MOSE WOMI EYWIƐNE*

1 Benɛ Israel bi ɔmɛ je Egipt zugba a nɔ se jeha nɛ ji enyɔ ɔ, nyɔhiɔ enyɔne ɔ we kekleekle ligbi ɔ, Yehowa kɛ Mose tu munyu ngɛ Sinai nga a nɔ, ngɛ kpe he bo tsu ɔ mi, nɛ e de lɛ ke: 2 “Kane Israel bi ɔmɛ a we asafo ɔ* kakaaka ngɛ a wekuhi a nya, ngɛ a tsɛmɛ a we ɔmɛ a nya, ngɛ nyumu ɔmɛ a biɛhi a hiɛmi nya. 3 O kɛ Aaron nyɛɛ ngma nihi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ngɛ Israel ɔ a biɛ ngɛ a kuu* ɔmɛ a nya.

4 “Ngɛ wɛtso fɛɛ wɛtso mi ɔ, nyɛɛ hla nyumu kake kɛ piɛɛ nyɛ he. E sa nɛ a ti nɔ fɛɛ nɔ nɛ pee nɔ ko nɛ e ji e wɛtso ɔ nya dalɔ. 5 Nyumuhi nɛ a maa ye bua nyɛ ɔmɛ a biɛhi ji nɛ ɔmɛ nɛ: ngɛ Reuben wɛtso ɔ mi ɔ, Elizur, Shedeur binyumu ɔ; 6 ngɛ Simeon wɛtso ɔ mi ɔ, Shelumiel, Zurishadai binyumu ɔ; 7 ngɛ Yuda wɛtso ɔ mi ɔ, Nashon, Aminadab binyumu ɔ; 8 ngɛ Isakar wɛtso ɔ mi ɔ, Netanel, Zuar binyumu ɔ; 9 ngɛ Zebulun wɛtso ɔ mi ɔ, Eliab, Helon binyumu ɔ; 10 ngɛ Yosef binyumu Efraim wɛtso ɔ mi ɔ, Elishama, Amihud binyumu ɔ; ngɛ Yosef binyumu Manase wɛtso ɔ mi ɔ, Gamaliel, Pedazur binyumu ɔ; 11 ngɛ Benyamin wɛtso ɔ mi ɔ, Abidan, Gideoni binyumu ɔ; 12 ngɛ Dan wɛtso ɔ mi ɔ, Ahiezer, Amishadai binyumu ɔ; 13 ngɛ Asher wɛtso ɔ mi ɔ, Pagiel, Okran binyumu ɔ; 14 ngɛ Gad wɛtso ɔ mi ɔ, Eliasaf, Deuel binyumu ɔ; 15 ngɛ Naftali wɛtso ɔ mi ɔ, Ahira, Enan binyumu ɔ. 16 Nihi nɛ a tsɛ mɛ kɛ je nimli asafo ɔ kpɛti ji nɛ ɔmɛ nɛ. Nimli nɛ ɔmɛ ji ganɔhi ngɛ a tsɛmɛ a wɛtso ɔmɛ a mi; mɛ ji nimli akpehi a nya dali ngɛ Israel.”

17 Lɔ ɔ he ɔ, Mose kɛ Aaron ngɔ nyumu nɛ ɔmɛ nɛ a je blɔ wo a biɛ ta a kɛ piɛɛ a he. 18 A bua asafo ɔ tsuo nya ngɛ nyɔhiɔ enyɔne ɔ we kekle ligbi ɔ nɔ, konɛ a ngma nihi nɛ a ye jeha 20 kɛ yaa a, a biɛ kakaaka ngɛ a wekuhi a nya, kɛ a tsɛmɛ a we ɔmɛ a nya 19 kaa bɔ nɛ Yehowa fã Mose ɔ. Lɔ ɔ he ɔ, e ngma a biɛ ngɛ Sinai nga a nɔ.

20 A ngma Reuben nɛ ji Israel bitɛte ɔ sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 21 nɛ nihi nɛ a ngma a biɛ ngɛ Reuben wɛtso ɔ mi ɔ, a yibɔ ji 46,500.

22 A ngma Simeon sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 23 nɛ nihi nɛ a ngma a biɛ ngɛ Simeon wɛtso ɔ mi ɔ, a yibɔ ji 59,300.

24 A ngma Gad sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 25 nɛ nihi nɛ a ngma a biɛ ngɛ Gad wɛtso ɔ mi ɔ, a yibɔ ji 45,650.

26 A ngma Yuda sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 27 nɛ nihi nɛ a ngma a biɛ ngɛ Yuda wɛtso ɔ mi ɔ, a yibɔ ji 74,600.

28 A ngma Isakar sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 29 nɛ nihi nɛ a ngma a biɛ ngɛ Isakar wɛtso ɔ mi ɔ, a yibɔ ji 54,400.

30 A ngma Zebulun sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 31 nɛ nihi nɛ a ngma a biɛ ngɛ Zebulun wɛtso ɔ mi ɔ, a yibɔ ji 57,400.

32 A ngma Yosef sisi bimɛ nɛ a je Efraim mi ɔ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 33 nɛ nihi nɛ a ngma a biɛ ngɛ Efraim wɛtso ɔ mi ɔ, a yibɔ ji 40,500.

34 A ngma Manase sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 35 nɛ nihi nɛ a ngma a biɛ ngɛ Manase wɛtso ɔ mi ɔ, a yibɔ ji 32,200.

36 A ngma Benyamin sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 37 nɛ nihi nɛ a ngma a biɛ ngɛ Benyamin wɛtso ɔ mi ɔ, a yibɔ ji 35,400.

38 A ngma Dan sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 39 nɛ nihi nɛ a ngma a biɛ ngɛ Dan wɛtso ɔ mi ɔ, a yibɔ ji 62,700.

40 A ngma Asher sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 41 nɛ nihi nɛ a ngma a biɛ ngɛ Asher wɛtso ɔ mi ɔ, a yibɔ ji 41,500.

42 A ngma Naftali sisi bimɛ a biɛ ngɛ a weku ɔ nya, kɛ a tsɛmɛ a we ɔmɛ a nya. A kane nyumuhi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ɔ kakaaka, 43 nɛ nihi nɛ a ngma a biɛ ngɛ Naftali wɛtso ɔ mi ɔ, a yibɔ ji 53,400.

44 Mose kɛ Aaron kɛ Israel ganɔ 12 ɔmɛ nɛ a ti nɔ fɛɛ nɔ da e wɛtso nane mi ɔ, ngma nimli nɛ ɔmɛ a biɛ. 45 Israel bi tsuo nɛ a ye kɛ je jeha 20 kɛ yaa nɛ a ma nyɛ ma tsu ta buli a ní tsumi ngɛ Israel ɔ, a ngma a biɛ ngɛ a tsɛmɛ a we ɔmɛ a nya, 46 nɛ nihi nɛ a ngma a biɛ ɔ tsuo a yibɔ ji 603,550.

47 Se Levi bi nɛ a ngɛ a kpɛti ɔ lɛɛ, a ngmɛ a biɛ ngɛ a tsɛmɛ a wɛtso ɔ nya. 48 Lɔ ɔ he ɔ, Yehowa de Mose ke: 49 “Levi wɛtso ɔ pɛ nɛ o ko ngma a biɛ, nɛ koo ngɔ a yibɔ kɛ piɛɛ Israel bi kpa amɛ a yibɔ ɔ he. 50 Moo hla Levi bi ɔmɛ nɛ a hyɛ bo tsu ɔ nɛ Odase Yemi Nɔ́ ɔ ngɛ mi ɔ, kɛ e mi ní ɔmɛ, kɛ e he nɔ́ fɛɛ nɔ́ nɔ. Mɛ lɛ a maa tloo bo tsu ɔ kɛ e mi ní ɔmɛ tsuo, nɛ mɛ lɛ a ma sɔmɔ ngɛ mi, nɛ mɛ lɛ a maa to si kɛ bɔle bo tsu ɔ. 51 Be fɛɛ be nɛ a kɛ bo tsu ɔ maa je he ko kɛ ya he kpa a, Levi bi ɔmɛ ji ni nɛmɛ nɛ a maa gbɛ. Nɛ ke a maa ma ekohu ɔ, Levi bi ɔmɛ nɔuu lɛ a maa ma. Nɔ fɛɛ nɔ nɛ e be jamɛ a he blɔ ɔ* nɛ́ e maa ba lejɛ ɔ, á gbe lɛ.

52 “Israel no fɛɛ Israel no nɛ́ é ma e bo tsu ngɛ he nɛ a ha lɛ kaa e to ɔ, nɔ fɛɛ nɔ nɛ e hi e kuu nɛ wɛtso etɛ lɛ ngɛ mi ɔ mi,* ngɛ a tabo ɔmɛ a nya. 53 Levi bi ɔmɛ nɛ́ a to si kɛ bɔle bo tsu ɔ nɛ Odase Yemi Nɔ́ ɔ ngɛ mi ɔ, konɛ ye mi mi nɛ ko fu Israel bi ɔmɛ a we asafo ɔ. Levi bi ɔmɛ ji nihi nɛ e sa kaa a hyɛ bo tsu ɔ nɛ Odase Yemi Nɔ́ ɔ ngɛ mi ɔ nɔ.”*

54 Israel ma a pee níhi tsuo nɛ Yehowa fã Mose ɔ. A pee jã a pɛ.

2 Jehanɛ ɔ, Yehowa kɛ Mose kɛ Aaron tu munyu, nɛ e de mɛ ke: 2 “Israel bi ɔmɛ nɛ́ a to si ngɛ he nɛ a kɛ ha a kuuhi nɛ wɛtso etɛɛtɛ lɛ ngɛ a mi ɔ. A ti nɔ fɛɛ nɔ nɛ e hi e tsɛmɛ a we ɔ aflaangaa a* kasa nya. Á to si kɛ bɔle kpe he bo tsu ɔ, nɛ a plɛ a hɛ mi kɛ tsɔɔ lɛ.

3 “Kuu nɛ wɛtso etɛ lɛ ngɛ mi maa to si tabo nya tabo nya ngɛ puje he blɔ. Yuda wɛtso ɔ lɛ maa nyɛɛ a hɛ mi. Yuda wɛtso ɔ ganɔ ji Nashon, Aminadab binyumu ɔ. 4 Nihi nɛ a ngma a biɛ ngɛ e tabo ɔ mi ɔ, a yibɔ ji 74,600. 5 Wɛtso nɛ maa to si ngɛ Yuda wɛtso ɔ kasa nya ji Isakar wɛtso ɔ; Isakar wɛtso ɔ ganɔ ji Netanel, Zuar binyumu ɔ. 6 Nihi nɛ a ngma a biɛ ngɛ e tabo ɔ mi ɔ, a yibɔ ji 54,400. 7 Wɛtso nɛ maa piɛɛ a he ji Zebulun wɛtso ɔ; Zebulun wɛtso ɔ ganɔ ji Eliab, Helon binyumu ɔ. 8 Nihi nɛ a ngma a biɛ ngɛ e tabo ɔ mi ɔ, a yibɔ ji 57,400.

9 “Nihi tsuo nɛ a ngma a biɛ ngɛ tabo ɔmɛ a mi ngɛ Yuda sito he ɔ, a yibɔ ji 186,400. Mɛ ji kekleekle kuu nɛ maa hia.

10 “Kuu nɛ wɛtso etɛ lɛ ngɛ mi maa to si tabo nya tabo nya ngɛ woyi je. Reuben wɛtso ɔ lɛ maa nyɛɛ a hɛ mi. Reuben wɛtso ɔ ganɔ ji Elizur, Shedeur binyumu ɔ. 11 Nihi nɛ a ngma a biɛ ngɛ e tabo ɔ mi ɔ, a yibɔ ji 46,500. 12 Wɛtso nɛ maa to si ngɛ e kasa nya ji Simeon wɛtso ɔ; Simeon wɛtso ɔ ganɔ ji Shelumiel, Zurishadai binyumu ɔ. 13 Nihi nɛ a ngma a biɛ ngɛ e tabo ɔ mi ɔ, a yibɔ ji 59,300. 14 Wɛtso nɛ maa piɛɛ a he ji Gad wɛtso ɔ; Gad wɛtso ɔ ganɔ ji Eliasaf, Reuel binyumu ɔ. 15 Nihi nɛ a ngma a biɛ ngɛ e tabo ɔ mi ɔ, a yibɔ ji 45,650.

16 “Nihi tsuo nɛ a ngma a biɛ ngɛ tabo ɔmɛ a mi ngɛ Reuben sito he ɔ, a yibɔ ji 151,450. Mɛ ji kuu enyɔne nɛ maa hia.

17 “Ke a kɛ kpe he bo tsu ɔ yaa he kpa a, Levi bi ɔmɛ nɛ a hi tabo kpa amɛ a kpɛti.

“Ke a yaa a, a nyɛɛ kaa bɔ nɛ a to mɛ ngɛ a sito he ɔmɛ ɔ, nɔ fɛɛ nɔ nɛ hi e blɔ he ngɛ e kuu nɛ wɛtso etɛ lɛ ngɛ mi ɔ mi.

18 “Kuu nɛ wɛtso etɛ lɛ ngɛ mi maa to si tabo nya tabo nya ngɛ pusinɔ he je. Efraim wɛtso ɔ lɛ maa nyɛɛ a hɛ mi. Efraim wɛtso ɔ ganɔ ji Elishama, Amihud binyumu ɔ. 19 Nihi nɛ a ngma a biɛ ngɛ e tabo ɔ mi ɔ, a yibɔ ji 40,500. 20 Wɛtso nɛ ma tsa e nɔ ji Manase wɛtso ɔ; Manase wɛtso ɔ ganɔ ji Gamaliel, Pedazur binyumu ɔ. 21 Nihi nɛ a ngma a biɛ ngɛ e tabo ɔ mi ɔ, a yibɔ ji 32,200. 22 Wɛtso nɛ maa piɛɛ a he ji Benyamin wɛtso ɔ; Benyamin wɛtso ɔ ganɔ ji Abidan, Gideoni binyumu ɔ. 23 Nihi nɛ a ngma a biɛ ngɛ e tabo ɔ mi ɔ, a yibɔ ji 35,400.

24 “Nihi tsuo nɛ a ngma a biɛ ngɛ tabo ɔmɛ a mi ngɛ Efraim sito he ɔ, a yibɔ ji 108,100. Mɛ ji kuu etɛne nɛ maa hia.

25 “Kuu nɛ wɛtso etɛ lɛ ngɛ mi maa to si tabo nya tabo nya ngɛ yiti je. Dan wɛtso ɔ lɛ maa nyɛɛ a hɛ mi. Dan wɛtso ɔ ganɔ ji Ahiezer, Amishadai binyumu ɔ. 26 Nihi nɛ a ngma a biɛ ngɛ e tabo ɔ mi ɔ, a yibɔ ji 62,700. 27 Wɛtso nɛ maa to si ngɛ e kasa nya ji Asher wɛtso ɔ; Asher wɛtso ɔ ganɔ ji Pagiel, Okran binyumu ɔ. 28 Nihi nɛ a ngma a biɛ ngɛ e tabo ɔ mi ɔ, a yibɔ ji 41,500. 29 Wɛtso nɛ maa piɛɛ a he ji Naftali wɛtso ɔ; Naftali wɛtso ɔ ganɔ ji Ahira, Enan binyumu ɔ. 30 Nihi nɛ a ngma a biɛ ngɛ e tabo ɔ mi ɔ, a yibɔ ji 53,400.

31 “Nihi tsuo nɛ a ngma a biɛ ngɛ Dan sito he ɔ, a yibɔ ji 157,600. Ngɛ kuuhi nɛ wɛtso etɛɛtɛ lɛ ngɛ a mi ɔ mi ɔ, mɛ ji nyagbe kuu nɛ maa hia.”

32 Israel bi nɛ a ngma a biɛ ngɛ a tsɛmɛ a we ɔmɛ a nya ji nɛ ɔmɛ nɛ; nihi nɛ a ngɛ sito he ɔmɛ nɛ a ngma a biɛ kɛ ha ta buli a ní tsumi ɔ, a yibɔ ji 603,550. 33 Se Levi bi ɔmɛ lɛɛ, a ngmɛ a biɛ kɛ piɛɛ we Israel bi kpa amɛ a he kaa bɔ nɛ Yehowa fã Mose ɔ. 34 Israel bi ɔmɛ pee nɔ́ fɛɛ nɔ́ nɛ Yehowa fã Mose ɔ. Bɔ nɛ a toɔ si ngɛ a kuuhi nɛ wɛtso etɛɛtɛ lɛ ngɛ a mi ɔ nya ha, kɛ bɔ nɛ a hiaa kɛ jeɔ a sito he ɔmɛ ji nɛ ɔ nɛ. A ti nɔ fɛɛ nɔ ngɛ́ e weku nya, ngɛ́ a tsɛmɛ ɔmɛ a we ɔmɛ a nya.

3 Ligbi nɛ Yehowa kɛ Mose tu munyu ngɛ Sinai Yoku ɔ nɔ ɔ, jamɛ a be ɔ mi ɔ, Aaron kɛ Mose a weku kpahi* ji nɛ ɔmɛ nɛ. 2 Aaron binyumu ɔmɛ a biɛhi ji nɛ ɔmɛ nɛ: e kekleekle bi ɔ biɛ ji Nadab, nɛ e senihi ji Abihu, Eleazar, kɛ Itamar. 3 Aaron binyumu ɔmɛ nɛ a pɔ mɛ nu, nɛ a wo mɛ osɔfo* konɛ a sɔmɔ kaa osɔfohi ɔ a biɛhi ji nɛ ɔmɛ nɛ. 4 Se Nadab kɛ Abihu gbo ngɛ Yehowa hɛ mi benɛ a sã afɔle nɛ a be he blɔ kaa a sãã ngɛ Yehowa hɛ mi ngɛ Sinai nga a nɔ ɔ; a be binyumuhi. Se Eleazar kɛ Itamar ya nɔ nɛ a piɛɛ a tsɛ Aaron he kɛ sɔmɔ kaa osɔfohi.

5 Kɛkɛ nɛ Yehowa de Mose ke: 6 “Ngɔɔ Levi wɛtso ɔ kɛ ba hɛ mi, nɛ o ngɔ mɛ kɛ ba da osɔfo Aaron hɛ mi konɛ a sɔmɔ lɛ. 7 Á tsu a blɔ nya ní tsumi ɔmɛ kɛ ye bua Aaron kɛ ma a tsuo ngɛ kpe he bo tsu ɔ hɛ mi. Lɔ ɔ ji sɔmɔmi ní tsumi nɛ a kɛ wo a dɛ kaa a tsu ngɛ bo tsu ɔ he. 8 Á hyɛ kpe he bo tsu ɔ mi ní ɔmɛ tsuo a nɔ, nɛ́ a tsu sɔmɔmi ní tsumi nɛ a kɛ wo a dɛ kaa a tsu ngɛ kpe he bo tsu ɔ he kɛ ye bua Israel bi ɔmɛ ɔ. 9 Ngɔɔ Levi bi ɔmɛ kɛ ha Aaron kɛ e bimɛ ɔmɛ. Mɛ ji nihi nɛ a ngɔ mɛ kɛ je Israel bi ɔmɛ a kpɛti kɛ ha lɛ. 10 Moo hla Aaron kɛ e bimɛ ɔmɛ nɛ a tsu níhi nɛ e sa kaa a tsu kaa osɔfohi ɔ. Nɔ fɛɛ nɔ nɛ e be jamɛ a he blɔ ɔ* nɛ́ e maa ba lejɛ ɔ, á gbe lɛ.”

11 Yehowa ya nɔ nɛ e kɛ Mose tu munyu, nɛ e de lɛ ke: 12 “Hyɛ! Imi lɛɛ, i hla Levi bi ɔmɛ ngɛ Israel bi ɔmɛ a kpɛti kɛ to Israel bi ɔmɛ a kekleekle bimɛ tsuo* a nane mi, nɛ Levi bi ɔmɛ maa pee ye níhi. 13 Ejakaa kekleekle bi fɛɛ kekleekle bi ɔ, ye nɔ́. Ligbi ɔ nɛ i gbe kekleekle bi fɛɛ kekleekle bi ngɛ Egipt zugba a nɔ ɔ, i tsu kekleekle bi fɛɛ kekleekle bi he kɛ ha ye he, nɔmlɔ bi jio, lohwe bi jio. A maa pee ye níhi. Imi ji Yehowa.”

14 Yehowa ya nɔ nɛ e kɛ Mose tu munyu ngɛ Sinai nga a nɔ, nɛ e de lɛ ke: 15 “Ngmaa Levi binyumu ɔmɛ a biɛ ngɛ a tsɛmɛ a wehi kɛ a wekuhi a nya. Nyumu fɛɛ nyumu nɛ e ye kɛ je nyɔhiɔ kake kɛ yaa a, ngmaa e biɛ.” 16 Lɔ ɔ he ɔ, Mose ngma a biɛ ngɛ Yehowa fami ɔ nya; e pee kaa bɔ nɛ a fã lɛ ɔ pɛpɛɛpɛ. 17 Levi binyumu ɔmɛ a biɛhi ji nɛ ɔmɛ nɛ: Gershon, Kohat, kɛ Merari.

18 Gershon binyumu ɔmɛ a biɛhi ngɛ a wekuhi a nya ji nɛ ɔmɛ nɛ: Libni kɛ Shimei.

19 Kohat binyumu ɔmɛ ngɛ a wekuhi a nya ji Amram, Izhar, Hebron, kɛ Uziel.

20 Merari binyumu ɔmɛ ngɛ a wekuhi a nya ji Mahli kɛ Mushi.

Levi bi ɔmɛ a wekuhi ngɛ a tsɛmɛ a wehi a nya ji nɛ ɔmɛ nɛ.

21 Gershon mi nɛ Libni bi ɔmɛ a weku ɔ kɛ Shimei bi ɔmɛ a weku ɔ je. Gershon bi ɔmɛ a wekuhi ji nɛ ɔmɛ nɛ. 22 Nyumuhi tsuo nɛ ngɛ a kpɛti nɛ a ye kɛ je nyɔhiɔ kake kɛ yaa nɛ a ngma a biɛ ɔ, a yibɔ ji 7,500. 23 Gershon bi ɔmɛ a weku ɔmɛ to si ngɛ kpe he bo tsu ɔ se kɛ yaa pusinɔ he blɔ. 24 Gershon bi ɔmɛ a tsɛmɛ a we ɔ ganɔ ji Eliasaf, Lael binyumu ɔ. 25 Gershon binyumu ɔmɛ a blɔ nya ní tsumi ngɛ kpe he bo tsu ɔ mi ji kaa a maa hyɛ bo tsu ɔ, kɛ bo tsu ɔ nɔ hami ní slɔɔto ɔmɛ, kɛ kpe he bo tsu ɔ nya patesia a* nɔ. 26 Mɛ nɔuu lɛ a maa hyɛ bohi nɛ a wo kɛ po yale ɔ, kɛ bo nɛ ngɛ yale ɔ nɛ bɔle bo tsu ɔ kɛ afɔle sami la tɛ ɔ nya a, kɛ yale ɔ he kpa amɛ, kɛ ní tsumihi tsuo nɛ kɔɔ ní nɛ ɔmɛ a he ɔ nɔ.

27 Kohat mi nɛ Amram bi ɔmɛ a weku ɔ, Izhar bi ɔmɛ a weku ɔ, Hebron bi ɔmɛ a weku ɔ, kɛ Uziel bi ɔmɛ a weku ɔ je. Kohat bi ɔmɛ a wekuhi ji nɛ ɔmɛ nɛ. 28 Nyumuhi tsuo nɛ a ye kɛ je nyɔhiɔ kake kɛ yaa a, a yibɔ ji 8,600; a blɔ nya ní tsumi ji kaa a maa hyɛ he klɔuklɔu ɔ nɔ. 29 Kohat binyumu ɔmɛ a weku ɔ to si ngɛ bo tsu ɔ woyi je. 30 Kohat bi ɔmɛ a tsɛmɛ a we ɔ weku ɔmɛ a ganɔ ji Elizafan, Uziel binyumu ɔ. 31 A blɔ nya ní tsumi ji kaa a maa hyɛ Daka a, kɛ okplɔɔ ɔ, kɛ kane tso ɔ, kɛ la tɛ ɔmɛ, kɛ níhi nɛ a kɛ sɔmɔɔ ngɛ he klɔuklɔu ɔ, kɛ patesia a,* kɛ ní tsumihi tsuo nɛ kɔɔ ní nɛ ɔmɛ a he ɔ nɔ.

32 Levi bi ɔmɛ a ganɔ nɔkɔtɔma ji osɔfo Aaron binyumu Eleazar. Lɛ nɛ e hyɛɔ nihi nɛ a tsuɔ ní ngɛ he klɔuklɔu ɔ a nɔ.

33 Merari mi nɛ Mahli bi ɔmɛ a weku ɔ kɛ Mushi bi ɔmɛ a weku ɔ je. Merari wekuhi ji nɛ ɔmɛ nɛ. 34 Nyumuhi tsuo nɛ a ye kɛ je nyɔhiɔ kake kɛ yaa nɛ a ngma a biɛ ɔ, a yibɔ ji 6,200. 35 Merari bi ɔmɛ a tsɛmɛ a we ɔ weku ɔmɛ a ganɔ ji Zuriel, Abihail binyumu ɔ. A to si ngɛ bo tsu ɔ yiti je. 36 Merari binyumu ɔmɛ a blɔ nya ní tsumi ji kaa a maa hyɛ bo tsu ɔ si mami tso ɔmɛ, kɛ e tso tlalatlala amɛ, kɛ e titima amɛ, kɛ e nɔ dami ní ɔmɛ, kɛ níhi tsuo nɛ ngɛ bo tsu ɔ mi ɔ, kɛ ní nɛ ɔmɛ a he ní tsumi ɔmɛ tsuo nɔ. 37 Mɛ kɛ̃ nɛ a maa hyɛ titimahi nɛ a kɛ po yale ɔ kɛ a nɔ dami ní ɔmɛ, a he plɛɛko ɔmɛ, kɛ a he kpa amɛ a nɔ.

38 Mose kɛ Aaron kɛ Aaron binyumu ɔmɛ ji ni nɛmɛ nɛ a maa to si ngɛ bo tsu ɔ hɛ mi kɛ yaa puje he blɔ, nɛ ji kpe he bo tsu ɔ hɛ mi. A blɔ nya ní tsumi ji kaa a maa hyɛ jami he ɔ nɔ ngɛ Israel bi ɔmɛ a nane mi. Nɔ fɛɛ nɔ nɛ e be jamɛ a he blɔ ɔ* nɛ́ e maa ba lejɛ ɔ, á gbe lɛ.

39 Levi bi tsuo nɛ a ji nyumuhi nɛ a ye kɛ je nyɔhiɔ kake kɛ yaa nɛ Mose kɛ Aaron ngma a biɛ ngɛ a wekuhi a nya kaa bɔ nɛ Yehowa fã a, a yibɔ ji 22,000.

40 Jehanɛ ɔ, Yehowa de Mose ke: “Ngmaa Israel bi ɔmɛ a bitɛtehi nɛ a ye kɛ je nyɔhiɔ kake kɛ yaa a tsuo a biɛ, kane mɛ nɛ o ngma a biɛhi kɛ fɔ si. 41 Moo hla Levi bi ɔmɛ ha mi ngɛ Israel bi ɔmɛ a kekleekle bimɛ tsuo a nane mi, nɛ́ o hla Levi bi ɔmɛ a lohwehi kɛ to Israel bi ɔmɛ a lohwehi a kekleekle bimɛ tsuo a nane mi. Imi ji Yehowa.” 42 Kɛkɛ nɛ Mose ngma kekleekle bimɛ nɛ a ngɛ Israel bi ɔmɛ a kpɛti ɔ tsuo a biɛ kaa bɔ nɛ Yehowa fã lɛ ɔ. 43 Bitɛtehi nɛ a ye kɛ je nyɔhiɔ kake kɛ yaa nɛ a ngma a biɛ ɔ tsuo a yibɔ ji 22,273.

44 Yehowa ya nɔ nɛ e kɛ Mose tu munyu, nɛ e de lɛ ke: 45 “Moo hla Levi bi ɔmɛ kɛ to kekleekle bimɛ nɛ a ngɛ Israel bi ɔmɛ a kpɛti ɔ tsuo a nane mi, nɛ́ o hla Levi bi ɔmɛ a lohwehi kɛ to Israel bi ɔmɛ a lohwehi a nane mi. Levi bi ɔmɛ nɛ́ a pee ye nɔ́. Imi ji Yehowa. 46 Akɛnɛ Israel bi ɔmɛ a kekleekle bi ɔmɛ hiɛ pe Levi bi ɔmɛ 273 he je ɔ, bɔ nɛ pee nɛ a kpɔ̃ ni nɛmɛ nɛ a be nɔ ɔ, 47 a ti nɔ fɛɛ nɔ nɛ ngɔ shekel* enuɔ kɛ ba kaa e kpɔmi sika ngɛ he klɔuklɔu ɔ shekel ɔ nya.* Shekel kake ji gera* 20. 48 Ngɔɔ sika a kɛ ha Aaron kɛ e binyumu ɔmɛ kaa ni nɛmɛ nɛ a yibɔ ɔ be nɔ ɔ a kpɔmi sika.” 49 Lɔ ɔ he ɔ, Mose ngɔ kpɔmi sika a ngɛ ni nɛmɛ nɛ a yibɔ be Levi bi ɔmɛ a yibɔ nɔ ɔ a dɛ, nɛ e kɛ kpɔ̃ mɛ. 50 Sika nɛ e ngɔ ngɛ Israel bi ɔmɛ a kekleekle bi ɔmɛ a dɛ ɔ ji shekel 1,365 ngɛ he klɔuklɔu ɔ shekel ɔ nya. 51 Kɛkɛ nɛ Mose ngɔ kpɔmi sika a kɛ ha Aaron kɛ e bimɛ ɔmɛ kaa bɔ nɛ Yehowa de lɛ ɔ; Mose pee kaa bɔ nɛ Yehowa fã lɛ ɔ pɛpɛɛpɛ.

4 Jehanɛ ɔ, Yehowa kɛ Mose kɛ Aaron tu munyu, nɛ e de mɛ ke: 2 “Nyɛɛ kane Kohat binyumu ɔmɛ nɛ a ngɛ Levi binyumu ɔmɛ a kpɛti ɔ ngɛ a wekuhi a nya, kɛ a tsɛmɛ a we ɔmɛ a nya. 3 Nyɛɛ kane ni nɛmɛ nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a tsuɔ ní ngɛ kpe he bo tsu ɔ mi ɔ he ɔ.

4 “Ní tsumi nɛ Kohat binyumu ɔmɛ ma tsu ngɛ kpe he bo tsu ɔ mi ji nɛ ɔ nɛ. E ji ní tsumi nɛ ngɛ klɔuklɔu pe kulaa. 5 Ke ma a maa hia kɛ je he nɛ a ngɛ ɔ kɛ ya he kpa a, Aaron kɛ e binyumu ɔmɛ maa ba kpe he bo tsu ɔ mi, nɛ a ma ba je tsu mi pomi bo ɔ kɛ ha Odase daka a nɔ. 6 A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha daka a nɔ, nɛ a maa ngɔ bo bluu kɛ ha nɔ, nɛ a maa ngɔ tsohi nɛ a kɛ hɛɛɔ daka a kɛ hɔɔ ga amɛ a mi.

7 “Jehanɛ se hu ɔ, a maa ngɔ bo bluu kɛ ha okplɔɔ nɛ a kɛ hɛ mi mami abolo ɔ pueɔ nɔ ɔ nɔ, nɛ a maa ngɔ kã amɛ, kɛ kplu wawi ɔmɛ, kɛ tsesi ɔmɛ, kɛ kplu nguahi nɛ a kɛ sãã dã afɔle ɔ kɛ ma nɔ; hɛ mi mami abolo ɔ nɛ hi nɔ. 8 A maa ngɔ bo tsutsu kɛ ha nɔ, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ hɛɛɔ ɔ kɛ hɔɔ ga amɛ a mi. 9 Jehanɛ ɔ, a maa ngɔ bo bluu kɛ ha kane tso ɔ, kɛ e kane ɔmɛ, kɛ abɛɛle ɔmɛ, kɛ e la jemi ní ɔmɛ, kɛ e nu tɔ ɔmɛ nɛ a kɛ kane ɔ mi nu woɔ a mi ɔ a he. 10 A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha kane tso ɔ kɛ e he ní ɔmɛ tsuo a he, nɛ a kɛ maa ma tso nɛ a kɛ maa hɛɛ ɔ nɔ. 11 A maa ngɔ bo bluu kɛ ha sika tsu afɔle sami la tɛ ɔ nɔ, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ maa hɛɛ ɔ kɛ hɔɔ ga amɛ a mi. 12 Lɔ ɔ se ɔ, a maa ngɔ níhi tsuo nɛ a kɛ sɔmɔɔ daa ngɛ he klɔuklɔu ɔ kɛ wo bo bluu mi, nɛ a maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha he, nɛ a kɛ maa ma tso nɛ a kɛ maa hɛɛ ɔ nɔ.

13 “Á muɔɔ la zu* ɔ ngɛ afɔle sami la tɛ ɔ mi, nɛ́ a ngɔ bo nɛ hɛɛ alamua tu su nɛ a kɛ lohwe he womi pee kɛ ha nɔ. 14 A maa ngɔ níhi tsuo nɛ a kɛ tsuɔ ní ngɛ afɔle sami la tɛ ɔ he ɔ kɛ ma afɔle sami la tɛ ɔ nɔ: la jemi ní ɔmɛ, fɔɔki ɔmɛ, sofi ɔmɛ, kɛ tsesi ɔmɛ, nɛ ji níhi tsuo nɛ a kɛ tsuɔ ní ngɛ afɔle sami la tɛ ɔ he ɔ. A maa ngɔ nɔ́ nɔ hami nɔ́ nɛ a kɛ pa mi gbe he womi pee kɛ ha nɔ, nɛ a maa ngɔ tsohi nɛ a kɛ hɛɛɔ ɔ kɛ hɔɔ ga amɛ a mi.

15 “Ke ma a ngɛ hiae kɛ yaa he kpa a, Aaron kɛ e binyumu ɔmɛ nɛ a ngɔ nɔ́ kɛ ha ní klɔuklɔu ɔmɛ kɛ níhi tsuo nɛ a ngɛ he klɔuklɔu ɔ he. Ke a gbe nya a, Kohat binyumu ɔmɛ nɛ a ba nɛ a ba tloo, se a ko ta ní klɔuklɔu ɔmɛ a he, ke pi jã a, a ma gbo. Ní tsumi nɛ Kohat binyumu ɔmɛ ma tsu* ngɛ kpe he bo tsu ɔ he ji nɛ ɔ nɛ.

16 “Osɔfo Aaron binyumu Eleazar ji nɔ nɛ maa hyɛ nu nɛ a kɛ woɔ kane ɔmɛ a mi ɔ, tsopa kɛ e he via a, ngma afɔle nɛ a sãã daa a, kɛ nɔ pɔmi nu ɔ nɔ. Lɛ nɛ e maa hyɛ bo tsu ɔ tsuo, kɛ níhi tsuo nɛ ngɛ mi ɔ, kɛ he klɔuklɔu ɔ, kɛ níhi nɛ ngɛ lejɛ ɔ a nɔ.”

17 Yehowa ya nɔ nɛ e kɛ Mose kɛ Aaron tu munyu, nɛ e de mɛ ke: 18 “Nyɛ ko ha nɛ Kohat bi ɔmɛ a weku ɔmɛ a sisi nɛ gu ngɛ Levi bi ɔmɛ a kpɛti. 19 Nyɛɛ pee nɔ́ nɛ ɔ ha mɛ konɛ a yi nɛ ná wami, nɛ a ko ba gbo akɛnɛ a hɛ kɛ su níhi nɛ a ngɛ klɔuklɔu pe kulaa a he ɔ he je. Aaron kɛ e binyumu ɔmɛ nɛ a ya bo tsu ɔ mi nɛ a ya tsɔɔ a ti nɔ fɛɛ nɔ ní tsumi nɛ e ma tsu, kɛ nɔ́ nɛ e maa tloo. 20 Á ko ba bo tsu ɔ mi nɛ a ba na ní klɔuklɔu ɔmɛ hɛngmɛfia po, ke pi jã a, a ma gbo.”

21 Jehanɛ ɔ, Yehowa kɛ Mose tu munyu, nɛ e de lɛ ke: 22 “Moo kane Gershon binyumu ɔmɛ ngɛ a tsɛmɛ a we ɔmɛ a nya, kɛ a wekuhi a nya. 23 Moo ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ. 24 Ní tsumi nɛ a kɛ wo Gershon bi ɔmɛ a weku ɔmɛ a dɛ, kɛ níhi nɛ a maa tloo ji nɛ ɔmɛ nɛ: 25 A maa tloo bo tsu ɔ he bo ɔmɛ, kpe he bo tsu ɔ, e nɔ hami nɔ́ ɔ, kɛ nɔ́ nɔ hami nɔ́ nɛ a kɛ pa mi gbe he womi pee nɛ ngɛ nɔ ɔ, kɛ kpe he bo tsu ɔ nya patesia a,* 26 bo nɛ a wo kɛ po yale ɔ, yale ɔ nɛ bɔle bo tsu ɔ kɛ afɔle sami la tɛ ɔ nya patesia a, kɛ a kpa amɛ, kɛ e he ní ɔmɛ tsuo, kɛ nɔ́ fɛɛ nɔ́ nɛ a kɛ sɔmɔɔ ngɛ lejɛ ɔ. A ní tsumi ji nɛ ɔ nɛ. 27 Aaron kɛ e binyumu ɔmɛ ji nihi nɛ a maa hyɛ ní tsumihi tsuo nɛ Gershon bi ɔmɛ ma tsu, kɛ tlomihi nɛ a maa tloo ɔ nɔ; nyɛɛ ngɔ ní nɛ ɔmɛ tsuo kɛ ha mɛ nɛ a tloo. Enɛ ɔ maa pee a ní tsumi. 28 Ní tsumi nɛ Gershon bi ɔmɛ a weku ɔmɛ ma tsu ngɛ kpe he bo tsu ɔ mi ji nɛ ɔ nɛ, nɛ nɔ nɛ maa hyɛ a nɔ ji osɔfo Aaron binyumu Itamar.

29 “Merari binyumu ɔmɛ lɛɛ, moo ngma a biɛ ngɛ a weku ɔ kɛ a tsɛmɛ a we ɔ nya. 30 Moo ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ. 31 Ke a ngɛ sɔmɔe ngɛ kpe he bo tsu ɔ he ɔ, níhi nɛ a maa tloo ji nɛ ɔmɛ nɛ: bo tsu ɔ sima tso ɔmɛ, e tso tlalatlala amɛ, e titima amɛ, e nɔ dami ní ɔmɛ; 32 titima amɛ nɛ a kɛ po yale ɔ, a nɔ dami ní ɔmɛ, a he plɛɛko ɔmɛ, kɛ a he kpa amɛ, kɛ a he ní ɔmɛ tsuo, kɛ níhi tsuo nɛ a kɛ tsuɔ ní nɛ ɔmɛ a he ní ɔ. Nyɛ tsɛ a ti nɔ fɛɛ nɔ biɛ nɛ nyɛɛ tsɔɔ lɛ nɔ́ nɛ e maa tloo. 33 Bɔ nɛ Merari binyumu ɔmɛ a weku ɔmɛ ma plɛ kɛ tsu ní ngɛ kpe he bo tsu ɔ mi ji nɛ ɔ nɛ. Osɔfo Aaron binyumu Itamar lɛ maa hyɛ a nɔ.”

34 Lɔ ɔ he ɔ, Mose kɛ Aaron kɛ ganɔhi nɛ a ngɛ asafo ɔ mi ɔ ngma Kohat bi ɔmɛ a binyumu ɔmɛ a biɛ ngɛ a wekuhi kɛ a tsɛmɛ a we ɔ nya. 35 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ. 36 Ni nɛmɛ nɛ a ngma a biɛ ngɛ a wekuhi a nya a tsuo a yibɔ ji 2,750. 37 Ni nɛ ɔmɛ ji nihi nɛ a ngma a biɛ ngɛ Kohat bi ɔmɛ a weku ɔmɛ a mi ɔ nɛ, nɛ ji nihi tsuo nɛ sɔmɔɔ ngɛ kpe he bo tsu ɔ mi ɔ. Mose kɛ Aaron ngma a biɛ kaa bɔ nɛ Yehowa fã Mose ɔ.

38 A ngma Gershon binyumu ɔmɛ a biɛ ngɛ a wekuhi kɛ a tsɛmɛ a we ɔ nya. 39 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ. 40 Ni nɛmɛ nɛ a ngma a biɛ ngɛ a wekuhi a nya kɛ a tsɛmɛ a we ɔ nya a tsuo a yibɔ ji 2,630. 41 Nihi nɛ a ngma a biɛ ngɛ Gershon binyumu ɔmɛ a weku ɔmɛ a mi ji nɛ ɔ nɛ, nɛ ji nihi tsuo nɛ a sɔmɔɔ ngɛ kpe he bo tsu ɔ mi ɔ. Mose kɛ Aaron ngma a biɛ kaa bɔ nɛ Yehowa fã a.

42 A ngma Merari binyumu ɔmɛ a biɛ ngɛ a wekuhi kɛ a tsɛmɛ a we ɔ nya. 43 A ngma nihi tsuo nɛ a ye kɛ je jeha 30 kɛ ya si jeha 50 nɛ a piɛɛ kuu nɛ a ngɔ ní tsumi kɛ wo a dɛ ngɛ kpe he bo tsu ɔ mi ɔ he ɔ a biɛ. 44 Ni nɛmɛ nɛ a ngma a biɛ ngɛ a wekuhi a nya a, a yibɔ ji 3,200. 45 Nihi nɛ Mose kɛ Aaron ngma a biɛ ngɛ Merari binyumu ɔmɛ a weku ɔmɛ a mi kaa bɔ nɛ Yehowa fã Mose ɔ ji nɛ ɔ nɛ.

46 Mose kɛ Aaron kɛ Israel ganɔ ɔmɛ ngma Levi bi nɛ ɔmɛ tsuo a biɛ ngɛ a wekuhi kɛ a tsɛmɛ a we ɔmɛ a nya; 47 a ye kɛ je jeha 30 kɛ ya si jeha 50, nɛ a ha mɛ tsuo ní tsumi kaa a sɔmɔ, nɛ́ a tloo kpe he bo tsu ɔ kɛ e he ní ɔmɛ. 48 Nihi nɛ a ngma a biɛ ɔ tsuo a yibɔ ji 8,580. 49 A ngma a biɛ kaa bɔ nɛ Yehowa fã Mose ɔ, nɔ fɛɛ nɔ kɛ ní tsumi nɛ a ha lɛ kɛ tlomi nɛ e maa tloo; a ngma a biɛ kaa bɔ nɛ Yehowa fã Mose ɔ pɛpɛɛpɛ.

5 Yehowa kɛ Mose tu munyu ekohu, nɛ e de lɛ ke: 2 “Fã Israel bi ɔmɛ nɛ a je nɔ fɛɛ nɔ nɛ e ji kpititsɛ, kɛ nɔ fɛɛ nɔ nɛ nyu ngɛ bee ngɛ e he, kɛ nɔ fɛɛ nɔ nɛ e ta gbogboe* he nɛ e he tsɔ we ɔ kɛ je sito he ɔ. 3 Nyumuhi jio, yihi jio, nyɛ je mɛ kpo. Nyɛ je mɛ kɛ ho sito he ɔ se ya konɛ a ko ble nihi nɛ i ngɛ* a kpɛti ɔ a sito he ɔmɛ.” 4 Lɔ ɔ he ɔ, Israel bi ɔmɛ pee jã, nɛ a je jamɛatsɛmɛ ɔmɛ kɛ ho sito he ɔ se ya. Israel bi ɔmɛ pee kaa bɔ nɛ Yehowa de Mose ɔ pɛpɛɛpɛ.

5 Yehowa ya nɔ nɛ e kɛ Mose tu munyu, nɛ e de lɛ ke: 6 “Mo de Israel bi ɔmɛ ke, ‘Ke nyumu ko aloo yo ko pee yayami nɛ adesahi peeɔ ɔ eko, nɛ e yi Yehowa anɔkuale ɔ, jamɛ a nɔ ɔ* ye fɔ. 7 E jaje yayami nɛ e* pee ɔ, nɛ e wo yayami nɛ e* pee ɔ he hiɔ sisiisi kaa nane mi tomi nɔ́, nɛ e* ngɔ nane mi tomi nɔ́ ɔ mi dlami enuɔ mi kake kɛ piɛɛ he; é ngɔ kɛ ha nɔ nɛ e tɔ̃ e nɔ ɔ. 8 Se ke nɔ nɛ a tɔ̃ e nɔ ɔ gbo nɛ e be weku no tutuutu nɛ e maa ngɔ nane mi tomi nɔ́ ɔ, lɛɛ á kpale kɛ ya ha Yehowa, nɛ e maa pee osɔfo ɔ nɔ́. Enɛ ɔ maa piɛɛ agbosu nɛ a kɛ maa sã kpatami afɔle kɛ ha lɛ ɔ he.

9 “‘Yemi kɛ buami fɛɛ yemi kɛ buami nɛ ngɛ klɔuklɔu nɛ Israel bi ɔmɛ kɛ ma ha osɔfo ɔ maa pee e nɔ́. 10 Nɔ́ klɔuklɔu fɛɛ nɔ́ klɔuklɔu nɛ nɔ ko ngɛ ɔ, e maa pee e nɔ́ kulaa. Nɔ́ fɛɛ nɔ́ nɛ nɔ ko maa ngɔ kɛ ba ha osɔfo ɔ, maa pee osɔfo ɔ nɔ́.’”

11 Yehowa ya nɔ nɛ e kɛ Mose tu munyu, nɛ e de lɛ ke: 12 “O kɛ Israel bi ɔmɛ nɛ tu munyu, nɛ o de mɛ ke, ‘Nɔ́ nɛ nyɛɛ pee ji nɛ ɔ nɛ; ke nyumu ko yo je e se nɛ e yi lɛ anɔkuale, 13 nɛ nyumu kpa kɛ lɛ ya ná bɔmi, se e kɛ nɔ́ nɛ ɔ laa e huno ɔ nɛ nɔ ko hu li, nɛ e kɛ nɔ́ nɛ ɔ ble e he, se a nɛ odase ko, nɛ a nui lɛ hulɔ ɔ: 14 Yo ɔ ble e he niinɛ jio, e ble we e he jio, ke e huno ɔ bɔni hunga jemi nɛ e yi mi tɛ lɛ ngɛ e yo ɔ he, nɛ e susu kaa e yi lɛ anɔkuale ɔ, 15 nyumu ɔ nɛ ngɔ e yo ɔ kɛ ba osɔfo ɔ ngɔ, nɛ́ e ngɔ níhi nɛ a kɛ maa sã afɔle ha yo ɔ, nɛ ji barli* mamu lita enyɔ* kɛ piɛɛ he. E ko plɛ nu kɛ pue nɔ, nɛ e ko ngɔ ohɛ kɛ pue nɔ, ejakaa e ji hunga jemi ngma afɔle, nɛ ji ngma afɔle nɛ ma ha nɛ a na ke ji nɔ ɔ ye fɔ loo e yi fɔ.

16 “‘Osɔfo ɔ maa ngɔ yo ɔ kɛ ba da Yehowa hɛ mi. 17 Osɔfo ɔ maa yɛ nyu klɔuklɔu kɛ wo zu buɛ mi, nɛ osɔfo ɔ ma piti zu ngɛ zugba ngɛ bo tsu ɔ mi kɛ wo nyu ɔ mi. 18 Kɛkɛ ɔ, osɔfo ɔ ma ha nɛ yo ɔ ma ba da Yehowa hɛ mi, nɛ e maa pɛne yo ɔ yi bwɔmi kɛ pue e nɔ, nɛ e maa ngɔ ngma afɔle ɔ, nɛ ji hunga jemi ngma afɔle ɔ kɛ wo yo ɔ dɛ mi kaa kaimi nɔ́, nɛ osɔfo ɔ maa hɛɛ nyu nɛ dooɔ nɛ ngɔɔ gbiɛmi kɛ baa a ngɛ e dɛ mi.

19 “‘Lɔ ɔ se ɔ, osɔfo ɔ ma ha nɛ yo ɔ nɛ kã kita; e ma de yo ɔ ke: “Ke nyumu kpa ko kɛ mo ná we bɔmi be mi nɛ o ngɛ o huno ɔ sisi, nɛ o ji o huno ɔ se nɛ́ o kɛ ble o he ɔ, lɛɛ o maa ye o he ngɛ nyu nɛ dooɔ nɛ ɔ, nɛ e ngɔɔ gbiɛmi kɛ baa a he. 20 Se ke o je o huno ɔ se nɛ o ble o he be mi nɛ o ngɛ o huno ɔ sisi, nɛ o kɛ nyumu kpa ya ná bɔmi ngɛ o huno ɔ se ɔ,—” 21 Jehanɛ ɔ, osɔfo ɔ ma ha nɛ́ yo ɔ nɛ kã gbiɛmi kita, nɛ osɔfo ɔ ma de yo ɔ ke: “Yehowa nɛ ha nɛ o plɛ pee gbiɛmi kɛ kita kami nɔ́ ngɛ o ma mi bi ɔmɛ a kpɛti, nɛ́ Yehowa nɛ ha nɛ o fiɔ* nɛ kplɔ,* nɛ o mi mi nɛ pee agbo. 22 Nyu nɛ ngɔɔ gbiɛmi kɛ baa nɛ ɔ maa sɛ o mi ní mi, nɛ e ma ha nɛ o mi mi maa pee agbo, nɛ o fiɔ* ma kplɔ.”* Kɛkɛ ɔ, yo ɔ nɛ e he nɔ ke: “Amen! Amen!”*

23 “‘Jehanɛ ɔ, osɔfo ɔ nɛ ngma gbiɛmi nɛ ɔmɛ kɛ wo womi mi nɛ e fɔ kɛ wo nyu nɛ dooɔ ɔ mi. 24 Lɔ ɔ se ɔ, e ma ha nɛ yo ɔ nɛ nu nyu nɛ dooɔ nɛ e ngɔɔ gbiɛmi kɛ baa a, nɛ nyu nɛ ngɔɔ gbiɛmi kɛ baa a maa sɛ yo ɔ mi mi nɛ e maa doo ngɛ e mi mi. 25 Osɔfo ɔ maa ngɔ hunga jemi ngma afɔle ɔ ngɛ yo ɔ dɛ, nɛ e maa fɔ̃ ngma afɔle ɔ kɛ ya kɛ ba ngɛ Yehowa hɛ mi, nɛ e maa ngɔ kɛ ba afɔle sami la tɛ ɔ he. 26 Osɔfo ɔ ma piti ngma afɔle ɔ dɛ kɔkɔ kake kaa kaimi afɔle,* nɛ e maa sã ngɛ afɔle sami la tɛ ɔ nɔ, nɛ lɔ ɔ se ɔ, e ma ha nɛ yo ɔ maa nu nyu ɔ. 27 Ke e ha nɛ yo ɔ nu nyu ɔ, nɛ e ngɛ mi niinɛ kaa e ble e he nɛ e yi e huno ɔ anɔkuale ɔ, nyu nɛ ngɔɔ gbiɛmi kɛ baa a maa sɛ e mi mi nɛ e maa pee doomi, nɛ e mi maa fu agbo, nɛ e fiɔ* ma kplɔ,* nɛ e ma plɛ pee gbiɛmi nɔ́ ngɛ e ma mi bi ɔmɛ a kpɛti. 28 Se ke yo ɔ ble we e he nɛ e he tsɔ ɔ, e maa ye e he kɛ je jamɛ a tue gblami ɔ he, nɛ e ma nyɛ maa ngɔ hɔ nɛ́ e fɔ bimɛ.

29 “‘Mlaa nɛ kɔɔ hunga jemi he ji nɛ ɔ nɛ, ke e ba kaa yo ko je e huno se, nɛ e ble e he be mi nɛ e ngɛ e huno ɔ sisi, 30 aloo ke nyumu ko bɔni hunga jemi akɛnɛ e susu kaa e yo yi lɛ anɔkuale he je ɔ, e ha nɛ yo ɔ nɛ ya da Yehowa hɛ mi, nɛ́ osɔfo ɔ nɛ ngɔ mlaa nɛ ɔ kɛ tsu ní ngɛ yo ɔ blɔ fa mi. 31 A be nyumu ɔ fɔ bue, se yo ɔ lɛɛ ke e ye fɔ niinɛ ɔ, lɛ nitsɛ e yayami maa tloo lɛ.’”

6 Yehowa ya nɔ nɛ e kɛ Mose tu munyu, nɛ e de lɛ ke: 2 “O kɛ Israel bi ɔmɛ nɛ tu munyu, nɛ́ o de mɛ ke, ‘Ke nyumu ko loo yo ko kã kita klɛdɛɛ kaa e maa pee Nazir no* ha Yehowa a, 3 é yu e he ngɛ wai kɛ dã kpahi nɛ a nya wa a he. É ko nu wai nɛ kuã aloo dã fɛɛ dã nɛ nya wa nɛ kuã. É ko nu nɔ́ ko nɛ a kɛ wai yiblii pee, nɛ e ko ye wai yiblii hulɔ, mumu jio, gbigbli jio. 4 Be abɔ nɛ e maa hi si kaa Nazir no ɔ, e ko ye nɔ́ ko nɛ a kɛ wai tso he nɔ́ ko pee, kɛ je wai yiblii ngmlikiti nɔ kɛ ya si e he toto nɔ.

5 “‘Be abɔ nɛ e ngɛ kita nɛ e kã kaa e maa pee Nazir no ɔ sisi ɔ, yi sɛmi ha nɛ ko sa e yi he. E ya nɔ nɛ e pee e he klɔuklɔu kɛ gu e yi bwɔmi ɔ nɛ e ma ha nɛ e hɛ ɔ nɔ. E pee jã kɛ ya si be nɛ e he nɛ e ngɔ kɛ ha Yehowa a maa ba nyagbe. 6 Be abɔ nɛ e maa hi si kaa nɔ ko nɛ e ngɔ e he kɛ ha Yehowa a, e ko ya nɔ* nɛ gbo he. 7 Ke e tsɛ, loo e nyɛ, loo e nyɛminyumu, loo e nyɛmiyo lɛ gbo po ɔ, e ko ble e he, ejakaa e yi bwɔmi nɛ hɛ ɔ ji okadi nɛ tsɔɔ kaa e ji Nazir no kɛ ha e Mawu ɔ.

8 “‘Be abɔ nɛ e maa hi si kaa Nazir no ɔ, e ngɛ klɔuklɔu ha Yehowa. 9 Se ke nɔ ko gbo tlukaa ngɛ e kasa nya, nɛ lɔ ɔ ble e yi bwɔmi ɔ nɛ ji okadi nɛ tsɔɔ kaa e ngɔ e he kɛ ha Mawu ɔ,* ligbi nɛ e maa tsu e he ɔ, e sɛ e yi ɔ. É sɛ e yi ɔ ngɛ ligbi kpaagone ɔ nɔ. 10 Ligbi kpaanyɔne ɔ, é ngɔ lahuɛ* enyɔ aloo beleku lahuɛ bimɛ enyɔ kɛ ba ha osɔfo ɔ ngɛ kpe he bo tsu ɔ nya. 11 Osɔfo ɔ maa ngɔ kake kɛ sã yayami afɔle, nɛ e maa ngɔ kake ɔ hu kɛ sã sami afɔle kɛ kpata ha lɛ ngɛ e yayami ɔ he akɛnɛ e kɛ nɔ* nɛ gbo ble e he ɔ he je. Lɔ ɔ se ɔ, é tsu e yi he jamɛ a ligbi ɔ. 12 Jehanɛ ɔ, e ngɔ e he kɛ ha Yehowa ekohu ligbi abɔ nɛ e maa pee Nazir no ɔ, nɛ́ e ngɔ agbosu wayo nɛ e ye jeha kake kɛ ba kaa fɔ yemi afɔle. Se a be be nɛ be ɔ kanee kɛ piɛɛ he, ejakaa e ble Nazir no nɛ e ji ɔ.

13 “‘Mlaa nɛ fɔɔ si ha Nazir no ji nɛ ɔ nɛ: Ke ligbihi nɛ e kɛ pee Nazir no ɔ ba nyagbe ɔ, a maa ngɔ lɛ kɛ ba kpe he bo tsu ɔ nya. 14 É ngɔ ní nɛ ɔmɛ kɛ ha Yehowa ngɛ lejɛ ɔ kaa e we afɔle: agbosu wayo kake nɛ kpa ko be e he nɛ e ye jeha kake kaa sami afɔle, jijɔ yo kake nɛ kpa ko be e he nɛ e ye jeha kake kaa yayami afɔle, agbosu kake nɛ kpa ko be e he kaa tue mi jɔmi afɔle. 15 Jehanɛ ɔ, a ngɔ mamu bukɔbukɔ nɛ a kɛ nu futu mi kɛ pee abolo nɛ masa be mi, nɛ́ a bɔ mɛ lokotolokoto* kɛ wo kusii mi, akpɔɔnɔɔ nɛ masa be mi nɛ a kɛ nu kpa he, kɛ a he ngma afɔle kɛ dã afɔle. 16 Osɔfo ɔ maa ngɔ ní nɛ ɔmɛ kɛ ba Yehowa hɛ mi, nɛ e kɛ ma ba sã yayami afɔle kɛ sami afɔle ha lɛ. 17 Osɔfo ɔ maa ngɔ agbosu ɔ kɛ abolo nɛ masa be mi nɛ ngɛ kusii ɔ mi ɔ kɛ sã tue mi jɔmi afɔle ha Yehowa, nɛ e maa sã e he ngma afɔle kɛ e he dã afɔle.

18 “‘Jehanɛ ɔ, Nazir no ɔ nɛ sɛ e yi bwɔmi nɛ hɛ gagaaga a* ngɛ kpe he bo tsu ɔ nya, nɛ e ngɔ e yi bwɔmi nɛ e to benɛ e ji Nazir no ɔ kɛ wo la nɛ ngɛ tue mi jɔmi afɔle ɔ sisi ɔ mi. 19 Ke Nazir no ɔ sɛ e yi bwɔmi ɔ nɛ kadiɔ lɛ kaa Nazir no ɔ ta a, osɔfo ɔ nɛ́ ngɔ agbosu ɔ kɔni kake nɛ a hoo, nɛ́ e je abolo nɛ masa be mi nɛ a bɔ mɛ lokotolokoto ɔ kake, kɛ akpɔɔnɔɔ nɛ masa be mi kake ngɛ kusii ɔ mi kɛ piɛɛ he kɛ wo Nazir no ɔ dɛ enyɔ ɔmɛ a mi. 20 Jehanɛ ɔ, osɔfo ɔ nɛ e fɔ̃ ní ɔmɛ kɛ ya kɛ ba kaa afɔle nɛ a fɔ̃ɔ ngɛ Yehowa hɛ mi. Ní nɛ ɔmɛ kɛ lohwe ɔ gugue ɔ nɛ a kɛ sã afɔle nɛ a fɔ̃ɔ ɔ, kɛ e nane ɔ ji nɔ́ klɔuklɔu nɛ a kɛ ha osɔfo ɔ. Lɔ ɔ se ɔ, Nazir no ɔ ma nyɛ maa nu wai.

21 “‘Mlaa nɛ fɔɔ si ha Nazir no nɛ e kã Mawu kita a ji nɛ ɔ nɛ: Ke e kã kita kaa e maa sã afɔle kpa ko kɛ piɛɛ nɔ́ nɛ e biɔ nɛ Nazir no nɛ sã ha Yehowa a he, nɛ e ma nyɛ maa pee jã a, lɛɛ e ye kita nɛ e kã a nɔ ngɛ bumi nɛ e ngɛ kɛ ha mlaa nɛ e sa kaa e ye nɔ kaa Nazir no ɔ he je.’”

22 Kɛkɛ nɛ Yehowa de Mose ke: 23 “De Aaron kɛ e binyumu ɔmɛ ke, ‘Bɔ nɛ nyɛ maa jɔɔ Israel bi ɔmɛ ha ji nɛ ɔ nɛ. Nyɛ de mɛ ke:

24 “Yehowa nɛ jɔɔ mo nɛ e po o he piɛ.

25 Yehowa nɛ ha nɛ e hɛ mi nɛ kpɛ ngɛ o nɔ, nɛ́ e na mo mɔbɔ.

26 Yehowa nɛ e wó e hɛ nɔ nɛ e hyɛ mo, nɛ e ha mo tue mi jɔmi.”’

27 Nɛ́ a ngɔ ye biɛ kɛ fɔ Israel bi ɔmɛ a nɔ, konɛ ma jɔɔ mɛ.”

7 Ligbi ɔ nɛ Mose gbe bo tsu ɔ mami nya a, e pɔ bo tsu ɔ kɛ níhi nɛ ngɛ mi ɔ, kɛ afɔle sami la tɛ ɔ, kɛ e he ní ɔmɛ tsuo nu nɛ e pee mɛ klɔuklɔu. Benɛ e pɔ ní nɛ ɔmɛ nu nɛ e pee mɛ klɔuklɔu ta a, 2 Israel ganɔ ɔmɛ, nɛ ji a tsɛmɛ a we ɔmɛ a nyatsɛmɛ ɔmɛ sã afɔle. Wɛtso ɔmɛ a ganɔ nɛ ɔmɛ nɛ a hyɛ biɛ ngmami ɔ nɔ ɔ 3 ngɔ zugba lɛhi nɛ́ a ngɔ nɔ́ kɛ ha a he ekpa, kɛ na ku 12 kɛ ba Yehowa hɛ mi. Ganɔ enyɔ fɛɛ ganɔ enyɔ ngɔ zugba lɛ kake kɛ ba, nɛ a ti nɔ fɛɛ nɔ ngɔ na ku kake kɛ ba; a ngɔ kɛ ba bo tsu ɔ hɛ mi. 4 Yehowa de Mose ke: 5 “Ngɔɔ ní ɔmɛ nɛ a kɛ ba a, nɛ o kɛ ha Levi bi ɔmɛ kaa bɔ nɛ a ti nɔ fɛɛ nɔ ní tsumi ma bi kaa e ná, ejakaa a kɛ ma tsu kpe he bo tsu ɔ he sɔmɔmi ní tsumi ɔ.”

6 Lɔ ɔ he ɔ, Mose ngɔ zugba lɛ ɔmɛ kɛ na amɛ nɛ e kɛ ha Levi bi ɔmɛ. 7 E ngɔ zugba lɛ enyɔ kɛ na ku eywiɛ kɛ ha Gershon binyumu ɔmɛ, ejakaa lɔ ɔ ji nɔ́ nɛ a maa hia kɛ tsu a ní tsumi ɔ; 8 nɛ e ngɔ zugba lɛ eywiɛ kɛ na ku kpaanyɔ kɛ ha Merari binyumu ɔmɛ, ejakaa lɔ ɔ ji nɔ́ nɛ a maa hia kɛ tsu a ní tsumi ɔ. Osɔfo Aaron binyumu Itamar lɛ maa hyɛ a ní tsumi ɔ nɔ. 9 Se e ha we Kohat binyumu ɔmɛ eko, ejakaa mɛɛ lɛɛ a ní tsumi ɔ kɔɔ níhi nɛ a ngɛ he klɔuklɔu ɔ a he, nɛ a kɛ ní klɔuklɔu ɔmɛ fɔɔ a konɔ.

10 Ligbi ɔ nɛ a jɔɔ afɔle sami la tɛ ɔ nɔ nɛ a pɔ lɛ nu ɔ, jamɛ a ligbi ɔ, ganɔ ɔmɛ ngɔ níhi kɛ ba. Benɛ ganɔ ɔmɛ ngɔ a ní ɔmɛ kɛ ba afɔle sami la tɛ ɔ hɛ mi ɔ, 11 Yehowa de Mose ke: “Daa ligbi ɔ, ganɔ kake maa ngɔ níhi nɛ a kɛ maa sã afɔle kɛ jɔɔ afɔle sami la tɛ ɔ nɔ ɔ kɛ ba.”

12 Kekleekle ligbi ɔ, nɔ nɛ e ngɔ e we afɔle ɔ kɛ ba ji, Aminadab binyumu Nashon nɛ e je Yuda wɛtso ɔ mi ɔ. 13 Níhi nɛ e kɛ ba kaa afɔle ji: sika hiɔ kã nɛ e jiɔmi ji shekel* 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya,* nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 14 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 15 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 16 apletsi wayoo kake nɛ a kɛ maa sã yayami afɔle. 17 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Aminadab binyumu Nashon ngɔ kɛ ba konɛ a kɛ sã afɔle ɔ nɛ.

18 Ligbi enyɔne ɔ, Zuar binyumu Netanel nɛ e ji Isakar wɛtso ɔ ganɔ ɔ ngɔ e níhi kɛ ba. 19 Níhi nɛ e kɛ ba kaa afɔle ji: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 20 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 21 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 22 apletsi wayoo nɛ a kɛ maa sã yayami afɔle. 23 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Zuar binyumu Netanel ngɔ kɛ ba kaa afɔle.

24 Ligbi etɛne ɔ, Helon binyumu Eliab nɛ e ji Zebulun wɛtso ɔ ganɔ ɔ 25 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 26 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 27 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 28 apletsi wayoo kake nɛ a kɛ maa sã yayami afɔle. 29 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Helon binyumu Eliab ngɔ kɛ ba kaa afɔle.

30 Ligbi eywiɛne ɔ, Shedeur binyumu Elizur nɛ e ji Reuben wɛtso ɔ ganɔ ɔ 31 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 32 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 33 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 34 apletsi wayoo nɛ a kɛ maa sã yayami afɔle. 35 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Shedeur binyumu Elizur ngɔ kɛ ba kaa afɔle.

36 Ligbi enuɔne ɔ, Zurishadai binyumu Shelumiel nɛ e ji Simeon wɛtso ɔ ganɔ ɔ 37 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 38 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 39 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 40 apletsi wayoo kake nɛ a kɛ maa sã yayami afɔle. 41 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Zurishadai binyumu Shelumiel ngɔ kɛ ba kaa afɔle.

42 Ligbi ekpane ɔ, Deuel binyumu Eliasaf nɛ e ji Gad wɛtso ɔ ganɔ ɔ 43 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 44 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 45 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 46 apletsi wayoo kake nɛ a kɛ maa sã yayami afɔle. 47 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Deuel binyumu Eliasaf ngɔ kɛ ba kaa afɔle.

48 Ligbi kpaagone ɔ, Amihud binyumu Elishama nɛ e ji Efraim wɛtso ɔ ganɔ ɔ 49 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 50 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 51 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 52 apletsi wayoo kake nɛ a kɛ maa sã yayami afɔle. 53 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Amihud binyumu Elishama ngɔ kɛ ba kaa afɔle.

54 Ligbi kpaanyɔne ɔ, Pedazur binyumu Gamaliel nɛ e ji Manase wɛtso ɔ ganɔ ɔ 55 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 56 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 57 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 58 apletsi wayoo kake nɛ a kɛ maa sã yayami afɔle. 59 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Pedazur binyumu Gamaliel ngɔ kɛ ba kaa afɔle.

60 Ligbi nɛɛne ɔ, Gideoni binyumu Abidan nɛ e ji Benyamin wɛtso ɔ ganɔ ɔ 61 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 62 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 63 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 64 apletsi wayoo kake nɛ a kɛ maa sã yayami afɔle; 65 jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Gideoni binyumu Abidan ngɔ kɛ ba kaa afɔle.

66 Ligbi nyɔngmane ɔ, Amishadai binyumu Ahiezer nɛ e ji Dan wɛtso ɔ ganɔ ɔ 67 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 68 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 69 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 70 apletsi wayoo kake nɛ a kɛ maa sã yayami afɔle. 71 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Amishadai binyumu Ahiezer ngɔ kɛ ba kaa afɔle.

72 Ligbi nyɔngma kɛ kakene ɔ, Okran binyumu Pagiel nɛ e ji Asher wɛtso ɔ ganɔ ɔ 73 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 74 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 75 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 76 apletsi wayoo kake nɛ a kɛ maa sã yayami afɔle. 77 Jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Okran binyumu Pagiel ngɔ kɛ ba kaa afɔle.

78 Ligbi nyɔngma kɛ enyɔne ɔ, Enan binyumu Ahira nɛ e ji Naftali wɛtso ɔ ganɔ ɔ 79 ngɔ ní nɛ ɔmɛ kɛ ba kaa afɔle: sika hiɔ kã nɛ e jiɔmi ji shekel 130, kɛ sika hiɔ tsesi nɛ e jiɔmi ji shekel 70 ngɛ he klɔuklɔu ɔ shekel ɔ nya, nɛ́ mamu bukɔbukɔ nɛ a kɛ nu futu mi nɛ a kɛ maa sã ngma afɔle hyi mɛ tɔ; 80 sika tsu kplu wayo nɛ e jiɔmi ji shekel 10 nɛ́ tsopa kɛ e he via hyi lɛ tɔ; 81 na ku wayoo kake, kɛ agbosu kake, kɛ jijɔ ku nɛ e yi jeha kake lolo nɛ a kɛ maa sã sami afɔle; 82 apletsi wayoo kake nɛ a kɛ maa sã yayami afɔle; 83 jehanɛ hu ɔ, na enyɔ, kɛ agbosu enuɔ, kɛ akpakpo enuɔ, kɛ jijɔ ku enuɔ nɛ a ye jeha kakaaka nɛ a kɛ maa sã tue mi jɔmi afɔle. Ní nɛ ɔmɛ ji níhi nɛ Enan binyumu Ahira ngɔ kɛ ba kaa afɔle.

84 Benɛ a pɔ afɔle sami la tɛ ɔ nu ɔ, níhi nɛ ganɔhi nɛ a ngɛ Israel ɔ ngɔ kɛ ba kaa afɔle konɛ a kɛ jɔɔ nɔ ji nɛ ɔmɛ nɛ: sika hiɔ kã 12, sika hiɔ tsesi 12, kɛ sika tsu kplu wayo 12; 85 sika hiɔ kã a eko fɛɛ eko jiɔmi ji shekel 130, nɛ tsesi ɔ hu eko fɛɛ eko jiɔmi ji shekel 70. Sika hiɔ tsuo nɛ a kɛ pee ní nɛ ɔmɛ ɔ jiɔmi ji shekel 2,400 ngɛ he klɔuklɔu ɔ shekel ɔ nya. 86 Sika tsu kplu wayo 12 nɛ́ tsopa kɛ e he via hyi mɛ ɔ, eko fɛɛ eko jiɔmi ji shekel 10 ngɛ he klɔuklɔu ɔ shekel ɔ nya. Sika tsu tsuo nɛ a kɛ pee kplu wayo ɔmɛ ɔ jiɔmi ji shekel 120. 87 Nahi tsuo nɛ a kɛ maa sã sami afɔle ɔ ji na ku 12, kɛ agbosu 12, kɛ jijɔ ku 12 nɛ a ye jeha kakaaka kɛ a he ngma afɔlehi, kɛ apletsi wawi 12 nɛ a kɛ maa sã yayami afɔle. 88 Nahi tsuo nɛ a kɛ maa sã tue mi jɔmi afɔle ɔ ji na ku 24, agbosu 60, akpakpo 60, kɛ jijɔ ku 60 nɛ a ye jeha kakaaka. Benɛ a pɔ afɔle sami la tɛ ɔ nu ɔ, afɔle nɛ a sã kɛ jɔɔ nɔ ji nɛ ɔ nɛ.

89 Be fɛɛ be nɛ Mose maa ya kpe he bo tsu ɔ mi nɛ e kɛ Mawu* ma ya tu munyu ɔ, e nuɔ gbi nɛ́ e kɛ lɛ ngɛ munyu tue ɔ kɛ jeɔ Odase daka a nya nɔ́ ɔ nɔ ngɛ kerub enyɔ ɔmɛ a kpɛti; nɛ Mawu kɛ lɛ tuɔ munyu.

8 Yehowa kɛ Mose tu munyu, nɛ e de lɛ ke: 2 “O kɛ Aaron nɛ tu munyu nɛ o de lɛ ke, ‘Ke e su kane ɔmɛ ɔ, kane kpaago ɔmɛ a la a nɛ kpɛ kɛ hyɛ kane tso ɔ hɛ mi blɔ.’” 3 Lɔ ɔ he ɔ, nɔ́ nɛ Aaron pee ji nɛ ɔ nɛ: E su kane ɔmɛ ngɛ kane tso ɔ nɔ, konɛ a kpɛ kɛ hyɛ kane tso ɔ hɛ mi blɔ kaa bɔ nɛ Yehowa fã Mose ɔ. 4 Bɔ nɛ a pee kane tso ɔ ha ji nɛ ɔ nɛ: A kó sika tsu kɛ pee. A kó sika tsu kɛ pee e kpɛti tso ɔ kɛ ya si e mɔmɔ ɔmɛ a nɔ. A pee kane tso ɔ kaa bɔ nɛ Yehowa je ngɛ nina mi kɛ tsɔɔ Mose ɔ pɛpɛɛpɛ.

5 Yehowa kɛ Mose tu munyu ekohu, nɛ e de lɛ ke: 6 “Moo hla Levi bi ɔmɛ ngɛ Israel bi ɔmɛ a kpɛti, nɛ o tsu a he. 7 Bɔ nɛ o maa tsu a he ha ji nɛ ɔ nɛ: Mo fĩa nyu nɛ a kɛ fɔɔ yayami ngɛ nɔ he ɔ kɛ pue a nɔ, nɛ́ a ngɔ yi sɛmi ha kɛ kpa a he bwɔmi tsuo, nɛ́ a fɔ a tadehi a he, nɛ́ a tsu a he. 8 Lɔ ɔ se ɔ, á ngɔ na ku wayoo kake kɛ e he ngma afɔle nɛ a kɛ mamu bukɔbukɔ nɛ́ a kɛ nu futu mi pee, nɛ́ mo hu o ngɔ na ku wayoo kpa nɛ a kɛ maa sã yayami afɔle. 9 Nɛ́ o ngɔ Levi bi ɔmɛ kɛ ba kpe he bo tsu ɔ hɛ mi, nɛ o bua Israel bi ɔmɛ a we asafo ɔ tsuo nya. 10 Ke o ngɔ Levi bi ɔmɛ kɛ ba Yehowa hɛ mi ɔ, Israel bi ɔmɛ nɛ a ngɔ a nine kɛ pue Levi bi ɔmɛ a nɔ. 11 Aaron nɛ ngɔ Levi bi ɔmɛ kɛ ha* ngɛ Yehowa hɛ mi kaa afɔle nɛ a fɔ̃ɔ nɛ Israel bi ɔmɛ kɛ ha, konɛ a tsu Yehowa sɔmɔmi ní tsumi ɔ.

12 “Kɛkɛ ɔ, Levi bi ɔmɛ nɛ a ngɔ a nine kɛ pue na ku ɔmɛ a yi mi. Lɔ ɔ se ɔ, ngɔɔ kake kɛ sã yayami afɔle, nɛ o ngɔ kake ɔ hu kɛ sã sami afɔle ha Yehowa kɛ kpata ha Levi bi ɔmɛ. 13 Nɛ́ o ha nɛ Levi bi ɔmɛ nɛ a da si ngɛ Aaron kɛ e binyumu ɔmɛ a hɛ mi, nɛ o ngɔ mɛ kɛ ha* kaa afɔle nɛ a fɔ̃ɔ, nɛ a ngɔ kɛ ha Yehowa. 14 Mo je Levi bi ɔmɛ ngɛ Israel bi ɔmɛ a kpɛti, nɛ Levi bi ɔmɛ maa pee ye níhi. 15 Lɔ ɔ se ɔ, Levi bi ɔmɛ maa ba nɛ a ma ba sɔmɔ ngɛ kpe he bo tsu ɔ mi. Bɔ nɛ o ma plɛ kɛ tsu a he konɛ o ngɔ mɛ kɛ ha* kaa afɔle nɛ a fɔ̃ɔ ji nɛ ɔ nɛ. 16 Ejakaa a ji nihi nɛ a ngɔ mɛ kɛ ha; a je mɛ kɛ je Israel bi ɔmɛ a kpɛti kɛ ha mi. Ma ngɔ mɛ kɛ to Israel bi ɔmɛ a kekleekle bimɛ tsuo* a nane mi kɛ ha imi nitsɛ ye he. 17 Ejakaa ye níhi ji Israel bi ɔmɛ a kekleekle bimɛ tsuo, nimli jio, lohwehi jio. I tsu a he kɛ ha ye he ligbi nɛ i gbe Egipt zugba a nɔ kekleekle bimɛ ɔmɛ tsuo ɔ. 18 Ma ngɔ Levi bi ɔmɛ kɛ to Israel bi ɔmɛ a kekleekle bimɛ tsuo a nane mi. 19 Ma hla Levi bi ɔmɛ kɛ je Israel bi ɔmɛ a kpɛti nɛ ma ngɔ mɛ kɛ ha Aaron kɛ e binyumu ɔmɛ kaa nihi nɛ a ngɔ mɛ kɛ ha, konɛ a sɔmɔ ngɛ Israel bi ɔmɛ a nane mi ngɛ kpe he bo tsu ɔ mi, nɛ a kpata kɛ ha Israel bi ɔmɛ ngɛ a yayami he, konɛ e ko ba kaa Israel bi ɔmɛ maa hɛ mɛ kɛ su he klɔuklɔu ɔ he, nɛ́ haomi nɛ ba a nɔ.”

20 Mose kɛ Aaron kɛ Israel bi ɔmɛ a we asafo ɔ tsuo pee nɔ́ nɛ ɔ ha Levi bi ɔmɛ. Níhi tsuo nɛ Yehowa fã Mose ke e pee ha Levi bi ɔmɛ ɔ, jã nɛ Israel bi ɔmɛ pee ha mɛ. 21 Lɔ ɔ he ɔ, Levi bi ɔmɛ tsu a he nɛ a fɔ a tade ɔmɛ a he, nɛ lɔ ɔ se ɔ, Aaron ngɔ mɛ kɛ ha* kaa afɔle nɛ a fɔ̃ɔ ngɛ Yehowa hɛ mi. Jehanɛ ɔ, Aaron kpata ha mɛ konɛ a he nɛ tsɔ. 22 Lɔ ɔ se ɔ, Levi bi ɔmɛ sɛ kpe he bo tsu ɔ mi konɛ a ya sɔmɔ ngɛ Aaron kɛ e binyumu ɔmɛ a hɛ mi. Bɔ nɛ Yehowa fã Mose kaa e pee Levi bi ɔmɛ ɔ, jã nɛ a pee mɛ.

23 Jehanɛ ɔ, Yehowa kɛ Mose tu munyu, nɛ e de lɛ ke: 24 “Munyu nɛ nyɛɛ se nɛ ɔ kɔɔ Levi bi ɔmɛ a he: Ke nyumu ko ye kɛ je jeha 25 kɛ yaa a, é ya piɛɛ nihi nɛ a sɔmɔɔ ngɛ kpe he bo tsu ɔ mi ɔ a he. 25 Se ke e ye jeha 50 ɔ, é je sɔmɔmi kuu ɔ mi, nɛ́ e ko sɔmɔ hu. 26 E ma nyɛ maa ye bua e nyɛminyumu ɔmɛ nɛ a tsuɔ ní ngɛ kpe he bo tsu ɔ mi ɔ, se lɛ nitsɛ lɛɛ a ko ngɔ ní tsumi pɔtɛɛ ko kɛ wo e dɛ ngɛ lejɛ ɔ. Bɔ nɛ o maa to Levi bi ɔmɛ, kɛ a ní tsumi ɔmɛ a he blɔ nya ha ji nɛ ɔ nɛ.”

9 Benɛ Israel bi ɔmɛ je Egipt zugba a nɔ ɔ se jeha enyɔne ɔ we kekleekle nyɔhiɔ ɔ, Yehowa kɛ Mose tu munyu ngɛ Sinai nga a nɔ, nɛ e de lɛ ke: 2 “Israel bi ɔmɛ nɛ a ye Hetsɔmi afɔle ɔ ngɛ be nɛ a to ɔ mi. 3 Nyɛɛ ye Hetsɔmi afɔle ɔ ngɛ nyɔhiɔ nɛ ɔ we ligbi nɛ ji 14 ɔ nɔ ke du ngɛ bue* ngɛ be nɛ a to ɔ mi. Nyɛɛ ye kaa bɔ nɛ e he mlaa amɛ, kɛ e he blɔ tsɔɔmi ɔmɛ tsuo tsɔɔ ɔ.”

4 Lɔ ɔ he ɔ, Mose de Israel bi ɔmɛ kaa a ye Hetsɔmi afɔle ɔ. 5 Kɛkɛ nɛ a ye Hetsɔmi afɔle ɔ ngɛ Sinai nga a nɔ, ngɛ kekleekle nyɔhiɔ ɔ we ligbi nɛ ji 14 ɔ nɔ be mi nɛ du ngɛ bue.* Bɔ nɛ Yehowa fã Mose ke a pee ɔ, jã pɛpɛɛpɛ nɛ Israel bi ɔmɛ pee.

6 Se e ba mi kaa nyumu komɛ ya ta nɔ* nɛ gbo he nɛ a he tsɔ we, lɔ ɔ he ɔ, a nyɛ we nɛ a ye Hetsɔmi afɔle ɔ jamɛ a ligbi ɔ. Enɛ ɔ he ɔ, nyumu nɛ ɔmɛ ya Mose kɛ Aaron a ngɔ jamɛ a ligbi ɔ, 7 nɛ a ya de Mose ke: “Wa ya ta nɔ* nɛ gbo he nɛ wa he tsɔ we. Mɛni he je nɛ e sa nɛ lɔ ɔ nɛ tsi wa nya nɛ wa ko piɛɛ Israel bi kpa amɛ a he kɛ ngɔ wa Hetsɔmi afɔle ɔ kɛ ha Yehowa ngɛ be nɛ a to ɔ mi ɔ?” 8 Kɛkɛ nɛ Mose de mɛ ke: “Nyɛɛ mlɛ nɛ ma nu nɔ́ nɛ Yehowa ma fã mi ke ma de nyɛ.”

9 Kɛkɛ nɛ Yehowa de Mose ke: 10 “De Israel bi ɔmɛ ke, ‘Ke nyɛ ti nɔ ko, aloo nyɛ nina ko ta gbogboe* he nɛ e he tsɔ we, aloo e hia blɔ kɛ ho he ko tsitsaa ya po ɔ, loloolo ɔ, e sa nɛ e ye Hetsɔmi afɔle ɔ ha Yehowa. 11 Á ye Hetsɔmi afɔle ɔ ngɛ nyɔhiɔ enyɔne ɔ we ligbi nɛ ji 14 ɔ nɔ ke du ngɛ bue.* Á ngɔ abolo nɛ masa be mi kɛ ba nɛ dooɔ kɛ ye. 12 Á ko si eko nɛ je nɛ na yi, nɛ a ko ku e wu ko hulɔ. Á ye Hetsɔmi afɔle ɔ kaa bɔ nɛ blɔ tsɔɔmihi tsuo nɛ ngɛ Hetsɔmi ɔ he ɔ tsɔɔ ɔ. 13 Ke nɔ ko he tsɔ, nɛ pi nɛ e hia blɔ, se e yi Hetsɔmi afɔle ɔ, á gbe lɛ,* ejakaa e yi Yehowa Hetsɔmi afɔle ɔ ngɛ be nɛ a to ɔ mi. Lɛ nitsɛ e yayami maa tloo lɛ.

14 “‘Ke nubwɔ ko ngɛ nyɛ kpɛti ɔ, lɛ hu e ye Hetsɔmi afɔle ɔ ha Yehowa. É ye Hetsɔmi afɔle ɔ kaa bɔ nɛ Hetsɔmi ɔ he mlaa a kɛ e he blɔ tsɔɔmi ɔ tsɔɔ ɔ. Mlaa kake lɛ fɔɔ si ha nyɛ, nubwɔ jio, zugba a nɔ bi fɔfɔɛ jio.’”

15 Jehanɛ ɔ, ligbi nɛ a ma bo tsu ɔ, bɔku ɔ ba ha bo tsu ɔ, nɛ ji bo tsu nɛ Odase Yemi Nɔ́ ɔ ngɛ mi ɔ nɔ, se jamɛ a gbɔkuɛ ɔ, bɔku ɔ kpɛ kaa la ngɛ bo tsu ɔ yi nɔ kɛ ya si mɔtu. 16 Jã nɛ e yaa nɔ: Ke je na a, bɔku ɔ haa bo tsu ɔ nɔ, nɛ ke je jɔ ɔ, e kpɛɔ kaa la ngɛ bo tsu ɔ yi nɔ. 17 Be fɛɛ be nɛ bɔku ɔ ma wo e he nɔ kɛ je bo tsu ɔ nɔ pɛ ɔ, Israel bi ɔmɛ hiaa, nɛ he nɛ bɔku ɔ ma ya da si ngɛ ɔ, lejɛ ɔ nɛ Israel bi ɔmɛ toɔ si ngɛ. 18 Israel bi ɔmɛ hiaa ngɛ Yehowa fami nya, nɛ a toɔ si ngɛ Yehowa fami nya. Ke bɔku ɔ ngɛ bo tsu ɔ nɔ ɔ, a hiɔ a sito he ɔ. 19 Ke bɔku ɔ ngɛ bo tsu ɔ nɔ ligbi babauu ɔ, Israel bi ɔmɛ buɔ Yehowa tue nɛ a hiɔ lejɛ ɔ. 20 Be komɛ ɔ, bɔku ɔ hiɔ bo tsu ɔ nɔ ligbi bɔɔ pɛ. Israel bi ɔmɛ hiɔ sito he ɔ ngɛ Yehowa fami nya, nɛ a hiaa ngɛ Yehowa fami nya. 21 Be komɛ ɔ, bɔku ɔ hiɔ bo tsu ɔ nɔ kɛ jeɔ gbɔkuɛ kɛ ya siɔ mɔtu, nɛ ke bɔku ɔ wo e he nɔ mɔtu pɛ kɛkɛ a hia. Ke je jɔ jio, je na jio, ke bɔku ɔ ná wo e he nɔ pɛ kɛkɛ a hia. 22 Ke bɔku ɔ ye ligbi enyɔ jio, nyɔhiɔ kake jio, nɔ́ nɛ pe jã jio, be abɔ nɛ bɔku ɔ ngɛ bo tsu ɔ nɔ ɔ, Israel bi ɔmɛ hiɔ a sito he ɔ, nɛ a ji. Se ke bɔku ɔ wo e he nɔ pɛ, kɛkɛ a hia. 23 A toɔ si ngɛ Yehowa fami nya, nɛ a hiaa ngɛ Yehowa fami nya. A bu Yehowa tue, nɛ a ye fami nɛ Yehowa fã mɛ kɛ gu Mose nɔ ɔ nɔ.

10 Lɔ ɔ se ɔ, Yehowa de Mose ke: 2 “Moo pee titimati enyɔ. Mo kó sika hiɔ nɛ o kɛ pee, konɛ ke a ma bua asafo ɔ nya, aloo a maa hia kɛ je sito he ɔ, a kpã. 3 Ke a kpã enyɔ ɔmɛ tsuo ɔ, asafo ɔ tsuo nɛ ba bua a he nya ngɛ o ngɔ ngɛ kpe he bo tsu ɔ nya. 4 Se ke a kpã kake ɔ, lɛɛ ganɔ ɔmɛ, nɛ a ji nimli akpehi a nya dali nɛ a ngɛ Israel ɔ pɛ lɛ a ma ba bua a he nya ngɛ o ngɔ.

5 “Ke nyɛ kpa titimati ɔ nɛ e pɛmi be glɛ kake nɔ ɔ, nihi nɛ a to si ngɛ puje he ɔ nɛ a hia. 6 Ke nyɛ kpa titimati ɔ si enyɔne, nɛ e pɛmi be glɛ kake nɔ ɔ, nihi nɛ a ngɛ woyi je ɔ nɛ a hia. Be fɛɛ be nɛ kuu ɔ kake maa hia a, a kpa titimati ɔ ngɛ blɔ nɛ ɔ nɔ.

7 “Jehanɛ ɔ, ke a ma bua asafo ɔ nya a, nyɛ kpa titimati ɔmɛ, se a pɛmi nɛ hi glɛ kake nɔ. 8 Aaron binyumu ɔmɛ, nɛ ji osɔfo ɔmɛ ji ni nɛmɛ nɛ a ma kpa titimati ɔmɛ. Bɔ nɛ a kɛ titimati ɔmɛ ma tsu ní ha ji nɛ ɔ nɛ. Enɛ ɔ maa pee mlaa nɛ maa hi si daa ha nyɛ, nyɛ yi nɔhi tsuo.

9 “Ke he nyɛlɔ ko ba ngɛ nyɛ haoe ngɛ nyɛ zugba a nɔ nɛ e ba kaa nyɛɛ kɛ lɛ nɛ hwu ta a, nyɛ kpa titimati ɔmɛ kɛ bua ta buli a nya, nɛ Yehowa nyɛ Mawu ɔ ma kai nyɛ, nɛ e ma kpɔ̃ nyɛ ngɛ nyɛ he nyɛli ɔmɛ a dɛ.

10 “Jehanɛ hu ɔ, ngɛ nyɛ nyami ligbi ɔmɛ a mi, nɛ ji nyɛ gbijlɔ ɔmɛ kɛ nyɛ nyɔhiɔ ɔmɛ a sisije ɔ, nyɛ kpa titimati ɔmɛ ke nyɛ ngɛ nyɛ sami afɔle ɔmɛ kɛ nyɛ tue mi jɔmi afɔle ɔmɛ sãe; a maa pee kaimi nɔ́ ha nyɛ ngɛ nyɛ Mawu ɔ hɛ mi. Imi ji Yehowa nyɛ Mawu ɔ nɛ.”

11 Jehanɛ ɔ, ngɛ jeha enyɔne ɔ we nyɔhiɔ enyɔne ɔ we ligbi nɛ ji 20 ɔ nɔ ɔ, bɔku ɔ wo e he nɔ ngɛ bo tsu ɔ nɛ Odase Yemi Nɔ́ ɔ ngɛ mi ɔ nɔ. 12 Lɔ ɔ he ɔ, Israel bi ɔmɛ je Sinai nga a nɔ nɛ a hia ngɛ blɔ nya nɛ a to kɛ ha mɛ ke a maa hia kɛ je a sito he ɔ nya, nɛ bɔku ɔ ya da si ngɛ Paran nga a nɔ. 13 Enɛ ɔ ji kekleekle be nɛ a hia ngɛ blɔ nya nɛ Yehowa gu Mose nɔ kɛ to ɔ nya.

14 Lɔ ɔ he ɔ, kuu nɛ wɛtso etɛ lɛ ngɛ mi nɛ Yuda wɛtso ɔ nyɛɛ a hɛ mi ɔ ji kekleekle kuu nɛ hia tabo nya tabo nya, nɛ Aminadab binyumu Nashon ji tabo ɔ nya dalɔ. 15 Isakar wɛtso ɔ tabo ɔ nya dalɔ ji Zuar binyumu Netanel. 16 Zebulun wɛtso ɔ tabo ɔ nya dalɔ ji Helon binyumu Eliab.

17 Benɛ a gbɛ bo tsu ɔ, Gershon binyumu ɔmɛ kɛ Merari binyumu ɔmɛ tloo bo tsu ɔ nɛ a hia.

18 Lɔ ɔ se ɔ, kuu nɛ wɛtso etɛ lɛ ngɛ mi nɛ Reuben wɛtso ɔ nyɛɛ a hɛ mi ɔ hia tabo nya tabo nya, nɛ Shedeur binyumu Elizur ji tabo ɔ nya dalɔ. 19 Simeon wɛtso ɔ tabo ɔ nya dalɔ ji Zurishadai binyumu Shelumiel. 20 Gad wɛtso ɔ tabo ɔ nya dalɔ ji Deuel binyumu Eliasaf.

21 Lɔ ɔ se ɔ, Kohat bi ɔmɛ nɛ a tloo jami he ɔ he ní ɔmɛ ɔ hia. E sa nɛ a gbe bo tsu ɔ mami nya loko Kohat bi ɔmɛ nɛ a ba su.

22 Lɔ ɔ se ɔ, kuu nɛ wɛtso etɛ lɛ ngɛ mi nɛ Efraim wɛtso ɔ nyɛɛ a hɛ mi ɔ hia tabo nya tabo nya, nɛ Amihud binyumu Elishama ji tabo ɔ nya dalɔ. 23 Manase wɛtso ɔ tabo ɔ nya dalɔ ji Pedazur binyumu Gamaliel. 24 Benyamin wɛtso ɔ tabo ɔ nya dalɔ ji Gideoni binyumu Abidan.

25 Lɔ ɔ se ɔ, kuu nɛ wɛtso etɛ lɛ ngɛ mi nɛ Dan wɛtso ɔ nyɛɛ a hɛ mi ɔ hia tabo nya tabo nya. Mɛ ji tabo nɛ a maa po tabo ɔmɛ tsuo a he piɛ ngɛ se, nɛ Amishadai binyumu Ahiezer ji tabo ɔ nya dalɔ. 26 Asher wɛtso ɔ tabo ɔ nya dalɔ ji Okran binyumu Pagiel. 27 Naftali wɛtso ɔ tabo ɔ nya dalɔ ji Enan binyumu Ahira. 28 Ke Israel bi ɔmɛ maa hia ngɛ a tabo ɔmɛ a nya a, blɔ nya tomi nɛ a nyɛɛɔ se ji nɛ ɔ nɛ.

29 Kɛkɛ nɛ Mose de Hobab, nɛ ji e ngatsɛ Reuel,* Midian no ɔ binyumu ɔ ke: “Wa ngɛ hiae kɛ yaa he nɛ Yehowa de ke, ‘Ma ngɔ kɛ ha nyɛ’ ɔ. Ha nɛ waa ho. Waa kɛ mo maa hi si saminya, ejakaa Yehowa wo si kaa e ma ha Israel ní kpakpahi.” 30 Se Hobab de lɛ ke: “I be yae. Ma kpale kɛ ya imi nitsɛ ye ma mi, kɛ ye weku li a ngɔ.” 31 Se Mose de lɛ ke: “I kpa mo pɛɛ, koo je wa he, ejakaa o le nga a nɔ hehi nɛ e sa kaa waa to si ngɛ, nɛ o ma nyɛ maa tsɔɔ wɔ blɔ.* 32 Nɛ ke o kɛ wɔ ya a, bɔ fɛɛ bɔ nɛ ji ɔ, kpakpa fɛɛ kpakpa nɛ Yehowa maa pee wɔ ɔ, wɔ hu wa maa pee mo jamɛ a kpakpa a eko.”

33 Lɔ ɔ he ɔ, a hia kɛ je Yehowa yoku ɔ he nɛ a nyɛɛ ligbi etɛ, nɛ Yehowa somi daka a nyɛɛ a hɛ mi ngɛ a ligbi etɛ blɔ nyɛɛmi ɔ mi konɛ e hla sito he ha mɛ. 34 Ke je na nɛ a hia kɛ je sito he ɔ, Yehowa bɔku ɔ hiɔ a yi nɔ.

35 Be fɛɛ be nɛ daka a maa hia a, Mose deɔ ke: “Oo Yehowa, tee si nɛ o ha nɛ o he nyɛli ɔmɛ nɛ a gbɛ kɛ fĩa, nɛ́ o ha nɛ nihi nɛ a nyɛɛ mo ɔ nɛ a tu fo kɛ je o hɛ mi.” 36 Nɛ ke daka a da si ɔ, Mose deɔ ke: “Oo Yehowa, moo kpale kɛ ba Israel bi akpeakpehi abɔ ɔ ngɔ.”

11 Jehanɛ ɔ, ni ɔmɛ bɔni munyu huitihuiti tumi ngɛ Yehowa hɛ mi. Benɛ Yehowa nu ɔ, e mi mi wo la, nɛ la nɛ je Yehowa ngɔ bɔni tsomi ngɛ a kpɛti, nɛ e sã nihi nɛ a ngɛ sito he ɔ se ɔ a ti ni komɛ. 2 Benɛ ni ɔmɛ kpa ngmlaa kɛ bɔni Mose tsɛmi ɔ, e kpa Yehowa pɛɛ wawɛɛ ha mɛ, nɛ la a gbo. 3 Lɔ ɔ he ɔ, a wo lejɛ ɔ biɛ ke Tabera,* ejakaa la nɛ je Yehowa ngɔ ɔ tso ngɛ a kpɛti ngɛ lejɛ ɔ.

4 Lɔ ɔ se ɔ, futufututsɛmɛ* nɛ a ngɛ a kpɛti ɔ de ke ní komɛ ngɛ mɛ jloe, nɛ Israel bi ɔmɛ hu bɔni ya fomi ekohu, nɛ a ngɛ dee ke: “Mɛnɔ ma ha wɔ muɔ lo nɛ waa ye? 5 Hyɛ bɔ nɛ wa kaiɔ pa mi lo nɛ wa yeɔ bɔ nɛ wa suɔ ngɛ Egipt nɛ wa wui he hiɔ, kɛ jamatlɛ ɔmɛ, atlɛ ɔmɛ, sabola ba amɛ, sabola amɛ, kɛ galik ɔmɛ ha! 6 Se amlɔ nɛ ɔ, wa* ngɛ gbɔjɔe. Wa nɛ nɔ́ kpa ko kaa ja mana nɛ ɔ pɛ.”

7 Mana a ngɛ kaa korianda wu, nɛ e ngɛ kaa bedola blaa.* 8 Ni ɔmɛ jeɔ kpo nɛ a ya kukuɔɔ, nɛ a wɛɛɔ ngɛ wɛ tɛhi a nɔ aloo a gbeeɔ* ngɛ tso mi. Lɔ ɔ se ɔ, a hooɔ ngɛ buɛ mi, aloo a kɛ peeɔ abolo lokotolokoto, nɛ e ngɔmi ngɛ kaa keeki nɛ ngɔ̃ɔ nɛ a kɛ nu pee. 9 Ke bɔ́ nɛ ngɛ sito he ɔ nyɔ mi ɔ, kɛkɛ mana a hu nɛ pue si.

10 Mose nu nɛ weku fɛɛ weku mi bimɛ ngɛ ya foe, nɔ fɛɛ nɔ ngɛ ya foe ngɛ e bo tsu nya. Kɛkɛ nɛ Yehowa mi mi fu wawɛɛ nɛ a ní peepee ɔ gba Mose hu nya. 11 Kɛkɛ nɛ Mose de Yehowa ke: “Mɛni he je nɛ o hao o sɔmɔlɔ ɔ kikɛ nɛ ɔ? Mɛni he je nɛ o ha we nɛ ye hɛ mi nɛ ba nyami ngɛ o hɛ mi, nɛ o ngɔ nimli nɛ ɔmɛ a tlomi tsuo kɛ tloo mi ɔ? 12 Imi lɛ i ngɔ nimli nɛ ɔmɛ tsuo a hɔ lo? Imi lɛ i fɔ mɛ loko o deɔ mi ke, ‘Hɛɛ mɛ ngɛ o gugue mi kaa bɔ nɛ tsɔlɔ* hɛɛɔ bi ɔ’ kɛ ya zugba nɛ o wo si kaa o kɛ ma ha a nɛmɛ ɔmɛ ɔ nɔ ɔ? 13 Jije ma ná muɔ lo ngɛ kɛ ha nimli nɛ ɔmɛ tsuo? Ejakaa a ngɛ ya foe kɛ ngɛ ye nɔ puee ke, ‘Ha wɔ muɔ lo nɛ waa ye!’ 14 Imi nɔ kake too i be nyɛe ma tloo nimli nɛ ɔmɛ tsuo a tlomi; e jiɔ pe mi. 15 Ke bɔ nɛ o kɛ mi maa ye ha ji nɛ ɔ, lɛɛ i kpa mo pɛɛ nɛ o gbe mi amlɔ nɔuu. Ke ye hɛ mi ba nyami ngɛ o hɛ mi ɔ, lɛɛ ko ha nɛ ma na amanehlu ko hu.”

16 Yehowa ha Mose heto ke: “Moo hla nyumuhi 70 kɛ je Israel nikɔtɔma amɛ a kpɛti ha mi, nyumuhi nɛ o le mɛ kaa a ji nikɔtɔmahi kɛ nɔ hyɛli, nɛ́ o kɛ mɛ nɛ ya kpe he bo tsu ɔ nya, nɛ́ o ha nɛ a kɛ mo nɛ da si ngɛ lejɛ ɔ. 17 Ma kple si kɛ ba nɛ i kɛ mo ma ba tu munyu ngɛ lejɛ ɔ, nɛ ma je mumi ɔ nɛ ngɛ o nɔ ɔ eko kɛ ha mɛ, nɛ a maa ye bua mo kɛ hyɛ ni ɔmɛ a nɔ, konɛ e ko pee mo nɔ kake too pɛ o tlomi. 18 Mo de ni ɔmɛ ke, ‘Nyɛɛ tsu nyɛ he kɛ ha hwɔɔ, ejakaa bɔ fɛɛ bɔ nɛ ji ɔ, nyɛ maa ye muɔ lo, ejakaa nyɛ fo ya wo Yehowa tue mi ke: “Mɛnɔ ma ha wɔ muɔ lo nɛ waa ye? Benɛ wa ngɛ Egipt ɔ, níhi a mi hi ha wɔ.” Bɔ fɛɛ bɔ nɛ ji ɔ, Yehowa ma ha nyɛ muɔ lo nɛ nyɛ maa ye. 19 Pi ligbi kake, loo ligbi 2, loo ligbi 5, loo ligbi 10, loo ligbi 20 kɛkɛ nɛ nyɛ maa ye, 20 mohu ɔ, nyɔhiɔ mluku, kɛ yaa si be nɛ e maa je kpo ngɛ nyɛ gugwɔ mi, nɛ e maa gbe nyɛ nya, ejakaa Yehowa nɛ́ ngɛ nyɛ kpɛti ɔ, nyɛ kua lɛ, nɛ nyɛ ngɛ ya foe ngɛ e hɛ mi, nɛ nyɛ ngɛ bie ke: “Mɛni he je nɛ wa je Egipt ɔ?”’”

21 Kɛkɛ nɛ Mose de ke: “Nimli nɛ i ngɛ a kpɛti ɔ a yibɔ ji nyumu katsɛmɛ 600,000, nɛ o ngɛ dee ke, ‘Ma ha mɛ muɔ lo nɛ e maa su mɛ yemi nyɔhiɔ mluku’! 22 Ke wa gbe tohi babauu kɛ nahi babauu ha mɛ po ɔ, anɛ e maa su mɛ lo? Aloo ke a gbe lohi tsuo nɛ a ngɛ wo ɔ mi ɔ ha mɛ ɔ, anɛ e maa su mɛ lo?”

23 Kɛkɛ nɛ Yehowa bi Mose ke: “Anɛ Yehowa nine ngɛ kpiti lo? Nɔ́ nɛ i de ɔ maa ba mi jio, e be mi bae jio, o maa na.”

24 Lɔ ɔ he ɔ, Mose je kpo nɛ e ya de ni ɔmɛ nɔ́ nɛ Yehowa de ɔ. Nɛ e hla nyumuhi 70 kɛ je ma nikɔtɔma amɛ a kpɛti, nɛ e ha nɛ a da si kɛ bɔle bo tsu ɔ. 25 Kɛkɛ nɛ Yehowa kple si kɛ ba ngɛ bɔku mi, nɛ e kɛ lɛ ba tu munyu, nɛ e je mumi ɔ nɛ ngɛ e nɔ ɔ eko kɛ ha nikɔtɔmahi 70 ɔmɛ a ti nɔ fɛɛ nɔ. Benɛ mumi ɔ ba a nɔ pɛ nɛ a bɔni a ní peemi kaa gbali,* se lɔ ɔ se ɔ, a pee we jã hu.

26 Nyumu ɔmɛ a kpɛti nihi enyɔ ngɛ sito he ɔ. A biɛhi ji Eldad kɛ Medad. Mɛɛ lɛɛ a ji kpo kɛ yɛ bo tsu ɔ he, se akɛnɛ a piɛɛ nihi nɛ a ngma a biɛ ɔ a he he je ɔ, mumi ɔ bɔni a nɔ bami. Lɔ ɔ he ɔ, a bɔni a ní peemi kaa gbali ngɛ sito he ɔ. 27 Kɛkɛ nɛ niheyo ko tu fo nɛ e ya de Mose ke: “Eldad kɛ Medad ngɛ a ní pee kaa gbali ngɛ sito he ɔ!” 28 Kɛkɛ nɛ Nun binyumu Yoshua nɛ e ji Mose sɔmɔlɔ kɛ je e nihe mi ɔ he nɔ nɛ e de ke: “Ye nyɔmtsɛ Mose, moo tsi a nya!” 29 Se Mose de lɛ ke: “Anɛ o ngɛ hunga jee ha mi lo? Koo je hunga ha mi. I ná nɛ Yehowa we bi ɔmɛ tsuo ji gbali, nɛ Yehowa maa ngɔ e mumi ɔ kɛ pue a nɔ!” 30 Pee se ɔ, Mose kɛ Israel nikɔtɔma amɛ kpale kɛ ba sito he ɔ.

31 Kɛkɛ nɛ kɔɔhiɔ ko nɛ je Yehowa ngɔ bɔni fiami, nɛ e muɔɔ bebeehi* kɛ je wo ɔ se kɛ ba. Kɔɔhiɔ ɔ ha nɛ bebee* ɔmɛ ba nɔɔ si kɛ bɔle sito he ɔ. A nɔɔ si maa pee ligbi kake blɔ nyɛɛmi ngɛ sito he ɔ kasa hiɛ kɛ hiɛ kɛ bɔle sito he ɔ kɛ kpe. A te kɛ ba zugba kulaa maa pee kɔni fã enyɔ.* 32 Lɔ ɔ he ɔ, jamɛ a ligbi ɔ, kɛ jamɛ a nyɔ ɔ mi, kɛ e nɔ jena a tsuo ɔ, ni ɔmɛ bua bebee* ɔmɛ a nya nɛ́ a hwɔ we si. A ti nɔ ko be nɛ nɔ́ nɛ e bua nya a sui susumi nɔ́ nɛ ji homa* nyɔngma, nɛ a ya nɔ nɛ a gbɛ lohwe ɔmɛ nɛ a bua nya a mi kɛ kpa sito he ɔ tsuo.* 33 Se benɛ lo ɔ ngɛ a nya mi nɛ a ná we nɛ a ta lolo ɔ, Yehowa mi mi fu ni ɔmɛ wawɛɛ, nɛ Yehowa bɔni mɛ ní fiami, nɛ e gbe a ti nihi babauu.

34 Lɔ ɔ he ɔ, a wo lejɛ ɔ biɛ ke Kibrot Hataava,* ejakaa lejɛ ɔ nɛ a pu jiklɔɔtsɛmɛ nɛ a fo mɛ pɛ a nɔ́ mi ɔ ngɛ. 35 Benɛ ni ɔmɛ je Kibrot Hataava a, a ho Hazerot ya, nɛ a ya hi lejɛ ɔ.

12 Jehanɛ ɔ, Miriam kɛ Aaron tu munyu kɛ si Mose ngɛ Kush yo nɛ e ngɔ ɔ he je, ejakaa Mose yo ɔ, Kush no ji lɛ. 2 A bi ke: “Anɛ Mose pɛ nɔ nɛ Yehowa guɔ kɛ tuɔ munyu lo? Anɛ e tui munyu kɛ gui wɔ hu wa nɔ lo?” Nɛ Yehowa ngɛ nɔ́ nɛ a ngɛ dee ɔ nue. 3 Mose ji nɔ ko nɛ e he jɔ pe adesahi tsuo nɛ a ngɛ zugba a nɔ ɔ.*

4 Si kake too ɔ, Yehowa de Mose kɛ Aaron kɛ Miriam ke: “Nyɛ ni etɛ ɔmɛ nyɛɛ je kpo kɛ ho kpe he bo tsu ɔ he ya.” Lɔ ɔ he ɔ, mɛ ni etɛ ɔmɛ a je kpo kɛ ho. 5 Kɛkɛ nɛ Yehowa kple si kɛ ba ngɛ bɔku titima a mi, nɛ e ba da si ngɛ bo tsu ɔ nya, nɛ e tsɛ Aaron kɛ Miriam. Nɛ mɛ ni enyɔ ɔmɛ tsuo a hɛ mɛ kɛ ya a hɛ mi. 6 Kɛkɛ nɛ e de mɛ ke: “I kpa nyɛ pɛɛ, nyɛɛ bu mi tue. Ke Yehowa gbalɔ ko ngɛ nyɛ kpɛti ɔ, jinɛ i ko je ye he kpo kɛ tsɔɔ lɛ ngɛ nina mi, nɛ i kɛ lɛ ko tu munyu ngɛ nlami mi. 7 Se pi jã nɛ e ji ngɛ ye sɔmɔlɔ Mose blɔ fa mi! I ngɔ ye we ɔ tsuo kɛ wo e dɛ.* 8 I kɛ lɛ tuɔ munyu hɛ mi kɛ hɛ mi.* Nɔ́ fɛɛ nɔ́ nɛ i suɔ nɛ ma de lɛ ɔ, i deɔ lɛ heii, se pi ngɛ abɛ gbi mi; nɛ e naa bɔ nɛ Yehowa ngɛ ha. Mɛni he je mɔ nɛ nyɛ yi gbeye kaa nyɛ maa tu munyu kɛ si ye sɔmɔlɔ Mose ɔ?”

9 Lɔ ɔ he ɔ, Yehowa mi mi fu mɛ wawɛɛ, nɛ e je a he. 10 Kɛkɛ nɛ bɔku ɔ je bo tsu ɔ nɔ, nɛ hyɛ! kpiti pue Miriam, nɛ e hiɛ futaa kaa snoo. Aaron plɛ e he nɛ e hyɛ Miriam, nɛ e na kaa kpiti pue lɛ. 11 Amlɔ nɔuu ɔ, Aaron de Mose ke: “Ye nyɔmtsɛ, i kpa mo pɛɛ! I kpa mo pɛɛ, o kɛ wɔ nɛ ko ye ngɛ wa yayami ɔ he je! Nɔ́ nɛ wa pee nɛ ɔ lɛɛ, wa je kuasia. 12 I kpa mo pɛɛ, ko ha nɛ e ya nɔ nɛ e pee kaa nɔ nɛ e gbo, nɛ́ e nɔmlɔ tso ɔ fã sa loko a fɔ lɛ!” 13 Kɛkɛ nɛ Mose kpa ngmlaa kɛ tsɛ Yehowa, nɛ e de lɛ ke: “Ao Mawu, i kpa mo pɛɛ nɛ o tsa lɛ! I kpa mo pɛɛ!”

14 Yehowa de Mose ke: “Ke e tsɛ su lada kɛ pue e hɛ mi ɔ, anɛ e hɛ mi be si puee ligbi kpaago lo? Ha nɛ a tsi e nya ligbi kpaago ngɛ sito he ɔ se, lɔ ɔ se ɔ, a ma nyɛ maa ngɔ lɛ kɛ ba sito he ɔ ekohu.” 15 Lɔ ɔ he ɔ, a ya tsi Miriam nya ngɛ sito he ɔ se ligbi kpaago, nɛ ni ɔmɛ hiɛ kɛ ji sito he ɔ kɛ ya si be nɛ a kpale Miriam kɛ ba sito he ɔ. 16 Lɔ ɔ se ɔ, ni ɔmɛ hia kɛ je Hazerot, nɛ a ya to si ngɛ Paran nga a nɔ.

13 Jehanɛ ɔ, Yehowa kɛ Mose tu munyu, nɛ e de lɛ ke: 2 “Moo tsɔ nyumuhi nɛ a ya kpá Kanaan zugba a nɛ i kɛ ngɛ Israel bi ɔmɛ hae ɔ si. Nyɛɛ hla nyumu kake nɛ e ji ganɔ ngɛ Israel bi ɔmɛ a nɛmɛ a wɛtso ɔmɛ eko fɛɛ eko mi.”

3 Lɔ ɔ he ɔ, Mose tsɔ mɛ kɛ je Paran nga a nɔ ngɛ Yehowa fami nya. Nyumu ɔmɛ tsuo ji nya dali ngɛ Israel bi ɔmɛ a kpɛti. 4 A biɛhi ji nɛ ɔmɛ nɛ: ngɛ Reuben wɛtso ɔ mi ɔ, Zakur binyumu Shamua; 5 ngɛ Simeon wɛtso ɔ mi ɔ, Hori binyumu Shafat; 6 ngɛ Yuda wɛtso ɔ mi ɔ, Yefune binyumu Kaleb; 7 ngɛ Isakar wɛtso ɔ mi ɔ, Yosef binyumu Igal; 8 ngɛ Efraim wɛtso ɔ mi ɔ, Nun binyumu Hoshea; 9 ngɛ Benyamin wɛtso ɔ mi ɔ, Rafu binyumu Palti; 10 ngɛ Zebulun wɛtso ɔ mi ɔ, Sodi binyumu Gadiel; 11 ngɛ Yosef wɛtso ɔ nɛ ji Manase wɛtso ɔ mi ɔ, Susi binyumu Gaddi; 12 ngɛ Dan wɛtso ɔ mi ɔ, Gemali binyumu Amiel; 13 ngɛ Asher wɛtso ɔ mi ɔ, Mikael binyumu Setur; 14 ngɛ Naftali wɛtso ɔ mi ɔ, Vofsi binyumu Nabi; 15 ngɛ Gad wɛtso ɔ mi ɔ, Maki binyumu Geuel. 16 Nyumuhi nɛ Mose tsɔ ke a ya kpá zugba a si ɔ a biɛhi ji nɛ ɔmɛ nɛ. Mose wo Nun binyumu Hoshea biɛ ke Yoshua.*

17 Benɛ Mose ngɛ mɛ tsɔe konɛ a ya kpá Kanaan zugba a si ɔ, e de mɛ ke: “Nyɛɛ kuɔ kɛ ya Negeb, nɛ nyɛɛ kuɔ kɛ ya yoku ɔmɛ a nɔ. 18 Nyɛ ya hyɛ bɔ nɛ zugba a ngɛ ha, nɛ́ nyɛɛ hyɛ ke ji nihi nɛ a ngɛ nɔ ɔ a he wa loo a he wɛ, nɛ a he hiɛ loo a he pi. 19 Nyɛɛ hyɛ kaa zugba a hi loo e hí, nyɛɛ hyɛ hu kaa a fia gbogbo kɛ wo mahi nɛ a ngɛ nɔ ɔ a he loo a fiɛ gbogbo kɛ wui a he. 20 Nyɛɛ hyɛ kaa zugba a baa ní,* loo e bɛ ní,* nɛ nyɛɛ hyɛ kaa tsohi ngɛ zugba a nɔ loo tsohi be nɔ. Nyɛɛ pee kã, nɛ́ nyɛɛ ngɔ zugba a nɔ niba ní ɔ eko kɛ ba.” Jamɛ a be ɔ ji kekleekle wai yiblii fumi be.

21 Lɔ ɔ he ɔ, a kuɔ kɛ ho nɛ a ya kpá zugba a si kɛ je Zin nga a nɔ kɛ ya si Rehob, nɛ ngɛ Lebo Hamat kasa nya a.* 22 Benɛ a kuɔ kɛ ya Negeb ɔ, a ba su Hebron, he nɛ Anak bi nɛ ji Ahiman, Sheshai, kɛ Talmai ngɛ ɔ. A po Hebron ma a jeha kpaago loko a po Zoan ma nɛ ngɛ Egipt ɔ. 23 Benɛ a ba su Eshkol Dɔgba a* mi ɔ, a po wai tso kɔni kɛ e nɔ wai yiblii sau kplanyaa kake ngɛ lejɛ ɔ, nɛ a ngɔ tso kɛ wo kpɛ, nɛ a kpɛti ni enyɔ wo, a ngɔ pomegranet* bɔɔ kɛ fig bɔɔ hu kɛ piɛɛ he. 24 A wo lejɛ ɔ biɛ ke Eshkol* Dɔgba* ngɛ wai yiblii sau nɛ Israel bi ɔmɛ po ngɛ lejɛ ɔ he je.

25 Ligbi 40 se ɔ, a ya kpá zugba a si nɛ a kpale kɛ ba. 26 Lɔ ɔ he ɔ, a kpale kɛ ba Mose kɛ Aaron kɛ Israel ma a tsuo nɛ a ngɛ Paran nga a nɔ ngɛ Kadesh ɔ a ngɔ. A ba bɔ ma a tsuo amaniɛ, nɛ a ngɔ zugba a nɔ niba ní ɔ hu kɛ tsɔɔ mɛ. 27 Amaniɛ nɛ a ba bɔ Mose ji nɛ ɔ nɛ: “Wa ya zugba a nɛ o tsɔ wɔ nɔ ɔ nɔ, nɛ ngɛ anɔkuale mi ɔ, nyɔ nyu kɛ hwo ngɛ bee ngɛ nɔ, nɛ zugba a nɔ niba ní ji nɛ ɔ nɛ. 28 Se nihi nɛ a ngɛ zugba a nɔ ɔ, a he wa, nɛ mahi nɛ a fia gbogbo kɛ wo a he ɔ hu ji ma nguanguahi. Wa na Anak bi ɔmɛ hu ngɛ lejɛ ɔ. 29 Amalek bi ɔmɛ ngɛ Negeb zugba a nɔ, nɛ Hit bi ɔmɛ, kɛ Yebus bi ɔmɛ, kɛ Amor bi ɔmɛ ngɛ yoku ɔmɛ a nɔ, nɛ Kanaan bi ɔmɛ ngɛ wo ɔ he kɛ Yordan Pa a he.”

30 Kɛkɛ nɛ Kaleb bɔ mɔde kaa e maa wo ni ɔmɛ a bua benɛ a daa si ngɛ Mose hɛ mi ɔ. E de mɛ ke: “Nyɛ ha nɛ waa kuɔ kɛ ho amlɔ nɔuu. Bɔ fɛɛ bɔ nɛ ji ɔ, wa nine maa su zugba a nɔ, ejakaa wa ma nyɛ maa ye a nɔ kunimi kokooko.” 31 Se nyumuhi nɛ a piɛɛ Kaleb he kɛ kuɔ kɛ ya a de ke: “Wa be nyɛe maa kuɔ kɛ ya nɛ waa kɛ nimli nɛ ɔmɛ nɛ ya hwu, ejakaa a he wa pe wɔ.” 32 Nɛ a ya nɔ nɛ a tu zugba a nɛ a ya kpá si ɔ he munyu yaya kɛ tsɔɔ Israel bi ɔmɛ ke: “Zugba a nɛ wa ya be ngɛ nɔ kɛ hyɛ bɔ nɛ e ngɛ ha a ji zugba nɛ e miiɔ nihi nɛ a ngɛ nɔ ɔ, nɛ nihi tsuo nɛ wa na ngɛ zugba a nɔ ɔ je oblai nitsɛ. 33 Nɛ wa na Oblaihi,* nɛ ji Anak binyumu ɔmɛ nɛ́ a ji Nefilim ɔmɛ a nina ngɛ lejɛ ɔ, nɛ ke waa kɛ wa he to a he ɔ, wa ngɛ kaa tukpɛtukpɛhi,* nɛ jã kɛ̃ nɛ mɛ hu a naa wɔ.”

14 Kɛkɛ nɛ ma a tsuo wo a gbi nɔ, nɛ ni ɔmɛ fo ya boboobo jamɛ a nyɔ ɔ mi tsuo. 2 Israel bi ɔmɛ tsuo bɔni munyu huitihuiti tumi. Ni ɔmɛ tsuo tu munyu kɛ si Mose kɛ Aaron ke: “Wa gbo ngɛ Egipt zugba a nɔ jinɛ e hi, aloo wa gbo ngɛ nga nɛ ɔ nɔ jinɛ e hi! 3 Mɛni he je nɛ Yehowa ngɔ wɔ kɛ ma zugba nɛ ɔ nɔ konɛ wa ba gbo ngɛ klaate nya a? A maa ngɔ wa yi ɔmɛ kɛ wa bimɛ ɔmɛ nyɔguɛ. Ke wa kpale kɛ ho Egipt ya a, anɛ lɔ ɔ mohu hí lo?” 4 A de a sibi po ke: “Nyɛ ha nɛ waa hla hɛ mi nyɛɛlɔ nɛ waa kpale kɛ ho Egipt ya!”

5 Kɛkɛ nɛ Mose kɛ Aaron ngɔ a hɛ mi kɛ bu si ngɛ zugba ngɛ Israel ma a tsuo nɛ a kpe ɔ hɛ mi. 6 Nun binyumu Yoshua kɛ Yefune binyumu Kaleb nɛ a piɛɛ nihi nɛ a ya kpá zugba a si ɔ a he ɔ gba a he tadehi, 7 nɛ a de Israel ma a tsuo ke: “Zugba a nɛ wa ya be ngɛ nɔ kɛ hyɛ bɔ nɛ e ngɛ ha a ji zugba nɛ e hi saminya. 8 Ke Yehowa kplɛɛ wa nɔ ɔ, e maa ngɔ wɔ kɛ ya zugba nɛ ɔ nɔ kokooko, nɛ e maa ngɔ zugba nɛ nyɔ nyu kɛ hwo ngɛ bee ngɛ nɔ ɔ kɛ ha wɔ. 9 Se nyɛ ko tsɔ Yehowa hɛ mi atuã, nɛ nyɛ ko ye nihi nɛ a ngɛ zugba a nɔ ɔ hu gbeye, ejakaa tsapi nɔ ko kulaa ji mɛ ha wɔ.* A be he piɛ pomi ko hu, se wɔɔ lɛɛ Yehowa kɛ wɔ ngɛ. Nyɛ ko ye mɛ gbeye.”

10 Se ni ɔmɛ tsuo de ke a maa fiaa mɛ tɛ. Kɛkɛ nɛ Yehowa hɛ mi nyami ɔ ba kpe he bo tsu ɔ nɔ nɛ Israel bi ɔmɛ tsuo na.

11 Nɛ Yehowa bi Mose ke: “Mɛni be nimli nɛ ɔmɛ ma ná bumi kɛ ha mi? Ngɛ okadihi nɛ i pee ngɛ a kpɛti ɔ tsuo se ɔ, kɛ yaa si mɛni be loko a ma he mi maa ye? 12 Ha nɛ ma ngɔ hiɔ nɛ sãã nɔ kɛ kpata a hɛ mi, nɛ́ ma pee mo ma nɛ kle, nɛ e he wa pe mɛ.”

13 Se Mose de Yehowa ke: “Ke o pee jã a, Egipt bi ɔmɛ nɛ o kɛ o he wami kpɔ̃ nimli nɛ ɔmɛ kɛ je a dɛ mi ɔ maa nu, 14 nɛ a maa tu he munyu kɛ tsɔɔ zugba nɛ ɔ nɔ bi ɔmɛ. Mɛ hu a nu kaa mo Yehowa o ngɛ nimli nɛ ɔmɛ a kpɛti, nɛ o je o he kpo kɛ tsɔɔ mɛ hɛ mi kɛ hɛ mi. Mo ji Yehowa, nɛ o bɔku ɔ hiɔ a yi nɔ, nɛ ke je na a, o nyɛɛɔ a hɛ mi ngɛ bɔku titima mi, nɛ nyɔ mi ɔ, o nyɛɛɔ a hɛ mi ngɛ la titima mi. 15 Ke o kpata nimli nɛ ɔmɛ tsuo a hɛ mi ngɛ be kake mi ɔ, mahi nɛ a nu o biɛ ɔ he ɔ ma de ke: 16 ‘Yehowa nyɛ we nɛ e ngɔ nimli nɛ ɔmɛ kɛ ya zugba nɛ e wo si kaa e kɛ ma ha mɛ ɔ nɔ, lɔ ɔ he ɔ, e gbe mɛ ngɛ nga a nɔ.’ 17 Yehowa, amlɔ nɛ ɔ, i kpa mo pɛɛ nɛ o ha nɛ o he wami ɔ nɛ je agbo kaa bɔ nɛ o wo si benɛ o de ke: 18 ‘Imi Yehowa, ye mi mi fu we mla, nɛ ye suɔmi nɛ se pui ɔ hiɛ babauu. I ngɔɔ tɔmi kɛ yayami kɛ keɔ, se i ha we nɛ ni nɛmɛ nɛ a ye fɔ ɔ yeɔ a he kɔkɔɔkɔ. I ngɔɔ tsɛmɛ a tɔmi he tue gblami kɛ baa bimɛ a nɔ, i kɛ baa yi nɔ etɛne kɛ yi nɔ eywiɛne a nɔ.’ 19 I kpa mo pɛɛ nɛ o ngɔ nimli nɛ ɔmɛ a tɔmi ɔ kɛ ke mɛ ngɛ o suɔmi agbo nɛ se pui ɔ he je, kaa bɔ nɛ o kɛ nimli nɛ ɔmɛ a tɔmi ke mɛ kɛ je Egipt hluu kɛ ba si amlɔ nɛ ɔ.”

20 Kɛkɛ nɛ Yehowa de ke: “I ngɔ kɛ ke mɛ kaa bɔ nɛ o de ɔ. 21 Se kɛ̃ ɔ, be abɔ nɛ imi Yehowa ye hɛ ngɛ nɛ ɔ, ye hɛ mi nyami ɔ maa kpe zugba a nɔ tsuo. 22 Se nihi nɛ a na ye hɛ mi nyami ɔ, kɛ okadihi nɛ i pee ngɛ Egipt kɛ nga a nɔ, se kɛ̃ ɔ, si nyɔngma sɔuu ji nɛ ɔ nɛ a ka mi nɛ a bui ye gbi tue ɔ, a kpɛti nɔ kake po 23 be zugba a nɛ i kã a tsɛmɛ ɔmɛ kita kaa ma ngɔ kɛ ha mɛ ɔ nae kɔkɔɔkɔ. Ee, ni nɛmɛ nɛ a bui mi ɔ, a ti nɔ kake po be zugba a nae fɛɛ. 24 Se akɛnɛ e slo ye sɔmɔlɔ Kaleb ngɛ ni kpa amɛ a he, nɛ́ e ya nɔ nɛ e kɛ e tsui tsuo nyɛɛ ye se he je ɔ, ma ngɔ lɛ kɛ ya zugba nɛ e ya kpá si ɔ nɔ, nɛ e nina nine maa su nɔ. 25 Akɛnɛ Amalek bi ɔmɛ kɛ Kanaan bi ɔmɛ ngɛ dɔgba a* mi he je ɔ, hwɔɔ ɔ, nyɛɛ kpale nyɛ se nɛ nyɛɛ gu blɔ nɛ be ngɛ Wo Tsu ɔ he ɔ nɔ kɛ ya nga a nɔ.”

26 Lɔ ɔ se ɔ, Yehowa de Mose kɛ Aaron ke: 27 “Kɛ ya si mɛni be nɛ ma yiwutsotsɛmɛ nɛ ɔmɛ maa tu munyu huitihuiti kɛ si mi? Munyu huitihuiti nɛ Israel bi ɔmɛ ngɛ tue kɛ ngɛ mi sie ɔ, i nu. 28 De mɛ ke: ‘Yehowa ke, “Be abɔ nɛ i ngɛ wami mi nɛ ɔ, nɔ́ nɛ i nu nɛ nyɛ de ɔ, jã pɛ nɛ ma pee nyɛ! 29 Nyɛ ma gbo kɛ pue si ngɛ nga nɛ ɔ nɔ, ee, nyɛ nihi tsuo nɛ nyɛ ye jeha 20 kɛ yaa nɛ a ngma nyɛ biɛ ɔ, nyɛ nihi tsuo nɛ nyɛ tu munyu huitihuiti kɛ si mi ɔ. 30 Nyɛ ti nɔ ko nɔ ko be zugba nɛ i kã kita* kaa ma ha nɛ nyɛɛ hi nɔ ɔ nɔ yae, ja Yefune binyumu Kaleb kɛ Nun binyumu Yoshua pɛ.

31 “‘“Ma ngɔ nyɛ bimɛ nɛ nyɛ de ke a maa ngɔ mɛ nyɔguɛ ɔ kɛ ya zugba nɛ nyɛ kua a nɔ, nɛ a maa na bɔ nɛ zugba a ngɛ ha. 32 Se nyɛɛ lɛɛ nyɛ ma gbo kɛ pue si ngɛ nga nɛ ɔ nɔ. 33 Nyɛ binyumu ɔmɛ maa pee to hyɛli ngɛ nga a nɔ jeha 40, nɛ a maa na anɔkuale nɛ nyɛ yi mi ɔ* mi nɔ́ kɛ ya si be nɛ nyagbe nɔ ngɛ nyɛ kpɛti ma gbo kɛ fɔ si ngɛ nga a nɔ. 34 Ligbi abɔ nɛ nyɛɛ kɛ ya kpá zugba a si ɔ ji ligbi 40. Ligbi kake daa si ha jeha kake. Enɛ ɔ he ɔ, nyɛ maa na nyɛ yayami ɔmɛ a mi nɔ́ jeha 40, nɛ nyɛ maa na nɔ́ nɛ baa ke nɔ ko te si kɛ wo mi.*

35 “‘“Imi Yehowa lɛ i de. Nɔ́ nɛ ma pee ma yiwutsotsɛmɛ nɛ ɔmɛ nɛ a pee kake kɛ tsɔ ye hɛ mi atuã a ji nɛ ɔ nɛ: A nyagbe maa ba ngɛ nga nɛ ɔ nɔ, nɛ a ma gbo ngɛ hiɛ ɔ. 36 Nyumuhi nɛ Mose tsɔ nɛ a ya kpá zugba a si nɛ a ha nɛ ni ɔmɛ tsuo tu munyu huitihuiti kɛ si lɛ benɛ a kpale kɛ ba nɛ a ba bɔ zugba a he amaniɛ yaya a, 37 ee, nyumuhi nɛ a ba bɔ zugba a he amaniɛ yaya a, a maa gbla a tue nɛ a ma gbo ngɛ Yehowa hɛ mi. 38 Se Nun binyumu Yoshua kɛ Yefune binyumu Kaleb nɛ a piɛɛ nihi nɛ a ya kpá zugba a si ɔ a he ɔ lɛɛ, bɔ fɛɛ bɔ nɛ ji ɔ, a yi ma ná wami.”’”

39 Benɛ Mose de Israel bi ɔmɛ tsuo nɔ́ nɛ ɔ, a bɔni kɔmɔ yemi wawɛɛ nitsɛ. 40 Kɛkɛ nɛ a te si mɔtu mla ke a yaa yoku ɔ nɔ, nɛ a ngɛ dee ke: “Amlɔ nɛ ɔ, wa pee klaalo kaa wa maa kuɔ kɛ ya he nɛ Yehowa wo si kaa e kɛ ma ha wɔ ɔ, ejakaa wa pee yayami.” 41 Se Mose de mɛ ke: “Mɛni he je nɛ nyɛɛ kɛ Yehowa blɔ tsɔɔmi tsu we ní ɔ? Nyɛ be manye yee. 42 Nyɛ ko kuɔ kɛ ya, ejakaa Yehowa piɛɛ we nyɛ he; nyɛ he nyɛli ɔmɛ ma ya ye nyɛ nɔ kunimi. 43 Ejakaa Amalek bi ɔmɛ kɛ Kanaan bi ɔmɛ ngɛ lejɛ ɔ. A kɛ nyɛ maa kpe, nɛ nyɛ ma gbo ngɛ klaate nya. Akɛnɛ nyɛ je Yehowa se he je ɔ, Yehowa be nyɛ he piɛɛe.”

44 Se a kplii a tsui nɛ a pue yoku ɔ yi mi blɔ, se Yehowa somi daka a kɛ Mose lɛɛ a hiɛ kɛ ji sito he ɔ kpɛti. 45 Kɛkɛ nɛ Amalek bi kɛ Kanaan bi nɛ a ngɛ yoku ɔ nɔ ɔ kple si nɛ a ba fiaa mɛ ní, nɛ a gbɛ mɛ kɛ fĩa kɛ ya si Horma tɔɔ.

15 Yehowa kɛ Mose tu munyu ekohu, nɛ e de lɛ ke: 2 “O kɛ Israel bi ɔmɛ nɛ tu munyu nɛ o de mɛ ke, ‘Ke nyagbenyagbe ɔ, nyɛ ya su zugba nɛ i kɛ ngɛ nyɛ hae kaa nyɛɛ hi nɔ ɔ nɔ, 3 nɛ nyɛ maa ngɔ nyɛ na amɛ kɛ nyɛ to ɔmɛ eko kɛ sã afɔle nɛ a kɛ la sãã ha Yehowa konɛ e je via liliili ha Yehowa a*—sami afɔle jio, kita klɛdɛɛ ko he afɔle jio, afɔle nɛ je tsui mi faa jio, afɔle nɛ a sãã ngɛ nyɛ gbijlɔ yemi be ɔmɛ a mi jio— 4 nɔ nɛ ma afɔle ɔ sami ɔ nɛ e ngɔ ngma afɔle hu kɛ ba ha Yehowa. Ngma afɔle ɔ nɛ pee mamu bukɔbukɔ lita enyɔ* nɛ́ a kɛ nu lita kake* futu mi. 5 Jehanɛ hu ɔ, nyɛɛ ngɔ wai lita kake kɛ ba kaa dã afɔle kɛ piɛɛ sami afɔle ɔ, loo jijɔ ku wayo fɛɛ jijɔ ku wayo nɛ a kɛ maa sã afɔle ɔ he. 6 Se ke agbosu lɛ nyɛɛ kɛ maa sã afɔle ɔ, nyɛɛ ngɔ ngma afɔle hu kɛ ba. Ngma afɔle ɔ nɛ pee mamu bukɔbukɔ lita eywiɛ kɛ fã nɛ a kɛ nu nɛ e hiɛ bɔɔ pe lita kake futu mi. 7 Nɛ́ nyɛɛ ngɔ wai nɛ e hiɛ bɔɔ pe lita kake kɛ ba kaa dã afɔle nɛ jeɔ via liliili ha Yehowa.*

8 “‘Se ke na ku nɛ nyɛɛ kɛ maa sã sami afɔle, aloo kita klɛdɛɛ ko he afɔle, aloo tue mi jɔmi afɔle ha Yehowa a, 9 nyɛɛ ngɔ ngma afɔle kɛ piɛɛ na ku ɔ he kɛ ba. Ngma afɔle ɔ nɛ pee mamu bukɔbukɔ lita ekpa kɛ fã nɛ a kɛ nu nɛ e piɛ bɔɔ nɛ e maa su lita enyɔ futu mi. 10 Jehanɛ hu ɔ, nyɛɛ ngɔ wai nɛ e piɛ bɔɔ nɛ e maa su lita enyɔ kɛ ba kaa dã afɔle nɛ a kɛ la sãã nɛ jeɔ via liliili ha Yehowa.* 11 Nyɛɛ ngɔ ní nɛ ɔmɛ kɛ piɛɛ na ku fɛɛ na ku, loo agbosu fɛɛ agbosu, loo jijɔ ku wayo fɛɛ jijɔ ku wayo, loo apletsi fɛɛ apletsi nɛ nyɛɛ kɛ ma ba sã afɔle ɔ he. 12 Lohwehi abɔ nɛ nyɛɛ kɛ ma ba sã afɔle ɔ, nyɛɛ ngɔ ní nɛ ɔmɛ kɛ piɛɛ eko fɛɛ eko he. 13 Bɔ nɛ Israel fɔfɔɛ fɛɛ Israel fɔfɔɛ maa sã afɔle nɛ a kɛ la sãã nɛ jeɔ via liliili ha Yehowa* ji nɛ ɔ nɛ.

14 “‘Ke nubwɔ ko ba to nyɛ, aloo nubwɔ ko ngɛ nyɛ kpɛti be babauu, nɛ e maa sã afɔle nɛ a kɛ la sãã nɛ jeɔ via liliili ha Yehowa a,* e pee kaa bɔ nɛ nyɛ peeɔ ɔ pɛpɛɛpɛ. 15 Mlaa kake lɛ fɔɔ si ha nyɛ Israel bi kɛ nubwɔ nɛ e ngɛ nyɛ kpɛti ɔ tsuo. E maa pee mlaa nɛ fɔɔ si daa ha nyɛ yi nɔhi tsuo. E sɛ nɛ slɔɔto ko nɛ hi nyɛɛ kɛ nibwɔhi nyɛ kpɛti ngɛ Yehowa hɛ mi. 16 Mlaa kake kɛ kojomi kake nɛ́ ngɛ ha nyɛɛ kɛ nubwɔ nɛ ngɛ nyɛ kpɛti ɔ tsuo.’”

17 Yehowa ya nɔ nɛ e de Mose ke: 18 “O kɛ Israel bi ɔmɛ nɛ tu munyu nɛ o de mɛ ke, ‘Ke nyɛ ya su zugba nɛ i kɛ nyɛ yaa nɔ ɔ nɔ ɔ, 19 niye ní fɛɛ niye ní* nɛ nyɛ maa ye ngɛ nɔ ɔ, nyɛɛ ngɔ eko kɛ ha Yehowa kaa yemi kɛ buami. 20 Nyɛɛ ngɔ kekleekle ngma nɛ́ a wɛɛ nɛ e bua we kɛ pee abolo lokotolokotohi,* nɛ́ nyɛ kɛ ha kaa yemi kɛ buami. Kaa bɔ nɛ nyɛ ngɔɔ níhi kɛ jeɔ ngma gbeemi he ɔ kɛ baa kaa yemi kɛ buami ɔ, nyɛɛ pee jã ngɛ enɛ ɔ hu blɔ fa mi. 21 Nyɛɛ ngɔ nyɛ kekleekle ngma nɛ a wɛɛ nɛ e bua we ɔ eko kɛ ha Yehowa kaa yemi kɛ buami, nyɛ yi nɔhi tsuo.

22 “‘Ke e ba kaa nyɛ tɔ̃ tɔ̃mi ko, nɛ nyɛ yi mlaa nɛ ɔmɛ tsuo nɛ Yehowa kɛ ha Mose ɔ nɔ, 23 —mlaahi tsuo nɛ Yehowa wo nyɛ kɛ gu Mose nɔ, kɛ je ligbi nɛ Yehowa wo nyɛ mlaa a nɔ hluu kɛ yaa nyɛ yi nɔhi tsuo— 24 nɛ́ pi kaa nyɛ je blɔ nɛ nyɛ pee, nɛ ma a li ɔ, ma a tsuo nɛ ngɔ na ku wayoo kake kɛ sã sami afɔle nɛ jeɔ via liliili ha Yehowa,* nɛ́ a sã e he ngma afɔle kɛ e he dã afɔle kaa bɔ nɛ a peeɔ daa a, nɛ́ a ngɔ apletsi wayoo kake hu kɛ sã yayami afɔle. 25 Osɔfo ɔ ma kpata kɛ ha Israel ma a tsuo, nɛ a kɛ tɔmi ɔ maa ke mɛ, ejakaa pi nɛ a je blɔ nɛ a tɔ̃, nɛ jehanɛ hu ɔ, a ngɔ afɔle nɛ a kɛ la sãã ba ha Yehowa, nɛ a ngɔ a yayami afɔle ɔ hu kɛ ba Yehowa hɛ mi ngɛ tɔmi nɛ a tɔ̃ ɔ he je. 26 A kɛ maa ke Israel ma a tsuo, kɛ nubwɔhi nɛ ngɛ a kpɛti ɔ, ejakaa ni ɔmɛ tsuo lɛ a tɔ̃.

27 “‘Ke nɔ* ko pee yayami nɛ pi kaa e je blɔ ɔ, e ngɔ apletsi eyo nɛ e yi jeha kake lolo kɛ ba nɛ a kɛ sã yayami afɔle. 28 Osɔfo ɔ nɛ kpata kɛ ha nɔ* nɛ e pee yayami nɛ pi kaa e je blɔ ɔ. E pee jã ngɛ Yehowa hɛ mi, konɛ e kɛ kpata ha nɔ ɔ ngɛ nɔ́ nɛ e pee ɔ he, nɛ a kɛ maa ke lɛ. 29 Ke nɔ ko pee yayami ko nɛ́ pi kaa e je blɔ ɔ, mlaa kake nɛ́ e fɔ si ha nyɛ Israel fɔfɔɛhi kɛ nubwɔhi nɛ a ngɛ nyɛ kpɛti ɔ tsuo.

30 “‘Se ke nɔ* ko je blɔ nɛ e pee yayami ko ɔ, Israel fɔfɔɛ jio, nubwɔ jio, e gbe Yehowa he guɛ, lɔ ɔ he ɔ, e sa nɛ a gbe jamɛ a nɔ ɔ.* 31 Akɛnɛ e bui Yehowa munyu ɔ, nɛ́ e tɔ̃ e mlaa a nɔ he je ɔ, bɔ fɛɛ bɔ nɛ ji ɔ, á gbe jamɛ a nɔ ɔ.* Lɛ nitsɛ e yayami maa tloo lɛ.’”

32 Benɛ Israel bi ɔmɛ ngɛ nga a nɔ ɔ, a na nyumu ko nɛ e ngɛ lɛ́ nya buae ngɛ Hejɔɔmi ligbi ɔ nɔ. 33 Nihi nɛ a ya na lɛ nɛ e ngɛ lɛ́ nya buae ɔ ngɔ lɛ kɛ ba ha Mose kɛ Aaron kɛ ma a tsuo. 34 Akɛnɛ mlaa a tsɔɔ we nɔ́ tutuutu nɛ e sa kaa a pee lɛ he je ɔ, a tsi e nya ngɛ he ko.

35 Kɛkɛ nɛ Yehowa de Mose ke: “Bɔ fɛɛ bɔ nɛ ji ɔ, a gbe nyumu ɔ. Ma a tsuo nɛ fiaa lɛ tɛ ngɛ sito he ɔ se.” 36 Lɔ ɔ he ɔ, Ma a tsuo ngɔ lɛ kɛ ya sito he ɔ se nɛ a ya fiaa lɛ tɛ nɛ e gbo, kaa bɔ nɛ Yehowa fã Mose ɔ pɛpɛɛpɛ.

37 Yehowa ya nɔ nɛ e de Mose ke: 38 “O kɛ Israel bi ɔmɛ nɛ tu munyu nɛ o de mɛ ke, a pee deke kɛ wo a tade ɔmɛ a nya, a yi nɔhi tsuo, nɛ a ngɔ kpã bluu kɛ wo deke ɔ yi nɔ. 39 ‘Deke nɛ ɔ nɛ hi nyɛ tade ɔmɛ a nya bɔ nɛ pee nɛ nyɛɛ na nɛ nyɛ kai mlaahi tsuo nɛ Yehowa kɛ ha nyɛ ɔ, nɛ nyɛɛ ye a nɔ. Nyɛ ko nyɛɛ nyɛ nitsɛmɛ nyɛ tsui kɛ nyɛ hɛngmɛ se, ejakaa lɔ ɔ ha nɛ nyɛ yi mi anɔkuale.* 40 Deke ɔ maa ye bua nyɛ konɛ nyɛ kai ye mlaa amɛ tsuo, nɛ nyɛɛ ye a nɔ, nɛ nyɛɛ pee klɔuklɔu ha nyɛ Mawu ɔ. 41 Imi ji Yehowa nyɛ Mawu ɔ nɛ, nɔ nɛ e je nyɛ kɛ je Egipt zugba a nɔ konɛ ma kɛ tsɔɔ kaa imi ji nyɛ Mawu ɔ. Imi ji Yehowa nyɛ Mawu ɔ nɛ.’”

16 Kɛkɛ nɛ Kora, nɛ ji Izhar binyumu ɔ kɛ Eliab binyumuhi nɛ ji Datan kɛ Abiram, kɛ On, nɛ ji Pelet binyumu ɔ te si. Izhar tsɛ ji Kohat, nɛ Kohat tsɛ ji Levi. Datan, kɛ Abiram, kɛ On ji Reuben ninahi. 2 A kɛ Israel nyumuhi 250 te si kɛ wo Mose. Nyumu nɛ ɔmɛ ji ganɔhi nɛ a hla ngɛ ma a mi, nɛ́ a le mɛ saminya. 3 A kpe kɛ wo Mose kɛ Aaron he, nɛ a de mɛ ke: “Nyɛ ngɛ nɔ́ ko pee tsɔ! Ma nɛ ɔ tsuo ngɛ klɔuklɔu, ni ɔmɛ tsuo ngɛ klɔuklɔu, nɛ Yehowa ngɛ a kpɛti. Mɛni he je mɔ nɛ e sa nɛ nyɛ wo nyɛ he nɔ ngɛ Yehowa asafo ɔ nɔ ɔ?”

4 Benɛ Mose nu nɔ́ nɛ ɔ, amlɔ nɔuu nɛ e ngɔ e hɛ mi kɛ bu si. 5 Kɛkɛ nɛ e de Kora kɛ nihi tsuo nɛ a fĩ e se ɔ ke: “Hwɔɔ mɔtu ɔ, Yehowa ma ha nɛ wa maa na nɔ nɛ ji e nɔ́, kɛ nɔ nɛ ngɛ klɔuklɔu, kɛ nɔ nɛ e sa kaa e hɛ lɛ kɛ su e he. Nɔ nɛ e maa hla a, jamɛ a nɔ ɔ lɛ maa hɛ kɛ su e he. 6 Nɔ́ nɛ nyɛɛ pee ji nɛ ɔ nɛ: mo Kora, o kɛ nihi nɛ a fĩ o se ɔ tsuo nyɛɛ ngɔ la jemi níhi, 7 nɛ nyɛɛ je la kɛ wo a mi, nɛ nyɛɛ ngɔ tsopa kɛ e he via kɛ pue nɔ ngɛ Yehowa hɛ mi hwɔɔ, nɛ nɔ nɛ Yehowa maa hla a, lɛ ji nɔ klɔuklɔu. Nyɛ Levi binyumuhi, nyɛ ní peepee ba po blɔ mi!”

8 Lɔ ɔ se ɔ, Mose de Kora ke: “Nyɛ Levi binyumuhi, i kpa nyɛ pɛɛ, nyɛɛ bu tue. 9 Anɛ e pi ha nyɛ kaa Israel Mawu ɔ hla nyɛ kɛ je Israel bi ɔmɛ a kpɛti, nɛ e ngmɛ nyɛ blɔ kaa nyɛɛ hɛ nyɛ kɛ su e he konɛ nyɛ sɔmɔ ngɛ Yehowa bo tsu ɔ mi, nɛ́ nyɛɛ da ma a hɛ mi nɛ nyɛ sɔmɔ mɛ lo? 10 Anɛ e pi ha mo kaa e ha nɛ o kɛ o nyɛminyumu ɔmɛ tsuo, nɛ ji Levi binyumu ɔmɛ nyɛ hɛ kɛ su e he haa lo? Anɛ osɔfo yemi ɔ hu nyɛ ngɛ hlae ma kpɔ̃ lo? 11 Enɛ ɔ he ɔ, o kɛ nihi tsuo nɛ a fĩ o se nɛ nyɛ ngɛ nyɛ he nya buae ɔ ngɛ si tee kɛ ngɛ Yehowa woe. Aaron lɛɛ mɛni e pee nɛ́ e sa kaa nyɛɛ tu munyu huitihuiti kɛ si lɛ?”

12 Pee se ɔ, Mose tsɔ konɛ a ya tsɛ Datan kɛ Abiram, nɛ ji Eliab binyumu ɔmɛ kɛ ba, se a de ke: “Wa be bae! 13 Anɛ e pi ha mo kaa o ngɔ wɔ kɛ je zugba nɛ nyɔ nyu kɛ hwo ngɛ bee ngɛ nɔ ɔ nɔ kɛ ba nga nɛ ɔ nɔ konɛ o ba gbe wɔ lo? Amlɔ nɛ ɔ, o pa ngɛ hlae nɛ mo pɛ o pee o he nɔ yelɔ ngɛ wa nɔ lo?* 14 O kɛ wɔ bɛ zugba nɛ nyɔ nyu kɛ hwo ngɛ bee ngɛ nɔ ɔ nɔ, nɛ o ha we wɔ zugba kɛ wai ngmɔ kaa weto ní hulɔ. Anɛ o ngɛ hlae nɛ nyumu nɛ ɔmɛ nɛ a nyɛɛ o se kaa hɛ yuyuili lo?* Wa be bae!”

15 Enɛ ɔ he ɔ, Mose mi mi fu wawɛɛ nɛ e de Yehowa ke: “Ko plɛ nɛ o hyɛ a ngma afɔle ɔ. I ngɔɛ a teji kake po, nɛ i yi a ti nɔ ko nɔ ko awi hulɔ.”

16 Kɛkɛ nɛ Mose de Kora ke: “Hwɔɔ ɔ, o kɛ nihi tsuo nɛ a fĩ o se ɔ nyɛɛ ba Yehowa hɛ mi; o kɛ mɛ kɛ Aaron tsuo. 17 Nɔ fɛɛ nɔ nɛ́ e wo e la jemi nɔ́, nɛ́ e ngɔ tsopa kɛ e he via kɛ pue nɔ, nɛ́ nɔ fɛɛ nɔ nɛ e ngɔ e la jemi nɔ́ ɔ kɛ ba Yehowa hɛ mi, la jemi níhi 250. O kɛ Aaron hu nyɛ ti nɔ fɛɛ nɔ nɛ ngɔ e la jemi nɔ́ kɛ ba.” 18 Lɔ ɔ he ɔ, a ti nɔ fɛɛ nɔ wo e la jemi nɔ́, nɛ a ngɔ la kɛ tsopa kɛ e he via kɛ pue nɔ, nɛ a ya da si ngɛ kpe he bo tsu ɔ nya, a kɛ Mose kɛ Aaron tsuo. 19 Benɛ Kora bua nihi nɛ a fĩ e se ɔ a nya kɛ wo Mose kɛ Aaron a he ngɛ kpe he bo tsu ɔ nya a, Yehowa hɛ mi nyami ɔ je kpo kɛ tsɔɔ ma a tsuo.

20 Jehanɛ ɔ, Yehowa de Mose kɛ Aaron ke: 21 “Nyɛɛ yu nyɛ he ngɛ kuu nɛ ɔ he, nɛ́ ma kpata a hɛ mi hɛngmɛfia.” 22 Kɛkɛ nɛ a ngɔ a hɛ mi kɛ bu zugba nɛ a de ke: “Oo Mawu, mo nɛ o ha adesahi tsuo mumi,* anɛ yayami nɛ nɔ kake pee ɔ ma ha nɛ o ná ma a tsuo he abofu lo?”

23 Kɛkɛ nɛ Yehowa de Mose ke: 24 O kɛ ma a nɛ tu munyu nɛ o de mɛ ke, ‘Nyɛɛ hɛ nyɛ kɛ je Kora, kɛ Datan, kɛ Abiram a bo tsu ɔmɛ a he!’”

25 Kɛkɛ nɛ Mose te si nɛ e ho Datan kɛ Abiram a ngɔ ya, nɛ Israel ma nikɔtɔma amɛ piɛɛ e he kɛ ho. 26 E de ma a ke: “I kpa nyɛ pɛɛ, nyɛɛ hɛ nyɛ kɛ je yiwutsotsɛmɛ nɛ ɔmɛ a bo tsu ɔmɛ a he, nɛ́ nyɛ ko ta a nɔ́ ko nɔ́ ko he, konɛ a ko kpata nyɛ hɛ mi ngɛ a yayami ɔmɛ a he je.” 27 Amlɔ nɔuu nɛ a hɛ mɛ kɛ je Kora, kɛ Datan, kɛ Abiram a bo tsu ɔmɛ a he. Kɛkɛ nɛ Datan kɛ Abiram je kpo nɛ a kɛ a yi ɔmɛ, kɛ a binyumu ɔmɛ, kɛ a bimɛ tsɔwi ɔmɛ ba da si ngɛ a bo tsu ɔmɛ a nya.

28 Kɛkɛ nɛ Mose de ke: “Enɛ ɔ ma ha nɛ nyɛ maa na kaa Yehowa lɛ tsɔ mi kaa ma pee ní nɛ ɔmɛ tsuo, se pi imi nitsɛ ye yi mi tomi:* 29 Ke nimli nɛ ɔmɛ gbo gbenɔ nɛ adesahi tsuo gboɔ ɔ, ke a gbla a tue kaa bɔ nɛ a gblaa adesahi tsuo a tue ɔ, lɛɛ tsa pi Yehowa nɛ e tsɔ mi. 30 Se ke Yehowa ha nɛ nɔ́ ko nɛ bɛ hyɛ ba a nɔ, nɛ zugba a bli e nya mi nɛ e mii mɛ kɛ nɔ́ fɛɛ nɔ́ nɛ a ngɛ ɔ kɛ ho Yɔkɔ* mi ya hɛ ngmengmle ɔ, nyɛ maa na kaa nimli nɛ ɔmɛ bui Yehowa niinɛ.”

31 Benɛ Mose tu munyu nɛ ɔmɛ ta pɛ ɔ, zugba a mi gba. 32 Kɛkɛ nɛ zugba a bli e nya mi nɛ e mii mɛ kɛ a we mi bimɛ, kɛ nɔ fɛɛ nɔ nɛ fĩ Kora se ɔ, kɛ a níhi tsuo. 33 Lɔ ɔ he ɔ, a kɛ nihi nɛ a piɛɛ a he ɔ tsuo kple kɛ ho Yɔkɔ* mi ya hɛ ngmengmle, nɛ zugba a ha a nɔ, nɛ a hɛ mi kpata ngɛ asafo ɔ kpɛti. 34 Benɛ a ngɛ ngmlaa kpae ɔ, Israel bi tsuo nɛ a bɔle mɛ ɔ ye gbeye nɛ a tu fo, nɛ a de ke: “Wa ngɛ gbeye yee kaa zugba a maa mii wɔ!” 35 Kɛkɛ nɛ la je Yehowa ngɔ nɛ e ba sã nyumuhi 250 nɛ a ngɛ tsopa kɛ e he via a sãe ɔ.

36 Jehanɛ ɔ, Yehowa de Mose ke: 37 “De Eleazar, osɔfo Aaron binyumu ɔ nɛ e je la jemi ní ɔmɛ ngɛ la a mi, ejakaa a ngɛ klɔuklɔu. Jehanɛ hu ɔ, de lɛ nɛ e gbɛ la a kɛ ya se lokoo. 38 Á ngɔ nyumuhi nɛ a pee yayami nɛ a wami je a dɛ ɔ* a la jemi ní ɔmɛ kɛ pee dade tɛtlɛɛhi nɛ́ a kɛ ha afɔle sami la tɛ ɔ he, ejakaa a kɛ la jemi ní ɔmɛ ba Yehowa hɛ mi, nɛ a pee klɔuklɔu. Dade tɛtlɛɛ nɛ ɔmɛ nɛ a pee okadi kɛ ha Israel bi ɔmɛ.” 39 Enɛ ɔ he ɔ, osɔfo Eleazar ngɔ akɔblee la jemi ní ɔmɛ nɛ nihi nɛ la a sã mɛ ɔ kɛ ba a, nɛ e fiaa a nɔ nɛ a pee tɛtlɛɛ konɛ e kɛ ha afɔle sami la tɛ ɔ he, 40 kaa bɔ nɛ Yehowa de lɛ kɛ gu Mose nɔ ke e pee ɔ. E ji kaimi nɔ́ ko kɛ ha Israel bi ɔmɛ kaa, nɔ ko* nɛ e be he blɔ, nɛ e pi Aaron nina nɛ ko su afɔle sami la tɛ ɔ he nɛ e sã tsopa kɛ e he via ngɛ Yehowa hɛ mi, nɛ nɔ ko hu nɛ ko pee e ní kaa Kora kɛ nihi nɛ a fĩ e se ɔ.

41 E nɔ jena pɛ ɔ, Israel ma a tsuo bɔni munyu huitihuiti tumi kɛ si Mose kɛ Aaron, nɛ a ngɛ dee ke: “Nyɛ ni enyɔ nɛ ɔmɛ nyɛ gbe Yehowa we bi ɔmɛ.” 42 Benɛ ma a kpe kɛ wo Mose kɛ Aaron a he ɔ, a plɛ a hɛ mi kɛ tsɔɔ kpe he bo tsu ɔ, nɛ hyɛ! bɔku ɔ ha kpe he bo tsu ɔ nɔ, kɛkɛ nɛ Yehowa hɛ mi nyami ɔ bɔni e he kpo jemi.

43 Mose kɛ Aaron ho kpe he bo tsu ɔ hɛ mi ya, 44 nɛ Yehowa de Mose ke: 45 “Nyɛ je nyɛ he kɛ je ma nɛ ɔ he konɛ ma kpata a hɛ mi hɛngmɛfia.” Kɛkɛ nɛ a ngɔ a hɛ mi kɛ bu zugba. 46 Lɔ ɔ se ɔ, Mose de Aaron ke: “Ngɔɔ la jemi nɔ́ ɔ, nɛ́ o je la ngɛ afɔle sami la tɛ ɔ mi kɛ wo mi, nɛ o ngɔ tsopa kɛ e he via kɛ pue nɔ, nɛ o ya ma bi ɔmɛ a ngɔ esɔesɔ, nɛ o ya kpa a yayami ɔ he pɛɛ ha mɛ, ejakaa Yehowa mi mi fu wawɛɛ. Haomi ɔ je sisi momo!” 47 Amlɔ nɔuu nɛ Aaron wo la jemi nɔ́ ɔ kaa bɔ nɛ Mose de lɛ ɔ, nɛ e tu fo kɛ sɛ ni ɔmɛ a kpɛti, nɛ hyɛ! haomi ɔ je sisi ngɛ ni ɔmɛ a kpɛti momo. Enɛ ɔ he ɔ, e ngɔ tsopa kɛ e he via a kɛ pue la jemi nɔ́ ɔ nɔ, nɛ e bɔni ni ɔmɛ a yayami ɔ he pɛɛ kpami ha mɛ. 48 E ya nɔ nɛ e da si ngɛ nihi nɛ a gbo ɔ kɛ nihi nɛ a gbo we ɔ a kpɛti, nɛ nyagbenyagbe ɔ, haomi ɔ se po. 49 Nihi nɛ haomi ɔ gbe mɛ ɔ a yibɔ ji 14,700, slo ni nɛmɛ nɛ gbo ngɛ Kora sane ɔ mi ɔ. 50 Nyagbenyagbe ɔ, benɛ haomi ɔ se po ɔ, Aaron kpale kɛ ba Mose ngɔ ngɛ kpe he bo tsu ɔ nya.

17 Jehanɛ ɔ, Yehowa de Mose ke: 2 “O kɛ Israel bi ɔmɛ nɛ tu munyu nɛ o ha nɛ a tsɛmɛ a we ɔmɛ eko fɛɛ eko nɛ ha mo dɛma tso kake, ngɔɔ dɛma tso ɔ ngɛ a tsɛmɛ a we ɔmɛ eko fɛɛ eko ganɔ dɛ. Dɛma tso ɔ tsuo maa pee 12. Ngmaa a ti nɔ fɛɛ nɔ biɛ ngɛ e dɛma tso he. 3 Ngmaa Aaron biɛ ngɛ Levi dɛma tso ɔ he, ejakaa dɛma tso ɔ eko fɛɛ eko daa si kɛ ha a tsɛmɛ a we ɔ kake. 4 Ngɔɔ dɛma tso ɔmɛ kɛ pue kpe he bo tsu ɔ mi ngɛ Odase Yemi Nɔ́ ɔ hɛ mi ngɛ he nɛ i jeɔ ye he kpo kɛ tsɔɔ nyɛ ngɛ ɔ. 5 Nɔ nɛ ma hla a, e dɛma tso ɔ ma tsɛ̃, nɛ ma po munyu huitihuiti nɛ Israel bi ɔmɛ ngɛ tue kɛ ngɛ mi sie ɔ, kɛ munyu huitihuiti nɛ a ngɛ tue kɛ ngɛ nyɛ hu sie ɔ se.”

6 Enɛ ɔ he ɔ, Mose kɛ Israel bi ɔmɛ tu munyu, nɛ a ganɔ ɔmɛ tsuo ngɔ a dɛma tso ɔmɛ kɛ ba ha lɛ. A tsɛmɛ a we ɔmɛ eko fɛɛ eko ganɔ ngɔ dɛma tso kake kɛ ba; dɛma tso 12. Aaron dɛma tso ɔ hu piɛɛ he. 7 Kɛkɛ nɛ Mose ngɔ dɛma tso ɔmɛ kɛ ya pue Yehowa hɛ mi ngɛ bo tsu ɔ nɛ Odase Yemi Nɔ́ ɔ ngɛ mi ɔ mi.

8 E nɔ jena benɛ Mose ya bo tsu ɔ nɛ Odase Yemi Nɔ́ ɔ ngɛ mi ɔ mi ɔ, hyɛ! Aaron dɛma tso ɔ, nɛ ji Levi we ɔ dɛma tso ɔ tsɛ̃, nɛ e je ba, e gba mɔmɔ, nɛ e wo almond yiblii nɛ fu. 9 Kɛkɛ nɛ Mose muɔɔ dɛma tso ɔmɛ kɛ je Yehowa hɛ mi kɛ ba Israel bi ɔmɛ tsuo a ngɔ. A hyɛ dɛma tso ɔmɛ, nɛ a ti nɔ fɛɛ nɔ wo e nɔ́.

10 Kɛkɛ nɛ Yehowa de Mose ke: “Kpale Aaron dɛma tso ɔ kɛ ya fɔ Odase Yemi Nɔ́ ɔ hɛ mi, nɛ́ a kɛ to kaa okadi kɛ ha atuã tsɔli ɔmɛ, konɛ munyu huitihuiti ɔ nɛ a ngɛ tue kɛ ngɛ mi sie ɔ se nɛ po, nɛ́ a ko gbo.” 11 Amlɔ nɔuu nɛ Mose pee kaa bɔ nɛ Yehowa fã lɛ ke e pee ɔ. E pee jã a pɛ.

12 Kɛkɛ nɛ Israel bi ɔmɛ de Mose ke: “Piɔ lɛɛ wa ma gbo, wa hɛ mi ma kpata kokooko, wɔ tsuo wa hɛ mi ma kpata! 13 Nɔ fɛɛ nɔ nɛ maa hɛ lɛ kɛ su Yehowa bo tsu ɔ he ɔ po ma gbo! Anɛ e sa kaa wa gbo jã lo?”

18 Kɛkɛ nɛ Yehowa de Aaron ke: “O kɛ o binyumu ɔmɛ kɛ o tsɛ we ɔ nɛ piɛɛ o he ɔ lɛ maa bu nɔ́ fɛɛ nɔ́ nɛ a maa pee kɛ si jami he ɔ he akɔtaa, nɛ jehanɛ hu ɔ, o kɛ o binyumu ɔmɛ nɛ a piɛɛ o he ɔ lɛ maa bu nɔ́ fɛɛ nɔ́ nɛ a maa pee kɛ si nyɛ we osɔfo yemi ní tsumi ɔ he akɔtaa. 2 Jehanɛ hu ɔ, ngɔɔ o nyɛmimɛ ɔmɛ nɛ a ngɛ Levi wɛtso ɔ mi, nɛ ji o nɛmɛ a wɛtso ɔ kɛ ba, konɛ a ba piɛɛ o he nɛ a sɔmɔ o kɛ o binyumu ɔmɛ ngɛ bo tsu nɛ Odase Yemi Nɔ́ ɔ ngɛ mi ɔ hɛ mi. 3 Á tsu a blɔ nya ní tsumi ɔmɛ kɛ ye bua mo, nɛ́ a tsu ní tsumihi nɛ kɔɔ bo tsu ɔ tsuo he ɔ. Se a ko hɛ mɛ kɛ su he klɔuklɔu ɔ ní ɔmɛ kɛ afɔle sami la tɛ ɔ he, bɔ nɛ pee nɛ a kɛ nyɛ tsuo nyɛ ko ba gbo. 4 A maa piɛɛ o he, nɛ a ma tsu a blɔ nya ní tsumihi nɛ kɔɔ kpe he bo tsu ɔ he ɔ, nɛ a ma tsu bo tsu ɔ he ní tsumihi tsuo. Nɔ ko nɛ e be jamɛ a he blɔ ɔ* nɛ e ko hɛ lɛ kɛ su nyɛ he. 5 Nyɛ tsu nyɛ blɔ nya ní tsumi nɛ kɔɔ he klɔuklɔu ɔ kɛ afɔle sami la tɛ ɔ he ɔ, bɔ nɛ pee nɛ ye mi mi nɛ ko fu Israel bi ɔmɛ hu. 6 Imi nitsɛ lɛ i hla nyɛ nyɛmimɛ ɔmɛ, nɛ ji Levi bi ɔmɛ ngɛ Israel bi ɔmɛ a kpɛti kɛ ha nyɛ kaa nike ní. A ngɔ mɛ kɛ ha Yehowa konɛ a hyɛ kpe he bo tsu ɔ he ní tsumi ɔ nɔ. 7 Osɔfo yemi ní tsumihi nɛ kɔɔ afɔle sami la tɛ ɔ, kɛ ní tsumihi nɛ ngɛ tsu mi pomi bo ɔ se ɔ he ɔ, o kɛ o binyumu ɔmɛ lɛ nyɛ ma tsu. Nyɛ lɛ nyɛ ma tsu ní tsumi nɛ ɔ. I ngɔ osɔfo yemi ní tsumi ɔ kɛ ha nyɛ kaa nike ní, nɛ nɔ fɛɛ nɔ nɛ e be jamɛ a he blɔ ɔ* nɛ e maa hɛ lɛ kɛ su he ɔ, a gbe lɛ.”

8 Yehowa ya nɔ nɛ e kɛ Aaron tu munyu, nɛ e de lɛ ke: “Imi nitsɛ nɛ i kɛ mo to níhi nɛ a kɛ ba ha mi kaa yemi kɛ buami ɔ nya. I ngɔ ní klɔuklɔuhi nɛ Israel bi ɔmɛ kɛ ba ha mi kaa yemi kɛ buami ɔ eko kɛ ha mo kaa o blɔ fa mi nɔ́ kɛ yaa neneene. 9 O ma ná afɔlehi nɛ a ngɛ klɔuklɔu pe kulaa nɛ a kɛ la sãã a eko kaa o blɔ fa mi nɔ́. Afɔle fɛɛ afɔle nɛ a maa sã, nɛ́ ngma afɔlehi, kɛ yayami afɔlehi, kɛ fɔ yemi afɔlehi nɛ a kɛ ba haa mi ɔ hu piɛɛ he ɔ, ji nɔ́ klɔuklɔu pe kulaa, nɛ e maa pee o kɛ o binyumu ɔmɛ nyɛ nɔ́. 10 Moo ye ngɛ he ko nɛ ngɛ klɔuklɔu. Nyumu fɛɛ nyumu ma nyɛ maa ye eko. E maa pee nɔ́ klɔuklɔu ha mo. 11 Nike ní nɛ Israel bi ɔmɛ kɛ baa, kɛ a we afɔlehi tsuo nɛ a fɔ̃ɔ ɔ hu ji o nɔ́. I ngɔ kɛ ha o kɛ o binyumu ɔmɛ kɛ o biyi ɔmɛ nɛ a piɛɛ o he ɔ kaa nyɛ blɔ fa mi nɔ́ nɛ fɔɔ si kɛ yaa neneene. O we ɔ mi bimɛ ɔmɛ a ti nɔ fɛɛ nɔ nɛ e he tsɔ ɔ ma nyɛ maa ye eko.

12 “Nu nɛ hi pe kulaa, kɛ wai ehe nɛ hi pe kulaa, kɛ ngma, nɛ ji kekleekle yiblii nɛ a kɛ ba haa Yehowa a, i kɛ ha mo. 13 A zugba a nɔ kekleekle yiblii fɛɛ kekleekle yiblii nɛ e fu nɛ a maa ngɔ kɛ ba ha Yehowa a maa pee o nɔ́. O we ɔ mi bimɛ ɔmɛ a ti nɔ fɛɛ nɔ nɛ e he tsɔ ɔ ma nyɛ maa ye eko.

14 “Nɔ́ fɛɛ nɔ́ nɛ a jɔɔ nɔ* ngɛ Israel ɔ nɛ pee o nɔ́.

15 “Adebɔ nɔ́ fɛɛ adebɔ nɔ́ nɛ wami ngɛ mi ɔ kekleekle bi* nɛ́ a kɛ ma ha Yehowa a nɛ pee o nɔ́, nɔmlɔ jio, lohwe jio. Se bɔ fɛɛ bɔ nɛ ji ɔ, adesahi a kekleekle bimɛ, kɛ lohwehi nɛ a he tsɔ we hu a kekleekle bimɛ lɛɛ, mo kpɔ̃ mɛ. 16 Ke kekleekle bi ɔ ye nyɔhiɔ kake kɛ yaa a, moo ngɔ kpɔmi sika, nɛ ji sika hiɔ shekel* enuɔ nɛ a po fɔ si ngɛ he klɔuklɔu ɔ shekel ɔ nya a kɛ kpɔ̃ lɛ. Shekel kake ji gera* 20. 17 Na kekleekle bi eku, jijɔ kekleekle bi eku, kɛ apletsi kekleekle bi lɛɛ, e sɛ nɛ o kpɔ̃ mɛ. A ji níhi nɛ a ngɛ klɔuklɔu. Ngɔɔ a muɔ kɛ fĩa afɔle sami la tɛ ɔ nɔ, nɛ́ o sã a zɔ ɔ kaa afɔle nɛ a kɛ la sãã nɛ jeɔ via liliili ha Yehowa.* 18 A lo ɔ maa pee o nɔ́. E maa pee o nɔ́ kaa bɔ nɛ afɔle nɛ a fɔ̃ɔ ɔ gugue ɔ kɛ hiɔ nane ɔ hu ji o nɔ́ ɔ. 19 Yemi kɛ buamihi tsuo nɛ ngɛ klɔuklɔu nɛ Israel bi ɔmɛ maa ngɔ kɛ ba ha Yehowa a, o kɛ o binyumu ɔmɛ kɛ o biyi ɔmɛ nyɛɛ ngɔ. I kɛ ha nyɛ kaa nyɛ blɔ fa mi nɔ́ nɛ ngɛ kɛ yaa neneene. E ji ngo somi* nɛ ngɛ kɛ yaa neneene ngɛ Yehowa hɛ mi kɛ ha o kɛ o nina.”

20 Yehowa ya nɔ nɛ e de Aaron ke: “O be weto ní ko náe ngɛ a zugba a nɔ, nɛ o be zugba ko hu náe ngɛ a kpɛti. Imi ji o blɔ fa mi nɔ́ kɛ o weto ní ngɛ Israel bi ɔmɛ a kpɛti.

21 “Amlɔ nɛ ɔ, hyɛ, i ngɔ Israel níhi tsuo a mi dlami nyɔngma mi kakaaka kɛ ha Levi binyumu ɔmɛ kaa a weto ní ngɛ ní nɛ a ngɛ tsue ngɛ kpe he bo tsu ɔ he ɔ he je. 22 Israel bi ɔmɛ nɛ a ko su kpe he bo tsu ɔ he hu, ke a ba lejɛ ɔ, a pee yayami nɛ a ma gbo. 23 Levi bi ɔmɛ nitsɛmɛ nɛ a tsu kpe he bo tsu ɔ he sɔmɔmi ní tsumi ɔ, nɛ mɛ lɛ a maa bu Israel bi ɔmɛ a tɔmi he akɔtaa. Enɛ ɔ ji mlaa nɛ fɔɔ si ha nyɛ yi nɔhi tsuo kaa a ko ngɔ weto ní ko ngɛ Israel bi ɔmɛ a kpɛti. 24 Ejakaa i ngɔ mi dlami nyɔngma mi kake nɛ Israel bi ɔmɛ kɛ ba haa Yehowa a kɛ ha Levi bi ɔmɛ kaa a weto ní. Enɛ ɔ he nɛ i de mɛ ke, ‘A ko ngɔ weto ní ko ngɛ Israel bi ɔmɛ a kpɛti ɔ nɛ.’”

25 Kɛkɛ nɛ Yehowa de Mose ke: 26 “De Levi bi ɔmɛ ke, ‘Ke Israel bi ɔmɛ ngɔ a mi dlami nyɔngma mi kake nɛ́ i ngɔ ngɛ a dɛ kɛ ha nyɛ kaa nyɛ weto ní ɔ kɛ ba a, nyɛɛ ngɔ mi dlami nyɔngma mi kake ɔ hu e mi dlami nyɔngma mi kake kɛ ha Yehowa kaa yemi kɛ buami. 27 A maa bu lɔ ɔ kaa nyɛ yemi kɛ buami, kaa ngma nɛ je nyɛ ngma gbeemi he, aloo wai nɛ je nyɛ wai ngami he, aloo nu nɛ je nyɛ nu ngami he. 28 Enɛ ɔ ma ha nɛ nyɛ hu nyɛ je mi dlami nyɔngmanyɔngma mi kakaakahi tsuo nɛ nyɛ náa kɛ jeɔ Israel bi ɔmɛ a dɛ ɔ mi kɛ ha Yehowa kaa yemi kɛ buami. Nyɛ je kɛ ha osɔfo Aaron kaa yemi kɛ buami kɛ ha Yehowa. 29 Nike níhi tsuo nɛ nyɛ ná kaa yemi kɛ buami ɔ, nyɛɛ ngɔ e mi nɔ́ nɛ hi pe kulaa, nɛ ji nɔ́ klɔuklɔu ɔ kɛ ba ha Yehowa.’

30 “Nɛ o de mɛ ke, ‘Ke nyɛ ngɔ níhi nɛ hi pe kulaa a kɛ ha kaa yemi kɛ buami ɔ, a maa bu lɔ ɔ ha Levi bi ɔmɛ kaa ngma nɛ je a ngma gbeemi he, aloo wai nɛ je a wai ngami he, aloo nu nɛ je a nu ngami he. 31 Nyɛɛ kɛ nyɛ we mi bimɛ ɔmɛ ma nyɛ maa ye ngɛ he fɛɛ he, ejakaa ní tsumi nɛ nyɛ tsuɔ ngɛ kpe he bo tsu ɔ he ɔ he hiɔwo ji lɔ ɔ nɛ. 32 Be abɔ nɛ nyɛ ngɔɔ ní nɛ ɔmɛ a mi níhi nɛ hi pe kulaa a kɛ haa kaa yemi kɛ buami ɔ, lɔ ɔ be yayami pee ha nyɛ; nyɛ ko ble Israel bi ɔmɛ a ní klɔuklɔu ɔmɛ hulɔ, ke pi jã a, nyɛ ma gbo.’”

19 Yehowa kɛ Mose kɛ Aaron tu munyu ekohu nɛ e de ke: 2 “Mlaa nɛ Yehowa wo ɔ ji nɛ ɔ nɛ, ‘De Israel bi ɔmɛ ke a ngɔ na tsutsu nɛ kpa ko be e he nɛ a kɛ kuɛpã tso wui lɛ hyɛ ba ha mo. 3 Nyɛɛ ngɔ na a kɛ ha osɔfo Eleazar, nɛ e kpaka lɛ kɛ ho sito he ɔ se ya, nɛ́ a ya gbe lɛ ngɛ e hɛ mi. 4 Jehanɛ ɔ, osɔfo Eleazar nɛ ngɔ e nine nguɛ kɛ sɔ na a muɔ ɔ mi, nɛ́ e fĩa muɔ ɔ kɛ ya kpe he bo tsu ɔ hɛ mi tɛɛ si kpaago. 5 Lɔ ɔ se ɔ, á sã na a ngɛ osɔfo Eleazar hɛ mi. Á sã na a he womi ɔ, kɛ e lo ɔ, kɛ e muɔ ɔ, kɛ e fĩ ɔ tsuo. 6 Osɔfo ɔ nɛ ngɔ seda tso, hisopo, kɛ bo tsutsu, nɛ́ e sake kɛ pue la nɛ a ngɛ na a sãe ngɛ mi ɔ mi. 7 Jehanɛ ɔ, osɔfo ɔ nɛ fɔ e tade ɔmɛ a he, nɛ́ e du,* lɔ ɔ se ɔ, e ma nyɛ maa ba sito he ɔ; se osɔfo ɔ he be tsɔe kɛ yaa si gbɔkuɛ.

8 “‘Nɔ nɛ sã na a nɛ fɔ e tade ɔmɛ a he ngɛ nyu mi, nɛ́ e du.* E he be tsɔe kɛ yaa si gbɔkuɛ.

9 “‘Nyumu nɛ e he tsɔ nɛ bua na a la zu ɔ nya, nɛ́ e ngɔ kɛ ya pue he ko nɛ he tsɔ ngɛ sito he ɔ se, nɛ́ Israel ma a nɛ ngɔ kɛ to, konɛ a kɛ futu nyu nɛ a kɛ maa tsu a he ɔ mi. E ji yayami afɔle. 10 Nɔ nɛ ma bua na a la zu ɔ nya a nɛ fɔ e tade ɔmɛ a he. E he be tsɔe kɛ yaa si gbɔkuɛ.

“‘Enɛ ɔ maa pee blɔ tsɔɔmi nɛ fɔɔ si daa ha Israel bi ɔmɛ kɛ nubwɔ nɛ ngɛ a kpɛti ɔ. 11 Nɔ fɛɛ nɔ nɛ maa ta nɔ nɛ gbo* he ɔ, e he be tsɔe ligbi kpaago. 12 Ngɛ ligbi etɛne ɔ nɔ ɔ, jamɛ a nɔ ɔ nɛ ngɔ nyu ɔ* kɛ tsu e he, nɛ e he ma tsɔ ngɛ ligbi kpaagone ɔ nɔ. Se ke e tsu we e he ngɛ ligbi etɛne ɔ nɔ ɔ, e he be tsɔe ngɛ ligbi kpaagone ɔ nɔ. 13 Nɔ fɛɛ nɔ nɛ maa ta nɔ nɛ gbo* he nɛ e be e he tsue ɔ, e wo Yehowa bo tsu ɔ he mu. Á gbe jamɛ a nɔ ɔ ngɛ* Israel. Akɛnɛ a fĩa we he tsumi nyu ɔ kɛ pue we e nɔ he je ɔ, e he tsɔ we. Mu ɔ ngɛ e he.

14 “‘Ke nɔ ko gbo ngɛ bo tsu mi ɔ, mlaa nɛ ngɛ he ji nɛ ɔ nɛ: Nɔ fɛɛ nɔ nɛ maa sɛ bo tsu ɔ mi, kɛ nɔ fɛɛ nɔ nɛ ngɛ bo tsu ɔ mi momo ɔ he be tsɔe ligbi kpaago. 15 Nɔ́ fɛɛ nɔ́ nɛ nya fɔɔ si gu nɛ nya nɔ be nya a, jamɛ a nɔ́ ɔ he tsɔ we. 16 Nɔ fɛɛ nɔ nɛ maa ta nɔ ko nɛ a kɛ klaate gbe lɛ, aloo gbogboe ko, aloo adesa wu ko, aloo gɔ ko he ngɛ nga nɔ ɔ, e he be tsɔe ligbi kpaago. 17 Bɔ nɛ pee nɛ nɔ nɛ e he tsɔ we ɔ he nɛ tsɔ ɔ, e sa nɛ á ngɔ yayami afɔle nɛ a sã a la zu ɔ eko kɛ wo nɔ́ mi, nɛ a yɛ pa mi nyu kɛ pue nɔ. 18 Lɔ ɔ se ɔ, nyumu nɛ he tsɔ nɛ ngɔ hisopo kɛ sɔ nyu ɔ mi, nɛ́ e kɛ fĩa bo tsu ɔ, kɛ ní ɔmɛ tsuo, kɛ nihi* nɛ a ngɛ lejɛ ɔ a nɔ. E kɛ fĩa nɔ nɛ ta wu ɔ, loo nɔ nɛ a gbe lɛ ɔ, loo gbogboe ɔ, loo gɔ ɔ he ɔ nɔ. 19 Nɔ nɛ he tsɔ ɔ nɛ fĩa nyu ɔ kɛ pue nɔ nɛ he tsɔ we ɔ nɔ ngɛ ligbi etɛne ɔ kɛ ligbi kpaagone ɔ nɔ, nɛ ligbi kpaagone ɔ, é tsu e he ngɛ yayami he; lɔ ɔ se ɔ, e fɔ e tade ɔmɛ a he, nɛ́ e du, nɛ gbɔkuɛ ɔ, e he ma tsɔ.

20 “‘Se nɔ nɛ he tsɔ we nɛ e be e he tsue ɔ, a gbe jamɛ a nɔ ɔ,* ejakaa e ble Yehowa jami he ɔ. A fĩa we nyu nɛ a kɛ tsuɔ nɔ he ɔ kɛ pue we e nɔ, lɔ ɔ he ɔ, e he tsɔ we.

21 “‘Enɛ ɔ maa pee blɔ tsɔɔmi nɛ fɔɔ si daa ha mɛ: Nɔ nɛ ma fĩa he tsumi nyu ɔ nɛ́ e fɔ e tade ɔmɛ a he, nɛ nɔ nɛ maa ta he tsumi nyu ɔ he ɔ he be tsɔe kɛ yaa si gbɔkuɛ. 22 Nɔ́ fɛɛ nɔ́ nɛ nɔ nɛ e he tsɔ we ɔ maa ta he ɔ he be tsɔe, nɛ nɔ* nɛ maa ta jamɛ a nɔ́ ɔ he ɔ hu he be tsɔe kɛ yaa si gbɔkuɛ.’”

20 Ngɛ kekleekle nyɔhiɔ ɔ mi ɔ, Israel ma a tsuo ba su Zin nga a nɔ, nɛ ni ɔmɛ to si ngɛ Kadesh. Lejɛ ɔ nɛ Miriam gbo nɛ a pu lɛ ngɛ.

2 Jehanɛ ɔ, nyu be nɛ asafo ɔ maa nu, lɔ ɔ he ɔ, a bua a he nya kɛ wo Mose kɛ Aaron a he. 3 Ni ɔmɛ kɛ Mose pɛ, nɛ a de ke: “Wa ná nɛ wa gbo kɛ piɛɛ wa nyɛmimɛ ɔmɛ a he ngɛ Yehowa hɛ mi! 4 Mɛni he je nɛ nyɛɛ kɛ Yehowa asafo ɔ ba nga nɛ ɔ nɔ, nɛ́ waa kɛ wa lohwe ɔmɛ nɛ ba gbo ngɛ hiɛ ɔ? 5 Mɛni he je nɛ nyɛ nyɛɛ wa hɛ mi kɛ je Egipt kɛ ba he yaya nɛ ɔ? Wu ko be hie dumi ngɛ hiɛ ɔ nɛ fig kɛ wai kɛ pomegranet* ko hu be hie ngɛ hiɛ ɔ, nɛ nyu hu be nɛ wa maa nu.” 6 Kɛkɛ nɛ Mose kɛ Aaron je asafo ɔ hɛ mi kɛ ba kpe he bo tsu ɔ nya, nɛ a ngɔ a hɛ mi kɛ bu si, nɛ Yehowa hɛ mi nyami ɔ je kpo kɛ tsɔɔ mɛ.

7 Kɛkɛ nɛ Yehowa de Mose ke: 8 “Wo o tso ɔ, nɛ́ o kɛ o nyɛminyumu Aaron nyɛ bua ma a nya, nɛ́ nyɛɛ tu munyu kɛ tsɔɔ tɛ sa a konɛ nyu nɛ je mi. Kɛkɛ ɔ, nyu maa je tɛ sa a mi kɛ ha mɛ, nɛ o ma ha ma a kɛ a lohwe ɔmɛ nyu nɛ a nu.”

9 Lɔ ɔ he ɔ, Mose wo e tso ɔ ngɛ Yehowa hɛ mi kaa bɔ nɛ e fã lɛ ɔ pɛpɛɛpɛ. 10 Kɛkɛ nɛ Mose kɛ Aaron bua asafo ɔ nya ngɛ tɛ sa a hɛ mi, nɛ e de mɛ ke: “Nyɛ atuã tsɔli, nyɛɛ bu tue! Anɛ e sa nɛ wa je nyu ngɛ tɛ sa nɛ ɔ mi kɛ ha nyɛ lo?” 11 Kɛkɛ nɛ Mose wo e nine nɔ nɛ e ngɔ e tso ɔ kɛ fia tɛ sa a si enyɔ, nɛ nyu babauu je mi kɛ ba, nɛ ma a kɛ a lohwe ɔmɛ bɔni numi.

12 Pee se ɔ, Yehowa de Mose kɛ Aaron ke: “Akɛnɛ nyɛ tsɔɔ we kaa nyɛ ngɛ hemi kɛ yemi ngɛ ye mi, nɛ́ nyɛ wui ye hɛ mi nyami ngɛ Israel bi ɔmɛ a hɛ mi konɛ a na kaa i ngɛ klɔuklɔu he je ɔ, nyɛ be asafo nɛ ɔ ngɔe kɛ ya zugba nɛ ma kɛ ha mɛ ɔ nɔ.” 13 Meriba* nyu ɔmɛ ji nɛ ɔ nɛ, lejɛ ɔ nɛ Israel bi ɔmɛ kɛ Yehowa pɛ ngɛ, nɛ e ha nɛ a na kaa e ngɛ klɔuklɔu.

14 Kɛkɛ nɛ Mose tsɔ nihi kɛ je Kadesh kɛ ya Edom matsɛ ɔ ngɔ nɛ a ya de lɛ ke: “Nɔ́ nɛ o nyɛminyumu Israel ngɛ dee ji nɛ ɔ nɛ, ‘Mo nitsɛ o le haomihi tsuo nɛ waa kɛ kpe. 15 Wa tsɛmɛ ɔmɛ ya Egipt, nɛ wa hi Egipt jehahi* babauu, nɛ Egipt bi ɔmɛ wa waa kɛ wa tsɛmɛ ɔmɛ yi mi. 16 Nyagbenyagbe ɔ, wa kpa ngmlaa kɛ tsɛ Yehowa, nɛ e bu wɔ tue, nɛ e tsɔ bɔfo ko nɛ e ba je wɔ kɛ je Egipt, nɛ amlɔ nɛ ɔ, wa ngɛ Kadesh, nɛ ji ma nɛ kɛ o zugba a wo huzu ɔ nɔ. 17 Wa kpa mo pɛɛ, ha nɛ waa gu o zugba a nɔ kɛ be. Wa be ngmɔ ko loo wai ngmɔ ko mi gue, nɛ wa be vu ko mi nyu nue hulɔ. Wa maa nyɛɛ Matsɛ ɔ Gbɛjegbɛ ɔ nɔ tɛ̃ɛ, wa be hiɔ nɔ loo muɔ nɔ gbae kɛ yaa si be nɛ wa maa gu o zugba a nɔ kɛ be.’”

18 Se Edom de lɛ ke: “Koo gu ye zugba a nɔ kɛ be. Ke pi jã a, ma hia klaate kɛ ba ná mo.” 19 Kɛkɛ nɛ Israel bi ɔmɛ de lɛ ke: “Gbɛjegbɛ ngua a nɔ kɛkɛ nɛ wa maa nyɛɛ, nɛ ke e ba mi kaa waa kɛ wa lohwe lɛlɛɛ ɔmɛ nu o nyu ɔ eko ɔ, wa maa wo he hiɔ. Nɔ́ nɛ wa ngɛ bie pɛ ji kaa o ngmɛ wɔ blɔ nɛ waa nyɛɛ o zugba a nɔ kɛ be.” 20 Se e de mɛ ke: “Ko ba gu hiɛ ɔ kɛ be.” Kɛkɛ nɛ Edom ngɔ nihi fuu, kɛ tabo nɛ he* wa kɛ ba konɛ a ba tua mɛ. 21 Lɔ ɔ he ɔ, Edom kplɛɛ we nɛ Israel nɛ gu e zugba a nɔ kɛ be; enɛ ɔ he ɔ, Israel kpale e se ya gu he kpa.

22 Israel bi ɔmɛ, nɛ ji ma a tsuo je Kadesh kɛ ho Hor Yoku ɔ he ya. 23 Kɛkɛ nɛ Yehowa de Mose kɛ Aaron ngɛ Hor Yoku ɔ he ngɛ Edom huzu ɔ nya ke: 24 “Aaron ma gbo.* E be zugba nɛ ma kɛ ha Israel bi ɔmɛ ɔ nɔ yae, ejakaa nyɛ ni enyɔ ɔmɛ tsuo nyɛ bui fami nɛ i kɛ ha ngɛ Meriba nyu ɔmɛ a he ɔ tue. 25 Ngɔɔ Aaron kɛ e binyumu Eleazar nɛ o kɛ mɛ nɛ kuɔ kɛ ba Hor Yoku ɔ nɔ. 26 Je Aaron osɔfo tade ɔmɛ ngɛ e he nɛ o kɛ wo e binyumu Eleazar, nɛ Aaron ma gbo ngɛ lejɛ ɔ.”

27 Lɔ ɔ he ɔ, Mose pee kaa bɔ nɛ Yehowa fã lɛ ɔ pɛpɛɛpɛ, nɛ a kuɔ Hor Yoku ɔ ngɛ asafo ɔ tsuo hɛ mi. 28 Kɛkɛ nɛ Mose je Aaron osɔfo tade ɔmɛ ngɛ e he nɛ e kɛ wo Aaron binyumu Eleazar. Lɔ ɔ se ɔ, Aaron gbo ngɛ lejɛ ɔ, ngɛ yoku ɔ yi mi. Nɛ Mose kɛ Eleazar kple si kɛ je yoku ɔ nɔ kɛ ba. 29 Benɛ asafo ɔ tsuo na kaa Aaron gbo ɔ, Israel we ɔ tsuo fo Aaron he ya ligbi 30.

21 Benɛ Arad matsɛ ɔ nɛ e hi Negeb nɛ e ji Kanaan no ɔ nu kaa Israel gu Atarim blɔ ɔ nɔ kɛ ma a, e ya tua Israel, nɛ e nuu a ti ni komɛ nyɔguɛ kɛ ho. 2 Lɔ ɔ he ɔ, Israel kã Yehowa kita ke: “Ke o ngɔ nimli nɛ ɔmɛ kɛ wo ye dɛ ɔ, bɔ fɛɛ bɔ nɛ ji ɔ, ma kpata a ma amɛ a hɛ mi.” 3 Enɛ ɔ he ɔ, Yehowa bu Israel gbi tue, nɛ e ngɔ Kanaan bi ɔmɛ kɛ wo a dɛ, nɛ a kpata a kɛ a ma amɛ a hɛ mi. Lɔ ɔ he ɔ, a wo lejɛ ɔ biɛ ke Horma.*

4 Benɛ a tsa a blɔ hiami ɔ nɔ kɛ je Hor Yoku ɔ he nɛ́ a gu Wo Tsu ɔ nya blɔ ɔ nɔ konɛ a ya lɔgɔ Edom zugba a kɛ ho ɔ, blɔ hiami ɔ ha nɛ pɔ tɔ ni ɔmɛ a he.* 5 Ni ɔmɛ tu munyu kɛ si Mawu kɛ Mose si abɔ, nɛ a de ke: “Mɛni he je nɛ nyɛ ngɔ wɔ kɛ je Egipt kɛ ba konɛ wa ba gbo ngɛ nga nɛ ɔ nɔ ɔ? Niye ní be, nɛ nyu hu be. Niye ní nɛ ngɛ tai nɛ ɔ lɛɛ, wa sume hu.”* 6 Lɔ ɔ he ɔ, Yehowa ha nɛ sinɔ duɔtsɛmɛ* ba sɛ ni ɔmɛ a kpɛti, nɛ a kɔɔ mɛ, nɛ Israel bi ɔmɛ a kpɛti nihi fuu gbo.

7 Lɔ ɔ he ɔ, ni ɔmɛ ba Mose ngɔ, nɛ a ba de lɛ ke: “Wa pee yayami kaa wa tu munyu kɛ si Yehowa, nɛ wa tu munyu kɛ si mo hulɔ. Mo kpa Yehowa pɛɛ ha wɔ konɛ e je sinɔ ɔmɛ kɛ je wa kpɛti.” Lɔ ɔ he ɔ, Mose kpa pɛɛ ha ni ɔmɛ. 8 Kɛkɛ nɛ Yehowa de Mose ke: “Moo pee sinɔ duɔtsɛ* henɔ ko, nɛ́ o kɛ kpla tso he, konɛ ke sinɔ kɔ̃ nɔ ko ɔ, nɔ ɔ nɛ hyɛ sinɔ duɔtsɛ henɔ nɛ o pee ɔ, konɛ e yi nɛ ná wami.” 9 Oya nɔuu nɛ Mose pee akɔblee sinɔ nɛ e kɛ kpla tso he, nɛ be fɛɛ be nɛ sinɔ maa kɔ̃ nɔ ko nɛ nɔ ɔ maa hyɛ akɔblee sinɔ ɔ, e yi náa wami.

10 Lɔ ɔ se ɔ, Israel bi ɔmɛ tsa a blɔ hiami ɔ nɔ, nɛ a ya to si ngɛ Obot. 11 Nɛ a hia kɛ je Obot, nɛ a ya to si ngɛ Iye Abarim, ngɛ nga a nɛ e hɛ mi tsɔɔ Moab ɔ nɔ kɛ yaa puje he blɔ. 12 Nɛ́ a hia kɛ je lejɛ ɔ, a ya to si ngɛ Zered Dɔgba a* he. 13 A je lejɛ ɔ nɛ a ya to si ngɛ Arnon kpokpa a nɛ ngɛ nga a nɛ je Amor bi ɔmɛ a huzu ɔ nya a nɔ, ejakaa Arnon ji Moab huzu nɛ ngɛ Moab bi ɔmɛ kɛ Amor bi ɔmɛ a kpɛti. 14 Enɛ ɔ he je nɛ Yehowa Tahi womi ɔ tu “Waheb nɛ ngɛ Sufa, kɛ Arnon dɔgba amɛ,* 15 kɛ dɔgbahi* nɛ a be kɛ ya su* Ar ma a he, kɛ ya su he nɛ Moab huzu ɔ” ngɛ ɔ he munyu ɔ nɛ.

16 Lɔ ɔ se ɔ, a tsa nɔ kɛ ho Beer ya. Lejɛ ɔ nɛ Yehowa tu munyu kɛ tsɔɔ Mose ngɛ vu ko he ke: “Bua ni ɔmɛ a nya, nɛ́ ma ha mɛ nyu” ɔ nɛ.

17 Jamɛ a be ɔ, Israel la la nɛ ɔ:

“Oo vu, nyu nɛ je o mi kɛ ba!—Nyɛ he nɔ!*

Lɔ ɔ se ɔ, a je nga a nɔ kɛ ho Matana ya. 19 Nɛ́ a je Matana a, a tsa nɔ kɛ ho Nahaliel ya; nɛ́ a je Nahaliel ɔ, a tsa nɔ kɛ ho Bamot ya. 20 Nɛ́ a je Bamot ɔ, a tsa nɔ kɛ ho dɔgba a nɛ ngɛ Moab zugba a nɔ* ɔ he ya, ngɛ Pisga yo ɔ yi mi, he nɛ e hɛ mi tsɔɔ Yeshimon ɔ.*

21 Jehanɛ ɔ, Israel tsɔ nihi kɛ ya Sihon, nɛ ji Amor bi ɔmɛ a matsɛ ɔ ngɔ, nɛ a ya de lɛ ke: 22 “Ha nɛ waa gu o zugba a nɔ kɛ be. Wa be ngmɔ ko loo wai ngmɔ ko mi gbae. Wa be vu ko mi nyu nue. Wa maa nyɛɛ Matsɛ ɔ Gbɛjegbɛ ɔ nɔ tɛ̃ɛ kɛ ya si be nɛ wa maa gu o zugba a nɔ kɛ be.” 23 Se Sihon kplɛɛ we nɛ Israel nɛ gu e zugba a nɔ kɛ be. Mohu ɔ, Sihon bua e we bi ɔmɛ tsuo a nya, nɛ e je kpo konɛ e kɛ Israel nɛ ya hwu ta ngɛ nga a nɔ, nɛ e ba Yahaz, nɛ e kɛ Israel ba bɔni ta hwumi ngɛ lejɛ ɔ. 24 Se Israel kɛ klaate ye e nɔ kunimi, nɛ e ngɔ e zugba a kɛ je Arnon kɛ ya si Yabok nɛ ngɛ Ammon bi ɔmɛ a kasa nya a, ejakaa Yazer ji Ammon bi ɔmɛ a huzu.

25 Lɔ ɔ he ɔ, Israel ngɔ ma nɛ ɔmɛ tsuo, nɛ a hi Amor bi ɔmɛ a ma amɛ tsuo a mi, a hi Heshbon kɛ mahi tsuo nɛ bɔle lɛ ɔ* a mi. 26 Ejakaa Heshbon ji Sihon, nɛ ji Amor bi ɔmɛ a matsɛ ɔ ma. Lɛ nɛ e kɛ Moab matsɛ ɔ hwu ta nɛ e ngɔ e zugba a tsuo ngɛ e dɛ hluu kɛ ya si Arnon ɔ nɛ. 27 Lɔ ɔ he nɛ a bu he fɛu yemi abɛ nɛ ɔ nɛ:

“Ba Heshbon.

Ha nɛ a po Sihon ma a, nɛ a fia lɛ kɛ ma si kpɛii.

28 Ejakaa la ko je Heshbon, nɛ la lilɛ ko je Sihon ma a mi.

E sã Ar nɛ ngɛ Moab ɔ, e sã nyɔmtsɛmɛ nɛ a ngɛ hehi nɛ a ya hiɔwe* ngɛ Arnon ɔ.

29 Moab, musu tloo mo! Nɛ nyɛ nihi nɛ nyɛ ngɛ Kemosh, nyɛ hɛ mi ma kpata pɛ!

E ha nɛ e binyumu ɔmɛ pee lalaalo woli, nɛ e biyi ɔmɛ pee Sihon, nɛ ji Amor bi ɔmɛ a matsɛ ɔ nyɔguɛhi.

31 Enɛ ɔ he ɔ, Israel hi Amor bi ɔmɛ a zugba a nɔ. 32 Jehanɛ ɔ, Mose tsɔ nyumu komɛ konɛ a ya kpá Yazer ma a si. A ngɔ mahi nɛ bɔle lɛ ɔ,* nɛ a fiee Amor bi ɔmɛ nɛ a ngɛ lejɛ ɔ. 33 Lɔ ɔ se ɔ, a dɔ a yi nɛ a kuɔ kɛ gu Bashan blɔ ɔ nɔ kɛ ho. Kɛkɛ nɛ Og, nɛ ji Bashan matsɛ ɔ kɛ e we bi ɔmɛ tsuo je kpo konɛ a kɛ mɛ nɛ ba hwu ta ngɛ Edrei. 34 Yehowa de Mose ke: “Koo ye lɛ gbeye, ejakaa ma ngɔ e kɛ e we bi ɔmɛ tsuo kɛ e zugba a kɛ wo o dɛ, nɛ o maa pee lɛ kaa bɔ nɛ o pee Sihon, nɛ ji Amor bi ɔmɛ a matsɛ ɔ nɛ e hi Heshbon ɔ.” 35 Lɔ ɔ he ɔ, a ya nɔ nɛ a fiaa e kɛ e binyumu ɔmɛ kɛ e we bi ɔmɛ tsuo ní kɛ ya si be nɛ a kpata e we bi ɔmɛ tsuo a hɛ mi, nɛ a ngɔ e zugba a.

22 Lɔ ɔ se ɔ, Israel bi ɔmɛ pue nɔ nɛ a ya to si ngɛ Moab nga kplanaa a nɔ, ngɛ Yordan Pa a se, ngɛ Yeriko hanɔ. 2 Jehanɛ ɔ, Zipor binyumu Balak na níhi tsuo nɛ Israel pee Amor bi ɔmɛ ɔ, 3 nɛ Moab ye gbeye wawɛɛ ngɛ Israel bi ɔmɛ a he je, ejakaa a he hiɛ babauu nitsɛ; ngɛ anɔkuale mi ɔ, Israel bi ɔmɛ a he sawale nu Moab. 4 Lɔ ɔ he ɔ, Moab de Midian nikɔtɔma amɛ ke: “Nimli asafo nɛ ɔ ma kpata níhi tsuo nɛ bɔle wɔ ɔ hɛ mi kaa bɔ nɛ na ku kpeɔ nga ngɛ nga nɔ ɔ.”

Jamɛ a be ɔ mi ɔ, Zipor binyumu Balak ji Moab matsɛ. 5 E tsɔ nihi kɛ ya Beor binyumu Balaam ngɔ ngɛ Petor nɛ ngɛ Pa* a kasa nya, ngɛ lɛ nitsɛ e ma mi bi ɔmɛ a zugba a nɔ. E tsɔ nɛ a ya de lɛ ke: “Hyɛ! Ni komɛ je Egipt kɛ ba. Hyɛ! A ha zugba a nɔ,* nɛ a ngɛ ye hɛ mi haa. 6 I kpa mo pɛɛ nɛ o ba gbiɛ nimli nɛ ɔmɛ ha mi, ejakaa a he wa pe mi. Eko ɔ, ma nyɛ ma ye a nɔ kunimi, nɛ ma fiee mɛ kɛ je zugba a nɔ, ejakaa i le saminya kaa ke o jɔɔ nɔ ko ɔ, kɛkɛ a jɔɔ lɛ, nɛ ke o gbiɛ nɔ ko ɔ, kɛkɛ a gbiɛ lɛ.”

7 Enɛ ɔ he ɔ, Moab ma nikɔtɔma amɛ kɛ Midian ma nikɔtɔma amɛ pue nɔ kɛ ho Balaam ngɔ ya kɛ a dɛ mi sika nɛ́ a kɛ maa wo klaami ɔ he hiɔ, nɛ a ngɔ Balak sɛ gbi ɔ kɛ ya ha lɛ. 8 Kɛkɛ nɛ e de mɛ ke: “Nyɛɛ hwɔ hiɛ ɔ nyɔ nɛ ɔ mi, nɛ nɔ́ fɛɛ nɔ́ nɛ Yehowa ma de mi ɔ, ma ha nɛ nyɛɛ le.” Lɔ ɔ he ɔ, Moab ma nikɔtɔma amɛ hwɔ Balaam ngɔ.

9 Kɛkɛ nɛ Mawu ba Balaam ngɔ, nɛ e ba bi lɛ ke: “Nyumu nɛ ɔmɛ nɛ a ngɛ o ngɔ ɔ, mɛnɔmɛ ji mɛ?” 10 Balaam de anɔkuale Mawu ɔ ke: “Moab Matsɛ Balak, Zipor binyumu ɔ tsɔ kɛ ba de mi ke, 11 ‘Hyɛ! Ni ɔmɛ nɛ a je Egipt kɛ ma a ha zugba a tsuo nɔ.* Amlɔ nɛ ɔ, ba nɛ o ba gbiɛ mɛ ha mi. Eko ɔ, ma nyɛ ma ye a nɔ kunimi, nɛ ma fiee mɛ kɛ ho.’” 12 Se Mawu de Balaam ke: “O kɛ mɛ nɛ ko ya. Koo gbiɛ ni ɔmɛ, ejakaa a jɔɔ mɛ.”

13 Mɔtu ɔ, Balaam te si nɛ e ya de Balak ma nikɔtɔma amɛ ke: “Nyɛɛ ho nyɛ zugba a nɔ ya, ejakaa Yehowa kplɛɛ we kaa i kɛ nyɛ nɛ ya.” 14 Enɛ ɔ he ɔ, Moab ma nikɔtɔma amɛ kpale kɛ ho Balak ngɔ ya, nɛ a ya de lɛ ke: “Balaam kplɛɛ we kaa e kɛ wɔ maa ba.”

15 Se Balak kpale tsɔ ma nikɔtɔma kpahi nɛ́ a he hiɛ, nɛ́ a hɛ mi hu ngɛ nyami pe kekle ni ɔmɛ. 16 A ba Balaam ngɔ nɛ a ba de lɛ ke: “Nɔ́ nɛ Zipor binyumu Balak de ji nɛ ɔ nɛ, ‘I kpa mo pɛɛ, ko ha nɛ nɔ́ ko nɛ tsi o nya kaa o maa ba ye ngɔ, 17 ejakaa ma wo o hɛ mi nyami babauu, nɛ nɔ́ fɛɛ nɔ́ nɛ o ma de mi ke ma pee ɔ, ma pee. Enɛ ɔ he ɔ, i kpa mo pɛɛ, ba nɛ o ba gbiɛ nimli nɛ ɔmɛ ha mi.’” 18 Se Balaam ha Balak sɔmɔli ɔmɛ heto ke: “Ke Balak ha mi lɛ nitsɛ e we ɔ nɛ́ sika hiɔ kɛ sika tsu hyi lɛ tɔ po, i be nyɛe ma pee nɔ́ ko nɛ Yehowa ye Mawu ɔ fã we mi kaa ma pee, nɔ́ nyafii jio, nɔ́ ngua jio. 19 Se i kpa nyɛ pɛɛ, nyɛ hu nyɛɛ hwɔ hiɛ ɔ nyɔ nɛ ɔ mi, konɛ ma hyɛ nɔ́ nɛ Yehowa ma de mi ekohu.”

20 Nyɔ ɔ mi ɔ, Mawu ba Balaam ngɔ nɛ e ba de lɛ ke: “Ke nimli nɛ ɔmɛ ba tsɛ mo ɔ, lɛɛ o kɛ mɛ nɛ ya. Se mohu nɔ́ nɛ ma de mo ke o de ɔ, lɔ ɔ pɛ nɛ o de.” 21 Enɛ ɔ he ɔ, mɔtu ɔ, Balaam te si nɛ e wo e teji* ɔ nɔ ní, nɛ e kɛ Moab ma nikɔtɔma amɛ ho.

22 Se Mawu mi mi wo la kaa e yaa, nɛ Yehowa bɔfo ba da si ngɛ blɔ ɔ mi konɛ e tsi lɛ blɔ. Jamɛ a be ɔ mi ɔ, Balaam hi e teji ɔ nɔ kɛ yaa, nɛ e tsɔli enyɔ piɛɛ e he. 23 Benɛ teji ɔ na Yehowa bɔfo ɔ nɛ daa si ngɛ blɔ ɔ mi kɛ e dɛ mi klaate ɔ, e bɔ mɔde kaa e ma gba kɛ je blɔ ɔ nɔ kɛ sɛ nga a mi. Se Balaam bɔni teji ɔ kongomi konɛ e kpale kɛ ba blɔ ɔ nɔ. 24 Kɛkɛ nɛ Yehowa bɔfo ɔ ya da si ngɛ blɔ tokofii ko nɔ ngɛ wai ngmɔ enyɔ komɛ nɛ tɛ gbogbo ngɛ hiɛ kɛ hiɛ ɔ kpɛti; 25 Benɛ teji ɔ na Yehowa bɔfo ɔ, e ya kpasa gbogbo ɔ, nɛ e mia Balaam nane kɛ wo gbogbo ɔ he, kɛkɛ nɛ Balaam bɔni lɛ kongomi ekohu.

26 Jehanɛ ɔ, Yehowa bɔfo ɔ je nɛ e ya po lɛ ngɛ he ko tokofii, he nɛ blɔ ko blɔ ko be nɛ a kɛ plɛɔ he kɛ yaa hiɔ nɔ, loo muɔ nɔ. 27 Benɛ teji ɔ na Yehowa bɔfo ɔ, e bu si. Lɔ ɔ he ɔ, Balaam mi mi fu wawɛɛ, nɛ e ngɔ e dɛma tso ɔ kɛ kongo teji ɔ hluu. 28 Nyagbenyagbe ɔ, Yehowa ha nɛ teji ɔ tu munyu* nɛ e bi Balaam ke: “Mɛni i pee mo loko o kongo mi si etɛ sɔuu nɛ ɔ?” 29 Balaam ha teji ɔ heto ke: “Ejakaa o pee mi kuasia. Ke i hɛɛ klaate ngɛ ye dɛ ɔ, jinɛ i ko gbe mo!” 30 Kɛkɛ nɛ teji ɔ bi Balaam ke: “Anɛ pi imi ji o teji nɛ́ o hi nɔ o wami be tsuo kɛ ba si mwɔnɛ ɔ lo? Anɛ i pee mo nɔ́ ko kaa kikɛ hyɛ lo?” E ha heto ke: “Dɛbi!” 31 Kɛkɛ nɛ Yehowa bli Balaam hɛngmɛ, nɛ e na Yehowa bɔfo ɔ nɛ e daa si ngɛ blɔ ɔ mi, nɛ́ e hɛɛ klaate ngɛ e dɛ. Amlɔ nɔuu nɛ e kplã si, nɛ e kɛ e hɛ mi bu si.

32 Kɛkɛ nɛ Yehowa bɔfo ɔ bi lɛ ke: “Mɛni he je nɛ o kongo o teji ɔ si etɛ sɔuu ɔ? Hyɛ! imi nitsɛ i ba konɛ ma ba tsi mo blɔ, ejakaa blɔ nɛ o hia a, ye bua jɔɛ he. 33 Teji ɔ na mi nɛ e bɔ mɔde kaa e maa yu e he kɛ je ye he si etɛ sɔuu. Ke pi nɛ e yu e he ngɛ ye he ɔ, jinɛ i gbe mo momoomo, nɛ i he teji ɔ yi wami.” 34 Balaam de Yehowa bɔfo ɔ ke: “I pee yayami, ejakaa i li kaa mo lɛ o daa si ngɛ blɔ ɔ mi nɛ o kɛ mi ma kpemi. Amlɔ nɛ ɔ, ke blɔ nɛ i hia a dɛ ngɛ o hɛ mi ɔ, lɛɛ ma kpale ye se mɔ.” 35 Se Yehowa bɔfo ɔ de Balaam ke: “O kɛ nyumu ɔmɛ nɛ ho, se nɔ́ nɛ ma de mo ɔ, lɔ ɔ pɛ nɛ o de.” Lɔ ɔ he ɔ, Balaam kɛ Balak ma nikɔtɔma amɛ tsa blɔ hiami ɔ nɔ.

36 Benɛ Balak nu kaa Balaam ba a, amlɔ nɔuu nɛ e je kpo kɛ ho konɛ e kɛ lɛ nɛ ya kpe ngɛ Moab ma nɛ ngɛ Arnon dɔ ɔ nya a mi, ngɛ Moab zugba a huzu ɔ nya. 37 Balak bi Balaam ke: “Anɛ i tsɔ we ke a ba tsɛ mo kɛ ba lo? Mɛni he je nɛ o bɛ ɔ? Anɛ o susu kaa i be nyɛe nɛ ma wo o hɛ mi nyami babauu lo?” 38 Balaam ha Balak heto ke: “Amlɔ nɛ ɔ lɛɛ i ba. Se a maa ngmɛ mi blɔ nɛ ma de nɔ́ ko lɛɛ? Munyu nɛ Mawu maa ngɔ kɛ wo ye nya a, lɔ ɔ pɛ nɛ ma de.”

39 Enɛ ɔ he ɔ, Balaam kɛ Balak ho, nɛ a ba Kiriat Huzot. 40 Balak ngɔ nahi kɛ jijɔhi kɛ sã afɔle, nɛ e tsɔ nɛ a ngɔ eko ya ha Balaam kɛ ma nikɔtɔmahi nɛ a piɛɛ e he ɔ. 41 E nɔ jena mɔtu ɔ, Balak ngɔ Balaam kɛ kuɔ kɛ ya Bamot Baal bɔ nɛ pee nɛ e nyɛ nɛ e na ni ɔmɛ tsuo.

23 Kɛkɛ nɛ Balaam de Balak ke: “Moo ma afɔle sami la tɛ kpaago ngɛ hiɛ ɔ, nɛ́ o dla na ku kpaago kɛ agbosu kpaago ha mi.” 2 Oya nɔuu nɛ Balak pee kaa bɔ nɛ Balaam de lɛ ɔ. Nɛ Balak kɛ Balaam ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ. 3 Kɛkɛ nɛ Balaam de Balak ke: “Moo hi hiɛ ɔ ngɛ o sami afɔle ɔ he, konɛ ma ya. Eko ɔ, Yehowa kɛ mi ma ba kpe, nɛ nɔ́ fɛɛ nɔ́ nɛ e ma je ngɔ tsɔɔ mi ɔ, ma ba de mo.” Lɔ ɔ he ɔ, e ho yoku kpataa ko nɔ ya.

4 Kɛkɛ nɛ Mawu kɛ Balaam ya kpe, nɛ Balaam de lɛ ke: “I ma afɔle sami la tɛ kpaago ɔmɛ, nɛ i kɛ na ku kake kɛ agbosu kake sã afɔle ngɛ afɔle sami la tɛ ɔmɛ eko fɛɛ eko nɔ.” 5 Munyu nɛ Yehowa kɛ wo Balaam nya ji nɛ ɔ nɛ: “Kpale kɛ ya Balak ngɔ, nɛ nɔ́ nɛ o ma ya de lɛ ji nɛ ɔ nɛ.” 6 Lɔ ɔ he ɔ, e kpale kɛ ho nɛ e ya na kaa Balak kɛ Moab ma nikɔtɔma amɛ tsuo daa si ngɛ e sami afɔle ɔ he. 7 Kɛkɛ nɛ e tu munyu ngɛ abɛ mi ke:

‘Ba nɛ o ba gbiɛ Yakob ha mi.

Ee, ba nɛ o ba tu munyu kɛ si Israel.’

 8 Mɛni he je nɛ ma gbiɛ nihi nɛ Mawu gbíɛ mɛ ɔ?

Nɛ mɛni he je nɛ ma tu munyu kɛ si nihi nɛ Yehowa tui munyu kɛ si mɛ ɔ?

11 Kɛkɛ nɛ Balak de Balaam ke: “Mɛni o pee mi nɛ ɔ? I ngɔ mo kɛ ba kaa o ba gbiɛ ye he nyɛli, se hyɛ, jɔɔmi mohu nɛ o ba jɔɔ mɛ.” 12 E he nɔ ke: “Munyu fɛɛ munyu nɛ Yehowa kɛ maa wo ye nya a, anɛ pi lɔ ɔ nɛ e sa kaa ma de lo?”

13 Balak de lɛ ke: “I kpa mo pɛɛ, ba nɛ waa ya he kpa, he nɛ o ma nyɛ maa na mɛ ngɛ. O be mɛ tsuo nae, o maa na a kpɛti nihi bɔɔ pɛ. Moo gbiɛ mɛ ha mi ngɛ lejɛ ɔ.” 14 Lɔ ɔ he ɔ, e ngɔ lɛ kɛ ho Zofim nga a nɔ ya ngɛ Pisga yi mi, nɛ e ya ma afɔle sami la tɛ kpaago ngɛ lejɛ ɔ, nɛ e ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ. 15 Lɔ ɔ he ɔ, Balaam de Balak ke: “Moo hi hiɛ ɔ ngɛ o sami afɔle ɔ he nɛ́ i kɛ Mawu nɛ ya kpe ngɛ lejɛ ɔ.” 16 Nɛ Yehowa kɛ Balaam ya kpe, nɛ e kɛ munyu nɛ ɔ wo e nya: “Kpale kɛ ho Balak ngɔ ya, nɛ nɔ́ nɛ o ya de lɛ ji nɛ ɔ nɛ.” 17 Lɔ ɔ he ɔ, e kpale kɛ ba e ngɔ, nɛ e ba na kaa e ngɛ mlɛe ngɛ e sami afɔle ɔ he, nɛ Moab ma nikɔtɔma amɛ piɛɛ e he. Balak bi lɛ ke: “Mɛni Yehowa de?” 18 Kɛkɛ nɛ e tu munyu ngɛ abɛ mi ke:

“Balak, tee si, nɛ o bu tue.

Oo Zipor binyumu, moo bu mi tue.

Anɛ ke e de nɔ́ ko ɔ, e be pee lo?

Ke e tu munyu ɔ, anɛ e be hae nɛ e ba mi lo?

22 Mawu ngɔ mɛ kɛ je Egipt kɛ ma.

E ngɛ kaa nga mi na ku kolihi kɛ ha mɛ.

Amlɔ nɛ ɔ, a ma nyɛ ma de ngɛ Yakob, nɛ ji Israel he ke:

‘Nyɛɛ hyɛ nɔ́ nɛ Mawu pee!’

25 Kɛkɛ nɛ Balak de Balaam ke: “Ke o be nyɛe maa gbiɛ lɛ ɔ, lɛɛ koo jɔɔ lɛ mɔ.” 26 Balaam ha Balak heto ke: “I de we mo ke, ‘Ma pee nɔ́ fɛɛ nɔ́ nɛ Yehowa ma de’ ɔ lo?”

27 Balak de Balaam ke: “I kpa mo pɛɛ, ba nɛ ma ngɔ mo kɛ ya he kpa. Eko ɔ, anɔkuale Mawu ɔ maa kplɛɛ nɛ o gbiɛ mɛ ha mi ngɛ lejɛ ɔ.” 28 Enɛ ɔ he ɔ, Balak ngɔ Balaam kɛ ho Peor nɛ e hɛ mi tsɔɔ Yeshimon ɔ* yi mi ya. 29 Kɛkɛ nɛ Balaam de Balak ke: “Moo ma afɔle sami la tɛ kpaago ngɛ hiɛ ɔ, nɛ́ o dla na ku kpaago kɛ agbosu kpaago ha mi.” 30 Lɔ ɔ he ɔ, Balak pee nɔ́ nɛ Balaam de lɛ ɔ pɛpɛɛpɛ, nɛ e ngɔ na ku kake kɛ agbosu kake kɛ sã afɔle ngɛ afɔle sami la tɛ ɔmɛ eko fɛɛ eko nɔ.

24 Benɛ Balaam na kaa e sa Yehowa hɛ mi kaa e jɔɔ Israel ɔ, e yɛ nɛ e ya hla okadihi nɛ tsɔɔ kaa nɔ́ yayami ko maa ba hu, se e plɛ e hɛ mi kɛ tsɔɔ nga a nɔ blɔ. 2 Benɛ Balaam wo e hɛngmɛ nɔ nɛ e na Israel bi ɔmɛ nɛ a to si wɛtso nya wɛtso nya a, Mawu mumi ɔ ba e nɔ. 3 Kɛkɛ nɛ e tu munyu ngɛ abɛ mi ke:

10 Kɛkɛ nɛ Balak mi mi fu Balaam wawɛɛ. Balak gbɔ vu wo Balaam yi, nɛ e de Balaam ke: “I tsɛ mo kɛ ba kaa o ba gbiɛ ye he nyɛli, se si etɛ sɔuu ji nɛ ɔ nɛ o ngɛ mɛ jɔɔe mohu. 11 Esɔ nɛ o je kɛ ho we mi ya. I to kaa ma wo o hɛ mi nyami babauu, se hyɛ! Yehowa ha nɛ hɛ mi nyami ɔ bɔ mo.”

12 Balaam ha Balak heto ke: “Anɛ i de we nihi nɛ o tsɔ ɔ ke, 13 ‘Ke Balak ha mi e we ɔ nɛ́ sika hiɔ kɛ sika tsu hyi lɛ tɔ po, i be nyɛe ma pee imi nitsɛ ye tsui nya ní nɛ́ ma pee nɔ́ ko nɛ Yehowa fã we mi kaa ma pee, nɔ́ kpakpa jio, nɔ́ yayami jio’ lo? Anɛ i de we ke, ‘Nɔ́ nɛ Yehowa ma de mi ɔ, lɔ ɔ pɛ ma de’ lo? 14 Amlɔ nɛ ɔ, i yaa ye we bi ɔmɛ a ngɔ. Ba nɛ ma de mo nɔ́ nɛ nimli nɛ ɔmɛ maa pee o we bi ɔmɛ hwɔɔ se.”* 15 Kɛkɛ nɛ e tu munyu ngɛ abɛ mi ke:

20 Benɛ e na Amalek ɔ, e tsa munyu nɛ e ngɛ tue ngɛ abɛ mi ɔ nɔ ke:

21 Benɛ e na Ken bi ɔmɛ ɔ, e tsa munyu nɛ e ngɛ tue ngɛ abɛ mi ɔ nɔ ke:

“O hi he ɔ ngɛ slɔkee, nɛ o tsu ɔ maa si ngɛ tɛ sa nɔ.

22 Se nɔ ko maa sã Ken bi ɔmɛ* pɛsɛpɛsɛ.

E piɛ bɔɔ nɛ Asiria ma ba nu mo nyɔguɛ kɛ ho?”

23 Nɛ e tsa munyu nɛ e ngɛ tue ngɛ abɛ mi ɔ nɔ ke:

“Ao! Ke Mawu pee nɔ́ nɛ ɔ, mɛnɔ yi ma ná wami?

Se lɛ hu e hɛ mi ma kpata pɛsɛpɛsɛ.”

25 Kɛkɛ nɛ Balaam te si nɛ e kpale kɛ ho e je he ya. Balak hu wo e blɔ.

25 Benɛ Israel bi ɔmɛ ngɛ Shitim ɔ, ni ɔmɛ kɛ Moab yi ɔmɛ bɔni ajuama bɔmi. 2 Ke Moab bi ɔmɛ maa sã afɔlehi kɛ ha a mawu ɔmɛ ɔ, yi ɔmɛ fɔɔ mɛ nine kɛ yaa lejɛ ɔ, nɛ a yeɔ a niye ní ɔ, nɛ a kplãã si kɛ haa a mawu ɔmɛ. 3 Lɔ ɔ he ɔ, Israel bi ɔmɛ ya piɛɛ a he kɛ ja Baal nɛ ngɛ Peor ɔ,* nɛ Yehowa muklii mi fu Israel bi ɔmɛ wawɛɛ. 4 Yehowa de Mose ke: “Nuu nihi tsuo nɛ a nyɛɛ nimli nɛ ɔmɛ a hɛ mi ɔ, nɛ o sɛu mɛ ngɛ Yehowa hɛ mi piani katakata,* konɛ Yehowa mi mi fumi nɛ nya wa a nɛ je Israel bi ɔmɛ a nɔ.” 5 Kɛkɛ nɛ Mose de Israel kojoli ɔmɛ ke: “Nyɛ ti nɔ fɛɛ nɔ nɛ e gbe lɛ nitsɛ e he nihi nɛ a ya ja Baal nɛ ngɛ Peor ɔ.”*

6 Jamɛ a be ɔ mi ɔ, Israel no ko ya ngɔ Midian yo ko kɛ ma e nyɛmimɛ ɔmɛ a kpɛti ngɛ Mose kɛ Israel ma a tsuo a hɛ mi, be mi nɛ a ngɛ ya foe ngɛ kpe he bo tsu ɔ nya. 7 Benɛ osɔfo Aaron binyumu Eleazar binyumu Finehas na nɔ́ nɛ ɔ, oya nɔuu nɛ e te si ngɛ ma mi bi ɔmɛ a kpɛti, nɛ e ya wo akplɔ. 8 Kɛkɛ nɛ e nyɛɛ Israel no ɔ se kɛ ya sɛ bo tsu ɔ mi, nɛ e ngɔ akplɔ ɔ kɛ gbɔ mɛ ni enyɔ ɔmɛ, e kɛ gbɔ nyumu ɔ kɛ yo ɔ tsuo kɛ gu yo ɔ fɔmi he nɛ e pa si. Kɛkɛ nɛ haomi nɛ ba Israel bi ɔmɛ a nɔ ɔ se po. 9 Nihi nɛ a gbo ngɛ haomi ɔ he je ɔ, a yibɔ ji 24,000.

10 Kɛkɛ nɛ Yehowa de Mose ke: 11 “Osɔfo Aaron binyumu Eleazar binyumu Finehas je abofu nɛ i na kɛ ha Israel bi ɔmɛ ɔ kɛ je, ejakaa e ngmɛ́ mɛ blɔ nɛ a ja mawu kpa ko ngɛ a kpɛti kaa ja imi pɛ. Akɛnɛ i suɔ nɛ a ja imi pɛ he je ɔ, nɔ́ nɛ e pee ɔ ha nɛ i kpataa we Israel bi ɔmɛ a hɛ mi. 12 Lɔ ɔ he ɔ, de lɛ ke, ‘I kɛ lɛ ngɛ tue mi jɔmi somi soe. 13 Nɛ e maa pee osɔfo yemi somi nɛ maa hi si kɛ ya neneene ha lɛ kɛ e nina nɛ maa ba ngɛ e se ɔ, ejakaa e ngmɛ́ blɔ nɛ a ja mawu kpa ko ngɛ e Mawu ɔ se, nɛ e kpata kɛ ha Israel bi ɔmɛ.’”

14 Israel nyumu ɔ nɛ a gbe e kɛ Midian yo ɔ biɛ ji Zimri; Salu nɛ e ji Simeon bi ɔmɛ a tsɛmɛ a we ɔ eko ganɔ ɔ binyumu ji lɛ. 15 Midian yo nɛ a gbe lɛ ɔ biɛ ji Kozbi, Zur biyo ɔ; Zur ji wekuhi nɛ a ngɛ Midian bi ɔmɛ a tsɛmɛ a we ɔ eko mi ɔ nya dalɔ.

16 Pee se ɔ, Yehowa de Mose ke: 17 “Nyɛɛ hao Midian bi ɔmɛ nɛ nyɛ kpata a hɛ mi, 18 ejakaa a kɛ a ga ní peepee ɔmɛ hao nyɛ ngɛ Peor sane ɔ kɛ Kozbi, nɛ ji Midian ganɔ ɔ biyo ɔ sane ɔ mi. Kozbi ji a nyɛmiyo ɔ nɛ a gbe lɛ ngɛ haomi ligbi ɔ nɔ ngɛ Peor sane ɔ mi ɔ nɛ.”

26 Benɛ haomi ɔ se po ɔ, Yehowa de Mose kɛ osɔfo Aaron binyumu Eleazar ke: 2 “Nyɛɛ kane Israel bi ɔmɛ a we asafo ɔ tsuo ngɛ a tsɛmɛ a we ɔmɛ a nya, nyɛɛ kane ni nɛmɛ nɛ a ye kɛ je jeha 20 kɛ yaa, nɛ a ma nyɛ ma tsu ta buli a ní tsumi ngɛ Israel ɔ.” 3 Lɔ ɔ he ɔ, Mose kɛ osɔfo Eleazar kɛ ni ɔmɛ tu munyu ngɛ Moab nga kplanaa a nɔ ngɛ Yordan Pa a he ngɛ Yeriko ke: 4 “Nyɛɛ kane nihi nɛ a ye kɛ je jeha 20 kɛ yaa a kaa bɔ nɛ Yehowa fã Mose ɔ.”

Israel bi nɛ a je Egipt zugba a nɔ kɛ ba a ji nɛ ɔmɛ nɛ: 5 Reuben ji Israel kekleekle bi; Reuben binyumuhi ji nɛ ɔmɛ nɛ: Hanok, e mi nɛ Hanok bi ɔmɛ a weku ɔ je; Palu, e mi nɛ Palu bi ɔmɛ a weku ɔ je; 6 Hezron, e mi nɛ Hezron bi ɔmɛ a weku ɔ je; Karmi, e mi nɛ Karmi bi ɔmɛ a weku ɔ je. 7 Reuben bi ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 43,730.

8 Palu binyumu ji Eliab. 9 Nɛ Eliab binyumuhi ji Nemuel, Datan kɛ Abiram. Datan kɛ Abiram nɛ ɔ ji nihi nɛ a hla mɛ ngɛ ni ɔmɛ a kpɛti, nɛ́ a tsɔ atuã kɛ si Mose kɛ Aaron ɔ nɛ. A piɛɛ Kora we bi ɔmɛ a he benɛ a tsɔ atuã kɛ si Yehowa a.

10 Nɛ zugba a mi gba* nɛ e mii mɛ. Kora lɛɛ e kɛ nihi nɛ a fĩ e se ɔ gbo be mi nɛ la a sã nyumuhi 250 ɔ. Nɛ nɔ́ nɛ ba a nɔ ɔ ba pee kɔkɔ bɔmi nɔ́. 11 Se Kora binyumu ɔmɛ lɛɛ a gbo we.

12 Simeon binyumuhi ngɛ a wekuhi a nya ji nɛ ɔmɛ nɛ: Nemuel, e mi nɛ Nemuel bi ɔmɛ a weku ɔ je; Yamin, e mi nɛ Yamin bi ɔmɛ a weku ɔ je; Yakin, e mi nɛ Yakin bi ɔmɛ a weku ɔ je; 13 Zera, e mi nɛ Zera bi ɔmɛ a weku ɔ je; Shaul, e mi nɛ Shaul bi ɔmɛ a weku ɔ je. 14 Simeon bi ɔmɛ a wekuhi ji nɛ ɔmɛ nɛ; a yibɔ ji 22,200.

15 Gad binyumuhi ngɛ a wekuhi a nya ji nɛ ɔmɛ nɛ: Zefon, e mi nɛ Zefon bi ɔmɛ a weku ɔ je; Hagi, e mi nɛ Hagi bi ɔmɛ a weku ɔ je; Shuni, e mi nɛ Shuni bi ɔmɛ a weku ɔ je; 16 Ozni, e mi nɛ Ozni bi ɔmɛ a weku ɔ je; Eri, e mi nɛ Eri bi ɔmɛ a weku ɔ je; 17 Arod, e mi nɛ Arod bi ɔmɛ a weku ɔ je; Areli, e mi nɛ Areli bi ɔmɛ a weku ɔ je. 18 Gad binyumu ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 40,500.

19 Yuda binyumuhi ji Er kɛ Onan. Se Er kɛ Onan gbo ngɛ Kanaan zugba a nɔ. 20 Nɛ Yuda binyumuhi ngɛ a wekuhi a nya ji nɛ ɔmɛ nɛ: Shela, e mi nɛ Shela bi ɔmɛ a weku ɔ je; Perez, e mi nɛ Perez bi ɔmɛ a weku ɔ je; Zera, e mi nɛ Zera bi ɔmɛ a weku ɔ je. 21 Perez binyumuhi ji nɛ ɔmɛ nɛ: Hezron, e mi nɛ Hezron bi ɔmɛ a weku ɔ je; Hamul, e mi nɛ Hamul bi ɔmɛ a weku ɔ je. 22 Yuda bi ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 76,500.

23 Isakar binyumuhi ngɛ a wekuhi a nya ji nɛ ɔmɛ nɛ: Tola, e mi nɛ Tola bi ɔmɛ a weku ɔ je; Puva, e mi nɛ Puva bi ɔmɛ a weku ɔ je; 24 Yashub, e mi nɛ Yashub bi ɔmɛ a weku ɔ je; Shimron, e mi nɛ Shimron bi ɔmɛ a weku ɔ je. 25 Isakar bi ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 64,300.

26 Zebulun binyumuhi ngɛ a wekuhi a nya ji nɛ ɔmɛ nɛ: Sered, e mi nɛ Sered bi ɔmɛ a weku ɔ je; Elon, e mi nɛ Elon bi ɔmɛ a weku ɔ je; Yahleel, e mi nɛ Yahleel bi ɔmɛ a weku ɔ je. 27 Zebulun bi ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 60,500.

28 Yosef binyumuhi ngɛ a wekuhi a nya ji nɛ ɔmɛ nɛ: Manase kɛ Efraim. 29 Manase binyumuhi ji nɛ ɔmɛ nɛ: Makir, e mi nɛ Makir bi ɔmɛ a weku ɔ je; Makir fɔ Gilead; Gilead nɛ ɔ mi nɛ Gilead bi ɔmɛ a weku ɔ je. 30 Gilead binyumuhi ji nɛ ɔmɛ nɛ: Yazer, e mi nɛ Yazer bi ɔmɛ a weku ɔ je; Helek, e mi nɛ Helek bi ɔmɛ a weku ɔ je; 31 Asriel, e mi nɛ Asriel bi ɔmɛ a weku ɔ je; Shekem, e mi nɛ Shekem bi ɔmɛ a weku ɔ je; 32 Shemida, e mi nɛ Shemida bi ɔmɛ a weku ɔ je; Hefer, e mi nɛ Hefer bi ɔmɛ a weku ɔ je. 33 Se Hefer binyumu Zelofehad be binyumuhi, biyihi pɛ nɛ e fɔ. Zelofehad biyi ɔmɛ a biɛhi ji Mahla, Noa, Hogla, Milka, kɛ Tirza. 34 Manase bi ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 52,700.

35 Efraim binyumu ɔmɛ ngɛ a wekuhi a nya ji nɛ ɔmɛ nɛ: Shutela, e mi nɛ Shutela bi ɔmɛ a weku ɔ je; Beker, e mi nɛ Beker bi ɔmɛ a weku ɔ je; Tahan, e mi nɛ Tahan bi ɔmɛ a weku ɔ je. 36 Shutela binyumuhi ji nɛ ɔmɛ nɛ: Eran, e mi nɛ Eran bi ɔmɛ a weku ɔ je. 37 Efraim binyumu ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 32,500. Ni nɛ ɔmɛ ji Yosef binyumuhi ngɛ a wekuhi a nya.

38 Benyamin binyumuhi ngɛ a wekuhi a nya ji nɛ ɔmɛ nɛ: Bela, e mi nɛ Bela bi ɔmɛ a weku ɔ je; Ashbel, e mi nɛ Ashbel bi ɔmɛ a weku ɔ je; Ahiram, e mi nɛ Ahiram bi ɔmɛ a weku ɔ je; 39 Shefufam, e mi nɛ Shefufam bi ɔmɛ a weku ɔ je; Hufam, e mi nɛ Hufam bi ɔmɛ a weku ɔ je. 40 Bela binyumuhi ji Ard kɛ Naaman: Ard nɛ ɔ mi nɛ Ard bi ɔmɛ a weku ɔ je; Naaman nɛ ɔ mi nɛ Naaman bi ɔmɛ a weku ɔ je. 41 Benyamin binyumuhi ngɛ a wekuhi a nya ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 45,600.

42 Dan binyumuhi ngɛ a wekuhi a nya ji nɛ ɔmɛ nɛ: Shuham, e mi nɛ Shuham bi ɔmɛ a weku ɔ je. Dan weku ɔmɛ ngɛ a wekuhi a nya ji nɛ ɔmɛ nɛ. 43 Nihi nɛ a ngma a biɛ ngɛ Shuham bi ɔmɛ a weku ɔmɛ a mi ɔ, a yibɔ ji 64,400.

44 Asher binyumuhi ngɛ a wekuhi a nya ji nɛ ɔmɛ nɛ: Imnah, e mi nɛ Imnah bi ɔmɛ a weku ɔ je; Ishvi, e mi nɛ Ishvi bi ɔmɛ a weku ɔ je; Beria, e mi nɛ Beria bi ɔmɛ a weku ɔ je; 45 nihi nɛ a je Beria binyumu ɔmɛ a mi ji: Heber, e mi nɛ Heber bi ɔmɛ a weku ɔ je; Malkiel, e mi nɛ Malkiel bi ɔmɛ a weku ɔ je. 46 Asher biyo ɔ biɛ ji Sera. 47 Asher binyumu ɔmɛ a wekuhi ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 53,400.

48 Naftali binyumuhi ngɛ a wekuhi a nya ji nɛ ɔmɛ nɛ: Yahzeel, e mi nɛ Yahzeel bi ɔmɛ a weku ɔ je; Guni, e mi nɛ Guni bi ɔmɛ a weku ɔ je; 49 Yezer, e mi nɛ Yezer bi ɔmɛ a weku ɔ je; Shilem, e mi nɛ Shilem bi ɔmɛ a weku ɔ je. 50 Naftali bi ɔmɛ a weku ɔmɛ ngɛ a wekuhi a nya ji nɛ ɔmɛ nɛ, nɛ nihi nɛ a ngma a biɛ ɔ, a yibɔ ji 45,400.

51 Israel bi nɛ a ngma a biɛ ɔ, mɛ tsuo a hiɛmi ji 601,730.

52 Lɔ ɔ se ɔ, Yehowa de Mose ke: 53 “Mo gba zugba a kɛ ha nimli nɛ ɔmɛ kaa weto ní ngɛ biɛhi nɛ a ngma a nya.* 54 Kuuhi nɛ a mi bi ɔmɛ a he hiɛ ɔ, ha nɛ a weto ní ɔ nɛ hiɛ, nɛ kuuhi nɛ a mi bi ɔmɛ a he pi ɔ, gbɔ a weto ní ɔ nɔ. Moo da nihi nɛ a ngma a biɛ ngɛ kuu fɛɛ kuu mi ɔ a hiɛmi nɔ kɛ ha mɛ weto ní ɔ. 55 Se á fɔ sɔ kɛ gba zugba a. Á ná a weto ní ɔ ngɛ a tsɛmɛ a wɛtso ɔmɛ a biɛhi a nya. 56 Kuuhi nɛ a mi bi ɔmɛ a he hiɛ kɛ kuuhi nɛ a mi bi ɔmɛ a he pi ɔ tsuo ɔ, a fɔ sɔ kɛ gba a weto ní kɛ ha mɛ.”

57 Jehanɛ ɔ, Levi bi nɛ a ngma a biɛ ngɛ a wekuhi a nya ji nɛ ɔmɛ nɛ: Gershon, e mi nɛ Gershon bi ɔmɛ a weku ɔ je; Kohat, e mi nɛ Kohat bi ɔmɛ a weku ɔ je; Merari, e mi nɛ Merari bi ɔmɛ a weku ɔ je. 58 Levi bi ɔmɛ a weku ɔmɛ ji nɛ ɔmɛ nɛ: Libni bi ɔmɛ a weku ɔ, Hebron bi ɔmɛ a weku ɔ, Mahli bi ɔmɛ a weku ɔ, Mushi bi ɔmɛ a weku ɔ, kɛ Kora bi ɔmɛ a weku ɔ.

Kohat fɔ Amram. 59 Amram yo ɔ biɛ ji Yokebed, e ji biyo nɛ́ Levi yo ɔ fɔ ha lɛ ngɛ Egipt. Yokebed fɔ Aaron, kɛ Mose, kɛ a nyɛmiyo Miriam ha Amram. 60 Kɛkɛ nɛ a fɔ Nadab, Abihu, Eleazar, kɛ Itamar ha Aaron. 61 Se Nadab kɛ Abihu gbo, akɛnɛ a ngɔ la nɛ́ mlaa ngmɛ́ blɔ kɛ ya Yehowa hɛ mi ɔ he je.

62 Nihi nɛ a ngma a biɛ ɔ tsuo a hiɛmi ji 23,000, mɛ tsuo a ji nyumuhi nɛ a ye kɛ je nyɔhiɔ kake kɛ yaa. A ngmɛ́ a biɛ kɛ piɛɛ we Israel bi ɔmɛ a he, ejakaa a be mɛ weto ní ko hae ngɛ Israel bi ɔmɛ a kpɛti.

63 Ni nɛ ɔmɛ ji nihi nɛ Mose kɛ osɔfo Eleazar ngma a biɛ benɛ a ngma Israel bi ɔmɛ a biɛ ngɛ Moab nga kplanaa a nɔ, ngɛ Yordan Pa a he ngɛ Yeriko ɔ nɛ. 64 Se nihi nɛ Mose kɛ osɔfo Aaron ngma a biɛ benɛ a kane Israel bi ɔmɛ ngɛ Sinai nga a nɔ ɔ, a ti nɔ kake ngmelu po be nimli nɛ ɔmɛ a kpɛti. 65 Ejakaa Yehowa de ngɛ a he ke: “Bɔ fɛɛ bɔ nɛ ji ɔ, a ma gbo ngɛ nga a nɔ.” Enɛ ɔ he ɔ, a ti nɔ kake po píɛ. Yefune binyumu Kaleb kɛ Nun binyumu Yoshua pɛ nɛ piɛ.

27 Jehanɛ ɔ, Zelofehad biyi ɔmɛ nɛ a je Yosef binyumu Manase weku ɔmɛ eko mi ɔ ba. Zelofehad tsɛ ji Hefer, Hefer tsɛ ji Gilead, Gilead tsɛ ji Makir, Makir tsɛ ji Manase. Zelofehad biyi ɔmɛ a biɛ ji Mahla, Noa, Hogla, Milka kɛ Tirza. 2 A ba da Mose kɛ osɔfo Eleazar kɛ ganɔ ɔmɛ kɛ ma a tsuo hɛ mi ngɛ kpe he bo tsu ɔ nya, nɛ a de ke: 3 “Wa tsɛ gbo ngɛ nga a nɔ, se lɛɛ e piɛɛ we nihi nɛ a fĩ Kora se, nɛ ji kuu nɛ te si kɛ wo Yehowa a he. Mohu ɔ, e gbo ngɛ lɛ nitsɛ e yayami he je, nɛ e be binyumuhi. 4 Mɛni he je mɔ nɛ e sa nɛ wa tsɛ ɔ biɛ nɛ laa ngɛ e weku ɔ mi ngɛ binyumu nɛ e be ɔ he je? Nyɛ ha wɔ weto ní ngɛ wa tsɛ ɔ nyɛminyumu ɔmɛ a kpɛti.” 5 Kɛkɛ nɛ Mose ngɔ a sane ɔ kɛ ya fɔ Yehowa hɛ mi.

6 Nɛ Yehowa de Mose ke: 7 “Zelofehad biyi ɔmɛ a munyu da. Bɔ fɛɛ bɔ nɛ ji ɔ, ha mɛ weto ní kaa gbosi ní ngɛ a tsɛ ɔ nyɛminyumu ɔmɛ a kpɛti, nɛ́ o ha nɛ a tsɛ ɔ weto ní ɔ nɛ ba je a dɛ. 8 Jehanɛ ɔ, de Israel bi ɔmɛ ke, ‘Ke nyumu ko gbo nɛ e be binyumu ɔ, nyɛɛ ngɔ e weto ní ɔ kɛ ha e biyo. 9 Nɛ ke e be biyo ɔ, nyɛɛ ngɔ e weto ní ɔ kɛ ha e nyɛminyumuhi. 10 Ke e be nyɛminyumuhi ɔ, nyɛɛ ngɔ e weto ní ɔ kɛ ha e tsɛ nyɛminyumuhi. 11 Ke e tsɛ ɔ be nyɛminyumuhi ɔ, nyɛɛ ngɔ e weto ní ɔ kɛ ha e weku ɔ mi nɔ ko nɛ su e he haa, nɛ́ e pee e nɔ́. Enɛ ɔ maa pee mlaa kɛ ha Israel bi ɔmɛ kaa bɔ nɛ Yehowa fã Mose ɔ.’”

12 Kɛkɛ nɛ Yehowa de Mose ke: “Yaa kuɔ Abarim yoku nɛ ɔ nɛ o hyɛ zugba nɛ ma kɛ ha Israel bi ɔmɛ ɔ. 13 Ke o hyɛ ta a, mo hu o ma gbo* kaa bɔ nɛ o nyɛminyumu Aaron gbo ɔ, 14 ejakaa benɛ ma a kɛ mi ngɛ pɛe ngɛ Zin nga a nɔ ɔ, nyɛ bui fami nɛ i fã nyɛ ɔ tue, nɛ nyɛ wui ye hɛ mi nyami ngɛ a hɛ mi, benɛ i ha mɛ nyu ɔ. Nɔ́ nɛ ɔ ya nɔ ngɛ Meriba nyu ɔmɛ nɛ a ngɛ Kadesh ngɛ Zin nga a nɔ ɔ he.”

15 Kɛkɛ nɛ Mose de Yehowa ke: 16 “Yehowa, Mawu nɛ ha adesahi tsuo mumi ɔ* nɛ hla nyumu ko kɛ to ma a nya, 17 nɔ nɛ e maa nyɛɛ a hɛ mi kɛ ya kɛ ba, nɔ nɛ e ma kpaka mɛ kɛ ya kɛ ba, bɔ nɛ pee nɛ Yehowa ma a nɛ ko pee kaa jijɔhi nɛ a be hyɛlɔ.” 18 Lɔ ɔ he ɔ, Yehowa de Mose ke: “Moo ngɔ Yoshua, Nun binyumu ɔ, nyumu nɛ e ma nyɛ maa nyɛɛ nihi a hɛ mi ɔ,* nɛ́ o ngɔ o nine kɛ pue e nɔ. 19 Lɔ ɔ se ɔ, ngɔɔ lɛ kɛ da osɔfo Eleazar kɛ ma a tsuo hɛ mi, nɛ o pee lɛ hɛ mi nyɛɛlɔ ngɛ mɛ tsuo a hɛ mi. 20 Ngɔɔ o he blɔ* ɔ eko kɛ ha lɛ, konɛ Israel ma a tsuo nɛ a bu lɛ tue. 21 E maa da osɔfo Eleazar hɛ mi, nɛ Eleazar maa ngɔ Urim kɛ bi Yehowa juɛmi ha lɛ. E fami nya nɛ a maa je kpo ngɛ, nɛ e fami nya nɛ a maa ba, lɛ kɛ Israel bi tsuo nɛ a piɛɛ e he ɔ kɛ ma a tsuo.”

22 Lɔ ɔ he ɔ, Mose pee kaa bɔ nɛ Yehowa fã lɛ ɔ pɛpɛɛpɛ. E ngɔ Yoshua ba da si ngɛ osɔfo Eleazar kɛ ma a tsuo hɛ mi, 23 nɛ e ngɔ e nine kɛ pue e nɔ nɛ e pee lɛ hɛ mi nyɛɛlɔ, kaa bɔ nɛ Yehowa de kɛ gu Mose nɔ ɔ pɛpɛɛpɛ.

28 Lɔ ɔ se ɔ, Yehowa de Mose ke: 2 “Mo fã Israel bi ɔmɛ nɛ o de mɛ ke, ‘Nyɛɛ hyɛ nɛ nyɛɛ ngɔ ye we afɔle, nɛ ji ye we abolo ɔ ba ha mi. Nyɛɛ ngɔ ye we afɔlehi nɛ a kɛ la sãã nɛ jeɔ via liliili ha mi ɔ* kɛ ba ngɛ behi nɛ a to ha mɛ ɔ mi.’

3 “Nɛ́ o de mɛ ke, ‘Afɔle nɛ a kɛ la sãã nɛ nyɛ maa ngɔ ba ha Yehowa a ji nɛ ɔ nɛ: daa ligbi ɔ, nyɛɛ ngɔ jijɔ ku enyɔ nɛ kpa ko be a he nɛ́ a ye jeha kakaaka kɛ ba kaa sami afɔle; nyɛɛ pee jã daa. 4 Ngɔɔ jijɔ bi eku ɔ kake kɛ sã afɔle mɔtu, nɛ́ o ngɔ jijɔ bi eku ɔ kake hu kɛ sã afɔle ke du ngɛ bue,* 5 nɛ́ o ngɔ mamu bukɔbukɔ lita enyɔ,* nɛ́ a ngɔ nu kpakpa* lita kake* kɛ futu mi kɛ piɛɛ he kaa ngma afɔle. 6 E ji daa sami afɔle, afɔle nɛ a to sisi ngɛ Sinai Yoku ɔ nɔ kaa afɔle nɛ jeɔ via liliili,* afɔle nɛ a kɛ la sãã ha Yehowa, 7 kɛ e he dã afɔle lita kake kɛ piɛɛ jijɔ bi eku ɔmɛ eko fɛɛ eko he. Plɛ dã nɛ nya wa a kɛ pue si ngɛ he klɔuklɔu ɔ kaa dã afɔle kɛ ha Yehowa. 8 Nɛ́ o sã jijɔ bi eku kake ɔ hu ke du ngɛ bue.* Lɔ ɔ hu o ngɔ ngma afɔle kɛ dã afɔle kɛ piɛɛ he kaa mɔtu nɔ́ ɔ kɛ̃, nɛ́ o ngɔ kɛ ba kaa afɔle nɛ a kɛ la sãã nɛ jeɔ via liliili kɛ ha Yehowa.*

9 “‘Se ngɛ Hejɔɔmi ligbi ɔ nɔ ɔ, á ngɔ jijɔ ku enyɔ nɛ kpa ko be a he nɛ́ a ye jeha kakaaka kɛ mamu bukɔbukɔ lita eywiɛ kɛ fã* nɛ a kɛ nu futu mi kaa ngma afɔle, kɛ e he dã afɔle kɛ ba. 10 Enɛ ɔ ji sami afɔle kɛ ha Hejɔɔmi ligbi ɔ, kɛ daa sami afɔle ɔ kɛ e he dã afɔle ɔ nɛ.

11 “‘Daa nyɔhiɔ* sisije ɔ, nyɛɛ ngɔ na wayo enyɔ, agbosu kake, kɛ jijɔ ku kpaago nɛ kpa ko be a he nɛ́ a ye jeha kakaaka kɛ ba kaa sami afɔle kɛ ha Yehowa, 12 kɛ mamu bukɔbukɔ susumi nɔ́ mi dlami nyɔngma mi etɛ nɛ a kɛ nu futu mi kaa ngma afɔle kɛ ha na ku ɔmɛ eko fɛɛ eko, kɛ mamu bukɔbukɔ susumi nɔ́ mi dlami nyɔngma mi enyɔ nɛ a kɛ nu futu mi kaa ngma afɔle kɛ ha agbosu kake ɔ, 13 kɛ mamu bukɔbukɔ susumi nɔ́ mi dlami nyɔngma mi kake nɛ a kɛ nu futu mi kaa ngma afɔle kɛ ha jijɔ bi eku ɔmɛ eko fɛɛ eko kaa sami afɔle, afɔle nɛ jeɔ via liliili,* afɔle nɛ a kɛ la sãã ha Yehowa. 14 Nɛ a he dã afɔle ɔ nɛ pee wai nɛ e piɛ bɔɔ nɛ e maa su lita enyɔ kɛ ha na ku kake, kɛ lita kake kɛ bɔɔ kɛ ha agbosu ɔ, kɛ lita kake kɛ ha jijɔ bi eku kake. Daa nyɔhiɔ sami afɔle nɛ a maa sã nyɔhiɔ fɛɛ nyɔhiɔ ngɛ jeha a mi ji nɛ ɔ nɛ. 15 Jehanɛ hu ɔ, a sã apletsi bi kake kɛ ha Yehowa kaa yayami afɔle kɛ piɛɛ daa sami afɔle ɔ kɛ e he dã afɔle ɔ he.

16 “‘Kekleekle nyɔhiɔ ɔ we ligbi nɛ ji 14 ɔ maa pee Yehowa Hetsɔmi. 17 Nɛ ngɛ nyɔhiɔ ɔ we ligbi nɛ ji 15 ɔ nɔ ɔ, a ye gbijlɔ. A ye abolo nɛ masa be mi ligbi kpaago. 18 Kekleekle ligbi ɔ, a pee kpe klɔuklɔu. Nyɛ ko tsu ní tsumi ko nɛ he wa. 19 Nyɛɛ ngɔ na wayo enyɔ, agbosu kake, kɛ jijɔ ku kpaago nɛ́ a ye jeha kakaaka kɛ ba kaa sami afɔle kɛ ha Yehowa. Nyɛɛ ngɔ lohwehi nɛ kpa ko be a he kɛ ba. 20 Nyɛɛ ngɔ ní nɛ ɔmɛ kɛ a he ngma afɔlehi kɛ ba. Ngma afɔle ɔmɛ nɛ pee mamu bukɔbukɔ nɛ a ngɔ nu kɛ futu mi susumi nɔ́ mi dlami nyɔngma mi etɛ kɛ ha na ku kake, kɛ susumi nɔ́ mi dlami nyɔngma mi enyɔ kɛ ha agbosu ɔ. 21 Ngɔɔ susumi nɔ́ mi dlami nyɔngma mi kake kɛ ba kɛ ha jijɔ bi eku kpaago ɔmɛ eko fɛɛ eko, 22 kɛ apletsi kake kaa yayami afɔle, konɛ a kɛ kpata kɛ ha nyɛ. 23 Ngɛ mɔtu sami afɔle ɔ nɛ a sãã kaa daa sami afɔle ɔ se ɔ, nyɛɛ ngɔ ní nɛ ɔmɛ hu kɛ sã afɔle. 24 Jã nɔuu kɛ̃ nɛ daa ligbi ɔ, nyɛɛ ngɔ ní nɛ ɔmɛ kɛ sã afɔle kaa niye ní* afɔle nɛ a kɛ la sãã nɛ jeɔ via liliili ha Yehowa;* nyɛɛ pee jã ligbi kpaago. Á sã kɛ piɛɛ daa sami afɔle ɔ kɛ e he dã afɔle ɔ he. 25 Ngɛ ligbi kpaagone ɔ nɔ ɔ, nyɛɛ pee kpe klɔuklɔu. Nyɛ ko tsu ní tsumi ko nɛ he wa.

26 “‘Ngɛ ligbi nɛ nyɛ maa ngɔ kekleekle yiblii ɔ nɛ ji ngma ehe afɔle ɔ kɛ ba ha Yehowa a, nyɛɛ pee kpe klɔuklɔu ngɛ otsihi gbijlɔ ɔ mi. Nyɛ ko tsu ní tsumi ko nɛ he wa. 27 Nyɛɛ ngɔ na wayo enyɔ, agbosu kake, kɛ jijɔ ku kpaago nɛ́ a ye jeha kakaaka kɛ ba kaa sami afɔle nɛ jeɔ via liliili ha Yehowa,* 28 kɛ a he ngma afɔle. Ngma afɔle ɔ nɛ pee mamu bukɔbukɔ nɛ a kɛ nu futu mi susumi nɔ́ mi dlami nyɔngma mi etɛ kɛ ha na ku ɔmɛ eko fɛɛ eko, susumi nɔ́ mi dlami nyɔngma mi enyɔ kɛ ha agbosu kake ɔ, 29 susumi nɔ́ mi dlami nyɔngma mi kake kɛ ha jijɔ bi eku kpaago ɔmɛ eko fɛɛ eko, 30 kɛ apletsi kake nɛ a kɛ ma kpata kɛ ha nyɛ. 31 Nyɛɛ ngɔ ní nɛ ɔmɛ kɛ ha kɛ piɛɛ daa sami afɔle ɔ kɛ e he ngma afɔle ɔ he. Lohwe ɔmɛ nɛ a pee lohwehi nɛ kpa ko be a he, kɛ a he dã afɔlehi.

29 “‘Nyɔhiɔ kpaagone ɔ we kekleekle ligbi ɔ, nyɛɛ pee kpe klɔuklɔu. Nyɛ ko tsu ní tsumi ko nɛ he wa. E ji ligbi nɛ nyɛ ma kpa titimati. 2 Nyɛɛ ngɔ na wayo kake, agbosu kake, kɛ jijɔ ku kpaago nɛ a ye jeha kakaaka, nɛ́ kpa ko be mɛ tsuo a he kɛ ba kaa sami afɔle nɛ jeɔ via liliili ha Yehowa.* 3 Nyɛɛ ngɔ a he ngma afɔle nɛ ji mamu bukɔbukɔ nɛ a kɛ nu lita ekpa kɛ fã* futu mi kɛ ha na ku ɔ, kɛ susumi nɔ́ mi dlami nyɔngma mi enyɔ kɛ ha agbosu ɔ, 4 kɛ susumi nɔ́ mi dlami nyɔngma mi kake kɛ ha jijɔ bi eku kpaago ɔmɛ eko fɛɛ eko, 5 kɛ apletsi wayo kake kaa yayami afɔle konɛ a kɛ kpata kɛ ha nyɛ. 6 A kɛ enɛ ɔ nɛ piɛɛ daa nyɔhiɔ sami afɔle ɔ kɛ e he ngma afɔle ɔ, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kaa bɔ nɛ a peeɔ daa a; e ji afɔle nɛ jeɔ via liliili,* nɛ a kɛ la sãã ha Yehowa.

7 “‘Nyɔhiɔ kpaagone nɛ ɔ we ligbi nyɔngmane ɔ nɔ ɔ, nyɛɛ pee kpe klɔuklɔu, nɛ́ nyɛɛ ye aywilɛho.* Nyɛ ko tsu ní tsumi ko. 8 Nyɛɛ ngɔ na wayo kake, agbosu kake, kɛ jijɔ ku kpaago nɛ a ye jeha kakaaka, nɛ́ kpa ko be mɛ tsuo a he kɛ ba kaa sami afɔle ha Yehowa, afɔle nɛ jeɔ via liliili.* 9 Nɛ a he ngma afɔle ɔ nɛ pee mamu bukɔbukɔ nɛ a kɛ nu futu mi susumi nɔ́ mi dlami nyɔngma mi etɛ kɛ ha na ku ɔ, susumi nɔ́ mi dlami nyɔngma mi enyɔ kɛ ha agbosu kake ɔ, 10 susumi nɔ́ mi dlami nyɔngma mi kake kɛ ha jijɔ bi eku kpaago ɔmɛ eko fɛɛ eko, 11 kɛ apletsi bi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

12 “‘Nyɔhiɔ kpaagone ɔ we ligbi nɛ ji 15 ɔ, nyɛɛ pee kpe klɔuklɔu. Nyɛ ko tsu ní tsumi ko nɛ he wa. Nyɛɛ ye gbijlɔ kɛ wo Yehowa hɛ mi nyami ligbi kpaago. 13 Nyɛɛ ngɔ na wawi 13, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba kaa sami afɔle, afɔle nɛ a kɛ la sãã nɛ jeɔ via liliili ha Yehowa.* 14 Nɛ a he ngma afɔle ɔ nɛ pee mamu bukɔbukɔ nɛ a kɛ nu futu mi susumi nɔ́ mi dlami nyɔngma mi etɛ kɛ ha na ku 13 ɔmɛ eko fɛɛ eko, susumi nɔ́ mi dlami nyɔngma mi enyɔ kɛ ha agbosu 2 ɔmɛ eko fɛɛ eko, 15 kɛ susumi nɔ́ mi dlami nyɔngma mi kake kɛ ha jijɔ bi eku 14 ɔmɛ eko fɛɛ eko, 16 kɛ apletsi bi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

17 “‘Ligbi enyɔne ɔ, nyɛɛ ngɔ na wawi 12, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 18 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 19 kɛ apletsi bi kake kaa yayami afɔle. Ngɛ daa sami afɔle ɔ, e he ngma afɔle ɔ kɛ a he dã afɔle ɔmɛ a se ɔ, nyɛɛ ngɔ ní nɛ ɔmɛ kɛ piɛɛ he.

20 “‘Ligbi etɛne ɔ, nyɛɛ ngɔ na ku 11, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 21 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 22 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

23 “‘Ligbi eywiɛne ɔ, nyɛɛ ngɔ na ku 10, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 24 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 25 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

26 “‘Ligbi enuɔne ɔ, nyɛɛ ngɔ na ku 9, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 27 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 28 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

29 “‘Ligbi ekpane ɔ, nyɛɛ ngɔ na ku 8, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 30 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 31 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

32 “‘Ligbi kpaagone ɔ, nyɛɛ ngɔ na ku 7, agbosu 2, kɛ jijɔ ku 14 nɛ a ye jeha kakaaka, nɛ kpa ko be mɛ tsuo a he kɛ ba, 33 kɛ a he ngma afɔle kɛ a he dã afɔle ɔmɛ kɛ ha na ku ɔmɛ, agbosu ɔmɛ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 34 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

35 “‘Ligbi kpaanyɔne ɔ, nyɛɛ pee kpe klɔuklɔu. Nyɛ ko tsu ní tsumi ko nɛ he wa. 36 Nyɛɛ ngɔ na ku kake, agbosu kake, kɛ jijɔ ku kpaago nɛ a ye jeha kakaaka, nɛ kpa ko be mɛ tsuo a he kɛ ba kaa sami afɔle nɛ a kɛ la sãã nɛ jeɔ via liliili ha Yehowa,* 37 kɛ a he ngma afɔle kɛ a he dã afɔle ɔmɛ kɛ ha na ku ɔ, agbosu ɔ, kɛ jijɔ bi eku ɔmɛ ngɛ a yibɔ nya, kaa bɔ nɛ a peeɔ daa a, 38 kɛ apletsi kake kaa yayami afɔle. Nyɛɛ ngɔ ní nɛ ɔmɛ kɛ piɛɛ yayami afɔle nɛ a kɛ ma kpata a, kɛ daa sami afɔle ɔ kɛ e he ngma afɔle ɔ, kɛ a he dã afɔle ɔmɛ a he kɛ ba.

39 “‘Nyɛɛ ngɔ ní nɛ ɔmɛ kɛ ba ha Yehowa ngɛ nyɛ gbijlɔ yemi be ɔmɛ a mi kɛ piɛɛ nyɛ si womi afɔle ɔmɛ, kɛ afɔlehi nɛ nyɛ jeɔ nyɛ tsui mi faa kɛ sãã, kaa nyɛ sami afɔle ɔmɛ, kɛ nyɛ ngma afɔle ɔmɛ, kɛ nyɛ dã afɔle ɔmɛ, kɛ nyɛ tue mi jɔmi afɔle ɔmɛ a he.’” 40 Mose de Israel bi ɔmɛ nɔ́ fɛɛ nɔ́ nɛ Yehowa fã lɛ ɔ.

30 Lɔ ɔ se ɔ, Mose kɛ Israel wɛtso yi ɔmɛ tu munyu, nɛ e de ke: “Yehowa fami ji nɛ ɔ nɛ: 2 Ke nyumu ko wo Yehowa si, aloo e kã kita kaa e maa yu e he ngɛ nɔ́ ko he ɔ,* e ko ma e hɛ kɛ fɔ nɔ. Nɔ́ fɛɛ nɔ́ nɛ e wo si kaa e maa pee ɔ, e pee.

3 “Ke yo ko wo Yehowa si, aloo e wo si kaa e maa yu e he ngɛ nɔ́ ko he be mi nɛ e ji yiheyo nɛ́ e ngɛ e tsɛ we mi, 4 nɛ e tsɛ ɔ nu si nɛ e wo ɔ, aloo si nɛ e wo kaa e* maa yu e he ngɛ nɔ́ ko he ɔ, nɛ e tsɛ ɔ de we nɔ́ ko ngɛ he ɔ, lɛɛ sihi tsuo nɛ e wo ɔ, e ye nɔ, nɛ si fɛɛ si nɛ e wo kaa e maa yu e he ngɛ nɔ́ ko he ɔ hu e ye nɔ. 5 Se ke e tsɛ ɔ nu kaa e wo si ko, aloo e wo si kaa e maa yu e he ngɛ nɔ́ ko he, nɛ e tsɛ ɔ kplɛɛ we nɔ ɔ, lɛɛ si nɛ e wo ɔ be ní tsue. Yehowa kɛ maa ke lɛ, ejakaa e tsɛ ɔ kplɛɛ we nɔ.

6 “Se ke e kɛ nyumu ko sɛ gba si himi mi be mi nɛ e ngɛ kita nɛ e kã a aloo si nɛ e he sɔ tsɔ kɛ wo ɔ sisi, 7 nɛ e huno ɔ nu he, se e de we nɔ́ ko ngɛ ligbi nɛ e nu ɔ nɔ ɔ, lɛɛ e ye e si womi ɔmɛ aloo sihi nɛ e wo kaa e maa yu e he ngɛ nɔ́ ko he ɔ nɔ. 8 Se ke e huno ɔ kplɛɛ we nɔ ngɛ ligbi nɛ e nu he ɔ nɔ ɔ, e ma nyɛ maa po kita nɛ yo ɔ kã a, aloo si nɛ yo ɔ he sɔ tsɔ kɛ wo ɔ mi, nɛ Yehowa kɛ maa ke yo ɔ.

9 “Se ke yalɔyo* aloo yo nɛ a kɛ lɛ po gba mi wo si ko ɔ, e ye si fɛɛ si nɛ e wo ɔ nɔ.

10 “Se ke yo ko wo si, aloo e wo si kaa e maa yu e he ngɛ nɔ́ ko he be mi nɛ e ngɛ e huno we mi, 11 nɛ e huno ɔ nu he se e de we lɛ nɔ́ ko, loo e pui mi ɔ, lɛɛ e ye e si womi ɔmɛ tsuo, aloo si fɛɛ si nɛ e wo kaa e maa yu e he ngɛ nɔ́ ko he ɔ nɔ. 12 Se ke ligbi nɛ e huno ɔ nu he nɛ e huno ɔ po si fɛɛ si nɛ e yo ɔ wo, aloo si nɛ e wo kaa e maa yu e he ngɛ nɔ́ ko he ɔ mi kulaa a, lɛɛ si nɛ e wo ɔ be ní tsue. Akɛnɛ e huno ɔ po mi he je ɔ, Yehowa kɛ maa ke yo ɔ. 13 Si fɛɛ si nɛ yo ko maa wo, loo kita fɛɛ kita nɛ yo ko ma kã kaa e maa yu e he ngɛ nɔ́ ko he kɛ kua e he ɔ,* e huno lɛ e sa kaa e kplɛɛ nɔ, aloo e po mi. 14 Se ke be pue mi nɛ e huno ɔ de we lɛ nɔ́ ko ɔ, lɔ ɔ tsɔɔ kaa e kplɛɛ yo ɔ si womi ɔmɛ tsuo aloo si fɛɛ si nɛ e wo kaa e maa yu e he ngɛ nɔ́ ko he ɔ nɔ. E kplɛɛ nɔ, ejakaa ligbi nɛ e nu kaa e yo ɔ wo si ɔ, e de we nɔ́ ko. 15 Se ke e nu ní nɛ ɔmɛ a he, nɛ be ko se loko e po mi ɔ, lɛɛ yo ɔ fɔ yemi ɔ maa tloo lɛ.

16 “Enɛ ɔmɛ ji blɔ tsɔɔmihi nɛ Yehowa kɛ ha Mose nɛ kɔɔ huno kɛ e yo, kɛ tsɛ kɛ e bi yiheyo nɛ ngɛ e we mi ɔ a he.”

31 Kɛkɛ nɛ Yehowa de Mose ke: 2 “Yaa gbla Midian bi ɔmɛ a tue ngɛ nɔ́ nɛ a pee Israel bi ɔmɛ ɔ he je. Lɔ ɔ se ɔ, o ma gbo.”*

3 Lɔ ɔ he ɔ, Mose kɛ ni ɔmɛ tu munyu nɛ e de mɛ ke: “Nyɛɛ hla nyumuhi ngɛ nyɛ kpɛti, nɛ a dla a he kɛ ha ta,* konɛ a kɛ Midian nɛ ya hwu, nɛ́ a ngɔ Yehowa lue yemi kɛ ba Midian nɔ. 4 Ngɛ Israel wɛtso fɛɛ wɛtso mi ɔ, nyɛɛ hla nihi 1,000 ngɛ a kpɛti kɛ ha ta a.” 5 Lɔ ɔ he ɔ, a hla nihi 1,000 ngɛ wɛtso fɛɛ wɛtso mi ngɛ Israel bi akpehi abɔ a kpɛti, nɛ a ná nihi 12,000 nɛ́ a dla a he kɛ ha ta a.*

6 Ngɛ wɛtso fɛɛ wɛtso mi ɔ, Mose wo nihi 1,000 blɔ kɛ ho, a kɛ Finehas nɛ e ji Eleazar binyumu ɔ. Lɛ ji tabo ɔ osɔfo, nɛ e hɛɛ ní klɔuklɔu ɔmɛ, kɛ titimatihi nɛ a kpaa ngɛ ta mi ɔ ngɛ e dɛ. 7 A kɛ Midian bi ɔmɛ ya hwu ta kaa bɔ nɛ Yehowa fã Mose ɔ, nɛ a gbe nyumu fɛɛ nyumu. 8 A gbe Midian matsɛmɛ ɔmɛ kɛ piɛɛ nihi nɛ a gbe mɛ ɔ a he. Midian matsɛmɛ enuɔ ɔmɛ a biɛ ji Evi, Rekem, Zur, Hur kɛ Reba. A ngɔ klaate kɛ gbe Beor binyumu Balaam hulɔ. 9 Se Israel bi ɔmɛ nuu yihi kɛ jokuɛwi nɛ a ngɛ Midian ɔ nyɔguɛ kɛ ho. Jehanɛ hu ɔ, a ha a we mi lohwe ɔmɛ tsuo, a lohwe lɛlɛɛ ɔmɛ tsuo, kɛ a níhi tsuo. 10 Nɛ a kɛ la sã a ma amɛ kɛ a sito he ɔmɛ* tsuo. 11 A ngɔ níhi nɛ a ná ngɛ ta a mi ɔ kɛ níhi nɛ a ha a tsuo kɛ ho, nimli jio, lohwehi jio. 12 Kɛkɛ nɛ a ngɔ nihi nɛ a nuu mɛ nyɔguɛ ɔ, kɛ níhi nɛ a ha a, kɛ níhi nɛ a ná ngɛ ta a mi ɔ kɛ ba ha Mose kɛ osɔfo Eleazar kɛ Israel ma a ngɛ sito he ɔ, ngɛ Moab nga kplanaa a nɔ ngɛ Yordan Pa a kasa nya ngɛ Yeriko.

13 Kɛkɛ nɛ Mose kɛ osɔfo Eleazar kɛ ganɔhi tsuo nɛ a ngɛ ma a mi ɔ je kpo nɛ a kɛ mɛ ya kpe ngɛ sito he ɔ se. 14 Se Mose mi mi fu nyumuhi nɛ a hla mɛ kɛ da ta buli ɔmɛ a nya a, nɛ ji nimli akpehi a nya dali ɔmɛ kɛ nimli lafahi a nya dali ɔmɛ nɛ a je ta a kɛ ma a. 15 Mose de mɛ ke: “Mɛni he je nɛ nyɛ baa yi ɔmɛ tsuo a yi ɔ? 16 Hyɛ! Yi nɛ ɔmɛ nɛ a bu Balaam ga womi tue, nɛ a sisi Israel bi ɔmɛ, nɛ a yi Yehowa anɔkuale ngɛ Peor sane ɔ mi, nɛ haomi ba Yehowa ma a nɔ ɔ nɛ. 17 Amlɔ nɛ ɔ, nyɛɛ gbe nyumu fɛɛ nyumu ngɛ jokuɛwi ɔmɛ a kpɛti, nɛ nyɛɛ gbe yo fɛɛ yo nɛ e kɛ nyumu ná bɔmi hyɛ. 18 Se yihewi tsuo nɛ a kɛ nyumu ko ná we bɔmi hyɛ ɔ lɛɛ nyɛ ma nyɛ maa baa a yi. 19 Nyɛɛ to si ngɛ sito he ɔ se ligbi kpaago. Nyɛ ti nɔ fɛɛ nɔ nɛ e gbe nɔ* ko, kɛ nyɛ ti nɔ fɛɛ nɔ nɛ e ta nɔ ko nɛ a gbe lɛ he ɔ, e sa nɛ e tsu e he ngɛ ligbi etɛne ɔ, kɛ ligbi kpaagone ɔ nɔ, nyɛɛ kɛ nihi nɛ nyɛ nuu mɛ nyɔguɛ ɔ tsuo. 20 Nyɛɛ tsu tade fɛɛ tade, kɛ nɔ́ fɛɛ nɔ́ nɛ a kɛ lohwe he womi pee, kɛ nɔ́ fɛɛ nɔ́ nɛ a kɛ apletsi he bwɔmi pee, kɛ nɔ́ fɛɛ nɔ́ nɛ a kɛ tso pee ɔ he.”

21 Kɛkɛ nɛ osɔfo Eleazar de ta buli nɛ a ya ta a ke: “Mlaa nɛ Yehowa kɛ ha Mose ji nɛ ɔ nɛ, 22 ‘Ní nɛ ɔmɛ pɛ, nɛ ji sika tsu, sika hiɔ, akɔblee, dade, sanyla, kɛ sumui, 23 nɔ́ fɛɛ nɔ́ nɛ a kɛ ma nyɛ maa wo la mi ɔ, nyɛɛ ngɔ kɛ wo la mi, nɛ e he ma tsɔ. Se nyɛɛ ngɔ he tsumi nyu ɔ hu kɛ tsu he. Nɔ́ fɛɛ nɔ́ nɛ a be nyɛe ma kɛ wo la mi ɔ, nyɛɛ ngɔ nyu ɔ kɛ fɔ he. 24 Nyɛ fɔ nyɛ tade ɔmɛ a he ngɛ ligbi kpaagone ɔ nɔ konɛ nyɛ he nɛ tsɔ, lɔ ɔ se loko nyɛɛ ba sito he ɔ.’”

25 Kɛkɛ nɛ Yehowa de Mose ke: 26 “Kane níhi nɛ a ha a, kane nimli kɛ lohwehi tsuo nɛ a nuu ɔ; o kɛ osɔfo Eleazar kɛ ni ɔmɛ a tsɛmɛ a we ɔmɛ a nya dali ngɛ ma a mi ɔ nɛ tsu nɔ́ nɛ ɔ. 27 Mo gba níhi nɛ a ha a mi enyɔ, ngɔɔ fã kɛ ha ta buli nɛ a ya ta a, nɛ o ngɔ fã kɛ ha ma a tsuo nɛ piɛ ɔ. 28 Ngɔɔ nimli, kɛ na, kɛ teji, kɛ to 500 fɛɛ 500 mi kake* ngɛ ta buli nɛ a ya hwu ta a dɛ kaa tó kɛ ha Yehowa. 29 Nyɛ je kɛ je fã nɛ a ha mɛ ɔ mi kɛ ha osɔfo Eleazar kaa yemi kɛ buami kɛ ha Yehowa. 30 Ngɔɔ nimli, na, teji, to, kɛ we mi lohwe slɔɔtohi tsuo 50 fɛɛ 50 mi kake kɛ je fã nɛ a kɛ ha Israel bi ɔmɛ ɔ mi nɛ o kɛ ha Levi bi ɔmɛ nɛ a tsuɔ Yehowa bo tsu ɔ he ní ɔ.”

31 Lɔ ɔ he ɔ, Mose kɛ osɔfo Eleazar pee kaa bɔ nɛ Yehowa fã Mose ɔ pɛpɛɛpɛ. 32 Níhi nɛ a ná ngɛ ta a mi, nɛ ji níhi nɛ ta buli nɛ a ya ta a muɔɔ ɔ mi nɔ́ nɛ piɛ ji to 675,000, 33 na 72,000, 34 kɛ teji 61,000. 35 Yihi nɛ a kɛ nyumu ko ná we bɔmi hyɛ ɔ a yibɔ ji, yihi* 32,000. 36 Nɛ́ a gba ní ɔmɛ a mi enyɔ ɔ, nihi nɛ a ya ta a ná to 337,500 kaa a blɔ fa mi nɔ́. 37 Tohi nɛ a je ngɛ to ɔmɛ a kpɛti kɛ ha Yehowa kaa tó ɔ, a yibɔ ji 675. 38 Na amɛ a yibɔ ji 36,000, nɛ a je 72 ngɛ mi kaa tó kɛ ha Yehowa. 39 Teji ɔmɛ a yibɔ ji 30,500, nɛ a je 61 ngɛ mi kaa tó kɛ ha Yehowa. 40 Nimli ɔmɛ* a yibɔ ji 16,000, nɛ a je nimli* 32 ngɛ mi kaa tó kɛ ha Yehowa. 41 Kɛkɛ nɛ Mose ngɔ tó ɔ kɛ ha osɔfo Eleazar kaa yemi kɛ buami kɛ ha Yehowa, kaa bɔ nɛ Yehowa fã Mose ɔ.

42 Fã nɛ ji Israel bi ɔmɛ a nɔ́ nɛ Mose je ngɛ nyumuhi nɛ a ya ta a, a blɔ fa mi nɔ́ ɔ mi ɔ, 43 tohi nɛ a ngɛ jamɛ a fã a mi ɔ a yibɔ ji 337,500, 44 nɛ na amɛ a yibɔ ji 36,000, 45 nɛ teji ɔmɛ a yibɔ ji 30,500, 46 nɛ nimli ɔmɛ* a yibɔ ji 16,000. 47 Kɛkɛ nɛ Mose je nimli ɔmɛ kɛ lohwe ɔmɛ a mi 50 fɛɛ 50 mi kake kɛ je fã nɛ ji Israel bi ɔmɛ a nɔ́ ɔ mi, nɛ e kɛ ha Levi bi ɔmɛ nɛ́ a tsuɔ Yehowa bo tsu ɔ he ní ɔ, kaa bɔ nɛ Yehowa fã Mose ɔ.

48 Kɛkɛ nɛ nyumuhi nɛ a hla mɛ kɛ da ta buli akpehi a nya, nɛ ji nimli akpehi a nya dali ɔmɛ, kɛ nimli lafahi a nya dali ɔmɛ ba Mose ngɔ, 49 nɛ a ba de Mose ke: “O sɔmɔli ɔmɛ kane ta buli nɛ a ngɛ wa sisi ɔ, nɛ a ti nɔ kake po laa we ngɛ wa kpɛti. 50 Lɔ ɔ he ɔ, ha nɛ wa ti nɔ fɛɛ nɔ nɛ e ngɔ níhi nɛ e ná a kɛ ba kaa afɔle ha Yehowa; sika tsu níhi, nane kpɔ mi gahi, nine si gahi, nɔ́ nya sɔumi gahi, tue nya níhi, kɛ june kpahi konɛ a kɛ kpata kɛ ha wɔ* ngɛ Yehowa hɛ mi.”

51 Lɔ ɔ he ɔ, Mose kɛ osɔfo Eleazar ngɔ sika tsu ɔ, nɛ ji june ɔmɛ tsuo ngɛ a dɛ. 52 Sika tsu nɛ nimli akpehi a nya dali ɔmɛ, kɛ nimli lafahi a nya dali ɔmɛ kɛ ba ha Yehowa kaa yemi kɛ buami ɔ tsuo ji shekel* 16,750. 53 Ta buli ɔmɛ a ti nɔ fɛɛ nɔ ha ní ha e he. 54 Mose kɛ osɔfo Eleazar ngɔ sika tsu ɔ ngɛ nimli akpehi a nya dali ɔmɛ kɛ nimli lafahi a nya dali ɔmɛ a dɛ kɛ ba kpe he bo tsu ɔ mi kaa kaimi nɔ́ kɛ ha Israel bi ɔmɛ ngɛ Yehowa hɛ mi.

32 Jehanɛ ɔ, Reuben bi ɔmɛ kɛ Gad bi ɔmɛ ngɛ lohwehi babauu nitsɛ, nɛ a yɔse kaa Yazer zugba a kɛ Gilead zugba a ji he nɛ hi kɛ ha lohwe lɛmi. 2 Enɛ ɔ he ɔ, Gad bi ɔmɛ kɛ Reuben bi ɔmɛ ya Mose, osɔfo Eleazar, kɛ ganɔhi nɛ a ngɛ ma a mi ɔ a ngɔ, nɛ a ya de mɛ ke: 3 “Atarot, Dibon, Yazer, Nimra, Heshbon, Eleale, Sebam, Nebo, kɛ Beon, 4 nɛ a ji zugbahi nɛ Yehowa ye a nɔ kunimi ha Israel ma a hi kɛ ha lohwe lɛmi, nɛ o sɔmɔli ɔmɛ ngɛ lohwehi babauu.” 5 A ya nɔ nɛ a de ke: “Ke wa hɛ mi ba nyami ngɛ o hɛ mi ɔ, lɛɛ ha nɛ o sɔmɔli ɔmɛ nɛ a ngɔ zugba nɛ ɔ kaa a weto ní. Ko ha nɛ waa po Yordan Pa a.”

6 Kɛkɛ nɛ Mose de Gad bi ɔmɛ kɛ Reuben bi ɔmɛ ke: “Anɛ e sa nɛ nyɛ nyɛmimɛ ɔmɛ nɛ a ya nɛ a ya hwu ta, nɛ́ nyɛɛ lɛɛ nyɛɛ hi hiɛ ɔ lo? 7 Mɛni he je nɛ e sa nɛ nyɛɛ wo Israel bi ɔmɛ a kɔni mi nyu ɔ? Ke nyɛ pee jã a, lɔ ɔ ma ha nɛ a be mi poe kɛ ya zugba nɛ Yehowa ma e juɛmi nya si kaa e kɛ ma ha mɛ ɔ nɔ. 8 Kikɛ nɛ ɔ nɛ nyɛ tsɛmɛ ɔmɛ pee benɛ i tsɔ mɛ kɛ je Kadesh Barnea kaa a ya hyɛ zugba a nɛ. 9 Benɛ a kuɔ kɛ ya Eshkol Dɔgba a* mi nɛ a ya na zugba a, a wo Israel bi ɔmɛ a kɔni mi nyu konɛ a ko ya zugba nɛ Yehowa maa ngɔ kɛ ha mɛ ɔ nɔ. 10 Jamɛ a ligbi ɔ, Yehowa mi mi wo la nɛ e kã kita ke: 11 ‘Nyumuhi nɛ a je* Egipt kɛ ba nɛ a ye kɛ je jeha 20 kɛ yaa a be zugba nɛ i kã Abraham, Isak, kɛ Yakob kita kaa ma ngɔ kɛ ha mɛ ɔ nɔ yae, ejakaa a nyɛɛ we ye se kɛ a tsui tsuo— 12 ja Keniz no Yefune binyumu Kaleb kɛ Nun binyumu Yoshua pɛ, ejakaa mɛɛ lɛɛ a nyɛɛ Yehowa se kɛ a tsui tsuo.’ 13 Lɔ ɔ he ɔ, Yehowa mi mi fu Israel bi ɔmɛ wawɛɛ, nɛ e ha nɛ a wo lalaalo ngɛ nga a nɔ jeha 40, kɛ ya si be nɛ yi nɔ bi nɛ a pee yayami ngɛ Yehowa hɛ mi ɔ tsuo gbo ta. 14 Amlɔ nɛ ɔ, nyɛ hu nyɛ ba da nyɛ tsɛmɛ ɔmɛ a nane mi kaa yayami peeli a bimɛ, nɛ nyɛ ha nɛ Israel he abofu nɛ Yehowa ná a mi wa. 15 Ke nyɛ kpale ngɛ e se ɔ, bɔ fɛɛ bɔ nɛ ji ɔ, e maa ngmɛɛ nimli nɛ ɔmɛ tsuo a he ekohu ngɛ nga a nɔ, nɛ nyɛ ma ha nɛ a hɛ mi ma kpata.”

16 Pee se ɔ, a su e he, nɛ a de lɛ ke: “Ha nɛ waa ngɔ tɛ kɛ ma lohwe tsuhi ha wa lohwe ɔmɛ, nɛ waa po mahi kɛ ha wa bimɛ ɔmɛ ngɛ hiɛ ɔ. 17 Se wa maa ya nɔ nɛ wa ma dla wa he kɛ ha ta, nɛ wa maa nyɛɛ Israel bi ɔmɛ a hɛ mi kɛ ya si be nɛ waa kɛ mɛ ma ya su a hi he ɔ. Wa bimɛ ɔmɛ lɛɛ, a maa hi mahi nɛ a fia gbogbo kɛ wo a he ɔ mi, konɛ nihi nɛ a ngɛ zugba a nɔ ɔ ko hao mɛ. 18 Wa be kpalee kɛ ba wa we ɔmɛ a mi kɛ yaa si be nɛ Israel bi ɔmɛ a ti nɔ fɛɛ nɔ nine maa su e zugba nɔ kaa e weto ní. 19 Weto ní nɛ a nine maa su nɔ ngɛ Yordan Pa a se kɛ yaa a, wa be eko ngɔe, ejakaa wa nine su wa weto ní ɔ nɔ ngɛ Yordan Pa a puje he blɔ momo.”

20 Mose ha mɛ heto ke: Nyɛɛ pee nɔ́ nɛ ɔ: “Nyɛɛ wo nyɛ ta hwumi níhi ngɛ Yehowa hɛ mi kɛ ha ta a. 21 Ke nyɛ ti nɔ fɛɛ nɔ ma wo e ta hwumi níhi, nɛ nyɛ maa po Yordan Pa a ngɛ Yehowa hɛ mi, be mi nɛ e ngɛ e he nyɛli ɔmɛ fiee ngɛ e hɛ mi 22 kɛ yaa si be nɛ a maa ye zugba a nɔ kunimi ngɛ Yehowa hɛ mi ɔ, lɛɛ ke nyɛ kpale nyɛ se ɔ, nyɛ be fɔ yee ngɛ Yehowa kɛ Israel hɛ mi. Kɛkɛ ɔ, zugba nɛ ɔ ma ba pee nyɛ nɔ́ ngɛ Yehowa hɛ mi. 23 Se ke nyɛ pee we nɔ́ nɛ ɔ, lɛɛ nyɛ pee yayami kɛ si Yehowa. Ke e ba jã a, nyɛ ná nɛ nyɛɛ le kaa nyɛ maa na nyɛ yayami ɔ mi nɔ́. 24 Enɛ ɔ he ɔ, nyɛ ma nyɛ maa po mahi kɛ ha nyɛ bimɛ ɔmɛ, nɛ́ nyɛɛ ma lohwe tsuhi ha nyɛ lohwe ɔmɛ, se nyɛɛ hyɛ nɛ nyɛɛ ye nyɛ si womi ɔ nɔ.”

25 Gad bi ɔmɛ kɛ Reuben bi ɔmɛ de Mose ke: “O sɔmɔli ɔmɛ maa pee kaa bɔ nɛ wa nyɔmtsɛ ɔ fã a pɛpɛɛpɛ. 26 Wa bimɛ ɔmɛ, wa yi ɔmɛ, wa lohwe lɛlɛɛ ɔmɛ, kɛ wa we mi lohwe ɔmɛ tsuo maa hi Gilead ma amɛ a mi, 27 se o sɔmɔli ɔmɛ, nɛ ji nyumu fɛɛ nyumu nɛ e dla e he konɛ e hwu ta ngɛ Yehowa hɛ mi ɔ maa po mi kɛ ho kaa bɔ nɛ ye nyɔmtsɛ ɔ de ɔ pɛpɛɛpɛ.”

28 Enɛ ɔ he ɔ, Mose ngɔ fami kɛ ha osɔfo Eleazar, Nun binyumu Yoshua, kɛ Israel wɛtso ɔmɛ a tsɛmɛ a we ɔmɛ a nyatsɛmɛ ɔmɛ. 29 Mose de mɛ ke: “Ke Gad bi ɔmɛ kɛ Reuben bi ɔmɛ, nɛ ji nyumu fɛɛ nyumu nɛ dla e he kɛ ha ta ngɛ Yehowa hɛ mi ɔ kɛ nyɛ po Yordan Pa a, nɛ a ye zugba a nɔ kunimi ɔ, lɛɛ nyɛɛ ngɔ Gilead zugba a kɛ ha mɛ kaa a weto ní. 30 Se ke a wo we ta hwumi níhi nɛ́ a kɛ nyɛ nɛ po mi kɛ ya a, lɛɛ a maa hi nyɛ kpɛti ngɛ Kanaan zugba a nɔ.”

31 Kɛkɛ nɛ Gad bi ɔmɛ kɛ Reuben bi ɔmɛ he nɔ ke: “Nɔ́ nɛ Yehowa de o sɔmɔli ɔmɛ ɔ, lɔ ɔ nɛ wa maa pee. 32 Wa ma wo ta hwumi níhi, nɛ wa maa po mi ngɛ Yehowa hɛ mi kɛ ya Kanaan zugba a nɔ, se nɔ́ nɛ wa ma ná kaa weto ní ɔ maa hi Yordan Pa a se ngɛ hiɛ ɔ.” 33 Lɔ ɔ he ɔ, Mose ngɔ Amor bi ɔmɛ a Matsɛ Sihon matsɛ yemi ɔ, kɛ Bashan Matsɛ Og matsɛ yemi ɔ, kɛ a ma amɛ tsuo kɛ a he zugba amɛ tsuo nɛ ngɛ jamɛ a kpokpa amɛ a nɔ ɔ, kɛ ha Gad bi ɔmɛ, Reuben bi ɔmɛ, kɛ Yosef binyumu Manase wɛtso fã a.

34 Nɛ Gad bi ɔmɛ kpale fia Dibon, Atarot, Aroer, 35 Atrot Shofan, Yazer, Yogbeha, 36 Bet Nimra, kɛ Bet Haran, nɛ ji mahi nɛ a fia gbogbo kɛ wo a he ɔ, nɛ a ngɔ tɛ kɛ pee tsuhi kɛ ha a lohwe ɔmɛ. 37 Nɛ Reuben bi ɔmɛ fia Heshbon, Eleale, Kiriataim, 38 Nebo, kɛ Baal-meon nɛ́ a tsake a biɛ ɔ, kɛ Sibma; nɛ a bɔni mahi nɛ a kpale fia a biɛ ehehi womi.

39 Manase binyumu Makir binyumu ɔmɛ ya tua Gilead nɛ a ngɔ ma a, nɛ a fiee Amor bi nɛ a ngɛ ma a mi ɔ. 40 Lɔ ɔ he ɔ, Mose ngɔ Gilead kɛ ha Manase binyumu Makir nɛ e hi lejɛ ɔ. 41 Nɛ Manase binyumu Yair ya tua bo tsu kɔpe ɔmɛ, nɛ e ngɔ, nɛ e bɔni kɔpe ɔmɛ tsɛmi ke Havot Yair.* 42 Nɛ Noba ya tua Kenat kɛ mahi nɛ bɔle lɛ ɔ,* nɛ e ngɔ ma a, nɛ e kɛ lɛ nitsɛ e biɛ Noba a wo lejɛ ɔ.

33 Bɔ nɛ Israel bi ɔmɛ a blɔ hiami ɔ ya nɔ ha benɛ a je Egipt zugba a nɔ ngɛ a kuu ɔmɛ* a nya ngɛ Mose kɛ Aaron blɔ tsɔɔmi sisi ɔ ji nɛ ɔ nɛ. 2 Mose ya nɔ nɛ e ngma hehi nɛ a hia kɛ je ngɛ a blɔ hiami ɔ mi ɔ, kaa bɔ nɛ Yehowa fã lɛ ɔ. Hehi nɛ a hia kɛ je kɛ hehi nɛ a ya to si ngɛ ji nɛ ɔmɛ nɛ: 3 A hia kɛ je Rameses ngɛ kekleekle nyɔhiɔ ɔ we ligbi nɛ ji 15 ɔ nɔ. Hetsɔmi ligbi ɔ we jena a, Israel bi ɔmɛ kɛ kã* je kpo ngɛ Egipt bi ɔmɛ tsuo a hɛ mi. 4 Jamɛ a be ɔ mi ɔ, Egipt bi ɔmɛ ngɛ a kekleekle bi ɔmɛ tsuo nɛ Yehowa gbe mɛ ngɛ a kpɛti ɔ pue, ejakaa Yehowa kojo a mawu ɔmɛ nɛ e gbla a tue.

5 Lɔ ɔ he ɔ, Israel bi ɔmɛ hia kɛ je Rameses, nɛ a ya to si ngɛ Sukot. 6 Kɛkɛ nɛ a hia kɛ je Sukot, nɛ a ya to si ngɛ Etam nɛ ngɛ nga a nya a. 7 Lɔ ɔ se ɔ, a hia kɛ je Etam nɛ a kpale a se nɛ a kɛ a hɛ mi tsɔɔ Pihahirot nɛ hɛ mi tsɔɔ Baal Zefon ɔ, nɛ a ya to si ngɛ Migdol hɛ mi. 8 Lɔ ɔ se ɔ, a hia kɛ je Pihahirot, nɛ a po wo ɔ kɛ ho nga a nɔ ya, a nyɛɛ Etam nga a nɔ ligbi etɛ blɔ nyɛɛmi, nɛ a ya to si ngɛ Mara.

9 Kɛkɛ nɛ a hia kɛ je Mara kɛ ya Elim. Nyu hɛngmɛ 12 kɛ tã 70 ngɛ Elim, lɔ ɔ he ɔ, a to si ngɛ lejɛ ɔ. 10 Lɔ ɔ se ɔ, a hia kɛ je Elim, nɛ a ya to si ngɛ Wo Tsu ɔ nya. 11 Lɔ ɔ se ɔ, a hia kɛ je Wo Tsu ɔ nya, nɛ a ya to si ngɛ Sin nga a nɔ. 12 Kɛkɛ nɛ a hia kɛ je Sin nga a nɔ, nɛ a ya to si ngɛ Dofka. 13 Pee se ɔ, a hia kɛ je Dofka, nɛ a ya to si ngɛ Alus. 14 Lɔ ɔ se ɔ, a hia kɛ je Alus, nɛ a ya to si ngɛ Refidim, he nɛ nyu be nɛ ni ɔmɛ maa nu ɔ. 15 Lɔ ɔ se ɔ, a hia kɛ je Refidim, nɛ a ya to si ngɛ Sinai nga a nɔ.

16 A hia kɛ je Sinai nga a nɔ, nɛ a ya to si ngɛ Kibrot Hataava. 17 Kɛkɛ nɛ a hia kɛ je Kibrot Hataava, nɛ a ya to si ngɛ Hazerot. 18 Lɔ ɔ se ɔ, a hia kɛ je Hazerot, nɛ a ya to si ngɛ Ritma. 19 Lɔ ɔ se ɔ, a hia kɛ je Ritma, nɛ a ya to si ngɛ Rimon Perez. 20 Kɛkɛ nɛ a hia kɛ je Rimon Perez, nɛ a ya to si ngɛ Libna. 21 A hia kɛ je Libna, nɛ a ya to si ngɛ Risa. 22 Lɔ ɔ se ɔ, a hia kɛ je Risa, nɛ a ya to si ngɛ Kehelata. 23 Kɛkɛ nɛ a hia kɛ je Kehelata, nɛ a ya to si ngɛ Shefer Yoku ɔ he.

24 Lɔ ɔ se ɔ, a hia kɛ je Shefer Yoku ɔ he, nɛ a ya to si ngɛ Harada. 25 Kɛkɛ nɛ a hia kɛ je Harada, nɛ a ya to si ngɛ Makelot. 26 Lɔ ɔ se ɔ, a hia kɛ je Makelot, nɛ a ya to si ngɛ Tahat. 27 Lɔ ɔ se ɔ, a hia kɛ je Tahat, nɛ a ya to si ngɛ Tera. 28 Kɛkɛ nɛ a hia kɛ je Tera, nɛ a ya to si ngɛ Mitka. 29 Pee se ɔ, a hia kɛ je Mitka, nɛ a ya to si ngɛ Hashmona. 30 Lɔ ɔ se ɔ, a hia kɛ je Hashmona, nɛ a ya to si ngɛ Moserot. 31 Kɛkɛ nɛ a hia kɛ je Moserot, nɛ a ya to si ngɛ Bene Yaakan. 32 Nɛ a hia kɛ je Bene Yaakan, nɛ a ya to si ngɛ Hor Hagidgad. 33 Lɔ ɔ se ɔ, a hia kɛ je Hor Hagidgad, nɛ a ya to si ngɛ Yotbata. 34 Pee se ɔ, a hia kɛ je Yotbata, nɛ a ya to si ngɛ Abrona. 35 Kɛkɛ nɛ a hia kɛ je Abrona, nɛ a ya to si ngɛ Ezion Geber. 36 Lɔ ɔ se ɔ, a hia kɛ je Ezion Geber, nɛ a ya to si ngɛ Zin nga a nɔ, nɛ ji Kadesh.

37 Pee se ɔ, a hia kɛ je Kadesh, nɛ a ya to si ngɛ Hor Yoku ɔ he, ngɛ Edom zugba a huzu ɔ nya. 38 Nɛ osɔfo Aaron kuɔ kɛ ho Hor Yoku ɔ nɔ ya ngɛ Yehowa fami nya, nɛ e ya gbo ngɛ lejɛ ɔ. Enɛ ɔ ya nɔ benɛ Israel bi ɔmɛ je Egipt zugba a nɔ ɔ se jeha nɛ ji 40 ɔ mi, ngɛ nyɔhiɔ enuɔne ɔ we kekleekle ligbi ɔ nɔ. 39 Benɛ Aaron gbo ngɛ Hor Yoku ɔ nɔ ɔ, e ye jeha 123.

40 Jamɛ a be ɔ mi ɔ, Arad matsɛ nɛ ji Kanaan no ɔ nɛ́ ngɛ Negeb ngɛ Kanaan zugba a nɔ ɔ nu kaa Israel bi ɔmɛ ma.

41 Pee se ɔ, a hia kɛ je Hor Yoku ɔ he, nɛ a ya to si ngɛ Zalmona. 42 Lɔ ɔ se ɔ, a hia kɛ je Zalmona, nɛ a ya to si ngɛ Punon. 43 Lɔ ɔ se ɔ, a hia kɛ je Punon, nɛ a ya to si ngɛ Obot. 44 Kɛkɛ nɛ a hia kɛ je Obot, nɛ a ya to si ngɛ Iye Abarim, ngɛ Moab huzu ɔ nya. 45 Pee se ɔ, a hia kɛ je Iyim,* nɛ a ya to si ngɛ Dibon Gad. 46 Lɔ ɔ se ɔ, a hia kɛ je Dibon Gad, nɛ a ya to si ngɛ Almon Diblataim. 47 Kɛkɛ nɛ a hia kɛ je Almon Diblataim, nɛ a ya to si ngɛ Abarim yoku ɔmɛ a nɔ ngɛ Nebo hɛ mi. 48 Nyagbenyagbe ɔ, a hia kɛ je Abarim yoku ɔmɛ a nɔ, nɛ a ya to si ngɛ Moab nga kplanaa a nɔ, ngɛ Yordan Pa a he ngɛ Yeriko. 49 A ya nɔ nɛ a to si ngɛ Yordan Pa a he, kɛ je Bet Yeshimot hluu kɛ ya si Abel Shitim, ngɛ Moab nga kplanaa a nɔ.

50 Yehowa kɛ Mose tu munyu ngɛ Moab nga kplanaa a nɔ ngɛ Yordan Pa a he ngɛ Yeriko, nɛ e de lɛ ke: 51 “O kɛ Israel bi ɔmɛ nɛ tu munyu nɛ o de mɛ ke, ‘Nyɛ maa po Yordan Pa a kɛ ya Kanaan zugba a nɔ. 52 Nyɛɛ fiee nihi nɛ a ngɛ zugba a nɔ ɔ tsuo ngɛ nyɛ hɛ mi, nɛ nyɛ kpata a tɛ amaga amɛ tsuo, kɛ a dade amaga amɛ tsuo a hɛ mi, nɛ nyɛɛ hule a jami hehi nɛ ya hiɔwe* ɔmɛ tsuo. 53 Nɛ́ nyɛɛ ngɔ zugba a nɛ nyɛɛ hi nɔ, ejakaa bɔ fɛɛ bɔ nɛ ji ɔ, ma ngɔ zugba a kɛ ha nyɛ kaa nyɛ nɔ́. 54 Nyɛɛ fɔ sɔ kɛ gba zugba a kɛ ha nyɛ weku ɔmɛ. Kuuhi nɛ a mi bi ɔmɛ a he hiɛ ɔ, nyɛ ha nɛ a weto ní ɔ nɛ hiɛ, nɛ kuuhi nɛ a mi bi ɔmɛ a he pi ɔ, nyɛ gbɔ a weto ní ɔ nɔ. He nɛ nɔ fɛɛ nɔ sɔ ɔ ma ya nɔ ɔ, lejɛ ɔ maa pee e weto ní. Nyɛ ma ná nyɛ weto ní kaa gbosi ní ngɛ nyɛ tsɛmɛ a wɛtso ɔmɛ a nya.

55 “‘Se ke nyɛ fiee we nihi nɛ a ngɛ zugba a nɔ ɔ kɛ ji nyɛ hɛ mi ɔ, nihi nɛ nyɛ ma ha nɛ a tlɔ lejɛ ɔ maa pee kaa nɔ́ ko nɛ maa hi nyɛ hɛngmɛ nɔ gbɔɔ, kɛ mio ngɛ nyɛ kasa he, nɛ a maa hao nyɛ ngɛ zugba a nɔ he nɛ nyɛ maa hi ɔ. 56 Nɛ nɔ́ nɛ i to kaa ma kɛ pee mɛ ɔ, ma kɛ pee nyɛ.

34 Yehowa ya nɔ nɛ e kɛ Mose tu munyu, nɛ e de lɛ ke: 2 “Ngɔɔ blɔ tsɔɔmi nɛ ɔmɛ kɛ ha Israel bi ɔmɛ: ‘Ke nyɛ ya su Kanaan zugba a nɔ ɔ, zugba nɛ maa pee nyɛ nɔ́ kaa nyɛ weto ní ɔ ji nɛ ɔmɛ nɛ, Kanaan zugba a kɛ e huzu ɔmɛ.

3 “‘Nyɛ woyi je huzu ɔ maa je Zin nga a nɔ ngɛ Edom kasa nya, nɛ nyɛ woyi je huzu ngɛ puje he blɔ ɔ maa je Ngo Wo ɔ* nya. 4 Nyɛ huzu ɔ maa dɔ e yi kɛ gu blɔ nɛ kuɔ kɛ yaa Akrabim ɔ woyi je, kɛ ya su Zin, nɛ e ma tsa nɔ kɛ ya si Kadesh Barnea woyi je. Lɔ ɔ se ɔ, e ma tsa nɔ kɛ ya Hazar Adar hluu kɛ ya si Azmon. 5 Huzu ɔ maa dɔ e yi ngɛ Azmon kɛ ya Egipt Dɔ* ɔ he, nɛ e ma ya pi Wo ɔ.*

6 “‘Nyɛ huzu ngɛ pusinɔ he ɔ maa pee Wo Ngua a* nya. Enɛ ɔ maa pee nyɛ huzu ngɛ pusinɔ he.

7 “‘Jehanɛ ɔ, enɛ ɔ maa pee nyɛ yiti je huzu: Nyɛ huzu ɔ maa je Wo Ngua a nya kɛ ya si Hor Yoku ɔ he. 8 Nɛ nyɛ huzu ɔ maa tsa nɔ kɛ je Hor Yoku ɔ he kɛ ya si Lebo Hamat,* nɛ huzu ɔ ma ya pi Zedad. 9 Nɛ e ma tsa nɔ kɛ ya su Zifron, nɛ e ma ya gbe nya ngɛ Hazar Enan. Enɛ ɔ maa pee nyɛ huzu ngɛ yiti je.

10 “‘Jehanɛ ɔ, nyɛɛ wo nyɛ huzu ɔ nɛ́ e ngɛ puje he blɔ ɔ kɛ je Hazar Enan kɛ ya si Shefam. 11 Huzu ɔ maa je Shefam kɛ ya gu Ribla, ngɛ Ain puje he blɔ, nɛ huzu ɔ ma kple kɛ ya po mi ngɛ kpongu nɛ ngɛ Kineret Wo ɔ* puje he blɔ ɔ he. 12 Huzu ɔ ma ya su Yordan Pa a he, nɛ e ma ya pi Ngo Wo ɔ. Enɛ ɔ maa pee nyɛ zugba kɛ e he huzuhi.’”

13 Lɔ ɔ he ɔ, Mose ngɔ blɔ tsɔɔmi kɛ ha Israel bi ɔmɛ ke: “Zugba nɛ nyɛ maa fɔ sɔ kɛ gba kaa nyɛ weto ní, kaa bɔ nɛ Yehowa fã kaa a kɛ ha wɛtso nɛɛ kɛ fã a ji nɛ ɔ nɛ. 14 Ejakaa Reuben bi ɔmɛ a wɛtso ɔ ngɛ a tsɛmɛ a we ɔ nya, kɛ Gad bi ɔmɛ a wɛtso ɔ ngɛ a tsɛmɛ a we ɔ nya, kɛ Manase wɛtso fã a ná a weto ní momo. 15 Wɛtso enyɔ kɛ fã amɛ ngɔ a weto ní momo ngɛ Yordan kpokpa a puje he ngɛ Yeriko, kɛ yaa puje he blɔ.”

16 Yehowa ya nɔ nɛ e kɛ Mose tu munyu, nɛ e de lɛ ke: 17 “Nyumuhi nɛ a ma gba zugba a kɛ ha nyɛ konɛ e pee nyɛ nɔ́ ɔ a biɛhi ji nɛ ɔmɛ nɛ: osɔfo Eleazar kɛ Nun binyumu Yoshua. 18 Nyɛɛ hla ganɔ kake ngɛ wɛtso fɛɛ wɛtso mi konɛ a gba zugba a kɛ ha nyɛ kaa nyɛ weto ní. 19 Nyumu ɔmɛ a biɛhi ji nɛ ɔmɛ nɛ: ngɛ Yuda wɛtso ɔ mi ɔ, Yefune binyumu Kaleb; 20 ngɛ Simeon bi ɔmɛ a wɛtso ɔ mi ɔ, Amihud binyumu Shemuel; 21 ngɛ Benyamin wɛtso ɔ mi ɔ, Kislon binyumu Elidad; 22 ngɛ Dan bi ɔmɛ a wɛtso ɔ mi ɔ, ganɔ nɛ a hla a ji Yogli binyumu Buki; 23 ngɛ Yosef binyumu ɔmɛ a kpɛti, ngɛ Manase bi ɔmɛ a wɛtso ɔ mi ɔ, ganɔ nɛ a hla a ji Efod binyumu Haniel; 24 ngɛ Efraim bi ɔmɛ a wɛtso ɔ mi ɔ, ganɔ nɛ a hla a ji Shiftan binyumu Kemuel; 25 ngɛ Zebulun bi ɔmɛ a wɛtso ɔ mi ɔ, ganɔ nɛ a hla a ji Parnak binyumu Elizafan; 26 ngɛ Isakar bi ɔmɛ a wɛtso ɔ mi ɔ, ganɔ nɛ a hla a ji Azan binyumu Paltiel; 27 ngɛ Asher bi ɔmɛ a wɛtso ɔ mi ɔ, ganɔ nɛ a hla a ji Shelomi binyumu Ahihud; 28 ngɛ Naftali bi ɔmɛ a wɛtso ɔ mi ɔ, ganɔ nɛ a hla a ji Amihud binyumu Pedahel.” 29 Ni nɛ ɔmɛ ji nihi nɛ Yehowa fã kaa a gba zugba a kɛ ha Israel bi ɔmɛ ngɛ Kanaan zugba a nɔ.

35 Yehowa ya nɔ nɛ e kɛ Mose tu munyu ngɛ Moab nga kplanaa a nɔ ngɛ Yordan Pa a he ngɛ Yeriko, nɛ e de lɛ ke: 2 “Ngɔɔ blɔ tsɔɔmi kɛ ha Israel bi ɔmɛ kaa a ha Levi bi ɔmɛ mahi ngɛ weto ní nɛ a ma ná a mi konɛ a hi mi, nɛ́ a ngɔ lohwehi a ní yemi hehi nɛ a ngɛ ma amɛ a he ɔ kɛ ha Levi bi ɔmɛ. 3 A maa hi ma amɛ a mi, nɛ a lohwe ɔmɛ, kɛ a ní ɔmɛ, kɛ a lohwe kpa amɛ tsuo maa hi lohwehi a ní yemi he ɔmɛ. 4 Lohwehi a ní yemi he nɛ e maa hi ma amɛ nɛ nyɛɛ kɛ ma ha Levi bi ɔmɛ a he ɔ, maa je gbogbo ɔ he kɛ ya se kɔni fã 1,000* kɛ bɔle ma a kɛ kpe. 5 Ngɛ ma a se ɔ, nyɛ susu kɔni fã 2,000 ngɛ puje he, kɛ kɔni fã 2,000 ngɛ woyi je, kɛ kɔni fã 2,000 ngɛ pusinɔ he, kɛ kɔni fã 2,000 ngɛ yiti je, nɛ ma a nɛ hi kpɛti. Lejɛ ɔmɛ maa pee a ma amɛ a he lohwehi a ní yemi hehi.

6 “Mahi nɛ nyɛ maa ngɔ kɛ ha Levi bi ɔmɛ ɔ maa pee wesa he ma 6, konɛ ke nɔ ko gbe nɔ ko ɔ, e tu fo kɛ ya mi, kɛ jehanɛ se hu ma kpahi 42. 7 Mahi tsuo nɛ nyɛɛ kɛ ma ha Levi bi ɔmɛ ɔ ji ma 48, kɛ a he lohwehi a ní yemi hehi. 8 Nyɛ je mahi nɛ nyɛɛ kɛ ma ha mɛ ɔ kɛ je Israel bi ɔmɛ a nɔ́ ɔ mi. Kuu nɛ e mi bi ɔmɛ a he hiɛ ɔ, nyɛɛ ngɔ babauu ngɛ a dɛ, nɛ kuu nɛ e mi bi ɔmɛ a he pi ɔ, nyɛɛ ngɔ bɔɔ pɛ ngɛ a dɛ. Kuu fɛɛ kuu maa ngɔ e ma amɛ eko kɛ ha Levi bi ɔmɛ ngɛ e weto ní nɛ e ma ná a nya.”

9 Yehowa ya nɔ nɛ e kɛ Mose tu munyu, nɛ e de lɛ ke: 10 “O kɛ Israel bi ɔmɛ nɛ tu munyu, nɛ o de mɛ ke, ‘Nyɛ maa po Yordan Pa a kɛ ya Kanaan zugba a nɔ. 11 Nyɛɛ hla mahi nɛ a mi yami be yee ha nyɛ nɛ nyɛ kɛ pee wesa he mahi, konɛ ke nɔ ko li e he be nɛ e gbe nɔ ko* ɔ, e tu fo kɛ ya lejɛ ɔ. 12 Ma nɛ ɔmɛ maa pee wesa hehi kɛ ha nyɛ kɛ maa je muɔ he lue yelɔ ɔ dɛ mi, bɔ nɛ pee nɛ nɔ nɛ gbe nɔ ɔ nɛ e ko gbo kɛ ya si be nɛ e maa da ma a hɛ mi nɛ a maa ye e sane ɔ. 13 Wesa he ma ekpa nɛ nyɛ maa hla a ma tsu yi mi tomi nɛ ɔ he ní. 14 Nyɛɛ ngɔ ma etɛ kɛ ha ngɛ Yordan Pa a se ngɛ hiɛ, nɛ́ nyɛɛ ngɔ ma etɛ kɛ ha ngɛ Kanaan zugba a nɔ konɛ a pee wesa he mahi. 15 Ma ekpa nɛ ɔmɛ maa pee wesa hehi kɛ ha Israel bi ɔmɛ, kɛ ma se no, kɛ nubwɔ nɛ ba ngɛ a kpɛti, konɛ nɔ fɛɛ nɔ nɛ e li e he be nɛ e gbe nɔ ko* ɔ nɛ́ e tu fo kɛ ya lejɛ ɔ.

16 “‘Se ke e ngɔ nɔ́ ko nɛ a kɛ dade pee kɛ fia nɔ ɔ nɛ e gbo ɔ, nɔmlɔ gbelɔ ji lɛ. Bɔ fɛɛ bɔ nɛ ji ɔ, a gbe nɔ gbelɔ ɔ. 17 Nɛ ke e ngɔ tɛ nɛ ma nyɛ maa gbe nɔ kɛ fia nɔ ko nɛ e gbo ɔ, nɔmlɔ gbelɔ ji lɛ. Bɔ fɛɛ bɔ nɛ ji ɔ, a gbe nɔ gbelɔ ɔ. 18 Nɛ ke e ngɔ nɔ́ ko nɛ a kɛ tso pee nɛ ma nyɛ maa gbe nɔ kɛ fia nɔ ko nɛ e gbo ɔ, nɔmlɔ gbelɔ ji lɛ. Bɔ fɛɛ bɔ nɛ ji ɔ, a gbe nɔ gbelɔ ɔ.

19 “‘Muɔ he lue yelɔ ɔ ji nɔ nɛ maa gbe nɔmlɔ gbelɔ ɔ nɛ. Ke e kɛ lɛ kpe ɔ, lɛ nitsɛ e gbe lɛ. 20 Ke nɔ ko kɛ ninyɛ tsitsɛɛ nɔ ko, aloo e kɛ juɛmi yaya* fɔ nɔ́ ko kɛ fia nɔ ko nɛ e gbo, 21 aloo e kɛ e nine fia lɛ ngɛ ninyɛ nɛ e ngɛ ha lɛ ɔ he je nɛ e gbo ɔ, bɔ fɛɛ bɔ nɛ ji ɔ, a gbe nɔ nɛ e fia nɔ ɔ nɔ́ ɔ. E ji nɔmlɔ gbelɔ. Ke muɔ he lue yelɔ ɔ kɛ nɔmlɔ gbelɔ ɔ kpe ɔ, e gbe lɛ.

22 “‘Se ke nɔ ɔ li e he be, nɛ pi ninyɛ nɛ e kɛ tsitsɛɛ lɛ, aloo pi juɛmi yaya* nɛ e kɛ fɔ nɔ́ ko kɛ fia lɛ, 23 aloo ke e nɛ lɛ, nɛ e ha nɛ tɛ ko ya nɔ e nɔ, nɛ́ pi e he nyɛlɔ ji lɛ, aloo pi nɛ e ngɛ hlae nɛ e plaa lɛ, nɛ nɔ ɔ gbo ɔ, 24 lɛɛ ma a nɛ kojo nɔ nɛ e fia nɔ ɔ nɔ́ ɔ, kɛ muɔ he lue yelɔ ɔ a kpɛti ngɛ blɔ tsɔɔmi nɛ ɔmɛ a nya. 25 Ma a nɛ́ he nɔ nɛ e gbe nɔ ɔ yi wami kɛ je muɔ he lue yelɔ ɔ dɛ mi, nɛ́ a kpale lɛ kɛ ho wesa he ma a mi he nɛ e tu fo kɛ ho ɔ ya, nɛ e hi lejɛ ɔ kɛ ya si be nɛ osɔfo nɔkɔtɔma nɛ a ngɔ nu klɔuklɔu kɛ pɔ lɛ nu ɔ ma gbo.

26 “‘Se ke nɔ nɛ e gbe nɔ ɔ hane wesa he ma nɛ e tu fo kɛ ho mi ya a huzu ɔ, 27 nɛ muɔ he lue yelɔ ɔ na nɔ nɛ e gbe nɔ ɔ ngɛ wesa he ma a huzu ɔ se, nɛ e gbe lɛ ɔ, e yi muɔ he fɔ. 28 Ejakaa e sa nɛ e hi wesa he ma a mi kɛ ya si be nɛ osɔfo nɔkɔtɔma a ma gbo. Se ngɛ osɔfo nɔkɔtɔma a gbenɔ ɔ se ɔ, nɔ nɛ e gbe nɔ ɔ ma nyɛ maa kpale kɛ ho lɛ nitsɛ e zugba nɔ ya. 29 Ní nɛ ɔmɛ maa pee mlaa nɛ nyɛɛ kɛ maa kojo nyɛ yi nɔhi tsuo ngɛ nyɛ hi he ɔmɛ tsuo.

30 “‘Nɔ fɛɛ nɔ nɛ maa gbe nɔmlɔ ɔ,* a da odase yeli a nya mi munyu nɔ kɛ bu lɛ kaa nɔmlɔ gbelɔ, nɛ́ a gbe lɛ; se a ko da odase yelɔ kake pɛ nya mi munyu nɔ kɛ gbe nɔ* ko. 31 Nyɛ ko ngɔ kpɔmi nɔ́ ko ngɛ nɔmlɔ gbelɔ ko nɛ e sa gbenɔ wami* he, ejakaa bɔ fɛɛ bɔ nɛ ji ɔ, e sa nɛ a gbe lɛ. 32 Nɛ nyɛ ko ngɔ kpɔmi nɔ́ ko ngɛ nɔ ko nɛ e tu fo kɛ ho wesa he ma ko mi ya a dɛ, konɛ lɔ ɔ nɛ ko ha nɛ e kpale kɛ ba hi e zugba a nɔ be mi nɛ osɔfo nɔkɔtɔma a gbo we lolo.

33 “‘Nyɛ ko wo zugba nɛ nyɛ ngɛ nɔ ɔ he mu, ejakaa muɔ woɔ zugba a he mu, nɛ kpatami nɔ́ ko be kɛ ha muɔ nɛ a pue si ngɛ zugba a nɔ ɔ kaa ja nɔ nɛ e pue muɔ ɔ si ɔ nitsɛ e muɔ. 34 Nyɛ ko ble zugba nɛ nyɛ ngɛ nɔ ɔ, he nɛ imi hu i ngɛ ɔ; ejakaa imi Yehowa, i ngɛ Israel bi ɔmɛ a kpɛti.’”

36 Manase binyumu Makir binyumu Gilead sisi bimɛ ɔmɛ a weku yi ɔmɛ nɛ a je Yosef binyumu ɔmɛ a weku ɔmɛ a mi ɔ ba, nɛ a kɛ munyu ko ba fɔ Mose kɛ ganɔ ɔmɛ, nɛ ji Israel bi ɔmɛ a weku yi ɔmɛ a hɛ mi. 2 A de ke: “Yehowa fã ye nyɔmtsɛ ɔ kaa e fɔ sɔ kɛ gba zugba a kaa weto ní kɛ ha Israel bi ɔmɛ; nɛ Yehowa fã ye nyɔmtsɛ ɔ kaa e ngɔ wa nyɛminyumu Zelofehad weto ní ɔ kɛ ha e biyi ɔmɛ. 3 Ke a ya gba nyumuhi nɛ a ngɛ Israel wɛtso kpa mi ɔ, a ma je yi ɔmɛ a gbosi ní ɔ hu ngɛ wa tsɛmɛ ɔmɛ a weto ní ɔ mi, nɛ a kɛ ma ya piɛɛ wɛtso nɛ a ya je mi ɔ weto ní ɔ he; ke e ba jã a, a ma je ngɛ wa weto ní nɛ a fɔ sɔ kɛ gba ha wɔ ɔ mi. 4 Jehanɛ ɔ, ke e su Israel bi ɔmɛ a Heyemi jeha a, a maa ngɔ yi ɔmɛ a gbosi ní ɔ hu kɛ piɛɛ wɛtso nɛ a ya je mi ɔ a weto ní ɔ he, nɛ ke e ba jã a, a ma je a gbosi ní ɔ kɛ je wa tsɛmɛ a wɛtso ɔ weto ní ɔ mi.”

5 Kɛkɛ nɛ Mose de Israel bi ɔmɛ ngɛ Yehowa fami nya ke: “Nɔ́ nɛ Yosef binyumu ɔmɛ a wɛtso ɔ ngɛ dee ɔ da. 6 Fami nɛ Yehowa kɛ ha ngɛ Zelofehad biyi ɔmɛ a he ji nɛ ɔ nɛ: ‘A ma nyɛ maa gba nɔ fɛɛ nɔ nɛ a suɔ. Se a gba nɔ ko ngɛ a tsɛ ɔ wɛtso ɔ mi. 7 Israel bi ɔmɛ a weto ní ko nɛ ko je wɛtso kake mi kɛ ya wɛtso kpa mi, ejakaa e sɛ nɛ Israel bi ɔmɛ nɛ a ha nɛ a tsɛmɛ a wɛtso ɔ weto ní ɔ nɛ je a dɛ. 8 Nɛ biyo fɛɛ biyo nɛ ngɛ gbosi ní ngɛ Israel wɛtso ɔmɛ a mi ɔ nɛ gba nɔ ko nɛ je e tsɛ ɔ wɛtso ɔ mi, bɔ nɛ pee nɛ Israel bi ɔmɛ a tsɛmɛ a weto ní ɔ nɛ ya nɔ nɛ hi a dɛ. 9 Gbosi ní ko nɛ ko je wɛtso kake mi kɛ ya wɛtso kpa mi, ejakaa e sa nɛ Israel wɛtso fɛɛ wɛtso nɛ pɛtɛ e weto ní he.’”

10 Zelofehad biyi ɔmɛ pee kaa bɔ nɛ Yehowa fã Mose ɔ pɛpɛɛpɛ. 11 Lɔ ɔ he ɔ, Mahla, Tirza, Hogla, Milka, kɛ Noa, nɛ ji Zelofehad biyi ɔmɛ gba a tsɛ ɔ nyɛminyumu ɔmɛ a binyumuhi. 12 A ba pee nyumuhi nɛ a je Yosef binyumu Manase weku ɔmɛ a mi ɔ a yihi, bɔ nɛ pee nɛ a gbosi ní ɔ nɛ tlɔ wɛtso nɛ a tsɛ ɔ weku ɔ je mi ɔ mi.

13 Ní nɛ ɔmɛ ji mlaahi kɛ kojomihi nɛ Yehowa kɛ ha Israel bi ɔmɛ kɛ gu Mose nɔ ngɛ Moab nga kplanaa a nɔ, ngɛ Yordan Pa a he ngɛ Yeriko.