Yesaya
41 “Nyɛɛ pee dii* nɛ nyɛɛ bu mi tue, nyɛ zugba kpɔhi nɛ nyu bɔle nyɛ;
Je ma amɛ nɛ a ná he wami ekohu.
Nyɛɛ ba; jehanɛ ɔ, nyɛɛ tu munyu.
Nyɛ ha nɛ waa kpe nɛ waa kojo.
2 Mɛnɔ lɛ e wo nɔ ko nɔ kɛ je puje he kɛ ba,
Mɛnɔ lɛ e kɛ dami tsɛ lɛ kɛ ba e nane nya,*
Konɛ e ngɔ je ma amɛ kɛ wo e dɛ,
Nɛ́ e ngɔ matsɛmɛ kɛ wo e sisi?
Mɛnɔ lɛ haa nɛ a plɛɔ peeɔ tabo zu ngɛ e klaate nya,
Kaa nga nɛ kɔɔhiɔ muɔɔ kɛ yaa ngɛ e kɛ̃ɛ̃ nya a?
3 E fieɔ a se, nɛ nɔ́ ko tsi we lɛ blɔ
Ngɛ blɔ nɛ e nane nyɛɛ we nɔ hyɛ ɔ nɔ.
4 Mɛnɔ lɛ e tsu nɔ́ nɛ ɔ? Mɛnɔ lɛ e pee nɔ́ nɛ ɔ?
Mɛnɔ lɛ e bua yi nɔhi a nya kɛ je sisije?
Imi, Yehowa, imi ji kekleekle nɔ;
Nɛ nyagbe yi nɔhi a mi hu i tsakee we.”
5 Zugbahi nɛ nyu bɔle mɛ ɔ na nɛ a ye gbeye.
Zugba a nyagbe he ɔmɛ tsuo bɔni mimiɛmi.
A hɛɛ mɛ kɛ baa, nɛ a baa hɛ mi.
6 Nɔ fɛɛ nɔ yeɔ kɛ buaa e sibi,
Nɛ e deɔ e nyɛmi ke: “Wlua mo.”
7 Lɔ ɔ he ɔ, ga ní tsulɔ woɔ dade he ní tsulɔ he wami;
Nɔ nɛ e kɛ hamle fiaa dade nɔ nɛ e peeɔ pɛtɛpɛtɛ ɔ
Woɔ nɔ nɛ e kɛ hamle ngɛ sɔ̃ tɛ nɔ fiaae ɔ he wami.
E deɔ ngɛ nɔ́ nɛ a sɔ̃ ɔ he ke: “E hi.”
Kɛkɛ ɔ, e kɛ plɛɛkohi kaa mi konɛ e ko nɔ si.
8 Se mo Israel, mo ji ye sɔmɔlɔ,
Oo Yakob, mo ji nɔ nɛ i hla,
Ye huɛ Abraham nina,*
9 I ngɔ mo kɛ je zugba a nyagbe he ɔmɛ,
Nɛ mo lɛ i ngɔ mo kɛ je zugba a nɔ hehi nɛ kɛ ɔ.
I de mo ke, ‘Mo ji ye sɔmɔlɔ;
I hla mo; i kua we mo.
10 Koo ye gbeye, ejakaa i kɛ mo ngɛ.
Koo ye tsui, ejakaa imi ji o Mawu ɔ nɛ.
Ma wo mo he wami, ee, ma ye bua mo,
I kɛ ye dami hiɔ nine ɔ maa pɛtɛ o he wawɛɛ.’
11 Hyɛ! Zo maa gbe nihi tsuo nɛ a mi mi fu mo ɔ, nɛ a hɛ mi ma pue si.
Nihi nɛ a kɛ mo ngɛ hwue ɔ, a maa ba mɛ si, nɛ a hɛ mi ma kpata.
12 O ma hla nyumuhi nɛ a kɛ mo ná a, se o be mɛ nae;
Nyumuhi nɛ a kɛ mo ngɛ hwue ɔ maa pee kaa nɔ́ ko nɛ be si himi mi, kaa nɔ́ nɛ pi nɔ́ ko kulaa ji mɛ.
13 Ejakaa imi Yehowa o Mawu ɔ, i ngɛ o hiɔ nine he pɛtɛe,
Imi lɛ i ngɛ mo dee ke, ‘Koo ye gbeye. Ma ye bua mo.’
14 Koo ye gbeye, mo Yakob nɛ o ngɛ kaa pɔpɔli,*
Nyɛ Israel nyumuhi, ma ye bua nyɛ,” Yehowa nyɛ Kpɔlɔ ɔ, Israel Nɔ Klɔuklɔu ɔ lɛ de.
15 “Hyɛ! I pee mo ngma fiaami tso,*
Ngma fiaami nɔ́ ehe kɛ e nya enyɔ.
O maa naa yoku ɔmɛ a nɔ, nɛ a maa ywia wɔtsɔwɔtsɔ
Nɛ o ma ha nɛ yoku wawi ɔmɛ maa pee kaa tsakati.*
16 O maa sa mi,
Nɛ kɔɔhiɔ maa muɔɔ mɛ kɛ ho;
Kɔɔhiɔ nɛ nya wa maa gbɛ mɛ ngɔ fia.
O bua maa jɔ ngɛ Yehowa mi,
Nɛ o maa fĩa ngɛ Israel Nɔ Klɔuklɔu ɔ mi.”
17 “Nihi nɛ a be nɔ́ ko kɛ ohiatsɛmɛ ngɛ nyu hlae, se eko be.
Kuma ha nɛ a lilɛ nɔ gbli.
Imi Yehowa, ma ha mɛ heto.
Imi Israel Mawu ɔ, i be mɛ kuae.
18 Ma ha nɛ pahi maa be ngɛ yoku wawi nɛ a nɔ ngɛ kpataa nɔ,
Nɛ nyu hɛngmɛhi maa be ngɛ dɔgbahi a mi.
Ma ha nɛ nga kplanaa nɔ ma plɛ pee taku kɛ e mi glãhi
Nɛ zugba nɛ nyu be nɔ ɔ ma plɛ pee he nɛ nyu hɛngmɛhi ngɛ.
19 Ma du seda tso
Kɛ akasia tso kɛ mɔmɔ tso kɛ nu tso ngɛ nga kplanaa nɔ.
Ma du junipa tso
Kɛ lazu tso kɛ sipro tso ngɛ nga kplanaa nɔ,
20 Bɔ nɛ pee nɛ nihi tsuo nɛ a na, nɛ a nu
Nɛ a bu tue, nɛ a nu sisi
Kaa Yehowa nine lɛ pee nɔ́ nɛ ɔ,
Nɛ Israel Nɔ Klɔuklɔu ɔ lɛ bɔ.”
21 Yehowa ke, “Nyɛɛ kɛ nyɛ sane ɔ nɛ ba,
Nyɛɛ tsɔɔ nyɛ sane ɔ mi,” Yakob Matsɛ ɔ lɛ de.
22 “Nyɛɛ ngɔ odase kɛ ba nɛ nyɛ de wɔ níhi nɛ maa ya nɔ.
Aloo nyɛ de wɔ níhi nɛ maa ba a.
23 Nyɛ de wɔ níhi nɛ maa ya nɔ hwɔɔ se,
Konɛ waa le kaa mawuhi ji nyɛ.
Ee, nyɛɛ pee nɔ́ ko, nɔ́ kpakpa jio, nɔ́ yaya jio,
Konɛ ke wa na a, e pee wɔ nyakpɛ.
24 Hyɛ! Nyɛ ji nɔ́ ko nɛ be si himi mi,
Nɛ níhi nɛ nyɛ bɔ mɔde kɛ pee ɔ hu se nami be a he.
Nɔ fɛɛ nɔ nɛ maa hla kaa e ma sɔmɔ nyɛ ɔ maa pee ní hiɔmi ní.
25 I wo nɔ ko nɔ kɛ je yiti je, nɛ e maa ba,
Nɔ ko nɛ́ e maa je puje he nɛ e ma tsɛ ye biɛ ɔ.
E maa naa nɔ yeli* a nɔ kaa zu,
Kaa bɔ nɛ buɛ puɛlɔ naa zu tsuãa nɔ ɔ.
26 Mɛnɔ lɛ e tu nɔ́ nɛ ɔ he munyu kɛ je sisije, bɔ nɛ pee nɛ waa le,
Aloo kɛ je blema lokoo, konɛ wa nyɛ nɛ wa de ke, ‘E munyu da’?
Ngɛ anɔkuale mi ɔ, nɔ ko nɔ ko de we!
Nɔ ko nɔ ko tu we he munyu!
Nɔ ko nɔ ko nui nɔ́ ko kɛ ji nyɛ ngɔ!”
27 Imi ji kekleekle nɔ nɛ e de Zion ke: “Hyɛ! Mɛ ji nɛ ɔ nɛ!”
Nɛ ma tsɔ nɔ ko nɛ e hɛɛ sane kpakpa kɛ ya Yerusalem.
28 Se i ya nɔ nɛ i hyɛ, se i nɛ́ nɔ ko;
Nɔ kake po be a kpɛti nɛ e maa wo ga.
Nɛ i ya nɔ nɛ i bi mɛ kaa a ha mi heto.
29 Hyɛ! Mɛ tsuo a ji nɔ́ ko nɛ be si himi mi.*
Se nami ko be a ní tsumi ɔmɛ a he.
A dade amaga amɛ ji kɔɔhiɔ kɛ nɔ́ ko nɛ se nami be he.