Hemi Kɛ Yemi Futumi​—Anɛ Mawu Kplɛɛ Nɔ Lo?

SE NIHI nɛ a fĩ hemi kɛ yemi futumi se ɔ lɛɛ, a susu kaa jami peeɔ nihi kake. Nyumu ko nɛ a tsɛɛ lɛ ke Eboo Patel nɛ e to hemi kɛ yemi kuu ko nɛ a tsɛɛ ke Interfaith Youth Core ɔ sisi ɔ de ke: ‘Jamihi tsuo tsɔɔ nihi kaa a je mi mi himi kpo kɛ tsɔɔ nihi, a hyɛ níhi nɛ ngɛ zugba a nɔ ɔ a nɔ, nɛ a pee nihi nibwɔ.’

Ngɛ anɔkuale mi ɔ, be komɛ ngɛ nɛ Buda bi, Katoliki bi, Protestant bi, Hindu bi, Muslim bi, kɛ jami kpahi peeɔ kake konɛ a ha nɛ ohia, aloo nɔ sisimi se nɛ po, aloo a tsi nihi a nya nɛ a jɔɔ oplɛmihi pumi ngɛ zu mi, aloo a po nyu, kɔɔhiɔ, kɛ zugba a he piɛ. Jami slɔɔtoslɔɔtohi pee kake konɛ a susu bɔ nɛ a ma plɛ kɛ ha nɛ kake peemi nɛ hi adesahi tsuo a kpɛti ɔ he. A suɔ kɛnlɛ kɛ yeɔ gbijlɔhi, a laa nɛ a doɔ, a sɔleɔ, nɛ a peeɔ ní kpahi hulɔ kɛ tsuɔ yi mi tomi nɛ ɔ he ní.

Anɛ jamihi nɛ a ma futu ɔ lɛ ma ha nɛ nihi a hemi kɛ yemi maa pee kake lo? Anɛ hemi kɛ yemi futumi nɔ lɛ Mawu maa da kɛ ha nɛ tue mi jɔmi nɛ ba je ɔ mi lo?

ANƐ KAKE PEEMI JI NƐ Ɔ LO?

Hemi kɛ yemi futumi kuu ɔmɛ a kpɛti kake ko tsɔɔ kaa jami slɔɔtoslɔɔtohi nɛ hiɛ pe 200 nɛ ngɛ kuu ɔ mi, nɛ kuu ɔ ngɛ mahi 76 a nɔ. Oti nɛ kuu ɔ kɛ ma e hɛ mi ji kaa “e ma ha nɛ kake peemi nɛ hi kuu ɔ mi bimɛ ɔmɛ a kpɛti daa.” Se a nyɛ we nɛ a tsu yi mi tomi nɛ ɔ he ní. Kaa nɔ hyɛmi nɔ́ ɔ, nihi nɛ a toɔ níhi a he blɔ nya ngɛ kuu ɔ mi ɔ tsɔɔ kaa e biɔ nɛ a ngma kuu ɔ mlaa a saminya konɛ a ko tɔ̃ jamihi nɛ ngɛ kuu ɔ mi ɔ eko nɔ. Mɛni he je nɛ a pee jã a? Nɔ́ kake ji kaa a ti ni komɛ kplɛɛ we nɔ kaa e sa nɛ Mawu biɛ nɛ hi mlaa a mi. Nyagbenyagbe ɔ, a wui Mawu biɛ ta hu kulaa.

Ke a wui Mawu biɛ ta a, lɛɛ mɛni hemi kɛ yemi he munyu a tuɔ mɔ? Jehanɛ se hu ɔ, mɛni blɔ nɔ e slo hemi kɛ yemi futumi kuu nɛ ɔ ngɛ kuuhi nɛ keɔ nihi ní, kɛ kuuhi nɛ yeɔ bua nihi nɛ e fĩ mɛ ɔ a he ngɛ? Enɛ ɔ he ɔ, hemi kɛ yemi futumi kuu ɔ tsɔɔ kaa e pi jami kuu ko, mohu ɔ, e ji “blɔ nya tomi ko nɛ haa nɛ kake peemi hiɔ nihi a kpɛti.”

ANƐ KPAKPA PEEMI PƐ JI NƆ́ NƐ HE HIA LO?

Nyumu ko nɛ e fĩ hemi kɛ yemi futumi se wawɛɛ nɛ a tsɛɛ lɛ ke Dalai Lama de ke: “Suɔmi, mi mi sami, kɛ yayami kɛ pami ji níhi titli nɛ jamihi nɛ a he biɛ ɔ tuɔ he munyu.” E de hu ke: “E sa nɛ wa je su nɛ ɔmɛ kpo ngɛ wa daa ligbi si himi mi.”

Ngɛ anɔkuale mi ɔ, suɔmi, mi mi sami, kɛ yayami kɛ pami ji su komɛ nɛ a he hia wawɛɛ nitsɛ. Yesu de ngɛ nɔ́ nɛ nihi tsɛɛ ke Mlaa Kpakpa a mi ke: “Nɔ́ tsuaa nɔ́ nɛ nyɛ hlaa kaa nihi nɛ pee ha nyɛ ɔ, nyɛ hu nyɛɛ pee jã nɔuu ngɔ ha mɛ.” (Mateo 7:12) Se anɛ nɔ́ nɛ hemi kɛ yemi nitsɛnitsɛ tsɔɔ kɛkɛ ji, nɛ a maa pee ní kpakpahi lo?

Bɔfo Paulo de ngɛ nihi fuu nɛ a siɔ a gugue kaa a ngɛ Mawu sɔmɔe ɔ a he ke: “I ngɛ odase ngɛ he kaa a hɛ dɔɔ wawɛɛ ngɛ Mawu he, se blɔ nɔ nɛ a kɛ ma ja lɛ ɔ nɛ a li.” Mɛni ji a nyagba? Lɔ ɔ ji “blɔ nɔ nɛ Mawu guu kɛ buu nɔ nɔ nɛ da a, a li.” Paulo tsɔɔ hu kaa “a hlaa kaa a ma wo mɛ nitsɛmɛ a blɔ.” (Roma Bi 10:2, 3) Akɛnɛ a li nɔ́ nɛ Mawu suɔ kaa a pee he je ɔ, a hemi kɛ yemi ɔ pee yaka.—Mateo 7:21-23.

NƆ́ NƐ BAIBLO Ɔ DE NGƐ HEMI KƐ YEMI FUTUMI HE

Yesu de ke: “A gbaa ni nɛmɛ nɛ kpataa pɛ.” (Mateo 5:9) Yesu peeɔ níhi nɛ e deɔ nihi ke a pee ɔ. E kɛ e he wui basabasa peemi mi, mohu ɔ, e fiɛɛ tue mi jɔmi sɛ gbi ɔ kɛ ha nihi tsuo. (Mateo 26:52) Suɔmi hi nihi nɛ a kplɛɛ e munyu ɔ nɔ ɔ a kpɛti. (Kolose Bi 3:14) Se anɛ oti kɛkɛ nɛ Yesu kɛ ma e hɛ mi ji kaa e ma dla ni slɔɔtoslɔɔtohi a kpɛti konɛ tue mi jɔmi nɛ hi a kpɛti lo? Anɛ e kɛ nihi nɛ a ngɛ jami kpahi a mi ɔ pee kake kɛ ja Mawu lo?

Farisi bi ɔmɛ kɛ Saduki bi ɔmɛ a jami nya dali ɔmɛ sume Yesu sane kulaa. A hla po kaa a maa gbe lɛ. Kɛ Yesu pee e ní ha kɛɛ? Yesu de e kaseli ɔmɛ ke: “Nyɛ ko hao nyɛ he ngɛ a he kulaa! Hɛ yuyuili nɛ ngɛ hɛ yuyuili blɔ tsɔɔe ji mɛ.” (Mateo 15:14) Yesu kɛ mɛ bla we kɛ ja Mawu.

Pee se ɔ, a to Kristofohi asafo ko sisi ngɛ Korinto ngɛ Hela. Lejɛ ɔ ji he ko nɛ jamihi blaa kɛ peeɔ níhi ngɛ. Kɛ Kristofohi nɛ a hi lejɛ ɔ pee a ní ha kɛɛ? Bɔfo Paulo ngma ya ha mɛ ke: “Nyɛɛ kɛ ni nɛmɛ nɛ he we yi ɔ kó bɔ.” Mɛni he je? Paulo de mɛ ke: “Kɛ Kristo kɛ Abosiami maa ye kɛɛ? Nɔ nɛ heɔ yeɔ ɔ, mɛni mi e kɛ nɔ nɛ he we yi ɔ ngɛ?” Lɔ ɔ se ɔ, e wo mɛ ga ke: “Nyɛɛ je a kpɛti, nɛ nyɛ tsɔ nyɛ he kɛ je a he.”—2 Korinto Bi 6:14, 15, 17.

E ngɛ heii kaa Baiblo ɔ tu munyu kɛ si hemi kɛ yemi futumi. Se eko ɔ, o ma bi ke: ‘Lɛɛ mɛni blɔ nɔ kake peemi nitsɛnitsɛ maa gu kɛ ba mɔ?’

KAKE PEEMI NITSƐNITSƐ

Mahi kakaaka 15 lɛ a bla kɛ pee hiɔwe níhi a mi hyɛmi lɛ ko (The International Space Station) nɛ bɔleɔ zugba a nɛ. Anɛ o susu kaa ke ma nɛ ɔmɛ kɛ a he kpa we gbi ngɛ bɔ nɛ e sa kaa a pee klama nɛ ɔ ha a he ɔ, a ko nyɛ ko pee lo?

Jã ji bɔ nɛ e ngɛ ngɛ hemi kɛ yemi futumi kuuhi nɛ a ngɛ mwɔnɛ ɔ a he. E ngɛ mi kaa a fiɛɛɔ kaa nihi nɛ a pee kake nɛ a bu a sibi mohu lɛɛ, se a kɛ a he kpa we gbi ngɛ nɔ́ nɛ ma ha nɛ a ná hemi kɛ yemi ɔ he. Enɛ ɔ ha nɛ loloolo ɔ, je mi bami kɛ jami mi tsɔɔmi he sanehi gbaa nihi a mi.

Mawu sisi tomi mlaahi lɛ ngɛ Baiblo ɔ mi. Enɛ ɔ he ɔ, waa kɛ níhi nɛ Baiblo ɔ deɔ ɔ ma nyɛ ma tsu ní. Nihi nɛ a kɛ tsu ní ngɛ a si himi mi ɔ hyɛ we nɔ hɛ mi hu, nɛ a kpa nihi nɛ a ngɛ jami kpahi a mi ɔ a he juɛmi yaya nami. Mawu gba kɛ fɔ si ke: ‘Ma ha je ma amɛ gbi nɛ he tsɔ. Mɛ tsuo a maa fa kue ha imi Yehowa, nɛ a maa pee a nya kake kɛ sɔmɔ mi.’ “Gbi nɛ he tsɔ” ɔ ji Mawu sisi tomi mlaahi nɛ kɔɔ jami he. Gbi nɛ ɔ haa nɛ kake peemi hiɔ nihi a kpɛti.—Zefania 3:9; Yesaya 2:2-4.

Yehowa Odasefohi ngɛ mo nine fɔe nɛ o ya Matsɛ Yemi Asa nɛ e kɛ he nɛ o ngɛ ɔ kɛ we ɔ nɔ, konɛ mo nitsɛ o ya na bɔ nɛ tue mi jɔmi kɛ kake peemi nitsɛnitsɛ ngɛ a kpɛti ha a.—La 133:1.