Medde ki Lega pi Cwak pa Lubanga

Lubanga omiyo ki dano mic mo ma kite dok pat​—kero me kubbe kwede kun gitito bote kit ma giwinyo kwede i lega. Lanebi Daudi olego ni: “In aye ma igamo lega-gu ducu. Dano ducu gibibino boti.” (Jabuli 65:2) Ento omyero waleg nining ka wamito ni Lubanga owiny legawa dok ominiwa mot?

LEG LEGA MA A KI I CWINYI, DOK KI MWOLO

Legani piri keni mini kare me yabo cwinyi bot Lubanga​—me titte kit ma iwinyo kwede kikome. (Jabuli 62:8) Won Twer Ducu maro legawa ma a ki i cwinywa.

LEG BOT LUBANGA KUN ILWONGO NYINGE

Kadi bed ni Lubanga tye ki nying me dog tic mapol, en tye ki nyinge acel keken. En owaco ni: “An nyinga Jehovah.”a (Icaya 42:8, NW) Nying Jehovah tye nonge tyen ma romo 7,000 kulu i Coc Maleng. Lunebi mapol gulwongo Lubanga kun gitiyo ki nyinge. Abraim owaco ni: “Jehovah alegi, . . . wek amedde ki lok [kwedi].” (Acakki 18:30, NW) Wan bene omyero wati ki nying Lubanga, Jehovah, ka watye ka lega bote.

LEG I LEB PENI KIKOME

Lubanga niang tamwa ki kit ma wawinyo kwede labongo paro pi leb ma waloko. Lokke tittiwa ni: “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”​—Tic pa Lukwena 10:34, 35.

Ento, wek wanong mot pa Lubanga, omyero watim gin mo makato lega keken. I pwony ma lubo man, wabinyamo gin ma omyero watim.

[Lok ma tye piny]