Sane Bimi 1: Anɛ I Ngɛ Wami Mi Ngɛ Yi Mi Tomi Ko Heje Lo?

ROSALIND nɛ a lɛ lɛ ngɛ England ɔ suɔ nɛ e le níhi fuu. E suɔ nɛ e ye bua nihi hulɔ. Benɛ e gbe sukuu nya a, e ná nítsumi ngɛ nítsumi he ngua ko nɛ yeɔ bua nihi nɛ a be he ko nɛ a maa hi, kɛ kpa jeli, kɛ nihi nɛ a ngɛ ní kasemi he nyagba. Ngɛ nítsumi ngua nɛ haa nɛ nɔ náa sika fuu nɛ e tsuɔ ɔ tsuo se ɔ, e de ke, “I bi jehahi babauu ke, ‘Mɛni heje nɛ wa ngɛ je ɔ mi ɔ?’ kɛ ‘Mɛni yi mi tomi heje nɛ wa ngɛ si himi mi ngɛ?’”

Mɛni heje e sa nɛ wa bi sane kaa jã?

Adesahi nyɛɔ susuɔ níhi a he. A be kaa lohwehi nɛ mɛɛ a susuu we níhi a he ɔ. Wa nyɛɔ kaseɔ ní kɛ jeɔ níhi nɛ a be ɔ mi, wa toɔ níhi a he blɔ nya kɛ ha hwɔɔ se, nɛ wa suɔ kaa waa le yi mi tomi heje nɛ wa ngɛ si himi mi.

Mɛni heto nɛ nihi ha?

Nihi babauu susu kaa yi mi tomi titli heje nɛ wa ngɛ si himi mi ji, nɛ́ wa ná ní aloo wa he biɛ konɛ wa bua nɛ jɔ.

Mɛni heto nɛ a ha a tsɔɔ?

E tsɔɔ kaa e sa nɛ waa di níhi nɛ wa bua jɔɔ he ɔ a se titli ngɛ wa si himi mi. E tsɔɔ hu kaa e sa nɛ waa pee wɔ nitsɛmɛ wa tsui nya ní mohu pe Mawu suɔmi nya ní.

Mɛni Baiblo ɔ tsɔɔ?

Matsɛ Salomo bua níhi babauu nya, nɛ e di níhi nɛ ma ha nɛ e ná bua jɔmi ɔ a se mohu lɛɛ, se lɔɔ ha we nɛ e ná bua jɔmi kɛ ya daa. Benɛ e yɔse yi mi tomi heje nɛ adesa ngɛ si himi mi ɔ, e ngma ke: “Nyagbe ɔ, nɔ́ nɛ ma de kɛkɛ ji kaa moo ye Mawu gbeye, nɛ o ye e mlaa amɛ a nɔ. Nítsumi nɛ ngɛ kɛ ha nimli adesahi tsuo ji nɛ ɔ nɛ.” (Fiɛlɔ 12:13) Mɛni Mawu mlaa amɛ a nɔ nɛ wa maa ye ɔ tsɔɔ?

Mawu bɔ wɔ ngɛ yi mi tomihi fuu a heje, nɛ yi mi tomi nɛ ɔ eko ji kaa e suɔ nɛ wa ná bua jɔmi. Salomo ngma ke: “Nɔ́ nɛ sa adesa peemi ji kaa e ye ní, nɛ e nu ní, nɛ e ná bua jɔmi kɛ je e dengme gbomi ɔ mi. Se kɛ̃ ɔ, i na kaa enɛ ɔ hu je Mawu ngɔ.”—Fiɛlɔ 2:24.

Mawu suɔ hu kaa waa suɔ wa weku mi bimɛ nɛ waa hyɛ a nɔ. Mo kadi ga womi kpakpa nɛ mi tɛ̃ nɛ a kɛ ha weku mi bimɛ ɔmɛ a ti nɔ tsuaa nɔ ɔ.

“Nyumu nɛ suɔ e yo kaa bɔnɛ e suɔ lɛ nitsɛ e he.”—Efesobi 5:28.
“Yogbayo tsuaa yogbayo nɛ bu e huno.”—Efesobi 5:33.
“Bimɛ, nyɛɛ bu nyɛ fɔli tue.”—Efesobi 6:1.

Ke waa kɛ Baiblo sisi tomi mlaa nɛ ɔmɛ tsu ní ɔ, wa bua maa jɔ wa he nɛ wa tsui hu maa nɔ wa mi bɔnɛ sa. Se nɔ́ nɛ he hia pe kulaa nɛ wa ma nyɛ maa pee ji, nɛ́ wa maa kase níhi fuu ngɛ wa Bɔlɔ ɔ he, konɛ waa kɛ lɛ nɛ bɔ Huɛ. Ngɛ anɔkuale mi ɔ, Baiblo ɔ fɔ wɔ nine kaa, ‘waa hɛ wɔ kɛ su Mawu he.’ Enɛ ɔ se ɔ, Baiblo ɔ wo wɔ si hu kaa ‘Mawu hu maa hɛ lɛ kɛ su wa he.’ (Yakobo 4:8) Ke o kplɛɛ nine fɔmi nɛ ɔ nɔ ɔ, o maa le yi mi tomi nitsɛnitsɛ heje nɛ o ngɛ si himi mi ɔ.

Amlɔ nɛ ɔ, Rosalind nɛ wa tu e he munyu kɛ sɛ hlami ɔ le yi mi tomi heje nɛ e ngɛ si himi mi.

Ke o ngɛ hlae nɛ o le níhi babauu kɛ kɔ níhi nɛ o maa pee konɛ o sa Mawu hɛ mi ɔ he ɔ, moo hyɛ Mɛni Tutuutu Ji Baiblo ɔ Tsɔɔmi? womi ɔ yi 12 ɔ. O ma nyɛ maa gbla ngɛ www.jw.org

Mɛni Yesu De Kɛ Kɔ Nɔ́ Heje Nɛ Wa Ngɛ Si Himi Mi ɔ He?

Yesu le yi mi tomi heje nɛ a fɔ lɛ kɛ ba je ɔ mi. E de ke: “Enɛ ɔ he nɛ a fɔ mi kɛ ba je ɔ mi, konɛ ma tsɔɔ anɔkuale ɔ.” (Yohane 18:37) Yesu kɛ e wami be ɔ tsɔɔ nihi anɔkualehi nɛ kɔɔ Mawu kɛ Mawu yi mi tomihi a he.

Ke wa kase Yesu ɔ, wa tsui maa nɔ wa mi ngɛ si himi mi. Ngɛ anɔkuale mi ɔ, Yesu ngɛ wɔ tsɛe konɛ wa ba kase lɛ. (Mateo 11:29) Mo susu blɔhi enyɔ pɛ nɛ wa ma nyɛ maa gu nɔ kɛ pee jã a he nɛ o hyɛ.

Yesu tsɔɔ kaa loko wa ma ná bua jɔmi ɔ, e sa nɛ waa ‘le kaa mumi mi ohiatsɛmɛ ji wɔ.’ (Mateo 5:3) Ke wa ‘le anɔkuale Mawu ɔ, nɛ wa le Yesu Kristo, nɔ nɛ e tsɔ ɔ,’ huɛ bɔmi kpakpa maa hi waa kɛ Mawu wa kpɛti.—Yohane 17:3.

Yesu fã e se nyɛɛli ɔmɛ kaa a tsɔɔ nihi nɔ́ nɛ mɛ hu a kase ɔ. E de ke: ‘Lɔɔ he ɔ, nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ baptisi mɛ ngɔ wo Tsɛ ɔ, kɛ Bi ɔ, kɛ mumi klɔuklɔu ɔ biɛ mi, nɛ nyɛɛ tsɔɔ mɛ nɛ a ye níhi tsuo nɛ i fã nyɛ ke nyɛɛ pee ɔ a nɔ.’—Mateo 28:19, 20.

Nihi nɛ a haa nɛ huɛ bɔmi kpakpa hii a kɛ Mawu a kpɛti kɛ gu Baiblo ɔ nɛ a kaseɔ nɛ a kɛ nɔ́ nɛ a kaseɔ ɔ tsuɔ ní ɔ nɔ ɔ, naa kaa a si himi tsakeɔ nɛ e peeɔ kpakpa. Benɛ mɛ hu a bɔni nihi ye buami konɛ a kase Mawu he ní ɔ, a náa nɔ mi mami kaa yi mi tomi nitsɛnitsɛ ko heje nɛ a ngɛ si himi mi ɔ nɛ.