Ngo Ma Baibul Waco?

Lubanga tika gamo lega ducu?

TIKA ITWERO WACONE NI EN GAMO LEGA PA . . .

• Dano ducu

• Jo mogo

• Ngat mo ku

GIN MA BAIBUL WACO

“Rwot [Jehovah] tye cok bot jo ducu ma kok bote, ma gikok bote ki ada.”​—Jabuli 145:18.

NGO MUKENE MA WAPWONYO KI I BAIBUL?

• Lubanga pe gamo lega pa jo ma pe gubedo luwiny. (Icaya 1:15) Ento, kadi bed kit meno, ka ‘gularo lok kacel ki Lubanga’ ce guloko kitgi, ci en pud twero winyo legagi.​—Icaya 1:18.

• Wek Lubanga ogam lega pa ngat moni, mitte ni legane orwatte ki mitine ma lubbe ki kit ma kicoyo kwede i Baibul.​—1 Jon 5:14.

Tika mitte ni waleg i yo mo ma kite dok pat?

JO MOGO GIYE ni myero kirum cong, kikul wic, nyo kirib cing kacel ka kitye ka lega. In itamo ningo?

GIN MA BAIBUL WACO

Lubanga ogamo lega pa jo ma onongo ‘gubedo piny’ nyo ma “gucung” nyo ma ‘gubuto piny’ nyo ma ‘gurumo congi piny.’ (1 Tekwaro 17:16; 2 Tekwaro 30:27; Ejira 10:1; Tic 9:40) En pe mito ni waleg dok i yo mo ma kite dok pat.

NGO MUKENE MA WAPWONYO KI I BAIBUL?

• Lubanga winyo lega pa jo ma gimwol.​—Jabuli 138:6.

• Itwero lega i leb mo keken nyo laling ling.​—2 Tekwaro 6:32, 33; Nekemia 2:1-6.