PWONY ME 23

Batija Biweko Ibedo ki Anyim Mamwonya!

Kit ma Nen Kwede i Buk Kikome

Yecu opwonyo ni Lukricitayo myero gunong batija. (Kwan Matayo 28:19, 20.) Ento batija obedo gin ango? Dok ngo ma myero ngat moni otim wek onong batija?

1. Batija obedo gin ango?

Nyig lok man ni “batija” a ki i lok me leb Grik ma tyen lokke ni “luto” i pii. I kare ma kibatija Yecu, kilute i Kulu Jordan, “ci en okatti woko ki i pii.” (Matayo 3:13, 16) Calo Yecu, Lukricitayo me ada bene kibatijagi kun kiluto komgi kulu i pii.

2. Ngat moni nyuto gin ango ki nongo batija?

Ka ngat moni onongo batija, en nyuto ni etyeko dyero kwone bot Lubanga Jehovah. Ngat moni dyere bot Lubanga nining? Ma peya en onongo batija, i legane pire kene en tito bot Jehovah ni emito tic Pire pi naka. En cikke ni ebiworo Jehovah keken dok gin ma pire tek loyo i kwone bibedo timo miti pa Jehovah. En yero me ‘kwerre kekene ka dong medde ki lubo’ pwony pa Yecu kacel ki lanene. (Matayo 16:24) Dyerene ki nongo batija weko twere bote me bedo ki wat macok ki Jehovah kacel ki jo mukene ma giworo Jehovah.

3. Ngat moni twero dongo nio wa i batija nining?

Ma peya inongo batija, pire tek ni ipwony lok i kom Jehovah dok idong niye matek i kome. (Kwan Jo Ibru 11:6.) Ka ngecci ki niyeni woto ki dongo, marri pi Jehovah bene bimedde ki dongo. Labongo akalakala mo, man bitugo cwinyi me tito lok pa Lubanga ki me kwo ma lubbe ki rwomme me kit ma atir. (2 Temceo 4:2; 1 Jon 5:3) Ka dong ngat moni tye ka kwo ‘ma lubbe ki miti pa Jehovah wek eyom cwinye maber,’ en bibedo ki miti me dyero kwone bot Lubanga kacel ki nongo batija.—Jo Kolocai 1:9, 10.a

NONG NGEC MATUT

Nen kong gin ma watwero pwonyo ki i kit ma Baibul loko kwede i kom batija pa Yecu, ki dong kit ma ngat moni twero yubbe kwede pi yub ma pire tek man.

4. Ngo ma watwero pwonyo ki i kit ma Baibul loko kwede i kom batija pa Yecu?

Kwan Matayo 3:13-17 me pwonyo lok madok i kom batija pa Yecu. I nge meno wunyam lapeny magi:

Tika Yecu onongo obedo latin matidi i kare ma en onongo batija?
Kibatija en nining? Tika gionyo nyo gikiro pii akira i wiye?

Yecu ocako tic ma pire tek ma Lubanga omine i lobo kany i nge nongo batija. Kwan Luka 3:21-23 ki Jon 6:38, ci wunyam lapeny man:

I nge nongo batija, tic ango ma pire obedo tek loyo i kwo pa Yecu?

5. Batija obedo yub ma itwero cobone

Ka pud icako kwan acaka, tamo i kom dyere ki nongo batija twero nen calo gin ma pe iromo cobone. Ento, ka imedde ki pwonyo lok i kom Jehovah kun ingeye maber, ci ibibedo ki gen me moko tam ma pire tek man. Me neno jo mogo ma gutimo meno, tuk VIDIO.

VIDIO: Kit me Doko Larem Jehovah (1:11)

Kwan Jon 17:3 ki Yakobo 1:5, ci wunyam lapeny man:

Gin ango ma twero konyo ngat moni me yubbe pi batija?

A. Dako ma tye ka lega me dyero kwone bot Lubanga.

B. Dako acel-li tye ka nongo batija macalo Lacaden pa Jehovah kun kilute i pii.

Wadyere bot Jehovah ki tite i lega ni wamito tic pire nakanaka
Batijawa nyuto bot jo mukene ni wadyere bot Lubanga

6. Ka wanongo batija, wadoko jo me ot pa Jehovah

Ka wanongo batija, wadonyo i kin jo me ot ma gunote dok ginonge i twok lobo-ni ducu. Kadi bed waa ki i tekwaro nyo kabedo mapatpat, wan ducu walubo rwom me kwo ma nonge i Baibul. Kwan Jabuli 25:14 ki 1 Petero 2:17, ci wunyam lapeny man:

Wat pa ngat moni ki Jehovah kacel ki luye luwote bibedo nining i nge nongo batija?

Cal ma kiribogi kacel: Lamego ma onongo batija tye ki yomcwiny ka woto ki tam i kom wat maber ma en tye kwede ki jo mukene me kacokke. 1. En tye ka lok ki lamego. 2. En tye ka konyo lamego mo mutii me wot. 3. En tye ka cam kacel ki lureme ma mwakagi patpat. 4. En tye ka tito kwena bot laco mo ki kony pa lamego mukene. 5. En tye ka mako cal kacel ki lumege aryo ma rangi del komgi patpat i gure madit.

JO MOGO GIWACO NI: “An pud pe atye atera me nongo batija.”

Ka meno aye kit ma iwinyo kwede, ci tika pud itamo ni meno obedo yub ma imito cobone?

WOT WIYE WIYE

Yecu opwonyo ni Lukricitayo omyero gunong batija. Ma ngat moni peya onongo batija, en myero odong niye matek i kom Jehovah, obed ka kwo ma lubbe ki rwom pa Lubanga me kit matir, dok odyere Bote.

Ngo ma ipwonyo?

Batija obedo gin ango, dok pingo pire tek?
Dyere kubbe ki batija nining?
Ngo ma ngat moni myero otim wek obed mupore me dyero kwone ki nongo batija?

Atyeko pwony man i nino dwe

Gin me atima

Kwan jami ma omyero itim ma kiryeyogi i agikki me Bute me 4, “Tika Atye Atera me Tito Kwena Kacel ki Kacokke?” ki “Tika Atye Atera me Nongo Batija?,” wek inen kit ma itwero bedo ma ipore me nongo batija.

Gin mukene me atima:

Your other goal

TIM KWED

Pwony gin ma batija obedo ki gin ma pe obedo.

“Batija Obedo Gin Ango?” (Pwony ma tye i jw.org)

Nen kong jami mogo ma dano myero otim wek odong nio wa i batija.

“Mar ki Pwoc pi Jehovah Bitugo Cwinyi me Nongo Batija” (Wi Lubele, Marci 2020)

Nen kong gin ma otugo cwiny laco mo me nongo batija.

“Onongo Gimito ni Amok Gin ma Baibul Pwonyo An Kikoma” (Wi Lubele, Febuari 1, 2013)

Nen kong pingo batija obedo yub ma pire tek ki kit ma itwero yubbe kwede pire.

“Tika Omyero Anong Batija?” (Buk me Questions Young People Ask—Answers That Work, Volume 2, dul me 37)

a Ka ngat moni yam con onongo batija i dini mukene, ci bimitte ni en onong batija doki macalo Lacaden pa Jehovah. Pingo? Pien dini meno onongo pe pwonyo lok ada ma tye i Baibul. Wek waribbe i niye acel me ada, mitte ni wanong batija acel me ada.—Nen Tic pa Lukwena 19:1-5, Jo Epeco 4:5 ki Pwony me 13.