Kit ma Baibul Twero Konyowa Kwede me Nyuto Woro
“Dano myero gunyut woro wek kuc obed tye i lobo.”—UNESCO Declaration of Principles on Tolerance, 1995.
Ka dano pe ginyuto woro, ci man twero kelo adegadega i kingi. Dok ka dano gitye ki adegadega, gitwero cako waco lok maraco, nyuto cwiny me apokapoka, nyo gidoko lubwami.
Ento dano gitye ki neno mapat pat i kom ngo ma nyuto woro obedo. Jo mogo gitamo ni nyuto woro kwako ye gin mo keken ma jo mukene gitimo. Jo mukene gitye ki neno ma bene tye i Baibul ni ngat ma wor weko jo mukene gibedo agonya me moko tamgi pigi kengi i kom gin ma gimito kadi bed gin kikomgi pe gicwako tam meno.
Tika Baibul twero konyo dano me nyuto woro i karewa-ni?
Gin mumiyo Baibul cuko cwinywa me nyuto woro
Baibul cuko cwinywa me nyuto woro. Wacci: ‘Wek dano ducu gunge ni ibedo ngat ma niang.’ (Jo Pilipi 4:5) Baibul cuko cwinywa me tero jo mukene ki kica, woro, ki dong labongo apokapoka. Jo ma giketo tam man i tic i kare mukene nongo pe giye nyo gilubo tam pa jo mukene, ento giweko jo magi gibedo agonya me kwo i yo ma gimito.
Ento, Baibul nyuto ni Lubanga tye ki rwom me kit matir ma dano myero gulubi. Waco ni: “Rwot dong onyutti gin maber, in dano.” (Mika 6:8) Baibul tye ki tira ma Lubanga omiyo me konyo dano wek gubed ki kwo ma pud dong ber loyo.—Icaya 48:17, 18.
Lubanga pe ominiwa twero me ngolo kop i wi jo mukene. Ma lubbe ki Baibul, “Lami-cik ki langolkop tye acel . . . In anga mono ma ingolo kop i kom lawoti-ni?” (Yakobo 4:12) Lubanga oweko wan ducu ki acel acel watye agonya me moko tamwa piwa kenwa ma romo kelo adwogi maber nyo marac i komwa.—Nwoyo Cik 30:19.
Gin ma Baibul waco i kom nyuto woro
Baibul waco ni omyero ‘wawor dano ducu.’ (1 Petero 2:17) Pi meno, jo ma giyero me kwo ma lubbe ki cik me Baibul gitero dano ducu ki woro, labongo paro pi niyegi nyo kit me kwogi. (Luka 6:31) Man pe te lokke ni jo ma gilubo cik me Baibul giye tam ducu ma jo mukene gitye kwede nyo gicwako tam ducu ma jo mukene gimoko. Ma ka dok iye ki gero nyo i yo marac, gitute ki kerogi ducu me poro kit ma Yecu onongo tero kwede jo mukene.
Me labolle, nino mo acel, Yecu orwatte ki dako mo ma onongo tye i dini ma Yecu pe cwako. Dako man onongo bene tye ka bedo kacel ki laco mo ma onongo pe cware—yo me kwo ma onongo Yecu pe cwako. Kadi bed kumeno, en oloko ki dako man ki woro.—Jon 4:9, 17-24.
Calo Yecu, Lukricitayo gitye atera me tito pi niyegi bot jo ma gitye ki miti me winyone, ento gitimo ki ‘woro madit.’ (1 Petero 3:15) Baibul waco bot Lukricitayo ni pe gudii jo mukene me lubo tamgi. Waco ni lalub kor Kricito “myero obed ngat ma pe da atata, myero obed ngat ma lakica bot dano ducu,” kadi wa jo ma niyegi pat.—2 Temceo 2:24.
Gin ma Baibul waco i kom adegadega
Baibul wacciwa ni ‘waket tek me bedo ki kuc ki jo ducu.’ (Jo Ibru 12:14) Ngat ma keto tek me bedo ki kuc kwero bedo ki adegadega. Kadi bed en pe timo gin mo keken ma pe rwatte ki niyene, ento en tute matek me bedo kacel ki jo mukene ki kuc. (Matayo 5:9) Ki lok ada, Baibul bene cuko cwiny Lukricitayo me maro lumonegi kun gitero jo ma unogi i yo me kica.—Matayo 5:44.
Ada gire, Baibul waco ni Lubanga “dag” tim mogo ma pe nyuto woro bot dano nyo wano jo mukene. (Carolok 6:16-19) Ento, Baibul kany otiyo ki nyig lok ni “dag” me nyuto kit ma Lubanga winyo kwede kikome i kom tim maraco. Baibul nyuto ni Lubanga tye atera me timo kica ki dok me konyo dano ma gimito loko kwogi wek obed ma rwatte ki cikke.—Icaya 55:7.
Tyeng mogo me Baibul ma loko i kom nyuto woro
Tito 3:2: ‘Nyut woro bot dano ducu i kare ducu.’
Dano ma niang dok i tam mapat pat i yo me mwolo, dok weko dano bedo ki woro i kingi.
Matayo 7:12: “Kit gin ducu ma wumito ni dano gutim botwu, wun bene wutim botgi kit meno.”
Wan ducu wamaro ka jo mukene giterowa ki woro dok giparo kit ma wawinyo kwede ki kit ma waneno kwede jami. Me niang kit me lubo cik man ma Yecu opwonyo-ni, kwan pwony ma wiye tye ni “Cik ma Ngene Tutwal-li Obedo Ngo?”
Yocwa 24:15: “Tin dong wuyer ngat ma wubitiyo bote.”
Ka waworo twero ma jo mukene gitye kwede me moko tamgi pigi kengi, ci wadongo kuc.
Tic pa Lukwena 10:34: “Lubanga pe poko kin dano.”
Lubanga pe poko kin dano ma lubbe ki tekwaro, kono obedo laco nyo dako, lobo, rangi del kom, nyo kwo macon. Jo ma gimito lubo lanen pa Lubanga ginyuto woro bot dano ducu.
Kabakuk 1:12, 13: ‘Lubanga dag neno tim maraco.’
Diyo cwiny pa Lubanga tye ki wang coone. En pe biye ni tim maraco omedde pi naka. Me niang jami mapol, nen vidio ma wiye tye ni Pingo Lubanga Oweko ni Dano Oden Can?
Jo Roma 12:19: “Pe wucul kwor, ento wuwek kare ki kiniga pa Lubanga, pien yam gicoyo ni, “An aye ma abiculo kwor, abiculo wange lacen, man Rwot [Jehovah]a ma owaco.”
Lubanga Jehovah pe omiyo twero ki ngati mo keken me culo kwor. En bineno ni kingolo kop atir i kare ma en oyero. Me niang jami mapol, kwan pwony ma wiye tye ni “Tika Koko pi Ngolo Kop Atir Biwinye?”
a Jehovah aye nying Lubanga. (Jabuli 83:18, NWT) Kwan pwony ma wiye tye ni “Jehovah En Anga?”