PWONY ME 32

Ker pa Lubanga Dong Tye ka Loc!

Kit ma Nen Kwede i Buk Kikome

Ker pa Lubanga ocako loc i polo i mwaka 1914. I mwaka meno aye bene kare me agikki me loc pa dano ocakke iye. Wangeyo man nining? Wabineno gin ma Baibul otito con, ki dok jami ma tye ka timme i wi lobo i kare-ni ki kit pa dano nicakke i mwaka 1914.

1. Gin ango ma lok pa lunebi nyuto?

Ki i buk pa lanebi Daniel, wangeyo ni Ker pa Lubanga onongo bicako loc i agikki me kare ma kilwongo i Baibul ni “mwaka abiro.” (Daniel 4:16, 17) I nge mwaki miya mapol, Yecu olwongo kare meno ni “kare pa Lurok,” dok en opwonyo ni kare meno onongo peya otum. (Luka 21:24) Kit ma wabineno kwede, mwaka abiro meno otum i mwaka 1914.

2. Gin ango ma tye ka timme i wi lobo dok kit pa dano tye nining nicakke i mwaka 1914?

Lupwonnye pa Yecu gupenye ni: “Lok man bitimme awene, dok kit gin ango ma binyuto dwogoni, ki agikki piny?” (Matayo 24:3) Me gamo lapenygi, Yecu otito jami mapol ma onongo bitimme i nge cako locce macalo Kabaka me Ker pa Lubanga. I kin jami magi onongo tye iye lweny, kec, ki oyengyeng. (Kwan Matayo 24:7.) Baibul bene otito ni kit pa dano “i kare me agikki” biweko “piny bibedo marac.” (2 Temceo 3:1-5) Lanyut ma Yecu oloko iye-ni ki kit pa dano dong onen woko ka maleng nicakke i mwaka 1914.

3. Pingo piny oballe adada nicakke i kare ma Ker pa Lubanga ocako loc?

Cutcut ma Yecu odoko Kabaka me Ker pa Lubanga, en ocako lweny i kom Catan ki jogine ki i polo. Kiloyo Catan woko i lweny meno. Baibul waco ni “gibole woko piny i ngom kacel ki lumalaikane.” (Niyabo 12:9, 10, 12) Catan tye ki akemo madwong pien en ngeyo ni kibineke woko ma pe orii. Pi meno, en tye ka kelo can ki arem madwong adada i wi lobo-ni. Meno aye tyen lok mumiyo piny tye marac adada i wi lobo ducu! Ker pa Lubanga bicobo pekki magi ducu.

NONG NGEC MATUT

Nen tyen lok mumiyo wangeyo ni Ker-ri ocako loc i mwaka 1914. Nen bene kit ma watwero nyuto kwede ni waye ni Ker-ri dong tye ka loc.

4. Lok pa lunebi me Baibul nyuto ni Ker-ri ocako loc i mwaka 1914

Tuk VIDIO.

Ker pa Lubanga Ocako Loc i 1914 (5:02)

Lubanga oweko Kabaka Nebukadnejar me Babilon oleko lek dok i lek man Lubanga onyutte gin ma bitimme i anyim. Wakwano lok i kom lek meno ki kit ma Daniel ogonyo kwede tere i Baibul. Nen ka maleng ni lek meno onongo bicobbe i kom ker pa Nebukadnejar ki bene i kom Ker pa Lubanga.—Kwan Daniel 4:17.a

Kwan Daniel 4:20-26, ci wuti ki chart ma tye me gamo lapeny magi:

(A) Gin ango ma Nebukadnejar oneno i wang lekke?—Nen tyeng me 20 ki 21.
(B) Ngo ma onongo bitimme i kom yat-ti?—Nen tyeng 23.
(C) Gin ango ma onongo bitimme i nge “mwaka abiro”?—Nen tyeng me 26.

Kit ma Lek Madok i Kom Yat-ti Kubbe ki Ker pa Lubanga

LOK PA LANEBI (Daniel 4:20-36)

Loc

(A) Yat mabor dok madit

Loc ogik

(B) “Tong yat meno” wek obed “nio wang ma mwaka abiro okato”

Ajut yat ma kitweyo ki rubota nyonyo ki mola.

Kidwoko loc cen

(C) “Ker bibedo meri matwal”

Cobbene mukwongo . . .

(D) Yat-ti onongo cung pi anga? —Nen tyeng 22.
(E) Locce ogik nining? —Kwan Daniel 4:29-33.
(F) Gin ango ma otimme i kom Nebukadnejar i agikki me “mwaka abiro”? —Kwan Daniel 4:34-36.

COBBENE MUKWONGO

Loc

(D) Nebukadnejar, Kabaka me Babilon

Kabaka Nebukadnejar odolo cinge i kore ki awaka madit.

Loc ogik

(E) I nge mwaka 606 K.M.P., Nebukadnejar odoko lapoya dok onongo pe twero loc pi mwaki abiro

Nebukadnejar tye obuto i dye lum kun camo lum calo lee.

Kidwoko loc cen

(F) Wi Nebukadnejar ocako tic maber ci en ocako loc odoco

Kabaka Nebukadnejar ocung ma oilo cinge malo.

Cobbene me aryo . . .

(G) Yat-ti onongo cung pi angagi? —Kwan 1 Tekwaro 29:23.
(H) Locgi ogik nining? Wangeyo nining ni onongo pud pe gitye ka loc i kare ma Yecu tye i lobo? —Kwan Luka 21:24.
(I) Kidwoko loc man cen awene dok ki kwene?

COBBENE ME ARYO

Loc

(G) Luker me Icrael ma onongo giloyo loc me kaka Lubanga

Luker mapatpat me Icrael ma gubedo i wi kom ker kun ngat man lubo lawote. Dero tye ka ryeny i komgi kun a ki i polo.

Loc ogik

(H) Kijwero Jerucalem, ci loc pa luker me Icrael ogik woko pi mwaki 2,520

Mac ma tye ka wango boma me Jerucalem i mwaka 607 K.M.P. I ngeye, mwaki 2,520 okato.

Kidwoko loc cen

(I) Yecu ocako loc i polo macalo Kabaka me Ker pa Lubanga

Yecu tye ka loyo lobo kun obedo i wi kom kerre i polo nicakke i mwaka 1914 K.M. Dero tye ka ryeny kun a ki bote.

Mwaka abiro-ni onongo bor lakwene?

But Baibul mogo konyowa me niang bute mukene. Me labolle, buk me Niyabo waco ni mwaka adek ki nucu rom ki nino 1,260. (Niyabo 12:6, 14) Mwaka abiro dodo meno kiryo, nyo bedo nino 2,520. Baibul kare mogo tiyo ki nyig lok man ni “nino” me cung pi mwaka. (Ejekiel 4:6) Pi meno, mwaka abiro ma kiloko iye i buk pa Daniel-ni orii pi mwaki 2,520.

5. Lobo olokke woko nicakke i mwaka 1914

Tuk VIDIO.

VIDIO: Lobo Olokke Woko Nicakke i Mwaka 1914 (1:10)

Yecu otito kit ma lobo-ni bibedo kwede ka en ocako loc macalo Kabaka. Kwan Luka 21:9-11, ci wunyam lapeny man:

Jami mene ki i kin ma kititogi-ni ma dong ineno ki wangi nyo iwinyo pire?

Lakwena Paulo oloko i kom kit pa dano ma i kare me agikki. Kwan 2 Temceo 3:1-5, ci wunyam lapeny man:

Tika dong ineno dano gitimme kit meno i kare-ni?

Cal ma kiribogi kacel: Cal ma nyuto jami ma tye ka timme i kare me agikki. 1. Ladit wi mony ocung i wi abam dok tye ka dange kun oilo cinge. 2. Odi ma gupoto piny i nge oyengyeng. 3. Dege lweny. 4. Lwak ma guruko labo um gitye ka wot i yo. 5. Odi me Twin Towers i boma me New York gitye ka wang i kare ma lutim aranyi gucelo. 6. Laco ma tye ka tucce ki yadi calo jayigi-ni. 7. Laco ma tye ka dange i wi dakone dok mito dongone. 8. Yadi ki kongo mapatpat. 9. Mon aryo ma guruko bongi, gingut ki gin cing ma welgi tego gitye ka mako calgi kekengi. 10. DJ ma tye ka tuko wer pi lwak i show. 11. Lajemo mo tye ka bayo bom ayuba.

6. Nyut ni itye ki niye ni Ker-ri dong tye ka loc

Kwan Matayo 24:3, 14, ci wunyam lapeny magi:

Tic ma pire tek ango ma kitye ka timone ma nyuto ni Ker pa Lubanga dong tye ka loc?
Itwero nywako i tic man nining?

Ker pa Lubanga tye ka loc, dok nino ma Ker-ri biloyo kwede lobo dong cok. Kwan Jo Ibru 10:24, 25, ci wunyam lapeny man:

Gin ango ma omyero wan ducu ki acel acel watim ‘kit macalo waneno nino maca dong tye ka nyiko cok-ki’?

Cal ma kiribogi kacel: 1. Latin kwan me Baibul ma obino i cokke pa Lucaden pa Jehovah. 2. Latin kwan acel-li tye ka tito kwena bot ngat mo ma en ngeyo. — Ka ipwonyo gin mo ma twero laro kwo pa jo mukene, man myero otug cwinyi me timo gin ango?

NGAT MO ROMO PENYI NI: “Pingo Lucaden pa Jehovah giwaco ni mwaka 1914 pire tek adada?”

In iromo gamone ningo?

WOT WIYE WIYE

Lok pa lunebi me Baibul ki jami ma tye ka timme i lobo moko ni Ker pa Lubanga dong tye ka loc. Wanyuto ni waye lok man ka watito bot jo mukene dok wabedo tye i cokke kare ducu.