe. Gamente ducu gubedo pa Catan.

¹² Itwero bedo ki lapeny ni: ‘Catan twero bedo laloc me lobo-ni nining? Jehovah aye mono pe obedo Lubanga Won Twer Ducu ma ocweyo polo ki lobo?’ (Niyabo 4:11) Kakare, ento Yecu olwongo Catan ni “lalo lobo man.” (Jon 12:31; 14:30; 16:11) Lakwena Paulo olwongo Catan Larac-ci ni “lubanga me lobo man.” (2 Jo Korint 4:3, 4) Dok lakwena Jon ocoyo ni “lobo ducu tye i te loc pa Larac.”​—1 Jon 5:19.

KIBIJWERO LOBO PA CATAN-NI NINING?

13. Pingo wamito lobo manyen?

¹³ Lobo man tye ka doko rac medde ameda. Lweny, camucana, bwola, ki dong tim gero tye kabedo ducu. Dano pe gitwero cobo pekki magi kadi bed gutemme nining. Ento cokcok-ki, Lubanga bijwero lobo marac-ci i kare me lwenye me Armagedon ci leyo kakare ki lobo manyen ka ma kit matir bedo iye.​—Niyabo 16:14-16; nen Lok me Giko Buk Man me 10.

14. Anga ma Lubanga oyero me bedo Kabaka me Kerre? Ngo ma Baibul otito con i kom Yecu?

¹⁴ Jehovah oyero Yecu me bedo Kabaka me Gamentene nyo Kerre me polo. Mwaki alip mapol mukato angec, Baibul otito ni Yecu biloc macalo “Laloc ma kelo kuc” dok ni gamentene pe bigik matwal. (Icaya 9:6, 7) Yecu opwonyo lulub kore me lega pi gamente man i kare ma en owacci: “Ker meri obin; giti gin ma imito i lobo kit ma gitiyo i polo.” (Matayo 6:10) I Dul me 8, wabipwonyo kit ma Ker pa Lubanga bileyo ka wang gamente me lobo-ni. (Kwan Daniel 2:44.) Ci dong, Ker pa Lubanga biloko lobo-ni doko paradic mamwonya.​—Nen Lok me Giko Buk Man me 11.

LOBO MANYEN DONG COK!

15. “Lobo manyen[-ni]” obedo ngo?

¹⁵ Baibul ociko ni: “Watye ka kuro polo manyen ki lobo manyen, ka ma kit ma atir bedo iye.” (2 Petero 3:13; Icaya 65:17) I kine mukene ka Baibul oloko i kom “lobo,” nongo tye ka lok i kom dano ma gibedo iye. (Acakki 11:1) Pi meno, “lobo manyen” me kit ma atir-ri cung pi dano ducu ma gin luwiny bot Lubanga dok ma gibinongo mot ki bote.

16. Mot ango ma Lubanga bimiyone bot jo ma gibikwo i lobo manyen, dok ngo ma myero watim me nongo mot man?

¹⁶ Yecu ocikke ni jo ma gibibedo i lobo manyen pa Lubanga-ni gibinongo “kwo ma pe tum.” (Marako 10:30) Ngo ma myero watim wek wanong mot meno? Tim ber ikwan Jon 3:16 ki 17:3 wek inong lagamme. Kong dong wanenu gin ma Baibul waco i kom kit ma kwo bibedo kwede i Paradic.

17, 18. Wangeyo nining ni kuc ki piny ma okwe mot bibedo tye ka weng i lobo?

¹⁷ Tim maraco, lweny, turo cik, ki tim gero dong bibedo pe matwal. Jo maraco dong gibibedo pe i lobo. (Jabuli 37:10, 11) Lubanga ‘bijuko lweny woko i wi lobo ducu.’ (Jabuli 46:9; Icaya 2:4) Lobo bipong ki dano ma gimaro Lubanga dok giwinyo doge. Kuc bibedo tye nakanaka.​—Jabuli 72:7.

¹⁸ Jo pa Jehovah gibibedo i piny ma okwe mot. I kare me Baibul, ka jo Icrael gulubo cik pa Lubanga, ci onongo gibedo ma piny okwe mot pien en onongo gwokogi. (Lulevi 25:18, 19) I Paradic, pe wabilworo gin mo nyo ngat mo keken. Wabibedo ma piny okwe mot kare ducu!​—Kwan Icaya 32:18; Mika 4:4.

19. Pingo watwero bedo ki gen ni cam bicek mabup i lobo manyen pa Lubanga?

¹⁹ Cam bibedo tye mabup. “Cam bene myero ocek mabup i lobone, opong wa wi godi-gu woko ducu.” (Jabuli 72:16) Jehovah ‘Lubangawa bimiyowa gum,’ dok ‘lobo biceko cam mabup.’​—Jabuli 67:6.

20. Wangeyo nining ni lobo bidoko paradic?

²⁰ Lobo ducu bidoko paradic. Dano gibibedo ki odi kacel ki poti mamwonya. (Kwan Icaya 65:21-24; Niyabo 11:18.) Lobo ducu bibedo mwonya calo poto me Eden. Jehovah biminiwa jami ma wamito kare ducu. Baibul waco kit man i kom Lubanga: “In iyabo cingi, ci imiyo gin makwo ducu giyeng.”​—Jabuli 145:16.

21. Wangeyo nining ni kuc bibedo tye i kin dano ki lee?

²¹ Kuc bibedo tye i kin dano ki lee. Lee pe dong gibiwano dano. Lutino matino pe gibilworo kadi wa lee ma giger i kareni.​—Kwan Icaya 11:6-9; 65:25.

22. Ngo ma Yecu bitimone pi jo ma komgi lit?

²² Pe tye ngat mo kome bibedo lit. I kare ma Yecu onong tye i lobo, en ocango jo mapol. (Matayo 9:35; Marako 1:40-42; Jon 5:5-9) Ento, macalo Kabaka me Ker pa Lubanga, Yecu bicango dano ducu. Ngati mo pe dok biwacci: “An koma lit.”​—Icaya 33:24; 35:5, 6.

23. Ngo ma Lubanga bitimone pi jo ma guto?

²³ Jo muto gibikwo doki. Lubanga ocikke ni ebicero dano milion mapol ata ma dong guto woko. “Dano gibicer woko, jo ma kitgi atir wa ki jo ma kitgi pe atir.”​—Kwan Jon 5:28, 29; Tic pa Lukwena 24:15.

24. Iwinyo nining i kom bedo i Paradic?

²⁴ Wan ducu watye ki tam ma myero wamoki. Watwero yero me pwonyo lok i kom Jehovah kun watiyo pire, nyo watwero timo mere gin ma iwa mito. Ka wayero me tic pi Jehovah, ci wabibedo ki anyim mamwonya. Yecu owaco bot laco ma guto kacel kwede ni: “Wabibedo kwedi i Paradic.” (Luka 23:43) Kong dong wapwonyu lok i kom Yecu Kricito ki kit ma en bimiyo cikke pa Lubanga ducu cobbe kakare.