Yesu Tsɔɔ Wɔ Nɔ́ Nɛ Ma Ha Wa Tsui Maa Nɔ Wa Mi

KAA bɔnɛ wa susu he ngɛ munyu nɛ sɛ hlami ɔ mi ɔ, Yesu tsui nɔ e mi ngɛ si himi mi. Enɛ ɔ he ɔ, ke wa suɔ nɛ wa tsui nɛ nɔ wa mi ngɛ si himi mi ɔ, e sa nɛ waa kase e nɔ hyɛmi nɔ́ ɔ, nɛ́ waa bu e ga womi tue.

Ngɛ anɔkuale mi ɔ, kaa bɔnɛ ngmami nɛ a wo ta ngɛ yinɔ ɔ tsɔɔ ɔ, Yehowa woɔ wɔ he wami konɛ waa kase Yesu. Wa je mi nɛ wa maa ba kaa bɔnɛ Yesu ba e je mi ɔ tsɔɔ kaa e sa nɛ nɔ́ tsuaa nɔ́ nɛ wa maa pee ngɛ wa si himi mi ɔ nɛ e kɛ nɔ hyɛmi nɔ́ nɛ Yesu pee, kɛ ní nɛ e tsɔɔ wɔ ɔ nɛ kɔ. Ke wa peeɔ jã a, lɔɔ ma ha nɛ Mawu bua maa jɔ wa he nɛ wa tsui maa nɔ wa mi ngɛ si himi mi.

Yesu tsɔɔ wɔ sisi tomi mlaa komɛ nɛ maa ye bua wɔ nɛ́ waa ba wa je mi kaa bɔnɛ e ba e je mi ɔ. E tu sisi tomi mlaa nɛ ɔmɛ fuu a he munyu ngɛ e Yoku ɔ Nɔ Fiɛɛmi munyu nɛ nihi le wawɛɛ ɔ mi. Nyɛ ha nɛ wa susu sisi tomi mlaa nɛ ɔmɛ a kpɛti bɔɔ komɛ a he nɛ waa hyɛ, konɛ waa hyɛ bɔnɛ waa kɛ ma tsu ní ngɛ wa si himi mi ha.

SISI TOMI MLAA: “A gbaa nihi nɛ le kaa mumi mi ohiatsɛmɛ ji mɛ.”—Mateo 5:3.

BƆNƐ SISI TOMI MLAA NƐ Ɔ HAA NƐ NƆ TSUI NƆƆ NƆ MI HA:

Yesu tsɔɔ kaa a bɔ adesahi kɛ he numi kaa e sa nɛ a le Mawu. Wa suɔ nɛ waa le sane bimi kaa ní nɛmɛ nɛ nyɛɛ se nɛ ɔmɛ a heto: Mɛni heje nɛ wa ngɛ hiɛ ɔ? Mɛni heje nɛ nɔ́ nami hyi je ɔ mi tɔ kikɛ ɔ? Anɛ Mawu susuɔ wa he niinɛ lo? Anɛ wami ko ngɛ gbenɔ se lo? Ja wa ná hetohi kɛ ha sane bimi nɛ ɔmɛ loko wa tsui ma nyɛ maa nɔ wa mi ngɛ si himi mi. Yesu le kaa Mawu Munyu ɔ mi pɛ nɛ wa ma nyɛ maa na sane bimi nɛ ɔmɛ a heto nɛ da ngɛ. Yesu de e Tsɛ ɔ ngɛ sɔlemi mi ke: ‘O munyu ɔ ji anɔkuale.’ (Yohane 17:17) Anɛ Mawu Munyu ɔ ma nyɛ maa ye bua wɔ niinɛ konɛ waa le Mawu, nɛ wa tsui nɛ nɔ wa mi lo?

SANE NƐ YA NƆ NITSƐNITSƐ:

Esa ji nɔ nɛ e da lali a kuu ko nɛ he biɛ ɔ nya, nɛ he nɛ e la kɛ su ɔ ha nɛ e biɛ ya tsitsaa. Se enɛ ɔ tsuo se ɔ, Esa na kaa e tsui nɔɛ e mi ngɛ si himi mi. E de ke: “E ngɛ mi kaa ye bua jɔ kaa i ngɛ lali a kuu ɔ mi mohu lɛɛ, se ye tsui nɔɛ ye mi ngɛ si himi mi.” Pee se ɔ, Esa kɛ Yehowa Odasefono ko kpe. Esa de ke: “I bi lɛ sanehi fuu, nɛ bɔnɛ e kɛ Ngmami ɔ ha mi hetohi ha a ha nɛ ye nya kpɛ ye he, enɛ ɔ he ɔ, i kɛ lɛ wa bɔni Baiblo ɔ kasemi.” Nɔ́ nɛ Esa kase ngɛ Baiblo ɔ mi ɔ sɛ e tsui mi nɛ lɔɔ wo lɛ he wami nɛ e jɔɔ e wami nɔ ha Yehowa. E de ke: “Be ko nɛ be ɔ, i kɛ haomihi pɔɔ kpemi, se amlɔ nɛ ɔ, ye tsui nɔ ye mi ngɛ si himi mi.”

SISI TOMI MLAA: “A gbaa ni nɛmɛ nɛ naa mɔbɔ.”—Mateo 5:7.

BƆNƐ SISI TOMI MLAA NƐ Ɔ HAA NƐ NƆ TSUI NƆƆ NƆ MI HA:

Mɔbɔ nami tsɔɔ nɔ ko mi mi nɛ maa sã lɛ ngɛ nihi a he, e ma je mi mi jɔmi kpo kɛ tsɔɔ nihi, nɛ e ma susu nihi a he. Yesu na nihi nɛ a be nɔ́ ko ɔ mɔbɔ. E mi mi sãa lɛ wawɛɛ ngɛ nihi a he, enɛ ɔ he ɔ, e sɛ hlami nɛ e ye bua nihi nɛ a ngɛ nɔ́ nae ɔ. (Mateo 14:14; 20:30-34) Ke wa kase Yesu nɛ wa naa nihi mɔbɔ ɔ, lɔɔ ma ha nɛ wa tsui maa nɔ wa mi ngɛ si himi mi, ejakaa nihi nɛ a naa nihi mɔbɔ ɔ náa bua jɔmi. (Bɔfo Ɔmɛ A Nítsumi 20:35) Wa ma nyɛ maa na nihi nɛ a ngɛ haoe nɛ a hia wa yemi kɛ buami ɔ mɔbɔ kɛ gu mi mi jɔmi munyuhi nɛ wa maa tu kɛ tsɔɔ mɛ kɛ níhi nɛ wa maa pee kɛ ha mɛ ɔ nɔ. Anɛ ke wa naa nihi mɔbɔ ɔ, lɔɔ ma ha nɛ wa tsui maa nɔ wa mi niinɛ lo?

SANE NƐ YA NƆ NITSƐNITSƐ:

Maria kɛ e huno Carlos pee mɔbɔ nami he nɔ hyɛmi nɔ́. Maria mami gbo kɛ je e papaa he, nɛ lingmi nɛ ɔ, e papaa be he wami nɛ e tlɔ tsu mi. Maria kɛ Carlos ya ngɔ lɛ kɛ ba je a ngɔ nɛ a ngɛ lɛ hyɛe. Behi fuu ngɛ nɛ a hwɔ we mahe, nɛ ke e sikli hiɔ ɔ klã wawɛɛ ɔ, a kɛ lɛ yaa hiɔtsami he nɔuu. A kplɛɛ nɔ kaa be komɛ ngɛ nɛ pɔ tɔɔ a he wawɛɛ. Se kaa bɔnɛ Yesu de ɔ, a ngɛ bua jɔmi, nɛ a tsui hu nɔ a mi ejakaa a le kaa a kɛ yemi kɛ buami nɛ Maria papaa hia a ngɛ lɛ hae.

SISI TOMI MLAA: “A gbaa ni nɛmɛ nɛ kpataa pɛ [suɔ tue mi jɔmi, NW].”—Mateo 5:9.

BƆNƐ SISI TOMI MLAA NƐ Ɔ HAA NƐ NƆ TSUI NƆƆ NƆ MI HA:

Ke nɔ ko “suɔ tue mi jɔmi” ɔ, lɔɔ tsɔɔ kaa nɔ ɔ suɔ nɛ “tue mi jɔmi” nɛ hi e kɛ nihi a kpɛti. Ngɛ mɛni blɔ nɔ ke nɔ ko suɔ nɛ tue mi jɔmi nɛ hi e kɛ nihi a kpɛti ɔ, e tsui nɔɔ e mi? Ke wa bɔɔ mɔde nɛ wa haa nɛ tue mi jɔmi hiɔ waa kɛ nihi wa kpɛti ɔ, lɔɔ haa nɛ waa kɛ nihi nɛ bɔle wɔ ɔ hiɔ si saminya. E sa nɛ waa bu Baiblo ga womi nɛ ɔ tue: “Ke e maa hi ɔ, nyɛɛ bɔ mɔde nɛ nyɛɛ kɛ nɔ tsuaa nɔ nɛ hi si ngɛ he jɔmi [tue mi jɔmi] mi.” (Romabi 12:18) Wa wekuli kɛ nihi nɛ eko ɔ, a kplɛɛ we níhi nɛ wa heɔ yeɔ ɔ nɔ ɔ hu piɛɛ “nɔ tsuaa nɔ” nɛ a wo ta ngɛ ngmami ɔ mi ɔ he. Ke waa kɛ “nɔ tsuaa nɔ” hi si ngɛ tue mi jɔmi mi ɔ, anɛ wa tsui maa nɔ wa mi ngɛ si himi mi lo?

SANE NƐ YA NƆ NITSƐNITSƐ:

Mo susu yo ko nɛ a tsɛɛ lɛ ke Nair ɔ e níhi a si kpami ɔ he nɛ o hyɛ. E kɛ jehahi babauu bɔ mɔde kaa e ma ha nɛ tue mi jɔmi nɛ hi e kɛ nihi a kpɛti, titli ɔ, e kɛ e weku mi bimɛ ɔmɛ a kpɛti. Maa pee jeha 15 ji nɛ ɔ nɛ e huno kua lɛ ɔ, lɛ nɔ kake too nɛ ngɛ a bimɛ ɔmɛ tsɔsee. E binyumu ɔ kake kɛ tsopa yaya tsuɔ ní, nɛ behi fuu ɔ, e peeɔ basabasa, nɛ e woɔ Nair kɛ e biyo ɔ a he gbeye. Nair he ye kaa nɔ́ nɛ e kase ngɛ Baiblo ɔ mi ɔ ha nɛ e nyɛ nɛ e ngɛ tue mi jɔmi se die ngɛ si himi nɛ mi wa nɛ ɔ mi. E bɔɔ mɔde wawɛɛ konɛ e kɛ nɔ ko nɛ ko sã nya aloo a hua nɔ́ ko he. E bɔɔ mɔde nɛ e jeɔ mi mi jɔmi kɛ mi mi sami kpo kɛ tsɔɔ nihi, nɛ e nuɔ mɛ sisi. (Efesobi 4:31, 32) E he ye wawɛɛ kaa akɛnɛ e kase bɔnɛ a kɛ nihi hiɔ si ngɛ tue mi jɔmi mi heje ɔ, lɔɔ ha nɛ e kɛ e weku mi bimɛ kɛ ni kpahi a kpɛti ngɛ kpakpa.

E SA NƐ WA SUSU HWƆƆ SE HE

Ke wa bu Yesu ga womi ɔ tue ɔ, wa ma ná bua jɔmi nɛ wa tsui hu maa nɔ wa mi ngɛ si himi mi. Se loko wa tsui maa nɔ wa mi nitsɛnitsɛ ngɛ si himi mi ɔ, ja wa le níhi hu nɛ maa ba hwɔɔ se. Ke nɔ́ pɛ nɛ wa le ji kaa nyagbe ɔ, wa maa bwɔ, hiɔ maa nu wɔ, nɛ wa ma gbo ɔ, anɛ wa tsui ma nyɛ maa nɔ wa mi ngɛ si himi mi lo? Se kɛ̃ ɔ, ní nɛ ɔmɛ nɔuu nɛ ngɛ nɔ yae ngɛ je ɔ mi.

Se sane kpakpa ko ngɛ! Níhi fuu ngɛ nɛ Yehowa kɛ maa jɔɔ nihi tsuo nɛ a bɔɔ mɔde nɛ a ‘baa a je mi kaa bɔnɛ Yesu ba e je mi ɔ.’ Yehowa wo si ke, e be kɛe nɛ e kɛ je ehe nɛ a peeɔ dami ní ngɛ mi maa ba. Adesahi anɔkualetsɛmɛ nɛ a ngɛ nɔmlɔtso mi he wami kpakpa maa hi si kɛ ya neneene ngɛ je ehe nɛ ɔ mi kaa bɔnɛ Yehowa to e yi mi ɔ. Mawu Munyu ɔ de ke: “Mawu hi he ji nimli a kpɛti! E kɛ mɛ maa hi si, nɛ a maa pee e ma. Mawu nitsɛ kɛ mɛ maa hi si, nɛ e maa pee a Mawu. Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”—Kpojemi 21:3, 4.

Maria nɛ ji yomoyo ɔ nɛ e ye jeha 84 nɛ wa tu e he munyu kɛ sɛ hlami ɔ, kɛ bua jɔmi ngɛ be nɛ Mawu si womi nɛ ɔ maa ba mi ɔ blɔ hyɛe. Mo nɛɛ? Anɛ o suɔ nɛ o maa le babauu kɛ kɔ nɔ́ nɛ o maa pee konɛ o nine nɛ su “wami nɛ ngɛ kɛ yaa neneene” ɔ nɔ ngɛ Mawu Matsɛ Yemi nɛ maa ba a sisi lo? (1 Timoteo 6:19) Ke jã a, lɛɛ o ma nyɛ maa ngma ya ha Yehowa Odasefoli nɛ a ngɛ o kpɔ ɔ mi ɔ aloo o ngma ya ha nihi nɛ a pee womi tɛtlɛɛ nɛ ɔ.a