Tika Lucaden pa Jehovah Giye i kom Yecu?

BEDO KI NIYE I KOM YECU PIRE TEK

Anthony: Itye nining Tim? Cwinya yom me rwatte kwedi doki.

Tim: An bene cwinya yom tutwal.

Anthony: Akeli Wi Lubele ki Awake! ma pud gukati nyen. Atamo ni pwony ma i magajin magi biyomo cwinyi adada.

Tim: Apwoyo tutwal. Atye ki pwoc madit ni tin ibino pien tye gin mo ma amito penyi kwede.

Anthony: Ayela pe, ngo ma imito penyone

Tim: Nino ca abedo ka lok ki latic lawota mo acel. Atitte pi bukke ma imina-ni ki dok kit ma kwanogi mit kwede. Ento en owacca ni pe myero akwangi pien Lucaden pa Jehovah pe giye i kom Yecu. Meno mono lok ada? Awaco bot latic lawota-ni ni abipenyi ka ce idwogo.

Anthony: Cwinya yom ni ipenya. Ber tutwal ni ipenyo Lacaden pa Jehovah ento pe ngat mukene. Pien ka imito ngeyo gin ma ngat moni ye iye, ci omyero ipeny en ngat meno kikome.

Tim: Meno aye gin ma atamo.

Anthony: Lok ada tye ni Lucaden pa Jehovah giye i kom Yecu. Ki lok ada, waye ni omyero wabed ki niye i kom Yecu wek wanong larre.

Tim: Onongo atamo ni wuye, ento i kare ma latic lwaota-ni owacci wun pe wuye i kom Yecu, lokke okelo lapeny mapol i wiya. Ageno ni pud peya wanyamo lok meno.

Anthony: Ka imito, aromo nyutti tyeng mogo ma nyuto kit ma pire tek kwede me bedo ki niye i kom Yecu. Magi aye tyeng mogo ma Lucaden pa Jehovah gitiyo kwede i ticgi me pwony.

Tim: Medde anyim.

Anthony: Ka maber ma waromo cakone ki iye aye lok ma Yecu owaco i Jon 14:6. Man obedo but lok ma Yecu owaco i kare ma tye ka lok ki lakwenane acel. Wakwano ni: “Yecu odokke iye ni, ‘An a yo, ki ada, ki kwo: pe tye ngat mo ma bino bot Won, kono ki i an keken.’” Ma lubbe ki tyeng man, yo mene keken ma watwero oo kwede bot Won?

Tim: Omyero wawok ki bot Yecu.

Anthony: Igamo kakare. Meno gin ma Lucaden pa Jehovah giye ki cwinygi ducu. Wek kong apenyi: Itamo ni Lubanga mito ni dano gulegi i nying anga?

Tim: I nying Yecu.

Anthony: Meno lok ada. Dok man aye gin mumiyo an alego i nying Yecu. Lucaden pa Jehovah ducu bene gilego i nying Yecu.

Tim: Cwinya yom me ngeyone.

Anthony: Wang Baibul mukene ma waromo nenone aye Jon 3:16. Tyeng man pire tek adada mumiyo kilwongo ni pen lok me Jiri. Man te lokke ni tyeng meno dolo te lok ducu ma kicoyo madok i kom kwo pa Yecu kacel ki ticce me pwony i kare ma en pud tye i lobo. Kwan tyeng man kong.

Tim: Ayela pe. Waco ni: “Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”

Anthony: Apwoyo. Tika onongo ingeyo tyeng man?

Tim: Ee, awinyo tyen mapol i ot lega.

Anthony: Man obedo tyeng ma ngene adada. Ka ineno mot, kany Yecu owaco ni. En owaco ni mar pa Lubanga yabo yo bot dano me nongo kwo ma pe tum​—ento omyero kong watim gin ango?

Tim: Omyero wabed ki niye.

Anthony: Kakare. Bedo ki niye i kom Wod acel keken ma Lubanga ocweyo en kikome, Yecu Kricito. Ki dok lok man ni bedo ki niye i kom Yecu yabiwa yo me nongo kwo ma pe tum-mi tye kicoyo i pot karatac 2 i magajin man ma akelo boti-ni. Ma lubbe ki tyen lok me coyo Wi Lubele, kiwaco ni magajin man “dongo niye i kom Yecu Kricito, ma oto wek wanong kwo ma pe tum dok ma kombeddi dong tye ka loc calo Kabaka me Ker pa Lubanga.”

Tim: Meno iloko kakare. Pien magajin ma imako-ni moko atir ni Lucaden pa Jehovah giye i kom Yecu.

Anthony: Kakare.

Tim: Ci dong, pingo dano giwaco ni pe wuye i kom Yecu?

Anthony: Twero bedo ni tye tyen lok mapol mumiyo dano giwaco kumeno. I kine mogo, dano giwaco pien ni nongo guwinyo ki bot jo mukene. Nyo oromo bedo ni lupwonye dinigi aye opwonyogi.

Tim: Atye ka tamone ni jo mogo giwacci wun pe wuye i kom Yecu pien ni wun wulwonge ni Lucaden pa Jehovah ento pe Lucaden pa Yecu.

Anthony: Meno bene romo bedo tyen lok mukene.

Tim: Pingo wun wuloko tutwal i kom Jehovah?

“AMIYO NYINGI ONGENE”

Anthony: Me acel, wan waye ni tic ki nying Lubanga, Jehovah pire tek adada​—kit macalo Wode Yecu bene otiyo kwede-ni. Nen kong gin ma Yecu owaco i lega bot Wonne. Lega man kicoyo i Jon 17:6. Iromo kwanone?

Tim: Ayela pe. “Amiyo nyingi ongene botgi, dok abimiyo ngene, wek mar ma imara kwede obed i gin, ki an i igi.”

Anthony: Apwoyo. Ka ineno, Yecu owacci eweko nying Lubanga ongene. Pingo itamo ni en otimo meno?

Tim: Pe angeyo ba.

Anthony: Waromo neno ginacoya mukene ma twero konyowa me niang lok man maber. Atye ka tamo pi Tic pa Lukwena 2:21. Wakwano ni: “Jo ducu ma gilwongo nying Jehovah gibilarogi, NW.” Angeyo ni in bene iye ni ka lwongo nying Jehovah pire tek wek wanong larre, ci labongo akalakala Yecu onongo ngeyo.

Tim: Ngene kene gire.

Anthony: Yecu oneno ni pire tek ni lulub kore gunge dok guti ki nying Lubanga wek gunong larre. Dok man tye i kin lok ma pigi tego mumiyo waloko i kom Jehovah adada. Wanongo ni pire tek pi wan me weko nying Lubanga ongene ki dok me konyo jo mukene wek gulwong nyinge.

Tim: Kadi bed ni dano pe gingeyo nying Lubanga nyo bene pe gitiyo kwede, ento pud nongo gingeyo ngat ma gitye ka lok i kome ka guloko i kom Lubanga.

Anthony: Meno romo bedo lok ada. Ento kadi bed kumeno, kit macalo Lubanga otitiwa nyinge-ni, dong yot botwa me nyikke cok bote.

Tim: Peya aniang lokki. Ngo ma itye ka wacone?

Anthony: Ket kong kuman: Pe mitte ni onongo myero wange nying Moses. Onongo waromo ngeye macalo ngat ma opoko i Nam Makwar nyo ma ogamo Cik Apar ki bot Lubanga. Meno bene rom aroma ki Nua​—pingo omyero wange nyinge? Onongo kiromo lwonge ni laco ma opayo yeya ci olaro jo me ode kacel ki lee mapol. Kadi wa Yecu bene onongo kiromo ngeye macalo ngat ma oa ki i polo dok bene oto pi balwa, pe kumeno?

Tim: Kakare.

Anthony: Ento Lubanga oneno ni wangeyo nying jo magi. Ngeyo nyinggi konyowa pe me tero lok komgi calo ododo mo ata. Kadi bed ni peya warwatte ki Moses, Nua, nyo Yecu, ento ngeyo nyinggi konyowa me nenogi macalo dano adana.

Tim: Onongo peya aneno i yo ma kumeno, ento tam meno rwatte gire!

Anthony: Meno aye tyen lok mukene mumiyo Lucaden pa Jehovah gitiyo ki nying Lubanga tutwal. Wamito ni dano gudong niye i kom Lubanga macalo dano adana, Ngat ma giromo nyikke cok bote. Ki bene, watero gin ma Yecu otimo ma weko wanong larre macalo gin ma pire tek. Kong dong wakwan wang Baibul acel wek waniang lok man.

Tim: Ayela pe.

Anthony: Con kong wakwano Jon 14:6. Po ni Yecu owaco ni en aye “yo, ki ada, ki kwo.” Kong wadok cen wek wakwan lokke i Jon 14:1. Iromo kwano lok pa Yecu i agikki me tyeng man?

Tim: Tyengi wacci: “Wuye Lubanga, wuye an bene.”

Anthony: Apwoyo. Man mono obedo pyem i kin yero bedo ki niye i kom Yecu nyo Jehovah?

Tim: Pe. Yecu owaco ni omyero wanyut niye i kom gin aryo weng.

Anthony: Igamo kakare. Dok ageno ni iye ni pe omyero wawac awaca ni watye ki niye i kom Lubanga ki Yecu. Ki lok ada, kit ma wakwo kwede myero omok lok meno.

Tim: Meno tye kakare.

Anthony: Ento ngat moni romo nyutone nining ni etye ki niye i kom Lubanga ki Yecu? Waromo nyamo lapeny man lacen.a

Tim: Meno bibedo ber adada.