Yesu Si Temi ɔ Ma Ha Nɛ Nihi Ma Ná Wami!

YESU si temi ɔ pi blema munyu ko kɛkɛ nɛ nihi bɔɔ ko pɛ nɛ a nu he nɛ se nami tsɔ ko be he ha wɔ mwɔnɛ ɔ. Bɔfo Paulo tsɔɔ se nami nɛ ngɛ Yesu si temi ɔ he. E ngma ke: “Mawu tle Kristo si kɛ je gbeje [kaa kekleekle yiblii] nɛ e kɛ ye odase kaa e ma tle ni nɛmɛ nɛ gbo ɔ tsuo si. Ejakaa kaa bɔnɛ gbenɔ gu adesa nɔ kɛ ba a, jã nɔuu kɛ̃ adesa nɔ gbogboehi a si temi ɔ gu kɛ ba. Kaa bɔnɛ nihi tsuo ngɛ Adam mi gboɔ ɔ, jã nɔuu kɛ̃ a ma tle nihi tsuo si ngɛ Kristo mi.”—1 Korintobi 15:20-22.

A tle Yesu si ngɛ Nisan 16, 33 M.B. Nisan 16 ji be nɛ Yudabi ɔmɛ ngɔɔ a kekleekle ngma nɛ a kpa a kɛ yaa Yehowa Mawu hɛ mi ngɛ sɔlemi we ɔ ngɛ Yerusalem. Enɛ ɔ heje ɔ, tsɛmi nɛ Paulo tsɛ Yesu ke kekleekle yiblii ɔ tsɔɔ kaa a ma tle ni kpahi hu si kɛ ba wami mi.

Munyu nɛ Paulo tu kɛ nyɛɛ se ɔ tsɔɔ se nɛ wa ná ngɛ Yesu si nɛ a tle ɔ he. Paulo de ke: “Kaa bɔnɛ gbenɔ gu adesa nɔ kɛ ba a, jã nɔuu kɛ̃ adesa nɔ gbogboehi a si temi ɔ gu kɛ ba.” Yayami nɛ Adam pee kɛ mluku nɛ e yi ɔ sã wɔ, enɛ ɔ heje nɛ wɔ tsuo wa gboɔ ɔ nɛ. Se, Yesu ngɔ e we adesa wami nɛ ye mluku ɔ ngɔ ha kaa kpɔmi nɔ́ nɛ e kɛ bli blɔ ha adesahi konɛ a ye a he kɛ je yayami kɛ gbenɔ dɛ mi kɛ gu gbogboehi a si temi ɔ nɔ. Paulo mwɔ sane ɔ nya nɛ e ngma ngɛ Romabi 6:23 ɔ ke: “Yayami he hiɔwo ji gbenɔ; se Mawu nɔke nɔ́ ɔ ji neneene wami nɛ wa náa ngɛ wa Nyɔmtsɛ Yesu Kristo mi.”

Yesu nitsɛ tsɔɔ se nami nɛ ngɛ e gbenɔ ɔ kɛ e si temi ɔ he kɛ ha wɔ ɔ nya. E de ke: “E sa kaa a wo Nɔmlɔ Bi ɔ nɔ, konɛ nɔ tsuaa nɔ nɛ heɔ lɛ yeɔ ɔ, e ná neneene wami. Ejakaa Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e ná neneene wami.”—Yohane 3:14-16.

Mo susu wami nɛ be nyagbe, nɛ nɔ́ nami, aloo aywilɛho be mi ɔ he nɛ o hyɛ! (Kpojemi 21:3, 4) E ji hɛ kɛ nɔ fɔmi nɛ ngɛ bua jɔmi nitsɛnitsɛ! Ní lelɔ ko de ke: “Ngɛ be mi nɛ yɔkɔhi ma ha nɛ nɔ ko ma kai kaa adesa wami be ngɛ kpiti ɔ, gbogboehi a si temi ɔ ma ha nɛ nɔ ko ma kai kaa gbenɔ be si hie daa.” Ee, Yesu si temi ɔ ma ha nɛ wa ma ná wami!