“Ibibedo Kweda i Paradic”

1. Ma Yecu peya oto, ngo ma en owaco bot latim bal mo ma kiguro i ka ngete? (Luka 23:39-43)

YECU kacel ki lutim bal aryo ma i ka ngete gubedo ka deno can malit i kare ma giwoto ki to motmot. (Luka 23:32, 33) Lutim bal aryo-ni onongo gubedo ka yeto Yecu, ma onyuto ka maleng ni onongo pe gubedo lupwonnyene. (Mat. 27:44; Mar. 15:32) Ento ngat acel i kingi cwinye olokke woko. En owaco ni: “Yecu, po pira ka ibidonyo i Kerri.” Yecu ogamme ni: “Ada, awaco boti tin ni, in ibibedo kweda i Paradic.” (Luka 23:43, NWT) (Kwan Luka 23:39-42.) Twero bedo ni labalo-ni onongo owinyo kwena ni “ker me polo dong onyiko cok” ma Yecu obedo ka tito ento en kikome pe odoko lapwonnye. Dok Yecu pe owaco ni labalo-ni bibedo i Ker meno i polo. (Mat. 4:17) Yecu onongo tye ka lok i kom Paradic ma bibedo i lobo i anyim. Pingo watwero wacone kit meno?

2. Wangeyo nining ni labalo ma ongut-ti obedo Lajudaya?

² Labalo ma ongut-ti nen calo onongo obedo Lajudaya. En owaco bot latim bal lawote ni: ‘In pe ilworo Lubanga, ma kun gingolo kop i komi kwede ma rom?’ (Luka 23:40) Lujudaya onongo giworo Lubanga acel keken, ento rok ma orumo ka ngetgi onongo giworo lubange mapol. (Nia 20:2, 3; 1 Kor. 8:5, 6) Ka onongo lubalo magi pe gubedo Lujudaya, kono labalo-ni openyo lawote ni, ‘In pe ilworo lubange?’ Medo i kom meno, Yecu onongo pol kare pe tito kwena bot lurok pien pe kiore bot lurok, ento “bot jo Icrael keken, pien gitye calo romi murwenyo.” (Mat. 15:24) Lubanga onongo otito bot Luicrael ni ebicero jo muto. Twero bedo ni labalo ma ongut-ti onongo ngeyo man, dok lokke onyuto ni en onongo ngeyo ni Jehovah bicero Yecu me loc i Ker pa Lubanga. Laco-ni nen calo obedo ki gen ni Lubanga bicere bene.

3. Gin ango ma nen calo labalo-ni otamo iye i kare ma Yecu oloko i kom Paradic? Tit kong. (Acakki 2:15)

³ Ka labalo ma ongut-ti onongo obedo Lajudaya, ci en onongo ngeyo lok i kom Adam ki Kawa kacel ki Paradic ma Jehovah oketogi iye. Dong nen calo labalo-ni onongo ye ni Paradic ma Yecu oloko pire-ni bibedo poto mamwonya adada i lobo kany.—Kwan Acakki 2:15.

4. Lok pa Yecu bot latim bal-li myero otug cwinywa me tam i kom gin ango?

⁴ Lok ma Yecu owaco bot latim bal-li myero otug cwinywa me lwodo kit ma kwo bibedo kwede i Paradic. Ki lok ada, watwero pwonyo gin mo i kom Paradic ki i loc pa Kabaka Solomon ma opong ki kuc-ci. Baibul waco ni Yecu dit loyo Solomon. Watwero bedo ki gen ni Yecu bitic kacel ki luloc luwote me loko lobo-ni doko Paradic mamwonya adada. (Mat. 12:42) Nen ka maleng ni, ‘romi mukene-ni’ myero gubed ki miti me ngeyo gin ma mitte ki botgi wek gubed mupore me kwo pi naka i Paradic.—Jon 10:16.

KWO BIBEDO NINING I PARADIC?

5. Itamo ni kwo bibedo nining i Paradic?

⁵ Gin ango ma bino i wi ka itamo pi kwo i Paradic? Twero bedo ni itamo i kom kabedo mo mamwonya adada calo poto me Eden. (Acak. 2:7-9) Wi twero po i kom lok ma lanebi Mika ocoyo i kom jo pa Lubanga ni “ngat acel acel bibedo i te olokke ki i te odurone.” (Mika 4:3, 4) Wi bene twero po i kom wang Baibul mogo ma waco ni cam bibedo madwong adada. (Jab. 72:16; Ic. 65:21, 22) Dong itwero goyo ni itye i poto mo mamwonya adada, kun ibedo i nyim meja ma opong ki cam mapatpat mamit. Itwero bene ngweyo ngwec ature ki ginapita makur ma oromo piny woko. Dok itwero goyo i wi ni in ki luremi kacel ki jo gangwu, ma i kine tye iye jo ma kicerogi, wutye ka nyero ki nongo mit pa bedo kacel. Meno ducu pe obedo lek mamwa. Watwero bedo ki gen ni jami magi ducu bitimme i lobo kany. Ento i Paradic, wabibedo bene ki tic me atiya ma yomo cwinywa.

6. Tic ango ma wabitimo i Paradic? (Nen cal.)

⁶ Jehovah ocweyowa ki miti me nongo yomcwiny i tic ma watiyo. (Latit. 2:24) Wabibedo ki tic mapol adada i kare me Loc me Mwaka Alip Acel pa Kricito. Jo ma gibikato ki i twon can madit atika-ni, kacel ki dano milion mapol ma kibicerogi gibimito bongi me aruka, cam, kacel ki kabedo. Wek waminigi jami magi, bimitte ni wati tic mapol ma biyomo cwinywa. Kit macalo Lubanga omiyo bot Adam ki Kawa tic me gwoko lobo, wan bene wabibedo ki tic mamit me loko lobo-ni doko Paradic. Go kong kit ma bibedo mit kwede me pwonyo dano milion mapol ata ma kibicerogi ma gitye ki ngec manok i kom Jehovah ki yubbe, ki me konyo jo ma lugen ma gukwo con ma Yecu peya obino i lobo wek gupwony gin mutimme nicakke i kare ma guto!

7. Gin ango ma watwero bedo ki gen iye, dok pingo?

⁷ Watwero bedo ki gen ni ka dong watye i Paradic, wabibedo ki kuc kacel ki jami ducu ma wamito dok wabitimo jami kore ki kore. Pingo? Pien Jehovah dong otyeko nyutiwa labol me kit ma kwo bibedo kwede i te loc pa Wode. Loc pa Kabaka Solomon aye obedo labol meno.

LOC PA KABAKA SOLOMON —ABIL ME KWO I PARADIC

8. Lok ma nonge i Jabuli 37:10, 11, 29 ocobbe nining i nge Kabaka Daudi coyone? (Nen “Lapeny pa Lukwan Bukkewa” ma tye i magajin man.)

⁸ Lubanga oweko Kabaka Daudi ocoyo kit ma kwo onongo bibedo kwede i kare ma kabaka mo maryek dok ma lagen biloc. (Kwan Jabuli 37:10, 11, 29.) Pol kare wakwano Jabuli 37:11 bot jo mukene ka watye ka nyamo lok i kom Paradic ma bibino i anyim. Watye ki tyen lok ma atir me timo meno pien Yecu bene oloko i kom tyeng acel-lu i Pwonye me Wi Got, kun onyuto ni lok meno bicobbe i anyim. (Mat. 5:5) Ento lok pa Daudi bene onyuto kit ma kwo bibedo kwede i te loc pa Kabaka Solomon. I kare ma Solomon loyo Icrael, jo pa Lubanga gunongo mit pa kuc ki lonyo madwong i “lobo ma mol cak ki moo kic.” Lubanga onongo owaco ni: “Ka wubilubo cikka . . . , Abimiyo kuc bedo i lobo, wubibuto piny, dano ma miyowu lworo bibedo pe.” (Levi 20:24; 26:3, 6) Cikke magi ocobbe i kare me loc pa Kabaka Solomon. (1 Tekwaro 22:9; 29:26-28) Dok Jehovah onongo ocikke ni jo maraco “dong bibedo pe matwal.” (Jab. 37:10) Dong lok ma nonge i Jabuli 37:10, 11, 29 ocobbe i kare macon dok bicobbe i anyim bene.

9. Gin ango ma kabaka ma dako me Ceba owaco i kom loc pa Kabaka Solomon?

⁹ Kabaka ma dako me Ceba owinyo pi kuc kacel ki ber bedo ma onongo tye i Icrael i kare me loc pa Solomon. En oa ki i lobo mabor adada me bino wa i Jerucalem wek enen ki wange. (1 Luker 10:1) I nge neno ker pa Solomon, en owaco ni: “Pe gititta kadi wa nucune kulu. . . . Monni gitye ki yomcwiny kuman! Luticci ducu gitye ki yomcwiny ma rom mene, ma gibedo ka cung i nyimi jwijwi ka winyo lok me ryekoni!” (1 Luker 10:6-8) Ento kwo i te loc pa Solomon onongo obedo abil keken pa jami ma Jehovah bitimo pi dano i te loc pa Wode Yecu.

10. I yo ma nining ma Yecu dit loyo Solomon?

¹⁰ Yecu dit kato Solomon i yo ducu. Solomon obedo laco ma onongo tye ki roc dok otimo bal madongo ma i agikkine okelo pekki mapol i kom jo pa Lubanga. Ki tungcel, Yecu obedo Laloc ma pe ki roc dok pe timo bal mo keken. (Luka 1:32; Ibru 4:14, 15) Yecu obedo lagen bot Lubanga kadi bed Catan okelo atematema madongo i kome. Kricito dong otyeko nyuto ni en pe ebitimo bal mo nyo gin mo keken ma twero kelo peko i kom jo ma gitye i te locce. En aye obedo Kabaka maber loyo ma watwero bedo kwede.

11. Angagi ma gibiloc kacel ki Yecu?

¹¹ Yecu bitic kacel ki luloc luwote ma welgi tye 144,000 me gwoko dano ki me cobo yub pa Jehovah pi lobo-ni. (Yabo 14:1-3) Gin gukato ki i atematema kacel ki pekki matego i kare ma pud gitye i lobo, pi meno gibiniang jami ma jo ma gikwo i lobo gibikato ki i iye. Tic ango kikome ma luloc magi gibitiyo?

TIC ANGO MA JO MA KIWIROGI GIBITIMONE?

12. Tic ango ma Jehovah bimiyo ki jo 144,000?

¹² Yecu ki luloc luwote gitye ki tic mapol adada makato tic ma onongo Solomon tye kwede. Onongo mitte ni Solomon ogwok dano milion mapol ma gibedo i lobo acel keken. Ento, jo ma gibiloc i Ker pa Lubanga gibigwoko dano bilion mapol ma gikwo i wi lobo ducu. Jehovah pud dong omiyo bot jo 144,000 deyo madit ya!

13. Tic ma pire tek ango ma jo ma gibiloc kacel ki Yecu gitye kwede?

¹³ Calo Yecu, jo 144,000 bene gibitic macalo luker ki lulamdog. (Yabo 5:10) I kare ma Luicrael onongo gitye i te Cik pa Moses, lulamdog onongo gikonyo dano me bedo ma komgi yot dok ma watgi ki Jehovah tye maber. Cik onongo tye ki “tipo keken me jami mabeco me kare me anyim,” pi meno watwero moko ni jo ma gibiloc kacel ki Yecu gibikonyo jo pa Lubanga me bedo ma komgi yot dok ki wat macok ki Jehovah. (Ibru 10:1) Myero wakur wek wanen kit ma luker ki lulamdog magi gibikubbe kwede ki jo ma gitye i te loc me Ker-ri i lobo kany. Kit yub mo keken ma Jehovah oketo, watwero bedo ki gen ni i Paradic ma bino, jo ma gitye i lobo gibinongo tira ducu ma gimito.—Yabo 21:3, 4.

NGO MITTE NI ‘ROMI MUKENE-NI’ GUTIM WEK GUBED MUPORE ME KWO I PARADIC?

14. Wat ango ma tye i kin ‘romi mukene-ni’ ki “romi manok”?

¹⁴ Yecu olwongo jo ma gibiloc kacel kwede ni “romi manok.” (Luka 12:32) En bene oloko i kom gurup me aryone ma olwongogi ni “romi mukene.” Gurup aryo magi gitye lwak acel. (Jon 10:16) Jo ma gitye i gurup aryo magi gitye ka tic kacel i kare-ni. Dok gibimedde ki tic kacel ka lobo woto ki doko Paradic. Ngene kene ni, i kare meno, “romi manok” dong gibibedo i polo dok ‘romi mukene-ni’ gibibedo ki gen me nongo mit pa kwo i lobo pi naka. Ento tye jami mogo ma ‘romi mukene-ni’ myero gutim wek gubed ma gupore pi kwo i Paradic.

15. (a) ‘Romi mukene-ni’ gitiyo kacel ki omegi Kricito nining? (b) Itwero lubo lanen pa omego ma tye i dukan yat-ti nining? (Nen cal.)

¹⁵ Labalo ma ongut-ti oto ma peya onongo kare me nyuto pwocce pi gin ma Kricito otimo pire. Ka iporo ki wan ma watye i kin ‘romi mukene-ni,’ watye ki kare mapol adada me nyuto kit ma wawinyo kwede i kom Yecu. Me labolle, wanyuto marwa pire ki i kit ma watero kwede omegine ma kiwirogi. Yecu owaco ni ebingolo kop i kom romi mukene-ni ma lubbe ki kit ma gutero kwede omegine. (Mat. 25:31-40) Watwero cwako omegi Kricito ki konyogi i tic me tito kwena ki loko dano me doko lupwonnye. (Mat. 28:18-20) Meno aye oweko wamito tic ki bukke ma kiyubogi pi kwano Baibul ki dano, calo buk me Bed ki Kwo Maber Nakanaka! Ka i kare-ni peya itye ka kwano Baibul ki ngat mo, pingo pe iket macalo yubbi me tito ki dano mapol kit ma itwero pi yubwa me nyamo lok me Baibul ki dano?

16. Gin ango ma watwero timone kombeddi wek wayubbe me kwo i te loc me Ker pa Lubanga?

¹⁶ Pe mitte ni wakur wang ma watye ka kwo i Paradic ci wadok kodi dano ma Jehovah mitogi kunnu. I kare-ni, waromo cako tute matek me bedo jo ma genne i lokwa ki ticwa kun bene wagwokke i kwowa me nino ducu. Dok omyero wabed lugen bot Jehovah, bot ngat ma wanyomme kwede, ki bot Lukricitayo luwotwa. Ka watye luwiny bot Jehovah i kare-ni i lobo man marac-ci, bibedo yot botwa me bedo luwiny bote i Paradic. Waromo bene dongo diro manyen kacel ki kit mogo mabeco ma nyuto ni watye ka yubbe me kwo i lobo manyen. Nen pwony ma wiye tye ni “Tika Itye Atera me ‘Leyo Lobo’?” ma nonge i magajin man.

17. Tika omyero cwinywa otur pi bal ma watimo con? Tit kong.

¹⁷ Myero bene watute matek wek cwinywa pe obed ka pidowa pi bal madongo ma watimo i kare mukato angec. Ngene kene ni, pe myero wati ki ginkok macalo gin me gengo ngewa me ‘timo bal akaka.’ (Ibru 10:26-31) Ento watwero bedo ki gen ni ka wangut ki cwinywa ducu pi bal ma watimo, wayenyo kony ki bot Jehovah ki luelda, dok waloko kitwa, nongo en otimiwa kica i yo ducu. (Ic. 55:7; Tic 3:19) Wi opo i kom lok ma Yecu owaco bot Luparicayo, ni: “Pe abino ka lwongo jo ma kitgi atir, ento lubalo.” (Mat. 9:13) Ginkok dit ma romo umo balwa ducu.

ITWERO KWO PI NAKA I PARADIC

18. Gin ango ma imito lok iye ki latim bal ma oto i nget Yecu-ni?

¹⁸ Tika itwero goyo i wi ni itye i Paradic, kun itye ka boko lok ki labalo ma oloko ki Yecu-ni? Labongo akalakala mo, wun ducu wubitito pwoc madit ma wutye kwede pi ginkok pa Yecu. Itwero penye me titi jami mutimme i cawa mogo manok ma Yecu peya oto ki kit ma en owinyo kwede i kare ma Yecu ogamo kwacce. Ki tungcel, en bene romo penyi kit ma kwo obedo kwede i kare me agikki me lobo pa Catan-ni. Pud dong bibedo twon mot madit adada me kwano Lok pa Lubanga ki jo ma kit meno!—Ep. 4:22-24.

19. Pingo kwo i Paradic pe biwaco komwa matwal? (Nen cal ma i pok ngeye.)

¹⁹ Kwo i Paradic pe biwaco komwa matwal. Kare ducu wabibedo ka rwatte ki jo manyen dok wabibedo ki tic me atima ma yomo cwinywa. Ma dong ber loyo ducu, nino ki nino wabimedde ki ngeyo Wonwa me polo maber ki nongo mit pa jami ma en omiyowa. Kare ducu wabibedo ki jami manyen me apwonya i kome, ki i kom cwecce. Ka wamedde ki kwo pi kare malac, marwa pi Lubanga bene bimedde ki dongo matut. Pud dong watye ki pwoc madit ya bot Jehovah ki Yecu pi miniwa gen me kwo nakanaka i Paradic!