LAPENY MA KIGAMO ME BAIBUL

Tika twere me niang Baibul?

Baibul obedo Lok pa Lubanga. Tye calo waraga mua ki bot wego ma lamar. (2 Temceo 3:16) I Baibul, Lubanga otito kit ma watwero yomo kwede cwinye, pingo eweko jami maraco timme, ki dok gin ma ebitimo pi dano i anyim. Ento lupwonye dini gunyweno pwony me Baibul woko; macalo adwogine, man oweko jo mapol gitamo ni pe giromo niang Baibul wacel.​—Tic pa Lukwena 20:29, 30.

Lubanga Jehovah mito ni wange lok ada madok i kome. Pi meno, en ominiwa buk ma watwero niang.​—Kwan 1 Temceo 2:3, 4.

In itwero niang Baibul nining?

Medo i kom miniwa Baibul, Jehovah pud konyowa me niang iye. En ooro Yecu me pwonyowa. (Luka 4:16-21) Yecu okonyo jo ma winye me niang Ginacoya, kun loko i kom tyeng mapol.​—Kwan Luka 24:27, 32, 45.

Yecu ocako kacokke pa Lukricitayo wek tic ma ecako-ni omedde anyim. (Matayo 28:19, 20) I kare-ni, lulub kor Yecu ma gin lugen gitye ka konyo dano me niang gin ma Baibul pwonyo madok i kom Lubanga. Ka imito niang Baibul, Lucaden pa Jehovah cwinygi bibedo yom me konyi.​—Kwan Tic pa Lukwena 8:30, 31.