LOK MA I POK NGEYE | IN IROMO NIANG BAIBUL
Pingo Myero Iniang Baibul?
“Baibul obedo buk me dini. Obedo buk mo ma welo i kwo pa dano dok pire pe tek bot Chinese.”—LIN, CHINA.
“Pe bene atwero niang buk maleng pa dinina me Hindu. Ci dong twere nining me niang Baibul?”—AMIT, INDIA.
“Aworo Baibul macalo buk mo macon ki dok awinyo ni obedo buk ma kicato loyo ki i kin bukke ducu. Ento an kikome pud pe aneno kopi mo me Baibul.”—YUMIKO, JAPAN.
Dano mapol ki wi loboni gitye ki woro madit pi Baibul. Ento oromo bedo ni gingeyo jami manok adada ki iye. Meno tye lok ada pi dano mapol ma gibedo i lobo Asia, ento bene loki kwako dano mapol i lobbe ma Baibul pol iye adada.
Ento, itwero penye kekeni ni, ‘Pingo myero abed ki miti me niang Baibul?’ Niang buk man maleng-ngi twero konyi me timo jami magi:
Bedo ki yengo dok ki yomcwiny i kwoni
Lweny ki peko me ot
Lweny ki par
Yubo wat ma tye i kin dano
Tic ki cente i yo maber
Ket kong, me laporre, Yoshiko, ma bedo i lobo Japan. Onongo mito ngeyo lok ada ma tye i Baibul, ci omoko tamme me kwanone en kikome. Adwogine obedo nining? “Baibul okonya me bedo ki tyen lok me kwo ki gen pi anyim,” en omedde ni: “Dong atye ki tyen lok me kwo.” Amit, ngat ma waloko i kome malo-ni omoko tamme me kwano Baibul en kikome bene. En owaco ni “Abedo ki ur madit. Baibul tye ki pwony ma konyo dano ducu”
Baibul ogudo kwo pa dano milion mapol ata. Pingo pe ikwan in kikome wek inen adwogi mabeco ma ibinongo?