PWONY ME 34
Watwero Nyuto Marwa pi Jehovah Nining?
In mono imaro Lubanga i kare-ni makato kit ma onongo imare kwede i kare ma icako kwano Baibul acaka? Tika imito medde ki jingo watti kwede? Ka tye kit meno, ci wi opo ni ka Jehovah woto ki neno mari pire dongo, ci en bimedde ki mari kacel ki gwoki. Itwero nyutte nining ni imare?
1. I yo ma nining ma watwero nyuto ki Jehovah ni wamare?
Wanyuto marwa pi Jehovah ki bedo luwiny bote. (Kwan 1 Jon 5:3.) En pe diyo ngat mo keken me bedo lawiny. Me kaka meno, en miyo ki ngat acel acel kare me yero ka ebibedo lawiny bote nyo pe. Pingo? Jehovah mito ni ‘wabed luwiny ki cwinywa ducu.’ (Jo Roma 6:17) Meno tyen lokke ni, en mito ni ibed lawiny pe ni pien kitye ka diyi adiya, ento pien ni imare. Bute me 3 ki 4 me buk man kiyubo me konyi me nyuto marri pi Jehovah ki timo jami ma yomo cwinye kun igwokke ki timo jami ma cwero cwinye.
2. Ngo ma romo weko bedo tek me nyuto marwa pi Jehovah?
“Dano ma kite atir limo can madwong.” (Jabuli 34:19) Wan ducu wayelle ki gorowa. Medo i kom meno, watwero kato ki i peko me can lim ki pekki mukene nyo kiromo terowa marac. Ka watye ka kato ki i peko, watwero nongo ni pe yot me timo gin ma Jehovah mito. Tye kit meno pien wanongo ni timo gin ma pe tye atir yot. Ento ka itimo gin ma Jehovah mito, inyuto bote ni imare makato gin mo nyo ngat mo keken. Dok inyuto ni in lagen bote. En bene bibedo lagen boti. Dok en pe biweki matwal.—Kwan Jabuli 18:25.
NONG NGEC MATUT
Nen pingo cwiny Jehovah bedo yom ka ibedo lawiny bote, dok ipwony jami ma twero konyi me medde ki bedo lawiny.
3. Catan okelo adot i komi
Ma lubbe ki buk pa Yubu ma tye i Baibul, Catan okelo adot, pe i kom laco ma nyinge Yubu keken ento i kom dano ducu ma gimito tic pi Jehovah. Kwan Yubu 1:1, 6–2:10, ci wunyam lapeny magi:
Ma lubbe ki lok pa Catan, Yubu onongo tye lawiny bot Jehovah pingo?—Nen Yubu 1:9-11.
Catan omoro adot ango i kom dano ducu, kadi wa in bene?—Nen Yubu 2:4.
Kwan Yubu 23:11-12, ci wunyam lapeny man:
Yubu onyuto nining ni ada emaro Jehovah?
Yubu omedde ki nyuto marre pi Jehovah ki bedo lagen bote
Wanyuto marwa pi Jehovah ka wamedde ki bedo lugen bote
4. Wek cwiny Jehovah obed yom
Kwan Carolok 27:11, ci wunyam lapeny magi:
Jehovah winyo nining ka inyuto ryeko dok ibedo lawiny bote? Pingo?
5. Itwero bedo lagen bot Jehovah
Marwa pi Jehovah tugo cwinywa me tito lok i kome bot jo mukene. Ka watye lugen bot Jehovah, wamedde ki tito kwena kadi bed timo meno pe yot. Tuk VIDIO, ci wunyam lapeny ma lubo.
Tika i kare mogo inongo ni tek me tito lok i kom Jehovah bot jo mukene?
I vidio man, gin ango ma okonyo George me loyo lworone?
Bedo lagen bot Jehovah doko yot ka wamaro jami ma en maro dok wadag jami ma en dagi. Kwan Amoc 5:15, ci wunyam lapeny magi:
Ma lubbe ki jami ma dong ipwonyo, jami mene ma Jehovah maro? Tit kong jami mogo ma en dagi.
Itwero pwonnye nining me maro gin maber kun ikwero gin marac?
6. Wanongo adwogi maber ka wabedo luwiny bot Jehovah
Bedo lawiny bot Jehovah keliwa adwogi maber kare ducu. Kwan Icaya 48:17, 18, ci wunyam lapeny magi:
Tika itamo ni watwero geno ni Jehovah kare ducu ngeyo gin maber loyo piwa? Pingo?
Adwogi maber ango ma in dong inongo nicakke i kare ma icako kwano Baibul ki ngeyo Lubanga Jehovah?
JO MOGO GIWACO NI: “Jami ma atimo pe twero yomo nyo cwero cwiny Lubanga i yo mo.”
Ginacoya mene ma itwero tic kwede me nyuto ni jami ma watimo twero yomo nyo cwero cwiny Jehovah?
WOT WIYE WIYE
Itwero nyuto mari pi Jehovah ki bedo lawiny bote ki dok ka imedde ki bedo lagen kadi itye ka kato ki i ariya mapatpat.
Ngo ma ipwonyo?
Gin ango ma ipwonyo ki i labol pa Yubu?
Ibinyuto mari pi Jehovah nining?
Ngo ma bikonyi me medde ki bedo lagen bot Jehovah?
TIM KWED
Pwony kit ma itwero bedo kwede lagen bot Jehovah kacel ki kacokke.
Pwony lok madok i kom adot ma Catan okelo i kom dano.
“Yubu Ogwoko Genene” (The Bible—What Is Its Message? bute me 6)
Nen kit ma jo matino gitwero nyuto kwede margi pi Jehovah.
Bulu ma tye ka nongo lyeto ki bot luwote twero medde ki bedo lagen bot Lubanga nining?