Peko ma Poto Atura Tika Ginyuto ni Lubanga Cwinye Col?

GIN MA DANO GIWACO: “Lubanga cwinye col pien en aye loyo lobo, ma nyutti peko ducu ma poto atura en aye kelo.”

GIN MA BAIBUL WACO: “Lobo ducu tye i te loc pa Larac.” (1 Jon 5:19) ‘Larac-ci’ obedo anga? Baibul wacci en aye Catan. (Matayo 13:19; Marako 4:15) Tika omyero waye lok man? Tam kong i kom lok man: Ka lobo tye i te loc pa Catan, ma nyutti en doro dano wek gubed luworo me jami ki dok gubed ki neno macek calo en. Man mono en aye pe gin mumiyo dano gitye ka balo kabedo murumowa-ni? Ludiro mapol gipoyo wiwa ni balo kabedo murumowa tye i kin jami mumiyo peko ma poto atura tye ka timme, ki dok woto ki medde ameda, nyo weko kare bedo kere bot dano me deno can.

Pi meno, pingo Lubanga oye ni Catan obed ki twero madit kuman? Man otimme i kare ma lunyodowa mukwongo gujemo i kom Lubanga ni pe obed Lalocgi. Pol pa dano guyero me lubo en yo acel-li nicakke wa kare meno. Pien dano gukwero loc pa Lubanga, man oweko gitye i te loc pa Catan, lamone pa Lubanga. Pi meno, Yecu olwongo Catan ni “lalo lobo man.” (Jon 14:30) Catan tika biloyo lobo-ni pi naka? Pe!

Cwiny Jehovaha cwer ka en neno peko ma Catan tye ka kelo i kom dano. Ki lok ada, Lubanga cwinye cwer adada pi can ma dano gitye ka denone. Me lapore, ma lubbe ki kwo matek ma Luicrael guwok ki iye, Baibul loko i kom Lubanga ni: “I cangi ducu en bene oneno iye can.” (Icaya 63:9) Pi kicane, Lubanga oketo yub me giko loc pa Catan woko dok man bitimme cokcok-ki! En ocimo Wode Yecu Kricito me bedo Kabaka ma kite atir dok bingolo kop atir pi naka.

KIT MA MAN GUDI KWEDE: Kadi bed ni loc pa Catan pe ogwoko dano ki i peko ma poto atura, ento loc pa Yecu bigwokowa. Con, Yecu ogwoko lupwonnyene i kare ma yamo madwong ocako kodo. Baibul wacciwa ni: “En . . . ojuko yamo, owaco ki nam ni, ‘Ling, pye mot.’ Yamo ocako kwe, nam oling mot.” Lupwonnyene gupenye kekengi ni: “Man anga kaa, ma yamo ki nam giwinye-ni?” (Marako 4:37-41) Gin man mutimme-ni miniwa gen ni Yecu bigwoko dano weng ma luwiny i kare me locce calo Kabaka.​—Daniel 7:13, 14.

[Lok ma tye piny]