Buk me Acakki tito kit ma polo ki lobo gucakke kwede kun wacci: “I acakki piny Lubanga oketo polo ki lobo.” (Acakki 1:1) I nge cweyo ginapita ki lee, Lubanga ocweyo dano mukwongo, Adam gin ki Kawa. Gin onongo dok gipat ki lee pien dano kicweyogi ki kit pa Lubanga calo mar, kwo ma atir, yomcwiny medo kadiwa bedo agonya me moko tamwa piwa kenwa. Pi meno, gin onongo gibimiyo lagam pi jami ma gutimo. Ka onongo gulubo cik pa Lubanga, kono onongo gudoko lunyodo pa dano ducu ma i lobo ma gitye ki kuc ki kwo ma labed naka.
Ento, lamalaika mo acel otiyo ki kare man me tic ki dano wek gucob mitine. Pi meno, en odoko Catan, ma te lokke ni “Lajemo.” Catan otiyo ki twol me bwolo Kawa kun wacce ni kwone bibedo maber labongo tira pa Lubanga. Adam gin ki Kawa gulubo lok pa Catan ci gubalo watgi ki Lacwecgi. Pi tam marac ma gumoko-ni, lunyodowa mukwongo gurwenyo kwo ma pe tum ci gunywalowa ki bal ma kelo to.
Cutcut, Lubanga otito pi yubbe me cobo peko man ki dok me yabo yo bot likwayo pa Adam me nongo kwo ma pe tum. Lubanga otito ni ‘lakwaro’ mo ma pire tek bineko Catan, ki dok jwayo peko ducu ma Catan, Adam, ki dong Kawa gukelo. (Acakki 3:15) ‘Lakwaro’ meno onongo bibedo anga? Onongo kibingeyone lacen.
Nicakke i kare meno, Catan tye ka temme me balo yub pa Lubanga. Jo maraco onongo gunya mapol adada. Lubanga omoko tamme me tyeko jo maraco i pii aluka. En ociko Nua ni opa yeya mo madit adada me laro en ki lupacone, kacel ki lee ma kicike ni otergi i yeya.
I nge mwaka acel ma Pii Aluka odwon kwede, Nua kacel ki lupacone gukatti woko ki i yeya i lobo ma gilonyo maleng. Ento ‘lakwaro’ ma kiciko pire-ni onongo peya obino.
—Jenge i Acakki cura 1-11; Juda 6, 14, 15; Niyabo 12:9.
