Bed ki Niye Matek ni Ker-ri Bicobo Yub pa Lubanga
“Niye aye ma moko gin ma dano geno.”—IBRU 11:1.
1, 2. (a) Gin ango ma bijingo niyewa ni Ker-ri bicobo yub ma Lubanga tye kwede pi dano? (b) Ma lubbe ki Jo Epeco 2:12, gicikke mapat pat-ti gijingo niyewa nining? (Nen cal ma tye i pot karatac man)
MACALO Lucaden pa Jehovah, pol kare watito ni Ker pa Lubanga keken aye bicobo pekkiwa ducu, dok wanyuto ki mit kom bot dano lok ada man ma tye i Ginacoya-ni. Gen ma watye kwede i kom Ker-ri kweyo cwinywa adada. Tika watye ki niye matek ni Ker-ri tye ada dok bicobo miti pa Lubanga? Tyen lok ango ma watye kwede ma weko wabedo ki niye matek i kom Ker-ri?—Ibru 11:1.
2 Ker ma Meciya aye loyo-ni obedo yub ma Won Twer Ducu oketo wek ecob yubbe pi cwecce. Ker-ri ocung i kom guti matek liking pien Jehovah aye tye ki twero me loc. Jami ma pigi tego madok i kom Ker-ri calo kabakane, jo ma gibiloc kwede, ki dok kabedo ma gibiloyone dong kityeko mokone kun kitiyo ki gicikke ma Lubanga nyo Wode Yecu Kricito aye omoko. Bedo ka tamo i kom gicikke magi biweko waniang i yo matut kit ma yub pa Lubanga bicobbe kwede ki dok bikonyowa me bedo ki tekcwiny ni Ker-ri bicung matwal.—Kwan Jo Epeco 2:12.
3. Gin ango ma wabinyamo i pwony man ki dong ma lubo?
3 Baibul loko i kom gicikke abicel ma pigi tego ma gikubbe ki Ker pa Lubanga ma Kricito Yecu aye loyo-ni. Gin aye (1) gicikke ma kimoko ki Abraim, (2) gicikke me Cik, (3) gicikke me Ker pa Daudi, (4) gicikke me bedo lalamdog calo Melkijedek, (5) gicikke manyen, ki (6) gicikke me Ker. Kong dong wanenu kit ma gicikke acel acel kubbe kwede ki Ker-ri ki dok kit ma konyo kwede i cobo yub pa Lubanga pi lobo ki dong dano.—Nen lok ma wiye tye ni “Kit ma Lubanga Bicobo Kwede Yubbe.”
CIKKE MA NYUTO KIT MA YUB PA LUBANGA BICOBBE KWEDE
4. Kit ma kicoyo kwede i Acakki, jami adek mene ma Jehovah owaco madok i kom dano?
4 I nge tyeko cweyo lobo wek dano gubed iye, Jehovah owaco jami adek ma pigi tego madok i kom dano: (1) Ebicweyo dano i calle, (2) Dano myero guyar Paradic orom lobo ducu dok gupong lobo ki lutinogi ma kitgi atir, (3) Ogengo dano ni pe gucam nyig yat me ngeyo gin maber ki marac. (Acak. 1:26, 28; 2:16, 17) Pe tye gin mo ma onongo dok mitte ni myero kimed i kom jami adek magi. I nge cweyo dano i calle, gin onongo myero guyar paradic i twok lobo lung ki dok pe gucam yat me ngeyo gin maber ki marac wek yub pa Lubanga ocobbe. Ci dong, pingo kimoko gicikke magi?
5, 6. (a) Catan otemo balo yub pa Lubanga nining? (b) Jehovah odok i pyem ma Catan okelo i Eden-ni nining?
5 Catan Larac-ci ocako jemo itutene me balo yub pa Lubanga. En otimo man kun weko bedo lawiny bot Lubanga nen calo gin ma konye pe i kare ma obwolo Kawa ni ocam nyig yat me ngeyo gin maber ki marac. (Acak. 3:1-5; Yabo 12:9) Pien obwolo Kawa me jemo, Catan okelo pyem i kom twero ma Lubanga tye kwede me loyo Cwecce. Lacen, Catan bene owacci dano pe giworo Lubanga me nono.—Yubu 1:9-11; 2:4, 5.
6 Ngo ma Jehovah otimo ma lubbe ki pyem ma Catan okelo i poto me Eden-ni? Neko lujemo magi onongo bigiko jemogi-ni woko. Ento man bene te lokke ni yub ma Lubanga tye kwede wek lutino pa Adam ki Kawa gupong lobo-ni onongo pe bicobbe. Ma ka neko lujemo-ni cutcut, Lacwec maryek-ki okati ki cikkene mo ma pire tek adada—Cikke pa Lubanga i Eden—me nyuto ni lokke ducu wang ma ocobbe.—Kwan Acakki 3:15.
7. Gen ango ma cikke pa Lubanga i Eden-ni miniwa madok i kom twol-li kacel ki likwaye?
7 Jehovah otiyo ki cikkene me Eden-ni me ngolo to i wi twol ki likwaye, ma man cung pi Catan Larac-ci ki jo ducu ma gicwake macalo lalocgi. Lubanga omiyo twero bot lakwaro dako-ni me jwero Catan woko. Pi meno, cikke pa Lubanga i Eden-ni tito ni kibijwayo ngat ma ocako jemo i poto me Eden kacel ki adwogi maraco ducu ma en okelo. Cikke man bene tuco ngat ma kibitic kwede me jwayone.
8. Ngo ma waromo pwonyone ma lubbe ki dako-ni ki lakwarone?
8 Anga ma obedo lakwaro pa dako-ni? Lakwaro man obedo cwec me cwiny kit macalo en bigoyo wi twol nyo ‘nginyo’ Catan Larac-ci. (Ibru 2:14) Pi meno, dako ma onongo binywalo lakwaro-ni bene obedo cwec me cwiny. Kadi bed likwayo pa twol-li gunya mapol, ento onongo pe kingeyo dako-ni kacel ki lakwarone pi mwaki ma romo 4,000 nicakke ma Jehovah ocikke kwede i Eden. I kare meno, Jehovah omoko gicikke mapat pat ma nyuto nga ma lakwaro-ni obedo ki dok me moko bot Luticce ni ebitic ki lakwaro man me jwayo jami maraco ducu ma Catan okelogi i kom dano.
GICIKKE MA NYUTO ANGA MA OBEDO LAKWARO PA DAKO-NI
9. Gicikke ma kimoko ki Abraim-mi obedo gin ango, dok ocako tic awene?
9 I nge mwaki 2,000 ma Jehovah ongolo kwede kop i wi Catan, en ociko Abraim ni owek pacone ma i Ur ma tye i Mecopotamia ci ocit wa i lobo Kanaan. (Tic 7:2, 3) Jehovah owacce ni: “A woko ki i lobo tuwu, ci icit i lobo ma abinyutti. Abimiyi idoko rok madit, pien ibibedo lakelgum. Abimiyo gum i kom jo ma leggi gum, abiceno ngat mo ma biceni; dok piri keken aye kaka ducu ma wi lobo bilimo iye gumgi” (Acak. 12:1-3) Man aye gicikke ma kimoko ki Abraim. Pe wangeyo awene kikome ma Jehovah omoko iye gicikke man ki Abraim. Ento, gicikke man ocako tic i 1943 ma peya kinywalo Kricito, i kare ma Abraim ma tye ki mwaka 75 ni oweko Karan ci ongolo Kulu Euprate.
10. (a) I yo ma nining ma Abraim onyuto kwede niye matek i kom cikke pa Lubanga? (b) Jami mene ma Jehovah otito motmot ma lubbe ki lakwaro pa dako-ni?
10 Jehovah onwoyo cikkene bot Abraim tyen mapol kun medo ngec mukene. (Acak. 13:15-17; 17:1-8, 16) I kare ma Abraim onyuto niye matek i kom cikke pa Lubanga ki bedo atera me tyero wode acel keken-ni, Jehovah ojingo gicikkene kwede kun moko ni cikkene wang ma ocobbe. (Kwan Acakki 22:15-18; Jo Ibru 11:17, 18.) I kare ma gicikke ma kimoko ki Abram-mi ocako tic, Jehovah ocako tito motmot jami mapol madok i kom lakwaro dako-ni. Lakwaro man onongo bia ki i doggola pa Abraim, onongo cung pi dano mapol ma gibitic macalo luker, gibityeko lumone ducu pa Lubanga, ki dong gibimiyo mot bot dano mapol.
Abraim onyuto niye matek i kom cikke pa Lubanga (Nen paragraf me 10)
11, 12. Ginacoya nyuto nining ni gicikke ma kimoko ki Abraim-mi bicobbe i yo madit, dok man gudowa nining?
11 Kadi bed ni gicikke ma kimoko ki Abraim-mi ocobbe atir atir i kom likwayo pa Abraim i kare ma guleyo Lobo ma Kiciko Pire-ni, Ginacoya bene nyuto ni gicikke meno onongo bicobbe i yo me cwiny. (Gal. 4:22-25) Ma lubbe ki kit ma gicikke man bicobbe kwede i yo madit-ti, lakwena Paulo otito ni bute mukwongo pa lakwaro Abraim-mi aye Kricito ki dok bute me aryone obedo jo 144,000 ma gin aye Lukricitayo ma kiwirogi. (Gal. 3:16, 29; Yabo 5:9, 10; 14:1, 4) Dako ma onywalo lakwaro-ni aye “Jerucalem ma tye i polo”—but dul pa Jehovah ma i polo, ma tye ki cwec me cwiny ma lugen. (Gal. 4:26, 31) Gicikke ma kimoko ki Abraim-mi nyuto ni lakwaro pa dako-ni bikelo mot mapol bot dano.
12 Gicikke ma kimoko ki Abraim-mi moko ni Ker pa Lubanga bicung matek dok yabo yo pi Kabaka kacel ki luloc luwote me loyo ker meno. (Ibru 6:13-18) Gicikke man bitic pi kare ma rom mene? Acakki 17:7 waco ni obedo “gicikke ma bedo matwal.” Gicikke man bitic nio ka Ker pa Meciya ojwero lumone pa Lubanga dok omiyo mot bot jo ducu ma i lobo. (1 Kor. 15:23-26) Ki lok ada, dano ma gibikwo i lobo i kare meno gibinongo adwogi maber pi naka. Gicikke ma Lubanga omoko ki Abraim-mi nyuto ni Jehovah omoko tamme me cobo yubbe ni dano ma kitgi atir ‘gupong lobo.’—Acak. 1:28.
GICIKKE MA MOKO NI KER PA DAUDI BIRII NAKANAKA
13, 14. Gin ango ma gicikke me Ker pa Daudi moko ma lubbe ki loc pa Meciya?
13 Cikke pa Lubanga i Eden-ni kacel ki gicikke ma kimoko ki Abraim-mi pwonyowa ni loc pa Jehovah kare ducu ocung i kom kit ma atir. (Jab. 89:14) Tika gamente pa Meciya bidoko rac ma mito ni kilok woko? Gicikke mukene tye ma moko ni meno pe bitimme wacel.
14 Nen kong gin ma Jehovah ocikke pire bot Kabaka Daudi kun tiyo ki gicikke me Ker pa Daudi. (Kwan 2 Camuel 7:12, 16.) Jehovah omoko gicikke man ki Daudi i kare ma Daudi tye ka loc i Jerucalem, kun cikke bote ni Meciya bibedo lakwarone. (Luka 1:30-33) Pi meno, Jehovah omiyo ngec matut ma lubbe ki doggola ma lakwaro man bia ki iye ki dok omoko ni lakwar Daudi bibedo ‘ngat ma tye ki twero’ me leyo komker me Ker pa Meciya. (Ejek. 21:25-27) Kom ker pa Daudi “bibedo nakanaka ma omoko woko liking” pien Yecu ‘bibedo tye, dok bigwoko kerre bedo nakanaka calo ceng ma ryeny.’ (Jab. 89:34-37) Ki lok ada, loc pa Meciya pe bidoko rac, dok bikelo adwogi maber pi naka!
GICIKKE ME BEDO LALAMDOG
15-17. Ma lubbe ki gicikke me bedo lalamdog calo Melkijedek, tic mene doki ma lakwaro-ni bitimone, dok pingo?
15 Gicikke ma kimoko ki Abraim-mi ki gicikke me ker pa Daudi ginyuto ni lakwaro pa dako-ni bibedo kabaka. Ento, wek dano me rok ducu gunong mot, lakwaro-ni pe myero obedo mere kabaka keken ci otum. Pire tek ni kikwany roc ki i kom dano ki bene gudok jo me ot pa Jehovah. Me cobo man, mitte ni lakwaro-ni bene oti macalo lalamdog. Lacwecwa maryek-ki oketo yub man kun moko gicikke me bedo lalamdog calo Melkijedek.
16 Jehovah otito bot Kabaka Daudi ni ebimoko gicikke ki Yecu me cobo jami aryo: ni Yecu ‘bibedo i nget Lubanga yo tung acuc’ nio ka en oloyo lumonene ki dok me bedo “ajwaka [lalamdog] nakanaka i kit pa Melkijedek.” (Kwan Jabuli 110:1, 2, 4.) Pingo “i kit pa Melkijedek”? Pien ma peya likwayo pa Abraim guleyo Lobo ma Kiciko Pire-ni, kabaka me Calem, Melkijedek, onongo tiyo macalo “ajwaka [lalamdog] pa Lubanga Mamalo Twal.” (Ibru 7:1-3) Jehovah kikome aye ocimme me tiyo tic man. Ma lubbe ki Ginacoya me leb Ibru, en keken aye otiyo macalo kabaka ki lalamdog. Medo i kom meno, kit macalo pe kicoyo lok mo keken i kom ngat ma en oleyo kakare nyo ngat ma olubo kore-ni, kiromo wacone ni en “obedo ajwaka [lalamdog] nakanaka.”
17 Jehovah kikome aye ocimo Yecu me bedo lalamdog kun tiyo ki gicikke man, dok Yecu bibedo “ajwaka [lalamdog] nakanaka, i kit pa Melkijedek.” (Ibru 5:4-6) Man nyuto ka maleng ni Jehovah omoko ni ebitic ki Ker pa Meciya me cobo yubbe pi lobo.
GICIKKE MA GIMOKO PI KER-RI
18, 19. (a) Gicikke ma dong watyeko nyamogi-ni ginyuto gin ango ma lubbe ki Ker-ri? (b) Lapeny mene ma wabinyamo i pwony ma lubo man?
18 Ka watamo i kom gicikke ma dong wanyamogi-ni, ci watwero niang kit ma gikubbe kwede ki Ker pa Meciya ki dong kit ma kimokogi kwede. Cikke pa Lubanga i Eden-ni moko ni Jehovah bicobo yubbe pi lobo ki dong dano kun tiyo ki lakwaro pa dako. Lakwaro man onongo bibedo anga, dok bitiyo tic mene? Gicikke ma kimoko ki Abraim-mi konyowa me niang man.
19 Gicikke me Ker pa Daudi miyo ngec matut i kom doggola ma lakwaro-ni bia ki iye dok miye twero me loyo lobo wek Ker pa Lubanga okel adwogi maber pi naka. Gicikke me bedo lalamdog calo Melkijedek-ki aye biweko lakwaro pa dako-ni tiyo macalo lalamdog. Ento, Yecu pe bitic kene me kwanyo roc ki i kom dano. Jo mukene bene kiwirogi me tic macalo luloc ki lulamdog. Gin gibia kikwene? Meno aye gin ma kibinyamone i pwony ma lubo man.